Pagpasanag Ti Jesus Tung Ni Nicodemo Kung Ya Pa Ag̓ari Malg̓ud Tung Palaksu Yang Paggaraëmën Yang Dios (3:1-15)
3
Numanyan,
may sasang taung nag̓aranan tung ni Nicodemo.
Tanya sasang kinasakpan yang grupung nag̓aranan tung mga Pariseo ig sasa kang pagpakigmaëpët tung nasyun yamën ang mga Judio.
2 May sasang law̓iia ang minangay ra tung ni Jesus.
Mag̓aning tung anya,
“Rabbi,
nag̓askëan da yamën ang yaway sasang manigtulduk ang tinuw̓ul yang Dios ang magpasanag tung yamën.
Kipurki anday mapagpalua ta mga pruibang mga maning tiang nag̓abuat mu kung indi nag̓apakigsasaan yang Dios.”
Jesus speaks with Nicodemus (Juan 3:1-21)
3 Mag̓aning ti Jesus ang minlës,
“Iugtulu tung nuyu yang kamatuuran,
yang sasang tau,
kung indi ipanganang umanb,
indi ëngëd maimung maispirinsiaan na yang paggaraëmën yang Dios tung anya.”
4 Mag̓aning ti Nicodemong minlës,
“Ya pa ag̓aring ipanganang uman yang sasang taung maëpët da?
Ayw̓a,
maklëd pa kaya ang uman tung tian yang nanay na ang para ipangana na sing uman?”
5 Mag̓aning ka ti Jesus ang nagtuw̓al,
“Iugtulu tung nuyu yang kamatuuran,
kung tinu pay indi ipanganang uman ëkël tung wai ig tung pag̓urubraën yang Espiritu Santo tung kinaisipan nac,
indi ëngëd maimung malg̓ud tung paggaraëmën yang Dios.
6 Kipurki kung tinu pay ipinangana ta tau,
yang pagkatau na tung tau ka manliit.
Katulad ka tung sasang taung ipinanganang uman yang Espiritu Santong linimpiuan,
may baklu ra kang pagkatau nang ipinaëyang da yang Dios tung anya.
7 India ilëm mabërëng tung inaningung atia tung nuyu.
Yang dapat mainabu tung numyung tanan ang ipanganaamu rang uman.
8 Tëlëngan mu ra ilëm yang palët.
Kung ay pay gustu nang mëyëp,
duun da ilëm mëyëp.
Yang agrut na magngël mu,
piru indi mu maskëan kung ay pa manliit kung ay pa manganing.
Yang pisan ay matinlung pananglitanu tung sasang taung ipinangana ra yang Espiritu Santo.
Ay kung unu pay natëngëran na ang yang taung atia nag̓uman da,
indi ëngëd masangkad ta tau.
Piru mabistu ra ëngëd tung pinakaw̓ut yang inubra na tung pagpangabui yang taung atia.”
9 Mag̓aning si ti Nicodemong minlës,
“Ya ra ilëm ag̓ari kaya?”
10 Mag̓aning ti Jesus ang nagtuw̓al,
“Yaway sasang nag̓abantug ang maayën ang magturuldukun tung mga masigkanasyun tang mga Israel,
piru naa pala yang mga bag̓ay ang naa,
indi mu nag̓aintindiand.
11 Iugtulu tung nuyu yang kamatuuran,
yang nag̓ipagpakaw̓ut yamën nag̓aintindian kang lag̓i yamën.
Yang naita yamën mismu,
ya ray nag̓ipagpaingmatuud yamën,
piru ay pa w̓a?
Indi mi ra ka ilëm agpanangdën yang nag̓ipagpaingmatuud yamën.
12 Kung indiaw ra ka ilëm panangdën ming pagpaingmatuud natëtëngëd tung nag̓ainabu taa tung kaliw̓utan ang naa ang katulad ka tung nag̓ianingung atia nungayna,
ya pa ag̓aring panangdënaw pa numyu kung magpaingmatuuraw pa natëtëngëd tung nag̓ainabu duun tung langit?
13 Andang pisan ay taung nag̓apagpaabwat duun tung langit ang para maskëan na ra rin kung unu pay pagkarainabu duun.
Piru ta yuung pag̓aningën ang Maninga Tau ultimu ra ilëm yuuy kabisadu tung mga bag̓ay ang atia,
ay duunaw ka man tung langit nanliit ang nagparanëk taa.
14-15 Dispuis,
yang pambungunu pariu tung iraw ang atiing saway ang itinakën ni Moises tung ayu ang pagkatapus ya ag̓ipaabwatay duun tung banwang kapase.
Bilang yuung pag̓aningën ang Maninga Tau,
yuu kay ipaabwatayf ug̓ud kung tinu pay magtalig yang sadili na tung yëën,
indi ra magdayun yang pagkablag na tung Dios,
kung indi,
asan da kang lag̓i nga paëyangayu ta ipagpangabui nang baklu ang anday pagtapusan na,”
mag̓aning ti Jesus.
Yang Pagbadbad Yang May Sulat Natëtëngëd Tung Pinag̓aning Ni Jesus Tung Ni Nicodemo (3:16-21)
16 Natëtëngëd ang durung pisan agkalutuk yang gëgmang ibinuluntad yang Dios tung yatën ang mga tau,
mismu yang pag̓aningën nang Ana nang inding pisan mapakdingan,
ya ray ipinaangay na taa tung kaliw̓utan ang naa bilang maning pa tung sasang dasag.
Ya ray binuat na ug̓ud kung tinu pay magtalig yang sadili na tung anya,
indi ra magdayun yang pagkablag na tung Dios ang asta tung sampa,
kung indi,
asan da kang lag̓i nga paëyangay na ta ipagpangabui nang baklu ang anday pagtapusan na.
17 Kipurki yang ipinagpangay yang Dios tung pag̓aningën nang Ana Na taa tung kaliw̓utan ang naa,
bëlag̓an ang mag̓aning ang para ya ray magsintinsia tung mga tau tung kalainan,
ang indi,
ug̓ud ëkël tung anya magkaratapnay ra tanirang ipampalibri tung sintinsiang atia.
18 Kung tinu pay magtalig yang sadili na tung anya,
indi ra ka ëngëd sakpën yang sintinsiang atia.
Piru kung tinu pay indi malëlyag ang magtalig tung anya,
katimbang nang pininig na rang lag̓i yang sadili na ang tanya sintinsiaan da ilëm yang Dios tung kalainan.
Ay indi na ra itinalig yang sadili na tung pag̓aningën ang “Ana Yang Dios” ang indi mapasiring-siringan.
19 Ay yang mga maning tiang tau,
maning taa yang palaksu yang pagpapinig nira tung mga sadili nira.
Ang patalungaën tung maning pa tung kaas ang naang nagkaw̓ut da tung kaliw̓utan,
indi malëlyag.
Ang indi,
yang makiklëp ya pa ka ëngëd ay pagmamaalën nira ay natëtëngëd tung pagburuatën nirang mga malain.
20 Ay natural,
kung tinu pay pagpadayun tung pagburuatën nang anday kuinta,
pag̓alikayan na ta mupia yang kaas.
Indi ra ka tia magpalëngët tung kaas,
nusias lumbaw ra yang mga buat-buat nang malalain.
21 Piru kung tinu pay pagpadayun tung pag̓urusuyun na tung nag̓akdëkan nang magkatama,
yay pagpalëngët tung kaas ug̓ud mabistu ra ang tanya nag̓apakigsasaan da yang Dios tung mga buat-buat na.
Yang Nag̓ipagpaingmatuud Ni Juan Ang Manigbënyag Natëtëngëd Tung Ni Jesus (3:22-30)
22 Taa numanyan,
ti Jesus,
dayun dang nagpanaw ang minangay duun tung sinakëpan yang Judea,
kasiraanami ra kang nag̓apangugyatan na.
Duunami ra nag̓urugpu ta pira pang kaldaw ang nunut da ka yang pagbërënyag̓ën na tung mga tau duun.
John testifies about Jesus (Juan 3:22-36)
23 Taa,
simanyan duun tung Enon ang alëngët tung Salim,
ti Juan ang naa,
pagbërënyag̓ën da ka tung mga tau,
ay bastanting wai duun.
Purisu sigi-sigi ra yang pag̓arangayën yang mga tau duun tung anyang pamagpabënyag.
24 Yang uras ang atii ti Juan indi pa nag̓akalabus.
25 Numanyan yang dumang nag̓apangugyatan ni Juan namagpakigsug̓a ra tung sasang masigka Judio nira natëtëngëd tung mga patakaran ang nag̓usuyun ang para mapunasan da yang mga tau ta kasalanan nira.
26 Pagkatapus namagdangëp da tung ni Juan ang namagkig̓a tung anyang mag̓aning,
“Rabbi,
nag̓adëmdëman mung atiing duuna pa rin tung duw̓ali yang Jordan,
may sasang aruman mung ipinagpailala mu tung mga tau?
Naa pala,
tanya unu pagbërënyag̓ën da ka!
Yang kadaklan ang mga tau tung anya ra unu agpamagdangëp!”
27 Mag̓aning ti Juan ang nagtuw̓al,
“Ayw̓a,
nag̓askëan ta ra kang lag̓i ang maski tinu pa,
kung may dëngëg na,
ay tia pinakdulan da yang Dios.
28 Maski yamu mismu mapagsistigusamu ka tung pagkamatuud ang nag̓aningaw ra kang lag̓i ang bëlag̓anaw yang pag̓aningën ang Cristo,
ang indi,
yuu ilëm agtuw̓ulay yang Dios ang mag̓ing palaskaw na.
29 Kung alimbawa may kumbira,
yang laliing pangasawa ya ray may kasawa,
bëlag̓an yang ungkuy nang nagpaiwan-iwan tung kumbira na.
Ug̓aring,
yang ungkuy na,
kung magngël na ra nganing yang nangasawa ang pagbaw̓alitaën ang matinlu ra ka atiing pagkakasawaan nirang durua,
pag̓ampayan ka ta kasadyaan nang duru ay durug tinlu yang pinakaw̓ut yang pagpaiwan-iwan na.
Ya tia yay kaalimbawaan yamën ni Jesus.
Purisu simanyan agsadyaanaw ra ta duru tung nag̓ibalita ming atia tung yëën.
30 Kaministiran ang tanyay mapadëngëg̓an ang mas pa.
Piru ta yëën,
maskin maaranëk da yang kadëngëg̓anu.
Yang Nag̓iwaswas Yang May Sulat Natëtëngëd Tung Inaning Ni Juan Ang Atia Tung Mga Taung Nag̓apangugyatan Na (3:31-36)
31 “Yang duun liit tung abwat,
landaw tung tanan.
Yang taa liit tung kaliw̓utan,
tau ka ilëm ang tanëkanën.
Yang nag̓ianing na,
natëtëngëd ilëm tung mga bag̓ay taa tung kaliw̓utan.
Kapurisu yang duun liit tung langit landaw tung tanan.
32 Yang kumpurming naita na kag nagngël na duun ya ray nag̓ipagpaingmatuud na tung mga tau,
piru indi ra nag̓apauyunan ta kadaklan.
33 Ug̓aring kung tinu pay magpauyun tung nag̓ipagpaingmatuud na,
asan dag pagpailala ang yang Dios talagang matalig̓an nang magkërëng tung kumpurming pinangakuan na.
34 Kipurki yang tinuw̓ul yang Dios,
yay pagpakaw̓ut yang bitala na.
Ay tanya nag̓apatiniran yang Dios tung Espiritu Santo ang anday sukatan yang pagparakëtëlën na tung anya tung tanan ang mga pag̓urubraën na.
35 Ay ya pa ag̓ari,
tanyang pag̓aningën ang Ana nag̓agëgmaan ta duru yang pag̓aningën nang Ama na.
Purisu yang tanan ang bag̓ay ipinabtang na tung pudir na.
36 Kapurisu kung tinu pay pagtalig tung anyang pag̓aningën ang Ana,
may baklu rang pagkatau na ang ya ray pagnatisan nang asta tung sampa.
Piru kung tinu pay indi magpalalang tung anya,
indi na ra mabag̓as yang baklung pagkatau na rin,
ang indi,
yay pag̓inëtëg̓an yang kasisilag̓ën yang Dios.”