Yang librung naa, katuglayunan yang sam bilug ang librung isinulat ni Lucas natëtëngëd tung ni Jesu-Cristo (1:1-3). Yang sinikad nang nagsulat, ay gustu nang magbaw̓alitaën natëtëngëd tung mga binuat-buatan yang mga apustul ang tinuw̓ul ni Jesus ang mamangërëngan tung anya. Ay ëkël tung pagpaktël yang Espiritu Santo tung nira, nagsarambung da yang Matinlung Balita mag̓impisa duun tung Jerusalem, magdasun tung intirung sinakëpan yang Judea, pati duun tung sinakëpan yang Samaria ang asta duun ëngëd tung mga kabiw̓init-binitan yang bilug ang kaliw̓utan (1:8). Gustu ka ni Lucas ang magpasanag ëngëd kung ya pa ag̓ari ang pati mga taung tag̓a duma-rumang mga nasyun ang bëlag̓an mga Judio nangaugpu ra tung mga tumatalig ang mga Judio ang tanirang tanan parariu rang binuat yang Dios ang mga tauan nang sadili. Ay atii kanay durug dakul yang pinag̓apartian na tung dating pag̓irintindiën yang mga tau ang yang mga Judio ilëm ay mga tauan na.