Pagpailala Ra Ti Jesus Tung Mga Taung Nag̓apangugyatan Na Duun Tung Bakayan (21:1-14)
21
Taa numanyan tung pira pang kaldaw,
ti Jesus nagpaita si tung yamën ang nag̓apangugyatan na duun tung bakayan yang lalagunang atiang paggug̓uuyan ang Tiberias.
Maning taa yang pagpaita na tung yamën.
2 Yami duun tung uras ang atii,
ya ra taa ti Simon Pedro,
ti Tomas ang atiang kaisan nag̓aguuyan yamën tung ni Kampi,
ti Natanael ang atiang tag̓a Cana ang ya kag lulg̓ud tung sinakëpan yang Galilea,
yami pang duruang mag̓ari ang mga ana ni Zebedeo,
asta yang mga kaarumanan pa yamën ang durua nga tauan.
Jesus at the Sea of Galilee (Juan 21:1-25)
3 Mag̓aning ti Simon Pedro tung yamën,
“Mag̓intraaw si tung pag̓ian.”
Mag̓aningami kang nagtimalës,
“Siraita si ka.”
Kapurisu numanyan dayunami rang nagsaay tung balangay.
Piru tung magdamal ang atii,
andang pisan ay naëklan yamën.
4 Taa numanyan,
atiing pandiklat da yang sag̓iid,
ti Jesus duun dag këkdëng tung bakayan.
Piru indi ilëm nailala yamën.
5 Simanyan kinëndalanami ra anyang inaning,
“Ta,
mga mamula,
naëkëlamu ra?”
Mag̓aningami kang tuminuw̓al,
“Bëë,
andang pisan!”
6 Mag̓aning si tung yamën,
“Ala,
asanamu ra manaktak tung ampir tung tuu mi.
Atia maëkëlamu ra,”
mag̓aning.
Kapurisu ta yamën,
nanaktakami ra ka man tung ampir tung tuu.
Pagtaktak yamën,
pisan!
Indi ra kinayanan yamën ta batak,
yang kinadaramëlën yang mga ian ang atia!
7 Kapurisu ta yëën ang alëngët ëngëd tung isip ni Jesus,
mag̓aningaw tung ni Pedro,
“Abëë,
Pedro,
ti Ginuu ta ra pala tii!”
Pagkadngël ni Simon Pedro ang ti Jesus da tii,
yang panlamig nang ya ra kang lag̓i ay linuas nang para anday sambër tung pag̓urubraën na,
ya ray inulambët na ang para tung paglanguy na,
indi ra mataktak yang aw̓ël nang atiang langkuy ang itinakwil na.
Pagkatapus dayun dang nagpakpang nagduul tung lambat ug̓ud indi ra manakbët.
8 Piru yaming kadaklan ang nag̓apangugyatan ni Jesus,
nagparanëkami ra ilëm tung bakayan ang yang lambat ang punuk da ta mga ian,
ya ra ilëm agguyuray yamën.
Ay bëlag̓anami alawid tung bakayan,
mga sang gatus da ilëm ang mitrus yang distansia na.
9 Numanyan tung paglampud yamën duun tung balangay,
may naita yamën ang apuy tung takas ang nag̓apagkalan ta kuring.
May mga ian ang nag̓ikiaw asan ig may tinapay pa ang nag̓ipakinit.
10 Mag̓aning ti Jesus tung yamën,
“Ala,
iëklay kanay ta pira pang bilug asan tung baklung nadëëp mi,”
mag̓aning.
11 Purisu numanyan baklu ra nagpatakas ti Pedrong pagguyud yang lambat ang atiang punuk ang pisan ta darakulung mga ian.
Duminangat da tung sang gatus may limang puluk may tulung bilug yang kinadakël nira (153).
Piru maskin durug dakël yang mga ian ang atia,
indi ka nalasik yang lambat.
12 Mag̓aning si ti Jesus tung yamën,
“Ala,
taniita,
mag̓iramalita ra,”
mag̓aning.
Numanyan tung yamën,
anda ray nagpangaas ang nagtalimaan tung anya kung tinu pa tanya,
ay nailala ra yamën ang talagang ti Ginuung Jesus.
13 Numanyan nagpalëngët da ti Jesus tung apuy ang namisik yang tinapay ang ya ra kay ipinamakdul-pakdul na tung yamën asta mga ian.
14 Atii ya ray pangyaklung bisis yang pagpaita ni Jesus tung yamën ang nag̓apangugyatan na,
pagkatapus nabui si kang uman.
Nag̓apaulikan Ni Jesus Yang Pagputulan Nirang Durua Ni Pedro (21:15-19)
15 Taa numanyan,
pagkatapus yamën ta pag̓iramal,
nagbugnu ra ti Jesus tung ni Pedrong mag̓aning,
“Simon,
ana ni Juan,
talagang nag̓agëgmaanaw w̓asu nuyung landaw pa tung mga kaarumanan mung naa?”
Mag̓aning ti Pedrong minlës,
“Ëë,
Ginuu,
yaway nag̓akdëk ang nag̓alëlyag̓ana yëën.”
Mag̓aning si ti Jesus tung anyang nagtimalës,
“Buinu,
kung maning tii,
padag̓ën-dag̓ënan mu ta maayën yang mga tauanu ang yay maning pa tung mga karniruu,”
mag̓aning.
16 Atii,
madua rang aningën ni Jesus ang,
“Simon,
ana ni Juan,
nag̓agëgmaanaw w̓asu nuyu?”
Mag̓aning ti Pedrong minlës,
“Ëë,
Ginuu,
yaway nag̓akdëk ang nag̓alëlyag̓ana yëën.”
Mag̓aning si ti Jesus ang minlës,
“Buinu,
asikasuën mu ta mupia yang mga tauanu.”
17 Atii,
maklu rang pasulitan ni Jesus ang inaning,
“Simon,
ana ni Juan,
nag̓alëlyag̓anaw pa ka w̓asu nuyu?”
maning.
Atii,
inampayan da ti Pedro ta kapungaw nang duru natëtëngëd maklu rang pasigwarën ni Jesus ang maskin tung kalëlyag̓an na ra ilëm kung may asan pa ka.
Mag̓aning ti Pedrong nagtuw̓al,
“Ginuu,
yaway nag̓askë yang tanan.
Purisu nag̓askëan mu ang nag̓alëlyag̓ana yëën.”
Mag̓aning si ti Jesus ang minlës,
“Tay puis,
padag̓ën-dag̓ënan mu ta maayën yang mga tauanu.
18 Iugtulu tung nuyu yang kamatuuran,
atiing kaw̓ataana pa rin,
yaway pagtagkës yang akës mu,
pamasyara ka tung kumpurming nag̓alëlyag̓an mung pasyaran.
Piru,
kung maëpëta ra nganing,
mandëpa ra yang kalima mu,
duma ray magtagkës tung nuyu ang ëklana ra ka anya duun tung anday gustu mung angayan,”
mag̓aning.
19 (Yuung ti Juan ang nagsulat,
may gustuung isalëët taa.
Napagbitala ti Jesus ta maning tia tung ni Pedro,
ay asan da nga pasapliray na kung unu pang kamatayënay ang sampëtan na,
ang asan da ka nga padëngëg̓ay na yang Dios.)
Numanyan,
dayun dang sinugpatan ni Jesus yang bitala na tung ni Pedro ang mag̓aning,
“Mag̓usuya ra ilëm tung yëën ta magpaluyut,”
mag̓aning.
Gustu Ni Pedro Ang Papagkumpalarën Na Yang Panampëtan Na May Yang Panampëtan Ni Juan (20:20-24)
20 Numanyan tung pagbëdlëng ni Pedro,
anday dumang naita nang pagdasun tung nira ni Jesus,
yuu ra ang alëngët ëngëd tung isip na ang yuu ka man mismu yang nagpataliling tung dëbdëb na atiing pagsararuan yamën ang tanan ang nagtalimaanaw ra tung anya kung tinu pay pagtraidur tung anyaa.
21 Numanyan,
pagkaita ni Pedro tung yëën,
dayunaw ra anyang itinalimaan tung ni Jesus ang mag̓aning,
“Ay yang aruman tang naa,
Ginuu,
unu pay anyang mapasaran?”
22 Mag̓aning ka ti Jesus ang minlës,
“Ayw̓a,
kung alimbawa gustuu ang tanya magnatis ang asta maglëkataw ra ilëm taa,
unu pa pay kalalabtën na asan tung nuyu?
Basta ta yawa,
mag̓usuya ra ilëm tung yëën ta magpaluyut,”
mag̓aning duun tung anya.
23 Purisu nabalita-w̓alita ra tung mga kaputulan ta ang yuu unu indiaw ra mapatay.
Piru indi nag̓aning ti Jesus tung ni Pedro ang indiaw ra mapatay,
kung indi,
yang inaning na,
kung gustu na unu ang yuu magnatis ang asta tung ipaglëkat na,
anda unu ay kalalabtën na asan tung ni Pedro.
24 Anday dumang pagpaingmatuud tung numyu natëtëngëd tung mga bag̓ay ang atia,
kung indi,
yuung ti Juan ang sasa kang pinangugyatan ni Ginuung Jesus ig yuu kay nagsulat yang tanan ang atia.
Dispuis yaming tanan tani,
nag̓askëan da yamën ang talagang matuud yang nag̓ipagpaingmatuurung atia tung numyu.
Pagpailala Ra Yang Nagsulat Kung Ya Pa Ag̓ari Yang Palaksu Yang Pagsurulatën Na (21:25)
25 Tung bag̓ay dakëlë pa ka rin ang mga pruibang makabëw̓ërëng ang nagkarabuat ni Jesus ang indi ra ka man isinulatu.
Ay sipurki kung alimbawa sulipëtënu pang sasa may sasa,
siguru,
maskin yang bilug ang kaliw̓utan,
kulang ang pabtangan tung mga librung magkarasulatu.