Natëtëngëd Tung Pagkabui Si Kang Uman Ni Jesus Ang Nagbungkaras Tung Yaklung Kaldaw (20:1-10)
20
Taa numanyan,
pagkaw̓ut yang primirung kaldaw tung sëlëd sang linggu,
bilang kaldaw ta Linggu,
atiing law̓ii-law̓ii pa,
naang ti Mariang naang sam bilug ang tag̓a Magdala,
ya ray minangay duun tung lëyang ang atiing pinanlug̓uran tung tinanguni ni Jesus.
Pagkaw̓ut na duun,
naita na yang batung atiang itinakëp din tung purta ang nakuat da.
2 Pagkaita na,
diritsyu rang nanlaksu ang minangay duun tung ni Simon Pedro may tung yëën kang alëngët ëngëd tung kinaisipan ni Jesus.
Pagkaw̓ut na tung yamën,
dayun dang nagbugnu tung yamën ang mag̓aning,
“Ingkëlan da tung lëyang yang tinanguni ni Ginuu ta!
Indi ilëm nag̓askëan yamën kung ay ra ipabtangay nira!”
ag̓aaning.
3-4 Pagkagngël yamën tia,
dayunami rang nanlaksu ang nag̓angay duun tung lëyang.
Tukawaw ra kang nakaw̓ut ay madasig̓aw tung arumanung nanlaksu.
5 Pagkaw̓utu,
dayunu rang sinirib yang tung kaklëran na.
Yang nasiriw̓u duun,
ya ra ilëm yang mga aw̓ël ang atiang ipinagsaw̓ëd-saw̓ëd tung tinanguni na ang ya ra ilëm agbëbtang asan.
Piru indiaw nagpaklëd.
6 Simanyan pagkaw̓ut ni Simon Pedro ang nauri tung yëën,
anday dakël-dakël,
diritsyu rang nagpaklëd tung lëyang.
Naita na ra ka yang mga aw̓ël ang atia ang ya ra ilëg bëbtang asan.
7 Asta yang panyung atiang ipinutus tung kulu ni Jesus,
asan ka yag titipig.
Ug̓aring ag̓ës tung mga aw̓ël ang atiang duma ang isinaw̓ëd-saw̓ëd tung tinanguni na.
8 Pagkatapus yuung natkaw duun tung lëyang,
nagpadasunaw ra ilëm tung ni Pedrong nagpaklëd.
Pagkaitaw yang mga aw̓ël ang nagkamaning da ta maning tia,
duunaw ra nanangëd ang ti Jesus nagbungkaras da ka man.
9 Duunaw ra nanangëd maskin indi pa nag̓askëan yamën ang may nabtang tung kasulatan ang tanya unu dapat ang mabui si kang umana.
10 Pagkatapus tia,
dayunami rang minulik.
Pagpailala Ti Jesus Tung Ni Mariang Tag̓a Magdala (20:11-18)
11 Ug̓aring naang ti Mariang naa,
ya ray nagbalik duun tung lëyang ang nasubli tung yamën.
Duun agkëkdëng tung lua ang pagtarangitën.
Yang pagtarangitën na,
ya kay pagsirib-sirib na tung kaklëran yang lëyang.
12 Unaw̓is ya ray nasirib na yang durua ngangilan ang pamag̓aw̓ël ta makukulit.
Kumarungan tung pinagpalw̓ug̓an tung tinanguni ni Jesus,
sam bilug ampir tung kuluwan,
sam bilug ampir tung kakayan.
13 Numanyan,
ya ray nansibugnu tung anyang mag̓aning,
“Ba tia,
nini,
unu ray pagtangitan mu?”
Mag̓aning ti Mariang minlës,
“Yang Ginuuu,
ingkëlan da.
Indi ilëm nag̓aintindianu kung ay ra ipabtangay!”
14 Pagkaaning na tia,
dayun dang nagbëdlëng.
May sasang taung naita nang yag këkdëng asan,
piru indi na ra nailala ang atia pala ya ra ti Jesus.
15 Pagkatapus ti Jesus ya si ay nagbugnu tung anyang nagtalimaan ang mag̓aning,
“Ba tia,
nini,
unu ray pagtangitan mu?
Tinu pay nag̓asagyap mu?”
mag̓aning.
Kalaum ni Maria,
ya ra yang manig̓asikasu tung kaluakan.
Purisu dayun sing nagbitala tung anyang mag̓aning,
“Kung yaway nangkël tung anya,
kung maimu ilëm tung nuyu,
ipakdëk mu ra tung yëën kung ay ra ipabtangay mu ug̓ud maëklanu,”
mag̓aning.
16 Mag̓aning ti Jesus ang guminuuy tung aran na,
“Maria!”
Pagkadngël na yang aran na,
dayun sing nanalunga tung anyang mag̓aning,
“Rabboni!”
(tung bitala yamën ang Hinebreo,
ya ray pangguuy yamën tung sasang manigtulduk ang nag̓agalang yamën.)
17 Mag̓aning ti Jesus ang minlës,
“Maria,
ustu ra tiang pagpërëg̓ësën mu tung yëën ay indiaw pa nag̓apaabwat duun tung ni Ama.
Maayën pa,
angayën mu ra kanay yang mga putulu.
Aningën mu ang magpaabwataw tung Amaw ang ya ra kay nagyaring Ama nira.
Magbalikaw tung Diosu ang ya ra kay Dios nira,”
mag̓aning.
18 Kapurisu ti Maria dayun dang nag̓angay tung yamën ang nag̓apangugyatan ni Jesus ang nagbaw̓alitaën da tung yamën ang naita na ra unu ti Ginuu.
Dayunami ra kang pinakdëk na kung unu pay itinuyun na tung anya.
Pagpailala Ra Ti Jesus Tung Mga Taung Nag̓apangugyatan Na (20:19-23)
19 Taa numanyan,
atiing law̓ii ra tung kaldaw kang atiing Linggu,
yaming nag̓apangugyatan ni Jesus pagsaragpunami ra tung sasang balay ang yang mga purta ginakutan da yamën ta mupia natëtëngëd tung ëlëd yamën tung mga pamagpakigmaëpët.
Numanyan inali rang lumimput ti Jesus ang nagkërëng tung pinagtaralungaan yamën ang mag̓aning tung yamën,
“Paëyanganamu ra yang Dios ta paglimënganan yang mga isip mi,”
mag̓aning.
Jesus appears to the disciples (Juan 20:19-31)
20 Pagkaaning na tia,
dayun dang nagpaita tung yamën yang mga ulat tung pursu na may tung talang na.
Duunami ra ngampayay ta kasadyaan yamën ang duru tung pagkaita yamën tung ni Ginuu.
21 Utru si,
mag̓aning si tung yamën,
“Paëyanganamu ra yang Dios ta paglimëngan yang mga isip mi.
Katulad ka tung yëën ang tinuw̓ulaw ni Amang magpaingmatuud tung mga tau natëtëngëd tung anya,
yamu ya ka.
Tuw̓ulunamu ra ka yëën ang magpaingmatuud natëtëngëd tung yëën.”
22 Pagkaaning na tia,
dayunami rang inunlaw̓an nang inaning,
“Atia ra,
risibiën mi ra yang Espiritu Santo.
23 Kung tinu pay pakaw̓utan mi yang Matinlung Balitang naa natëtëngëd tung yëën ang pagkatapus manangëd dang magtalig yang sadili na tung yëën,
may katëngdanan ming magdiklara tung anya ang talagang pinatawad da ka man yang Dios tung mga kasalanan na.
Piru kung tinu pay indi ra manangëd,
may katëngdanan mi kang magdiklara tung anya ang indi pa nag̓apatawad yang Dios tung mga kasalanan na,”
mag̓aning tung yamën.
Pagdiskumpiar Da Rin Ti Tomas Ang Ti Jesus Nagbungkaras Da (20:24-29)
24 Taa numanyan,
tung uras ang atiing pagpailala ni Jesus tung yamën ang nag̓apangugyatan nang dati,
anda asan ti Tomas ang yay aruman yamën ang sam bilug ang nag̓apapuanggaan yamën tung ni Kampi.
25 Simanyan,
pag̓irita yamën,
binalitaan da yamën ang,
“Tomas,
naita ra yamën ti Ginuu ta!”
Mag̓aning tanyang minlës,
“Bakluaw ra manangëd tia,
kung naitaw ra yang pinanawan yang mga lansang tung pursu na,
kag dinëënan ta tulduku yang ulat na,
asta yang talang nang sinakëp yang bangkaw,
dinëënanu ra ka,”
mag̓aning duun tung yamën.
26 Taa numanyan,
kaw̓utun si yang kaldaw ang Linggu,
yaming nag̓apangugyatan ni Jesus ang dati pagsaragpunami si tung balay ang atii,
kasiraanami ra ka ni Tomas.
Maskin siradu yang mga purta na,
inali sing lumimput ti Jesus ang nagkërëng tung pinagtaralungaan yamën.
Mag̓aning tung yamën,
“Paëyanganamu ra yang Dios ta paglimëngan yang mga isip mi.”
27 Pagkatapus,
ti Tomas ang naa ya si ay binugnu nang inaning,
“Tomas,
idëën mu ra tani yang tulduk mu tung pinanawan yang lansang tung pursuu.
Ilalaën mu ra kung ninu pang pursuay taa.
Idëën mu ka yang kalima mu tani tung talangu.
Ustu ra tiang pagdiskumpiar mu!
Manangëra ra.”
28 Mag̓aning ti Tomas ang minlës,
“Yawa ra yang Ginuuu ang may kalalangan tung yëën,
yawa ra yang Diosung magtutuuanu!”
29 Mag̓aning ti Jesus tung anya,
“Naa pala,
baklua ra manangëd kung sinakëpaw ra ta mata mu.
Durung pisan agkasadya yang taung manangëd maskin indiaw nag̓aita na,”
mag̓aning ti Jesus.
Yang Pag̓asikad Ni Juan Ang Pagsulat (20:30-31)
30 Dakëlë pang mga pruibang makabëw̓ërëng ang nagkarabuat ni Jesus ang nagkaraita yamën ang pinangugyatan na ang pagkatapus indi ra isinulatu tung librung atia.
31 Piru yang mga pruibang napabtang,
isinulatu ra nganing ug̓ud basi pa ra ilëm ang ta yamung pagbasa,
manangëramu ra ka ang ti Jesus ya ra ka man yang pag̓aningën ang Cristong pinilik yang Dios ang maggaraëmën,
bilang yang pag̓aningën nang Ana Na.
Kag yadwa pa ug̓ud tung pagtalig mi yang mga sadili mi tung anya,
asanamu ra ka magkatinir ta ipagpangabui ming baklu ang ya ra kay pagnatisan ming asta tung sampa.