Natëtëngëd Tung Pagkabui Si Kang Uman Ni Jesus Tung Yaklung Kaldaw (28:1-10)
28
Taa numanyan pagkataklib da yang kaldaw ang atiang nag̓ipamaënay ang baklu pa ilëm agpandiklat yang sag̓iid tung primirung kaldaw tung sëlëd yang sang linggu,
bilang kaldaw ta Linggua,
ti Mariang naang tag̓a Magdala may ti Maria kang naang sam bilug,
ya si kay namagbalik duun tung pinanlug̓uran tung ni Jesus ang para mamanginsapu si.
2 Numanyan may maktël ang yëgyëg ay natëtëngëd tung sasang angil ang tinuw̓ul yang Dios ang magparanëk duun ang pagkatapus dayun na rang pinalig̓id yang batung atiang itinakëp tung pinanlug̓uran ang ya ra ka man dayun ay pinamdungan na.
3 Durug kasusulaw ang tëlëngan ang maning pa tung kidlat,
pati yang aw̓ël na maninga sipsak agkakulit.
4 Numanyan yang mga sundalung atiang pamagbantay,
pagkaita nira tung anya,
durung pagpangërël nira natëtëngëd tung ëlëd nirang subra.
Pagkatapus dayun da ilëm ang namansitumba tung tanëk ang maninga patay ra.
5 Numanyan dayun dang nagbugnu yang angil tung mga baw̓ay ang atiang durua ang baklung nansikaw̓ut ang mag̓aning,
“Ta yamu,
indiamu ra mag̓ëlëd.
Nag̓askëanu ang yang nag̓adilëm mi taa ti Jesus ang ilinansang tung krus.
6 Anda ra taa ay pinabungkaras da yang Dios ang katulad ka tung inaning na.
Palëngëtamu ra kanay tani.
Tëlëngan mi w̓a yang pinagpalw̓ug̓an tung anya.
7 Pagkatapus pakaliamu rang mangay duun tung mga taung nag̓apangugyatan nang panganingën ang ti Jesus binwi si kang uman yang Dios ang pagkatapus numanyan nagtukaw ra tung nira duun tung Galilea.
Purisu duun da ka tanira mamanikad tung anyang para mag̓irita si ka tanira.
Buinu,
tandaan mi ta maayën yang itinuyunung atia tung numyu,”
mag̓aning.
8 Purisu numanyan namag̓apura ra ka man tanirang namagliit duun tung pinanlug̓uran tung ni Jesus.
Maskin pangëtab-këtaw̓an da ka man ta mupia natëtëngëd tung naita nirang atia,
piru durung pisan agkasadya yang mga isip nirang pamagralaksuan ang para magbaw̓alitaën da tung yamën ang pinangugyatan ni Jesus.
9 Numanyan tung pagralaksuën nira,
unaw̓is ti Jesus mismu ya ray nagpakigbag̓as tung nira.
Mag̓aning tung nirang nagbugnu,
“Mupiang kaldaw tung numyu!”
Pagkatapus dayun da nirang pinalëngtan ang pinggësan tung mga kakay na ang nunut da ka ta pagluud nira.
10 Mag̓aning ti Jesus ang nagpadayun yang bitala na tung nira,
“Indiamu ilëm mag̓ëlëd,
aa?
Angayën mi ra kanay yang mga putulung panganingën ang tanira kaministiran dang mamansiangay ra duun tung Galilea ug̓ud duunami ra mag̓irita,”
mag̓aning.
Yang Paëtad Yang Mga Pari May Yang Mga Pamagpakigmaëpët Tung Mga Diguardia Natëtëngëd Tung Nainabu Tung Tinanguni Ni Jesus (28:11-15)
11 Taa simanyan mintras pamansiangay ra yang mga baw̓ay ang atia duun tung mga tauan ni Jesus,
yang dumang mga sundalung naang pinapagbantay tung pinanlug̓uran tung ni Jesus,
ya ray nansibalik tung siudad ang namag̓ugtulun da tung mga paring atiang arabubwat ta katëngdanan natëtëngëd tung tanan ang nagkarainabu.
12-13 Numanyan dayun dang namagsaragpun tanira yang mga pamagpakigmaëpët ang namagparaig̓u.
Pagkatapus ta pagparaig̓u nira,
dayun dang namagpakdul ta bastanting kuarta tung mga sundalung atia ang nunut da ka ta paëtad tung nira ang mag̓aning,
“Kung tinu pay manginsapu tung numyu,
yamu ra ilëm ag̓aaning ang yang tinanguni na tinakaw ra ta law̓ii yang mga taung pinangugyatan na ang ya ray nangasubli tung ëlëk mi.
14 Kung alimbawa mabalitaan da ni Gubirnadur,
yami ray balang mangërëngan para tung numyu ang ta yamu anday kasalanan mi ug̓ud anda ray mabëgbëg̓an ta mga kulu mi para tung anya,”
mag̓aning.
15 Kapurisu pagrisibi nira yang kuarta,
inusuy ra ka man nira yang kumpurming ipinaëtad tung nirang namagbaw̓alitaën.
Purisu ang asta ra ilëm simanyan maning ka man tia yang nag̓ibalita-w̓alita yang mga masigka Judio ta.
Yang Panuw̓ul Ni Jesus Tung Mga Tauan Nang Mamagparakaw̓utun Yang Matinlung Balita Natëtëngëd Tung Anya (28:16-20)
16 Numanyan yaming pinangugyatan ni Jesus ang sam puluk may sasa,
nag̓angayami ra ka man tung Galilea,
duun tung sasang bukid ang ya ra kang lag̓i ay ipinaskë ni Jesus tung yamën tan taa pa ang para duunami ra magbarag̓as.
17 Pagkaita yamën tung anya,
maskin indi pa nag̓asigurung pisan yamën ang ya ra ka man ti Jesus,
dayunami ra ka ëngëd ang nagluud ang nagtuu tung anya.
18 Pagkatapus dayunami rang pinalëngtan nang inaning,
“Yang tanan ang bag̓ay mag̓ing tung kalangitan,
mag̓ing tung katanëkan man,
luw̓us dang ipinabtang yang Dios tung pudiru.
19 Purisu magliliw̓utunamung magparakaw̓utun natëtëngëd tung yëën tung tanan ang nasyun tung bilug ang kaliw̓utan ug̓ud mapakdulan da ta lugar nirang magsuku ra tung yëën ang para mag̓ing mga tauanu ka.
Kumpurming tinu pay magsuku tung yëën,
ya ray bënyag̓an mi ug̓ud asan da nga pananglitay na ang tanya nagpagaëm dang matuud tung ni Ama may tung yëën ang pag̓aningën nang Ana na may tung Espiritu Santo ang yami ra ka man ay may anya tung anya.
20 Dispuis panuldukan mi ka dayun ta mupia ang mamagtuman yang kumpurming itinuw̓ulu tung numyu.
Yang tanan ang atia ya ray prusigiran mi ay yuu mismu ay magpakigsasa tung numyung pirmi ang asta kaw̓utun da ilëm yang uras ang ipagtapus yang Dios tung panimpung naa,”
mag̓aning duun ti Jesus.