Natëtëngëd Tung Pagbungkaras Ni Jesus Tung Yaklung Kaldaw (24:1-12)
24
Numanyan pagkaw̓ut yang primirung kaldaw tung sëlëd sang linggua,
bilang kaldaw ta Linggu ang baklu pa ilëm agpandiklat yang sag̓iid,
namagbalik da tanira duun tung pinanlug̓uran tung ni Jesus.
Ëkël-ëkël nira tiing mga paamut ang pinagsimpan nira.
Lucas 24:1-13
2 Numanyan pagkaw̓ut nira duun tung lëyang,
naa pala abirtu ra.
Yang batung atiang pinasag̓ing bilug ang itinakëp tung purta na,
napalig̓id da tung sam bëlak.
3 Purisu numanyan diritsyu rang namampaklëd.
Pagkapaklëd nira,
indi ra nira naita yang tinanguni na.
4 Numanyan atiing nag̓aliwag̓an da ta durung pamag̓isip kung unu pa kayay linagpakan na,
pinainalian dang limput ta durua nga laliian ang pamag̓aw̓ël ta durug kasusulaw.
5 Numanyan kumus pinamalayan da ta ëlëd nirang duru,
indi nganing mangatëlëng ta ustu tung mga laliing atia.
Purisu ya ray nansibugnu tung nirang mag̓aning,
“Ay tia,
ayw̓at taa ra tung lëyang ang naa agsagyapay mi yang taung bui?
6-7 Anda ra taa,
kung indi,
pinabungkaras da yang Dios.
Dëmdëmën mi ra kanay yang inaning na tung numyu atiing duunamu pa rin tung Galilea ang tanya unung pag̓aningën ang Maninga Tau dapat unung iintriga tung pudir yang mga tag̓a dumang nasyun ang mga malalain ang mga tau,
ang pagkatapus ilansang ka unu nira tung krus ang imatayën ang pagkatapus tung yaklung kaldaw unu magbungkaras ka,”
ag̓aaning.
8 Atii,
baklu ra nga dëmdëmay nira yang pinag̓aning ni Jesus ang atii tung nira.
9 Numanyan diritsyu tanirang namansiliit duun tung lëyang ang namansibalik tung siudad.
Pagkaw̓ut nira duun,
namagbaw̓alitaën da tung mga tauan ni Jesus ang atiang dating sam puluk may sasa,
pati tung kadaklan ang mga tauan na ang kinaw̓utan nira duun.
10 Ya ra taa yang mga aran yang mga baw̓ay ang atiing namagbaw̓alitaën tung mga apustul:
ti Mariang atiang tag̓a Magdala,
ti Juana,
may ti Mariang atiang sam bilug ang yay nanay ni Santiago,
pati yang mga kaarumanan ka nirang duma.
11 Dispirinsia ilëm,
kung pamatian yang mga apustul yang nag̓ibalita nira,
indi ra ilëm pinanangëd nira ay midyu tung anday kapulutan na tung nira.
12 Piru ti Pedro tanya,
pagkagngël na yang balita nira,
diritsyu rang kumindëng ang naglaksu duun tung lëyang.
Numanyan tung pagkaw̓ut na,
dayun na rang tinirib yang kaklëran.
Anday dumang natirib na,
ya ra ilëm yang mga aw̓ël ang atiang ipinagsaw̓ëd-saw̓ëd tung tinanguni ni Jesus ang ya ra ilëg bëbtang asan.
Pagtirib na,
dayun dang nagbalik ang duru rang pagkabërëng na tung naita nang atii.
Yang Pagpailala Ni Jesus Tung Mga Tauan Nang Durua Ang Pansiangay Ra Duun Tung Emaus (24:13-35)
13 Taa numanyan tung kaldaw ang atii,
tung nirang tanan ang mga tauan ni Jesus,
may mga aruman nirang durua ang pansiangay ra duun tung baryung paggug̓uuyan ang Emaus,
ang yang lawid na tung Jerusalem mga sam puluk may sasang kilometro.
14 Numanyan yang pagparanawën nira ya kay pagkësën nira natëtëngëd tung tanan ang atiang nagkarainabu.
Lucas 24:14-35
15 Numanyan atiing siging kësën nira ang nag̓alaktan da ta balalaan nirang kaisan,
ti Jesus mismu nagpalëngët da tung nirang nagpakignunut.
16 Tung bag̓ay,
naita ra nira,
piru indi ilëm nailala nira ay natëtëngëd pinapanlaw̓uk-law̓uk da yang Dios yang panëlëng nira.
17 Numanyan mag̓aning ti Jesus ang nagbugnu tung nira,
“Ëlat kanay,
unu pa atiang pagkësënan ming pagbalalaan?”
Atii,
dayun dang nansitadëng.
Indi mataluk tung mga itsyura nira ang tanira may pag̓asinti nirang kapupungawën ang duru.
18 Numanyan yang sam bilug ang yay nag̓aranan tung ni Cleopas,
ya ray nagtimalës ang mag̓aning,
“Siguru yawa ilëm ang sam bilug ang pagdayu duun tung Jerusalem ang anday kaliw̓utan kung unu pay nagkarainabu.”
19 Mag̓aning ka tanyang nagtimalës,
“Ayw̓a,
unu pay nagkarainabu?”
Ag̓aaning ka tanirang nansituw̓al,
“Atii w̓a,
yang nagkarainabu tung ni Jesus ang tag̓a Nazaret.
Tanya sasang manigpalatay yang bitala yang Dios ang bistung pisan yang kagaëman na tung mga pruibang ipinagpalapus na may tung ipinagtulduk nang durug kabuilu.
Nauyunan da ngani ta mupia yang Dios,
pati yang kadaklan ang mga tau.
20 Ang pagkatapus,
yang mga paring arabubwat may yang pamagmangulu tung nasyun ta,
anday dumang binuat nira tung anya,
ya ra iintrigaay nira tung ni Gubirnadur Pilato ug̓ud masintinsiaan nang dapat ang imatayën ang pagkatapus ya ra ka dayun ipalansangay nira tung sasang krus.
21 Abaw,
piru ta yami,
ya ra rin ay natalig̓an yamën ang magbawi tung nasyun tang Israel.
Dispuis pa yaklu rang kaldaw numaan yang ikinagmatay na.
22 Bëlag̓an ilëm ya tii ay nainabu,
kung indi,
nabërëngami ra ka ta dakulung pagkabërëng tung ibinalita tung yamën yang dumang mga aruman yamën ang mga baw̓ay.
Ay kipurki ta nungaynang pangayag,
namansiangay ra duun tung lëyang ang atiing pinanlug̓uran tung anya.
23 Kaw̓utan nira,
indi ra naita nira yang tinanguni na.
Purisu tung pagbalik nira,
yang balita nira tung yamën,
bëlag ilëm ya tii,
kung indi,
tanira unu limput da ta mga angil ang ya unu ay namagbaw̓alitaën tung nira ang tanya unu nabui ra.
24 Purisu pagkabalita yamën tung nira,
may mga aruman yamën ang namansiangay ra ka duun tung pinanlug̓uran tung anya.
Insapuën nira,
ya ra ka man ang pisan tiing ibinalita yang mga baw̓ay.
Piru ang ayw̓at indi ra ka naita nira tanya?”
25 Mag̓aning ka tanyang minlës,
“Aay,
midyu tung anday naërëm mi!
Durug liwag pala tung mga isip mi ang yang tanan ang nagkarasulat yang mga manigpadapat ang tukaw yay luw̓us ang panangdën mi!
26 Bëlag bang may nagkaraula nira ang yang mga pinitinsia unung mga maning tiang naaning mi,
ya unu ay dapat ang mapasaran yang pag̓aningën ang Cristo baklu unu nga padëngëg̓ay yang Dios?”
ag̓aaning.
27 Pagkatapus dayun na rang pinamadbaran yang mga painu-inu nira tung tanan ang napabtang tung kasulatan ang kumpurming nag̓adapat tung sadili na,
impisa pa tung isinulat ni Moises ang asta ra tung nagkarasulat yang tanan ang mga manigpadapat sasa may sasa.
28 Numanyan atiing alëngët-lëngët da tanira tung baryung nag̓adistinu yang durua,
ti Jesus tanya midyu tung manlaw̓unus da ilëm.
29 Pagkasinti nira,
dayun da nirang inag̓apan ang inasig̓-asig ang inaning,
“Ungkuy,
maayën pang taawa ra ilëm magdayun tung yamën.
Apun da ka pa man.
Muya malaw̓iiana pa tung dalan,”
ag̓aaning.
Numanyan,
kumus matinlung imbitar tung anya,
nagpaaw̓ëk dang nagdayun duun tung nira.
30 Pagkatapus numanyan atiing pagtaralungaan da tanira tung lamisaan ang mamagyapun da,
ti Jesus ya ray nagmangulung namisik yang tinapay.
Pagpisik na,
dayun na rang pinasalamatan tung Dios yang yapun nira.
Pagkatapus yang tinapay,
ya ray piningas-pingas nang ipinarawat tung nira.
31 Atii,
baklu ra nga liwayay yang panëlëng nira tung anya.
Duun da ngailalaay nira tung pag̓urulag̓ën nang atii.
Pagkatapus,
naparëng da ilëm ang napalipat tung pagtëlëng nira.
32 Numanyan yang duruang naang nagkarabutwan,
nagkësën dang mag̓aning,
“Aa ka pala ya ray natëngëran na nungayna tung dalan ang ginanaan dang lag̓i ta mupia yang mga isip tang namati tung anyang pagbadbad yang kasulatan tung yatën,”
ag̓aaning.
33 Numanyan anday dumang binuat nira,
atiang lag̓i,
nansikdëng dang nansibalik duun tung Jerusalem.
Numanyan kaw̓utan nira yang sam puluk may sasang mga tauan ni Jesus ang atiang dati,
saragpun da tanira yang mga kaarumanan ka nirang duma.
34 Taa numanyan tingkawan da tanirang binalitaan yang kinaw̓utan nirang inaning,
“Matuud ka man pala,
ti Ginuu ta binwi si ka man ang uman yang Dios!
Nagpaita ra nganing tung ni Simonb!”
ag̓aaning.
35 Pagkatapus yang duruang naa,
pinatug̓uran da nira yang balita kung unu pay nainabu tung pagparanawën nira tung dalan,
kung ya pa ag̓ari yang pagkailala nira tung ni Jesus atiing pagpingas-pingas na yang tinapay.
Yang Pagpailala Ni Jesus Tung Mga Tauan Na Duun Tung Jerusalem (24:36-43)
36 Numanyan atiing indi pa nganing ag̓atapus tanira ta pagbitala,
asan da lumimput ti Jesus tung pinagtaralungaan nirang tanan.
Mag̓aning tung nira,
“Paëyanganamu ra yang Dios ta paglimëngan yang mga isip mi.”
Lucas 24:36-53
37 Atii ya ra ngaklag tanirang pinamalayan da ta ëlëd nirang duru.
Ay kanisip nira ang yang nag̓aita nirang atia sasang kalag.
38 Purisu ag̓aaning ti Jesus tung nira,
“Ayw̓a nag̓atarantaamu ra?
Ayw̓a pagdua-dua pa yang mga isip mi?
39 Ala,
tëlëngan mi w̓a yang mga pursuu pati mga kakayu ang yuu ra ka man taa mismu.
Ala pamëg̓ës-pëg̓ësanaw ra ka numyu ug̓ud masiguru mi ra ang yuu bëlag̓anaw sasang kalag.
Kipurki yang kalag,
anday isi na,
anda kay duli na ang katulad ka tung yëën ang yag dawalay ming bilug ang tinanguni.”
40 Pagkaaning na tia,
dayun na rang ipinaita tung nira yang mga ulat na tung pursu na may tung kakay na.
41 Numanyan kumus dërëëg̓ën pa yang kasadyaan nirang subra may yang pagkabërëng nirang duru,
kanisip nira ang muya tanira ya ra ilëm agkalang-kalangay.
Purisu anday dumang binuat ni Jesus ang para makuat yang pagdua-dua nirang atia,
nagtalimaan da tung nirang mag̓aning,
“Anday pamangan mi asan?”
42 Pagkatapus dayun da nirang pinakdulan ta sam pukis ang ian ang kiniaw.
43 Pagdawat na yang ian,
diritsyu rang pinangan na tung pinagtaralungaan nirang tanan.
Nag̓abadbaran Da Ni Jesus Yang Mga Isip Nira Tung Mga Kasulatan Ang Kumpurming Nag̓adapat Tung Anya (24:44-49)
44 Pagkatapus numanyan,
dayun dang nagpasanag ti Jesus tung nirang mag̓aning,
“Yang mga bag̓ay ang naang pinasaranu ya ra kang lag̓i ay ipinakdëku tung numyu tan taa ang pagnurunutanita pa rin ang yay dapat ang mainabu.
Kipurki ag̓aaningaw kang lag̓i tung numyu ang yang tanan ang ipinagpasulat yang Dios ang tukaw tung ni Moises pati yang ipinagpasulat na tung mga manig̓ula asta yang napabtang tung Mga Karantaën,
yang tanan ang atia ang kumpurming nag̓adapat tung yëën,
ag̓aaningaw,
indi maimung lumalis,
kung indi,
dapat luw̓us dang magkamatuud,”
ag̓aaning.
45 Pagkatapus,
yang mga painu-inu nira dayun na rang pinamadbaran tung mga kasulatan ang atia ang para mamarësmësan da nira ta mupia yang kumpurming nag̓adapat tung anya.
46 Numanyan atiing alëngët dang matapus yang pagbaradbarën na,
mag̓aning tung nira,
“Ta,
kung papagbilug̓unu ra yang tanan ang atiang ipinagpasanag̓u tung numyu,
yang pinakaisi na ya ra taa.
Yang pag̓aningën unung Cristo,
dapat unung mapasaran ta pinitinsiang durug lëbat ang imatayën ang pagkatapus magbungkaras da ka unu tung yaklung kaldaw.
47 Yadwa pa,
ëkël unu tung pagpakugmatay nang atia pati pagbungkaras na,
ya unu ay paniëlan yang Dios ang magpatawad tung mga tau ang kumpurmi unung manligna tung mga kasalanan na.
Ya unu ay kamtangan yang balita ang dapat unung ipagpakaw̓ut tung tanan ang nasyun tung bilug ang kaliw̓utan,
mag̓impisa unu taa tung siudad ang naang Jerusalem.
48 Purisu ta yamu,
yang intindiën mi ta mupia ang magpaingmatuuramu ra tung mga tau natëtëngëd tung yëën ang yang nagkaraulang atiang napabtang tung kasulatan luw̓us da ka man ang nagkamatuud tung yëën.
49 Ta yëën,
paangayanamu ra yëën tung sasang pinangakuan ni Amang ipatinir na tung numyu.
Purisu ta yamu magpabutwanamu ra kanay taa tung siudad ang asta malampuranamu ra yang Espiritu Santong liit tung langit ang yang kaalimbawaan mi pasuutanamu ra yëën tung puirsa na ang yay maning pa tung sasang aw̓ëlën mi,”
mag̓aning.
Natëtëngëd Tung Pagpaabwat Ni Jesus Ang Napalangit (24:50-53)
50 Taa numanyan may sasang kaldaw ang ingkëlan da ni Jesus yang mga tauan nang naglua tung siudad ang asta nangakaw̓ut da duun tung alëngët yang Betania.
Pagkaw̓ut nira duun,
ti Jesus dayun dang nagpaabwat yang kalima nang nag̓ingaluk tung Dios ang paktëlën na ra ta mupia yang mga aruman na.
51 Numanyan mintras pag̓arampuën pa tanya ta maning tia,
amat-amat dang papaabwat ay pag̓aëklan da yang Dios duun tung langit.
52 Numanyan tanirang nagkarabutwan,
dayun dang namagpadagpa tung tanëk ang namagtuu tung anya.
Pagkatapus namansibalik da duun tung Jerusalem ang duru rag kasadya yang mga isip nira.
53 Numanyan yang kadagmitan tung nira,
muya-muyang mamagsaragpun-sagpun duun tung pagtuuan ang atiang pinakalusu ang para mamagdarayawën tung Dios.