Yang Isinulat Ni JUAN Natëtëngëd Tung Ni Jesu-Cristo
Natëtëngëd Tung Sasang Maning Pa Tung Bitalang Ipinag̓aning Yang Dios (1:1-18)
1
Atiing anda pay nag̓aimu,
asan da kang lag̓i yang sasang maning pa tung bitalang ipinag̓aning yang Diosa.
Pagrinampilay kang lag̓i tanira yang Dios ig yang pagkadios yang Dios ya kay pagkadios na.
2 Tanya asan da kang lag̓i pagpakirampil tung Dios.
The Word (Juan 1:1-18)
3 Yang tanan ang bag̓ay ipinaimu yang Dios tung anya.
Kung bëlag̓an tung anya,
andang pisan ay naimu,
may sam bilug.
4 Tanya kang lag̓i yang nagpaguad yang baklung pagpangabui ang nag̓auyunan yang Dios ig katulad ka tung sasang kaas ang pagpasanag,
yay kaalimbawaan nang nagpasanag tung kinaisipan yang mga tau ug̓ud asan da ngaëyangay ta ipag̓intindi nira tung Dios ang magkatama.
5 Anday kabuntuk-buntukan yang pagparasanag̓ën na tung makiklëp ig indi ra ëngëd nag̓adëëg̓an yang makiklëp ang atiab.
6 Simanyan,
may sasang taung tinuw̓ul yang Dios ang ti Juan yang aran na.
7 Yang inangay na taa ay magpaingmatuud tung mga tau natëtëngëd tung kaas ang naa,
ug̓ud yang tanan ang mga tau mamagtalig da tung anya natëtëngëd tung pag̓ibalita na.
8 Bëlag̓an ang mag̓aning ang tanya yang kaas,
ang indi,
yang inangay na ang tanya magpaingmatuud natëtëngëd tung kaas.
9 Kung masig̓aak yang sasang kaas ang pagpasanag,
mas pa yang maning pa tung kaas ang naa,
ay nag̓apalëngëtan na yang kinaisipan yang mga tau taa tung kaliw̓utan ang naa ang para magpasanag tung nira.
10 Taa kang lag̓i tanya tung kaliw̓utan ang naa ig yang intirung kaliw̓utan pati yang tanan ang mga bëtang na luw̓us ang ipinaimu yang Dios tung anya.
Piru ya pa kay indi ra inilala yang mga tau taa tung kaliw̓utan.
11 Maskin duun mismu tung sadiling banwa na naglua,
piru indi ra ka ëngëd pinauyunan yang mga masigkanasyun na.
12 Piru kumpurming tinu pay nagpauyun tung anyang nagtalig,
ya ray pinakdulan na ta pudir nirang mag̓ing mga ana yang Dios.
13 Nagyari rang mga ana na ka man bëlag̓an ang mag̓aning ang natëtëngëd yay natauan dang lag̓i nira ëkël tung ama nirang naana tung nira,
kung indi,
yang Dios mismu ya ray maning pa tung naana tung nira.
14 Simanyan,
yang maning pa tung bitalang naang ipinag̓aning yang Dios,
nag̓ing taung bilug ig nagpakigsapënc da tung yamën.
Pinatëëk-tëëkan ka yamën yang kadëngëg̓an na ang yay bag̓ay ang pisan tung anya ay lusung pisan yang pag̓anaan nirang mag̓ama ang tanya duun ka man nanliit tung pag̓aningën nang Ama na.
Ay pinaitaanami ra nganing anya ta kanëëman nang durung pisan agkatinlu ig duun ka tung anya nga bilug̓ay yamën yang ultimung pagkadios yang Dios ang anday pagkakulang.
15 Pati nganing ti Juan ang naang manigbënyag,
nagpaingmatuud da ka natëtëngëd tung maning pa tung bitalang naang ipinag̓aning yang Dios ay nagparakaw̓utun da tung mga tau ang maning taa:
“Atia ra yang taung ibinalitaw ra kang lag̓i tung numyu ang atiing pag̓aningu ang may sasang taung maglua ang maskin nag̓auri pa tung yëën,
piru mas abwat ta katëngdanan tung yëën ay natëtëngëd bakluaw natau,
tanya asan da kang lag̓i.”
Yay aning ni Juan ang nagpaingmatuud tung mga tau.
16 Ag̓aningënu ang tung anya ka man nga bilug̓ay yamën yang ultimung pagkadios yang Dios ay maskin yaming tanan tani,
ikinaayën da ka yamën yang katinlu yang isip na ay anda ëngëd ang pisan ay kaluw̓us-luw̓usan yang kanëëman nang atiang durung pisan agkaaw̓unda.
17 Ayw̓a indi maaningu tia ay kipurki tëlëngan mi ra ilëm.
Atiing tukaw yang mga katuw̓ulan yang Dios ibinutwan ni Moises tung nasyun ta.
Ang pagkatapus numanyan,
kung ipasunaid pa tung unu pa ëngëd ay kantidad yang kanëëman yang Dios may yang kamtangan yang pagkadios na,
asan da ëngëd nga bilug̓ay ta tung ni Jesu-Cristo.
18 Yang Dios,
disti pa atii tung katëbtëw̓an,
andang pisan ay taung naita tung pirsunal na,
may sam bilug.
Piru naang sasang inding pisan mapakdingan ang ya ka man mismu yang Dios ang pirming pagsinasaay tanirang mag̓ama,
ya ray nagbadbad tung mga isip yamën natëtëngëd tung anya.
Natëtëngëd Tung Pagpaingmatuud Ni Juan Ang Manigbënyag Natëtëngëd Tung Ni Jesus (1:19-34)
19 Kung natëtëngëd tung pagpaingmatuud ni Juan ang naa tung mga tau,
maning taa yang nainabu.
Yang mga manigmangulu tung nasyun yamën ang mga Judio duun tung Jerusalem,
ya ray namanuw̓ul tung mga aruman nirang mamagpasiguru ra kanay tung ni Juan kung unu pay katëngdanan na.
Yang pinanuw̓ul nira ya ra yang mga pari,
kasiraan da ka tanira yang mga katabyang nirang duma.
John Baptizes Jesus (Juan 1:19-34)
20 Tung pagpasiguru nira tung ni Juan kung unu pay pagpabëtang na tung sadili na,
indi nag̓ambu,
kung indi,
nag̓ugtulun da yang matuud ang mag̓aning,
“Yuu bëlag̓anaw yang pag̓aningën ang Cristo ang katulad ka tung pag̓alaum mi.”
21 Mag̓aning tanirang namagtimalës,
“Tay kung maning tii,
tinua pang tauay?
Yawa w̓asu ti Elias ang ya kang lag̓i ay nag̓aëlat-ëlatan tang magbalik?”
Mag̓aning ti Juan ang nagtuw̓al,
“Bëlag!”
Dayun da nirang pinasulitan ang tinalimaan ang,
“Yawa w̓asu yang sasang manigpalatay yang bitala yang Dios ang atiing pinangakuan nang magkaw̓utd?”
Mag̓aning ka tanya,
“Bëlag ka!”
22 Numanyan,
namagpabalitëktëk pa ka ëngëd ang namanalimaan tung anyang mag̓aning,
“Balitaayami ka ta ustu kung tinua pang tauay ug̓ud mabalita ka yamën tung namanuw̓ul tung yamën.
Unu pay pagpabëtang mu tung sadili mu?”
23 Numanyan tung tuw̓al ni Juan,
ya ra ilëm ulitay na yang sasang naula ni Isaias ang yay sasang manigpalatay yang bitala yang Dios atiing tukaw.
Mag̓aning yang tuw̓al na,
“Anday duma,
yuu ra yang pinag̓ula tung kasulatan ang ya unu ay maglua taa tung banwang naang kapas ang para magparakaw̓utunaw tung mga tau.
Yang ianingu unu tung nira,
ang katulad ka tung pagtaradlëngën tung sasang dalan ang panawan ta sasang Adi,
kaministiran kang panadlëngën da ka nira ta mupia yang mga kinaisipan nira ang para simpan dang mampauyun tung ni Ginuu tang magkakaw̓ut da,”
mag̓aning.
24 Yang mga taung atiang pamagpabalitëktëk tung ni Juan,
pinanuw̓ul yang mga Pariseo.
25 Taa numanyan,
dayun-dayun yang pagpabalitëktëk nira tung ni Juan ang mag̓aning,
“Naa pala,
ag̓aaninga ka ang yawa bëlag̓an yang pag̓aningën ang Cristo,
bëlag̓ana ka ti Elias,
maski yang manigpalatay yang bitala yang Dios ang nag̓aëlat-ëlatan ta,
bëlag ka.
Ay kung maning tii,
ayw̓at pagpamënyag̓a pa ka ëngëd tung mga tau?
Unu pay kalëlyag mung ianing?”
26 Yang tuw̓al ni Juan,
maning taa:
“Kung tung bag̓ay,
yuu pagpamënyag̓aw ka man tung mga tau.
Piru may sasang taung nalakët asan tung numyu ang indi mi pa nag̓ailala.
27 Maskin nag̓auri pa tung yëën,
piru mas abwat ta katëngdanan tung yëën ang maskin nganing tung panguw̓ad da ilëm yang lakgëng yang sandalyas na,
indiaung pisan magkabag̓ay tung anyae,”
mag̓aning duun ti Juan.
28 Yang mga bag̓ay ang atia nainabu tung Betania,
duun tung duw̓ali yang subang pag̓aningën ang Jordan,
ay duun agpagbërënyag̓ën ti Juan tung mga tau.
29 Pangayag yang kaliw̓utan,
ti Jesus naita ra ni Juan ang pagpalëngët da tung anya.
Diritsyu rang ipinasapët na tung mga tau ang mag̓aning,
“Uay,
atia raw̓a yang taung tinuw̓ul yang Dios ang manulad tung sasang karnirung sinday pa ang ya ag̓idasag̓ay ug̓ud duun da nga kuat yang pagkamakinasalananën tang mga tau tung pagtërëlëngën yang Diosf.
30 Ya ra ka man tiang ibinalitaw ra kang lag̓i tung numyung tan taa pa ang atiing pag̓aningu ang may sasang taung maglua,
mag̓aningaw,
ang maskin nag̓auri pa tung yëën,
piru mas abwat ta katëngdanan tung yëën ay natëtëngëd bakluaw natau,
tanya asan da kang lag̓i.
31 Tan taa,
maskin yuu ngani,
indi pa nag̓ailalaw kung tinu pa.
Piru minangayaw taa ang para magpamënyag tung mga tau ay ug̓ud asan da ngaipailalaayu yang taung atia tung intirung nasyun tang Israel,”
ag̓aaning.
32 Numanyan,
ti Juan,
dayun da yang pagpaingmatuud na tung nirang mag̓aning,
“Atiing pagpamënyag̓aw ra tung mga tau,
may sasang taung naitaw rang pinangapunan dang pinakëënan yang Espiritu Santong nagpapariu ra tung kuari kalapati ang duun manliit tung langit.
33 Baklu naitaw,
indi pa ka man nag̓ailalaw,
basta pinakdëkaw ilëm yang nagtuw̓ul tung yëën ang magbërënyag̓ën tung mga tau ang kung tinu pay maitaung pangapunan yang Espiritu Santong pakëënan,
ya ra yang maning pa tung magbërënyag̓ën ka tung mga tau ëkël tung pagpatinir na tung nira yang Espiritu Santo.
34 Simanyan yang bag̓ay ang atia,
sinakëp dang pisan yang mataw.
Purisu nag̓apagpaingmatuuraw ra nganing tung numyu ang yang taung atia talagang ya ra ka man yang pag̓aningën ang Ana Yang Dios,”
mag̓aning.
May Tulu NGa Tauan Ang Namagpakiugpu Tung Ni Jesus (1:35-42)
35 Pangayag,
asan si ti Juan,
kasiraan da ka tanira yang durua nga tauan nang nag̓apangugyatan na.
The disciples follow Jesus (Juan 1:35-51)
36 Numanyan pagpamalad ni Juan tung ni Jesus ang magtataklib da,
ipinasapët na si tung mga aruman nang atiang durua ang mag̓aning,
“Uay,
atia raw̓a yang taung tinuw̓ul yang Dios ang magpakbung tung sasang karnirung sinday ang ya ag̓idasag̓ay,”
mag̓aning.
37 Pagkagngël nira tia,
dayun dang namagpakignunut tung ni Jesus.
38 Simanyan,
pagbalyëd ni Jesus,
naita na ra tanirang pamagpakignunut da tung anya.
Purisu tinalimaan na tanirang inaning,
“Unu ray ministir mi?”
Mag̓aning tanirang namagtimalës,
“Anda,
Rabbi.
Gustu ilëm yamën ang makdëkan kung aria pag pag̓istar.”
(Tung bitala yamën ang mga Judio,
yang puntus yang pangguuy nirang atiang Rabbi tung anya ay sasang manigtulduk.)
39 Mag̓aning ti Jesus ang minlës,
“Taniita,
ug̓ud maita mi.”
Kapurisu,
nansinunut da ka man tung anyang asta naita ra ka man nira yang pag̓istaran na.
Duun da ka namagdayun tung anya tung apun ang atia ay yang uras ang ipinagbarag̓as nira,
mga alas kuatru ra kang lag̓i yang apun.
40 Yang sam bilug tung durua nga tauan ang atiing nagngël ka tung ipinasapët ni Juan ang pagkatapus nagpakignunut da tung ni Jesus,
ya ra ti Andres ang ari ni Simon Pedro.
41 Simanyan ya ray nagsagyap tung aka na.
Pagbag̓as nira,
dayun dang nagbaw̓alitaën tung anyang mag̓aning,
“Manung,
naita ra yamën yang Mananapnay ang pinangakuan yang Dios ang yay pag̓aningën tang Mesias,”
mag̓aning.
(Kung tung bitalang Giniriego,
Cristo yang pangguuy yamën ang atia tung anya.)
42 Pagkatapus,
dayun na rang ingkëlan ti manung na tung ni Jesus.
Numanyan,
tung pagpamalad ni Jesus tung anya,
dayun na rang inaning ang,
“Yawa ti Simon ang ana ni Juan.
Piru simanyan,
papuanggaana ra yëën tung ni Cefas,”
mag̓aning.
(Kung ilaktëd tung bitalang Giniriego,
yang papuangga nang atia ti Pedro)g.
Pag̓imbitar Da Ti Jesus Tung Durua Si NGa Tauan Ang Para Mamagpaugyat Da Ka Tung Anya (1:43-51)
43 Pangayag,
naisip da ti Jesus ang mag̓angay duun tung parti Galilea.
Kumaw̓ut duun,
sinagyap na ti Felipe.
Pagkasagyap na,
dayun na rang inaning,
“Felipe,
magpakignunuta ra ka tung yëën ang magpaugyat,”
mag̓aning.
44 Ti Felipeng naa,
masigkabanwa ni Andres durua ni Pedro ang parariu tanirang tag̓a Betsaida.
45 Simanyan,
ti Felipe dayun dang nagsagyap tung ni Natanael.
Pagkaita na,
dayun na rang inaning ang,
“Ungkuy,
naita ra yamën yang taung pag̓aëlatan tang inula ni Moises.
Pati mga manigpalatay yang bitala yang Dios atiing tukaw pa nagkaraula ka natëtëngëd tung anya.
Ya ra ti Jesus ang ana ni Jose ang tag̓a Nazaret.”
46 Mag̓aning ti Natanael ang nagtimalës,
“Abëë,
ayw̓a,
may tag̓a Nazaret ang maayën ang tau?”
Mag̓aning ti Felipeng minlës,
“Alia,
tëlëngan mu w̓a,”
mag̓aning.
47 Taa,
simanyan,
pagkaita ni Jesus tung ni Natanael ang pagpalëngët da tung anya,
ya ra ag̓aningay na,
“Atia ka man ta taung bag̓ay ang pisan ang aningën ang kinasakpan yang nasyun tang naang Israel.
Indi maskëng mag̓ëgtëm kung unu pay nabtang tung isip na.”
48 Mag̓aning ti Natanael ang nagngël,
“Abaa,
ya pa ag̓aring nag̓askëan mu ra yang ug̓aliu?”
Mag̓aning ka ti Jesus ang nagtuw̓al,
“Baklua ra g̓uuyay ni Felipe ta nungayna,
nabandawa rang lag̓i yëën atiing duuna pa rin tung maglandungan yang igus muh.”
49 Mag̓aning ti Natanael ang minlës,
“Rabbi,
talagang yawa yang pag̓aningën ang Ana Yang Dios ang nag̓aëlatan yamën ang maggaraëmën tung nasyun tang Israel.”
50 Mag̓aning ti Jesus,
“Naa pala,
Natanael,
kalpësa ka ilëm ang manangëd tung yëën sigun tung inaningung atia tung nuyu ang nabandawa rang lag̓i yëën atiing duuna pa rin tung kapungul yang igus?
Kulang pa tia.
May mas pang makabëw̓ërëng ang maita mu.”
51 Mag̓aning ti Jesus ang nagpadayun yang bitala na,
“Iugtulu tung numyung tanan yang kamatuuran.
Yuung pag̓aningën ang ‘Maninga Tau’ kumus naawaw ra tung kaliw̓utan,
mabilug̓anaw ra numyung yuu ray pagrarampilan yang mga tau may yang Dios.
Ay may maita mi ra tung yëën ang magkaanggid-anggid tung nabag̓ay tung tinalakinëp ni dipuntu Jacobi atiing tukaw ang yang langit maning pa tung nag̓abri ra tung tagbu na ig may mga angil ang pag̓apanuw̓ul yang Dios ang namagpabalik-balik tung anya,”
mag̓aning.