Natëtëngëd Tung Pagparaklërën Ni Jesus Tung Siudad Ang Jerusalem (21:1-11)
21
1-2 Taa numanyan atiing panungulami rang tanan tung bukid ang atiang durung ayung pag̓aningën ang olibo,
ang yang distinu yamën duun tung siudad ang Jerusalem,
may sasang baryung nag̓alëngtan yamën ang paggug̓uuyan ang Betpage ang alëngët-lëngët da tung siudad ang Jerusalem.
Numanyan atiing nag̓alëngëtami ra tung baryung atia,
nanuw̓ul da ti Jesus tung mga aruman yamën ang durua nga tauan ang mag̓aning,
“Ala,
mangayamu ra kanay tung baryung naang tung tukawan ta.
Kung kumaw̓utamu ra nganing asan,
ya rang lag̓i ay mapanawan mi yang sasang asnung inaën ang yag këkëdkëd ang asan ka tung tëpad na yang sinday na.
Pamadbarën mi ra kanay ang pangguyuran tani tung yëën.
3 Kung may magbugnu tung numyu,
yamu ra ag̓aaning,
‘Kaministiran ni Ginuu ta!’
Magngël na ilëm tia,
ipampaguyud na ra ilëm ang lag̓i tung numyu,”
mag̓aning.
4 Taa numanyan yang tanan ang mga bag̓ay ang atia nagkamaningan da ta maning tia ay ug̓ud asan da magkamatuud yang sasang ipinaula yang Dios tung sasang manigpalatay yang bitala nang tukaw ang mag̓aning,
5 “Panganingën mi yang mga taung pamag̓istar tung Sion ang yang Adi nira panganing da asan tung nira.
Durug kapinaurayën ay yang magsasaayan na sasang asnung sinday paa,”
mag̓aning.
6 Kapurisu numanyan namagpanaw ra ka man yang mga aruman yamën ang atiang durua.
Tinuman da nira yang itinuw̓ul ni Jesus tung nira.
7 Pinangguyuran da ka man nira yang asnu may yang sinday na ang ya ray pinanapinan nira yang mga panlamig nira ang pagkatapus dayun da kang nagsaay ti Jesus tung sinday.
8 Numanyan yang pagsaay na tung asnu,
ya kay paggaralangën tung anya yang mga taung buntun dang pisan.
Yang duma yang mga panlamig nira ya ray ipinamëklad nira tung karsadang magpanawan yang asnu.
Yang duma may mga paklang ang pinaglampang nira ang ya ra kay ipinamëklad nira tung karsada.
9 Numanyan yang mga taung atiang buntun ang pamagpakigluyug tung ni Jesus,
yang duma nabtang tung tukawan na,
yang duma tung uri na.
Sigi-sigi ra ilëm yang pagkëkëndalën nirang pamag̓araning-aningan ang “Salamat!
Naa ra yang manubli tung paggaraëmën ni Adi David!
Pakaayënën da kang pirmi yang Dios naang pag̓atuw̓ul nang magpalua tung paggaraëmën na!
Salamat tung anya duun tung kaabwat-abwatan!”
10 Numanyan pagpaklëd ni Jesus tung Jerusalem,
namag̓irikbawan da yang mga tau ang namagtaralimaan-talimaanan ang mag̓aning,
“Tinu pa kayang tauay tia?”
11 Numanyan yang mga taung atiang buntun ang pamagpakigluyug da kang lag̓i tung ni Jesus,
ya ray namansituw̓al ang mag̓aning,
“Yang taung naa,
ya ra ti Jesus mismu ang tag̓a Nazaret duun tung sinakëpan yang Galilea.
Tanya yang manigpalatay yang bitala yang Dios ang atiing naula nuntukaw ang magkaw̓ut,”
mag̓aning.
Yang Pagpalayas Ni Jesus Tung Mga Nigusyanti Tung Palayas Yang Pagtuuan Ang Pinakalusu (21:12-17)
12 Taa numanyan dayun dang nagpaklëd ti Jesus duun tung palayas yang pagtuuan yamën ang pinakalusu.
Pagpaklëd na,
dayun dang nagpalayas tung tanan ang mga manigpaalang ta mga garamitën tung pagparadasag̓ën,
pati yang tanan ang pamangalang tung nira nagkaraumid da ka ta palayas.
Pati yang mga lamisaan ang atiang pinampabtangan ta mga kuartang nag̓ipagpabailu tung mga tau,
pinamaliskad na,
asta yang mga kakarungan yang mga manigpaalang ta mga kalapati,
ya ka.
13 Mag̓aning tung nira,
“May sasang bitala yang Dios ang napabtang tung kasulatan ang yang balay unung naang pag̓atiniran na,
dapat unu ang yay pag̓ampuan yang mga tau tung anyab.
Piru ay pa w̓a?
Ta numyu,
pag̓abuat mi ra ilëm ang kuinta lëyang ang pantalukan ta mga tulisan ang taa ra mismu agpandayaay mi yang mga taung pamagtuuc,”
mag̓aning.
14 Taa numanyan may mga buray pati mga barik ang ya ray namagpalëngët tung ni Jesus duun tung palayas ang pagkatapus ya ray pinampamaayën na.
15 Numanyan may mga paring arabubwat ta katëngdanan asan ang pamagpaniid,
kasiraan da ka tanira yang mga sag̓ad.
Pagkaita nira tung ni Jesus ang pagpalapus ta mga buat-buat ang mga maning tiang makabëw̓ërëng,
nangaërëpan da ta duru.
Bëlag̓an ilëm ya tiay nag̓aërëpan nira,
kung indi,
pati yang nag̓ipagkëndal yang mga mamula asan tung palayas ang pamansianing,
“Taw̓angan da ta mupia yang Dios yang taung naa ang ya ray pinasubli na tung paggaraëmën ni Adi David!”
16 Purisu dayun dang namagriklamu tung ni Jesus ang mag̓aning,
“Ayw̓a indi mu pagsambëngën tia?
Indi mu nag̓agngël yang nag̓ipagkëndal nirang atia?”
Mag̓aning ka ti Jesus ang minlës,
“Nag̓agngëlu ka,
piru yang gustuu ilëm ang maintindian tung numyu kung nabasa mi ra ka yang sasang napabtang tung kasulatan ang maski nganing yang mga mamula unu nag̓apaëyangan ka unu yang Dios ta ipagdayaw nirang ustu tung anya,
maskin yang gëg̓ësyë pa unung pamanusu pa,”
mag̓aningd.
17 Numanyan pagkaaning ni Jesus tia,
dayun da ilëm ang namutwan tung mga taung atia ang naglua tung siudad ang pagkatapus minangay ra duun tung Betania.
Duun da ka ngaëlëk tung law̓iing atii.
May Sasang Ayung Pag̓aningën Ang Igus Ang Magbitalaan Ni Jesus (21:18-22)
18 Numanyan pangayag ang timpranu,
atiing pagbalik da ni Jesus duun tung siudad,
ya ra nga suw̓uk.
19 Duun tung binit yang karsada may naita nang sasang ayung pag̓aningën ang igus.
Purisu ya ray pinalëngtan na,
piru naa pala andang pisan ay naita nang burak na,
kung indi,
purus ilëm mga daun.
Numanyan dayun na rang itinuluy tung malain yang ayung atiang inaning,
“Maayën pa rin ang india ra ilëm ang pisan mamurak ang uman!”
Pagkatapus lag̓i-lag̓ing nanlumpayëng da ka man yang ayung atiae.
20 Numanyan pagkaita yamën kung unu pay nainabu tung ayung atia,
nabërëngami ra ta mupia.
Dayunami rang nagtalimaan tung anyang mag̓aning,
“Ya pa ag̓aring nanlumpayëng dang lag̓i yang ayung atia?”
21 Mag̓aning ka ti Jesus ang minlës,
“Iugtulu tung numyu yang kamatuuran,
kung magtalig̓amu ta ustu tung Dios ang anday dua-dua yang mga isip mi,
mapagbuatamu ka ta magkapariu ka tung binuatung atia tung igus ang atia.
Bëlag̓an da ilëm maning tia ay masarangan mi,
kung indi,
maskin may sasang durug liwag tung pag̓intindi mi ang yay gustu ming ingalukun tung Dios,
mainabu kaf.
22 Purisu maskin unu pang bag̓ayay ang ipag̓ampu mi tung Dios,
basta nag̓atalig̓an mi ang yang nag̓aingaluk ming atia ipakdul na tung numyu,
atia pakdulanamu ka man anya,”
mag̓aning.
Yang Pag̓usisa Yang Mga Pamagpakigmaëpët Tung Ni Jesus Natëtëngëd Tung Katëngdanan Na (21:23-27)
23 Taa numanyan,
nagpadayun da ti Jesus yang pagparanawën nang nagbalik duun tung palayas yang pagtuuan ang atiang pinakalusu.
Numanyan atiing pagturuldukun da tung mga tau duun,
pinalëngtan da yang mga paring atiang arabubwat ta katëngdanan may yang mga pamagpakigmaëpët tung banwa.
Dayun da nirang inusisang inaning,
“Ëëy,
ay pa ngaëklay mu yang katëngdanan ang yawa magbuat yang mga maning tia taa tung pagtuuan tang naa?
Tinu pay naglug̓ut tung nuyu?”
24 Ag̓aaning ka ti Jesus ang nagtimalës,
“Ëlat kanay,
kung mga sarang tung numyu,
may sasa kang talimaanënu rin tung numyu.
Kung matuw̓al mi,
ay tuw̓alënamu ra ka yëën kung ay pa liit yang katëngdananung pagbuat ta mga maning tia.
25 Abir,
ay pa w̓asu liit yang katëngdanan ni Juan ang nagpamënyag tung mga tau?
Tung Dios manliit u tung tau ka ilëm?”
Pagkagngël nira tia,
dayun dang nag̓aralas-alasan ang mag̓aning,
“Unu pa w̓asu ay maayën ang ituw̓al ta?
Kung aningën ta ang tung Dios manliit yang katëngdanan ni Juan,
muya suliliënita si anyang talimaanën ang ayw̓at indiita ra nanangëd tung anya.
26 Piru kung aningën ta ang tung tau ka ilëm manliit yang katëngdanan na,
muya kung unu pay buatën tung yatën yang mga taung naang buntun,
indi ta ka ilëm maskëan.
Ay tanirang tanan pamag̓ingmatuud da ang ti dipuntu Juan talagang sasang tinuw̓ul yang Dios ang magpadapat yang bitala na,”
ag̓aaning.
27 Purisu numanyan tinuw̓al da ilëm nira ti Jesus ang,
“Inay,
indi ilëm nag̓askëan yamën.”
Mag̓aning si ka ti Jesus ang nagtimalës,
“Tay kung maning tii,
indiaw ra ka mag̓ugtul tung numyu kung ay pa liit yang katëngdananung pagbuat ta mga maning tia,”
mag̓aning.
Yang Nag̓ipananglit Ni Jesus Tung Duruang Magputul Ang Parariung Tinuw̓ul Ni Tatay Nira Piru Sam Bilug Ilëm Yang Nanangëd (21:28-32)
28 Taa numanyan,
dayun sing sinugpatan ni Jesus yang bitala na tung mga mamaëpët ang atia ang mag̓aning,
“Pamatian mi ra kanay yang pananglit ang naang ipagngëlu tung numyu kung maumpa tung pag̓intindi mi.
May sasang taung duruay ana nang lalii.
Numanyan minangay tung ana nang dakulu ang mag̓aning,
‘Duduy,
mag̓ubraa ra numaan duun tung kaubasan ta.’
29 Mag̓aning ka yang ana nang nagtimalës,
‘Indiaw.’
Ang pagkatapus atiing nabuay-w̓uay ra,
nag̓uman da yang isip nang minangay duun tung kaubasan ang nag̓ubra.
30 Atiing pagkagngël ni tatay na yang tuw̓al yang ana nang atiang dakulu,
dayun dang minangay tung ana nang sam bilug ang maning ka tii yang itinuw̓ul na tung anya.
Mag̓aning yang ana nang nagtimalës,
‘Ëë,
tatay.’
Ang pagkatapus indi ka minangay duun tung kaubasan.
31 Ta,
tinu pa w̓asu tung nirang durua ay nagtuman yang kalëlyag̓an yang tatay nira?”
Mag̓aning ka tanirang namansituw̓al,
“Yang dakulu.”
Mag̓aning ka ti Jesus ang minlës,
“Iugtulu tung numyu yang kamatuuran,
yang duruang atiang mag̓ari,
yang pisan yang kaalimbawaan mi yang mga manigpanukut asta mga baw̓ay ang malaway yang pangita nira.
Ay tanirang nag̓alamku ming indi ra risibiën yang Dios,
yamu pay nag̓atkawan nirang papalg̓ud tung paggaraëmën na.
32 Ayw̓a indi maaningu,
ay kipurki atiing paglua ni Juan ang manigbënyag ang nagpasanag tung numyu kung unu pay nag̓auyunan yang Dios ang yay dapat ang buatën mi,
indiamu ka nanangëd tung anya.
Piru yang mga manigpanukut ang atia pati mga baw̓ay ang atiang manigpausar,
ya pay namanangëd tung anyang namanligna tung mga kasalanan nira.
Ang pagkatapus ag̓ad ya rag dawalay mi ang dakulu ka man yang pinag̓umanan nira,
piru indi mi ra ka ëngëd inuman yang mga isip mi ang para manangëramu ra ka rin tung ni Juan,”
mag̓aning.
Yang Mga Pamagpakigmaëpët Nag̓ipananglit Ni Jesus Tung Mga Agsadur May Tung Mga Manigpakdëng Ta Balay (21:33-46)
33 Mag̓aning ti Jesus ang nagpadayun yang bitala na,
“Pamatian mi ra kanay yang sam bilug pang pananglit ang ipagngëlu tung numyu.
May sasang taung malapad yang tanëk na ang ya ray pinagluakan na ta purus ubas.
Pagkatapus pinaliw̓utan na yang kaubasan na ta mga batung tinarutug.
Pagkatapus may yuntung binangbangan nang binuat ang lilikdan yang mga burak na ang may saralug̓an ka yang wai nag.
Pagkatapus nagpakdëng pa ta barantayan.
Atiing matapus na ra yang tanan ang atia,
ipinaagsa na ra yang kaubasan na tung mga tau.
Pagkapiar na tung nira,
dayun dang nagliit ang minangay duun tung dumang banwa.
34 Numanyan pagkaw̓ut da yang kutitsya na,
nagtuw̓ul da tung mga turuw̓ulun nang mamansiangay ra duun tung mga agsadur na ang para ëklan da nira yang kaparti na tung patëbas.
35 Numanyan yang binuat yang mga agsadur na,
pinagdëëp da ilëm nira yang mga turuw̓ulun nang atia.
Yang sam bilug pinagtaraw̓angan da nira ta pamalu,
yang sam bilug inimatay ra ilëm nira,
yang sam bilug pinagbatu ra ilëm nirang asta napatay.
36 Utru si pinaangayan si yang may prupidad tung mga turuw̓ulun nang duma ang mas pang dakëlë kay tung primiru,
ang pagkatapus maning kang pisan tia yang binuat tung nira yang mga agsadur.
37 Numanyan tung kauri-urian da,
anday dumang tinuw̓ul nang mangay duun,
yang ana na mismu.
Mag̓aning tung sadili na,
‘Simpri galangën ka ëngëd nira yang anaw.’
38 Piru mabandaw ra yang mga agsadur ang ya ra yang ana yang may luak ang magkakaw̓ut da,
dayun dang namagkërësën ang mag̓aning,
‘Naa pala taa rag panganing yang manubli tung kaubasan ang naa.
Maayën pa,
imatayën ta ra ilëm ug̓ud yatën da yang surubliën na ra rin ang naa!’
ag̓aaning.
39 Purisu tung pagkaw̓ut na,
dayun da ka man nirang dinëëp ang ginuyuran duun tung lua yang kaubasan ang inimatay.
40 Ta,
kung kumaw̓ut da nganing yang may prupidad,
unu pa w̓asu ay buatën na tung mga agsadur nang atia?”
41 Mag̓aning ka tanirang namansituw̓al,
“Talagang pangimatayën na ra ilëm yang mga taung atiang durug kalalain.
Ang pagkatapus yang kaubasan na,
ipaagsa na si tung duma ang ya ray mamagpakdul tung anya yang kaparti na ang kada kaw̓utun yang patëbas,”
mag̓aning.
42 Mag̓aning ka ti Jesus ang nagsugpat,
“Siguru nabasa mi ra ka yang sasang pananglit ang napabtang tung kasulatan ang may batu unung pinasag̓i ang ya ray pinangindian yang mga manigpakdëng yang balay ang anda unu ay kuinta na,
ang pagkatapus ya pa ka ëngëd unu ay nagluang pinakaimpurtanting batung paniëlan yang lëbat yang intirung balay.
Anda unu ay dumang nagbawing nagpabalik tung batung atiing pinangindian da nira,
kung indi,
mismu unu ti Yawi ang duun da unu agpaninluay ta mupia yang mga taung pamagpaniidh.
43-44 Purisu iugtulu tung numyu,
ta yamung mga masigkanasyunung mga Judio,
kumus pinakdulanamu ra yang Dios ta lugar ming magpalg̓ud da rin tung palaksu yang paggaraëmën na tung pagpangabui mi,
ang pagkatapus nagpakuindiamu ra ka ëngëd,
tay anday dumang buatën na,
bawiën na ra ilëm tung numyu yang kaayënan ang atia.
Pagkatapus pakdulan na ra ta lugar yang duma ang kuinta nasyun ka ang ya ray mangapagpalua ta nag̓auyunan na ang magkabag̓ay ka tung mga taung kumpurming pagpagaëm tung anyai.”
45 Numanyan yang mga paring atiang arabubwat ta katëngdanan may yang mga Pariseo,
tung pagpamati nira tung mga pananglit ang atiang ipinagngël ni Jesus,
nasiman da nira ang naa pala tanira ray nag̓apatëmëngan na.
46 Purisu tinag̓aman da rin nirang ipadëëp.
Kasu ilëm pamangaman tung mga taung atiang buntun ay natëtëngëd yang pagpabëtang nira tung ni Jesus,
talagang pag̓atuw̓ul yang Dios ang magpalatay yang bitala na.