Nag̓ipananglit Ni Jesus Yang Mga Tauan Na Tung Mga Manig̓ubra Ang Pinapagturupu Ra Ilëm Yang Ag̓alën Nira Ta Suul (20:1-16)
20
Mag̓aning ti Jesus ang nagsugpat,
“Ag̓aningënamu ra yëën ta maning tia ay kipurki yang palaksu yang paggaraëmën yang Dios tung mga tau,
maning taa tung ipananglitung naa.
May sasang taung may kaluakan naa.
May sasang kaldaw ang atiing timpranu pang pisan,
nag̓angay ra duun tung palingki ang para mangaw̓ang da ta mga taung mamag̓ubra duun tung kaluakan na.
2 Namag̓iritsuan da tanira ang yang suul nira kumpurmi yang kinaldaw ang kadagmitan ang nag̓isuul tung mga tau tung lugar ang atii.
Pagkatapus pinanuw̓ul na rang mamag̓ubra ra duun tung kaluakan na.
3 Numanyan atiing pag̓alas nuibi rang timpranu,
nagbalik si duun tung palingki.
May mga taung naita nang pamagkërërëngan da ka ilëm asan ang pamag̓istambay.
4 Purisu dayun na rang pinag̓aning ang,
‘Ala,
pati yamu ag̓aw̓angënamu ra ka yëën ang mag̓ubra duun tung kaluakanu.
Suulanamu ka yëën ta magkatama.’
5 Purisu dayun da ka man ang namag̓angay duun ang namag̓ubra.
Numanyan atiing kërëng da yang kaldaw,
maning si ka tii yang binuat yang may kaluakan.
Pati tung alas tris da yang apun,
ya ka.
6 Numanyan atiing pag̓alas singku ra yang apun,
nagbalik sing uman duun tung palingki.
May mga taung duma ang naita na si kang pamagkërërëngan da ka ilëm asan.
Purisu dayun na ra kang pinag̓aning ang ‘Ëëy,
ayw̓a nag̓apunamu ra ka ilëm taa ang anda ka pala ay nag̓aubra mi?’
7 Mag̓aning ka tanirang namansituw̓al,
‘Ayw̓a naang anda kay nagpaubra tung yamën.’
Mag̓aning ka yang may tanëk ang nagtimalës,
‘Ala,
pati yamu ag̓aw̓angënamu ra ka yëën ang mag̓ubra duun tung kaluakanu.’
8 “Taa numanyan atiing apun dang pisan yang kaliw̓utan,
mag̓aning yang may kaluakan tung kapatas na,
‘Ala,
guuyan mu ra kanay yang mga ubrirus ang panuulan.
Impisaan mu ra ta suul yang nangauring pisan ang pinangaw̓angu ang pagkatapus ipaluslus mu rang panuulan ang asta kaw̓utun mu yang nangatkaw ang pinangaw̓angu.’
9 Purisu simanyan yang kumpurming pinangaw̓ang tung alas singku,
ya ray pinamakdulan da yang mga suul nira ang ya ray ipinatupu tung sëlëd sang kaldaw yang ubra nira.
10 Maning dang maning ang asta kinaw̓ut da yang nangatkaw ang pinangaw̓ang.
Yang kalaum nira,
mas abwat yang marisibi nira,
piru yang ipinakdul tung nira ya ka ilëm yang isinuul tung kadaklan ang ipinatupu tung sëlëd sang kaldaw.
11-12 Numanyan pagkarisibi nira yang mga suul nira,
dayun dang namagriklamuan tung may kaluakan ang mag̓aning,
‘Yang mga taung atiang nangauring pinangaw̓ang mu,
sang uras da ka ilëm yang ipinag̓ubra nira.
Piru yami nagbëw̓ëëk pa yang mga ulas yamën tung sëlëd mag̓apun ang durung pisan agkakinit yang kaldaw ang pagkatapus ya ra ka ilëm papagpariu-pariuay mu yang panuul mu tung yamën may tung nira?’
13 Mag̓aning ka yang may kaluakan ang minlës tung sam bilug tung nira,
‘Ungkuy,
bëlag̓an kang malain yang pag̓abuatu tung nuyu.
Tutal nagpauyuna ra ka ang yang suul mu kumpurmi yang kinaldaw ang kadagmitan ang nag̓isuul taa tung yatën.
14 Purisu ëklan mu ra ilëm atiang suul mung mulik.
Ay yang gustuu ang yang kumpurming nag̓isuulu tung nuyu ya kay nag̓isuulu tung taung naang nauring inaw̓angu.
15 Ayw̓a,
anday këtëlung magkalalangan natëtëngëd tung kuartaw ang kumpurming unu pay nag̓alëlyag̓anu?
Muya yawa ra ilëm mag̓aiw̓ëg tung mga aruman mu.’”
16 Numanyan dayun dang nagsugpat ti Jesus yang bitala nang mag̓aning,
“May pag̓atëlëngan ta aranëk simanyan ang ya ray ipaabwatay tung uri ig may pag̓atëlëngan ta abwat simanyan ang ya ra kay iparanëkay tung uri,”
mag̓aning.
Maklung Mainambit Ni Jesus Yang Dapat Ang Mapasaran Na Tung Uri Ang Durug Liwag (20:17-19)
17 Taa numanyan,
ti Jesus sigi-sigi ra yang pagparanawën nang panungul duun tung Jerusalem,
kasiraanami ra kang nag̓apangugyatan nang sam puluk may durua.
Numanyan tung pagparanawën yamën tung karsada,
ipinampaligbinami ra kanay anya ay may gustu nang iksën tung yamën ang yami yami ra ilëm.
18 Mag̓aning tung yamën,
“Ta,
naawita rag panungul ang panganing duun tung Jerusalem.
Muya mabërëngamu tung ianingung naa tung numyu.
Yuung pag̓aningën ang Maninga Tau,
anday dumang mainabu tung yëën duun tung Jerusalem,
kung indi,
iintrigaw ra tung pudir yang mga paring arabubwat ta katëngdanan may yang mga sag̓ad tung mga urdinansa,
ang pagkatapus sintinsiaanaw ra nira ang ipaimatay.
19 Pagkatapus dayunaw si ka nirang iintriga tung pudir yang bëlag̓an mga masigkanasyun ta ang anda ëngëd ay pag̓intindi nira tung Dios.
Buatënaw ra ilëm nirang sasang kayaman,
pagkatapus paburdunanaw ka nira bakluaw ipalansangay nira tung krus.
Piru pagkaw̓ut yang yaklung kaldaw,
pabungkarasënaw ra ka ëngëd yang Dios,”
ag̓aaning.
Agbaliskarën Da Ni Jesus Yang Sistima Yang Kaliw̓utan Ang Naa Natëtëngëd Tung Pag̓ërëkëlën Ta Katëngdanan (20:20-28)
20 Numanyan yang kasawa ni Zebedeo ya ray nagpalëngët tung ni Jesus,
kasiraan da ka tanira yang mga ana nang durua nga laliianb.
Pagpalëngët nira,
dayun dang nagluud yang nanay nira tung pinagtaralungaan nira ni Jesus ay may gustu nang ingalukun tung anya.
21 Mag̓aning ti Jesus tung anyang nagbugnu,
“Unu pay gustu mu,
Inëëy?”
Mag̓aning ka yang nanay nirang nagtimalës,
“Kung maimu ilëm tung nuyu,
pangakuay ka ang kung maggaraëmëna ra nganing,
yang mga anaung naang durua pakarungun mu ka tung tëpad mung magtimbang.”
22 Mag̓aning ka ti Jesus ang nagtimalës ang asan da iparumbuay na tung duruang atiang magputul,
“Indi mi ka ilëm nag̓amarësmësan kung unu ra ilëm ay nag̓aingaluk mi.
Basu kayanan mi kang magpapinitinsia ang katulad ka tung dapat ang pasaranu?”
Mag̓aning ka tanirang nansituw̓al,
“Ëë,
kayanan ka yamën.”
23 Mag̓aning si ti Jesus tung nirang nagsugpat,
“Mapasaran mi ra ka man yang mga pinitinsia ang katulad ka tung mapasaranu.
Piru kung tinu pay makarung tung tëparung magtimbang tung uri,
bëlag yuuy may pudir ang maglug̓ut,
kung indi,
ya ray nag̓itig̓ana ni Ama tung kumpurming tinu pay pinilik nang kumarung,”
mag̓aning.
24 Numanyan atiing nabalitaan da yamën ang mga kaarumanan nirang sam puluk,
anday duma,
nangimunami ra ta mupia tung mga aruman yamën ang atiang duruang magputul.
25 Purisu yaming tanan,
dayunami rang ginuuyan ni Jesus ang magpalëngët tung anya.
Mag̓aning tung yamën,
“Nag̓askëan mi ra ka ang tung kaliw̓utan ang naa yang pamangatëngdanan tung mga tag̓a duma-rumang nasyun,
yang katëngdanan nira ya ag̓ipandëëg-dëëg̓ay nira tung mga kinasakpan nira.
Muya-muyang manuw̓ul tung mga sakëp nira ang para ilalaën da nirang yay abwat tung nira.
26 Piru tung numyu,
indiaw malëlyag ang yay usuyun mi yang sistima nirang atia,
kung indi,
kung tinu pay malëlyag ang tëlëngan ta abwat asan tung numyu,
dapat ang yang pagpabëtang na tung sadili na tanya sasa ka ilëm ang turuw̓ulun ming mga kaarumanan na.
27 Dispuis kung tinu pay malëlyag ang magmangulu tung numyu,
dapat ka ang yang pagpabëtang na tung sadili na tanya sasa ka ilëm ang kirëpën mi.
28 Bilang magpakbungamu tung yëën ang pag̓aningën ang Maninga Tau.
Ay yang katuyuanu,
bëlag̓an ang mag̓aning ang para yuuy magpanuw̓ul tung mga taung magpasikasu,
kung indi,
ang para yuuy mag̓ing turuw̓ulun nirang mag̓arasikasuën tung nira,
ang yang inangayu ëngëd,
magpatumbasaw yang linawaw ang para durung mga taung mapaluasu tung pagpakirëpën nira tung kalëlyag̓an nirang magpakasalak,”
mag̓aning.
Yang Pagpabuskad Ni Jesus Tung Mata Yang Durua NGa Burayan (20:29-34)
29 Taa numanyan,
atiing magluluaami ra na Jesus tung lansangan ang Jerico,
buntun ang pisan yang mga taung pamagpakignunut tung anya.
30 Numanyan may durua nga burayan ang kumarungan tung binit yang karsada.
Pagkabalita nira ang ti Jesus magtataklib da asan,
dayun dang namagkëkëndalën ang mag̓aning,
“Amëëy,
kumus yawa ray manubli tung paggaraëmën ni Adi David,
ildawayami ka!”
31 Piru ya ra ampalaray yang mga taung atiang buntun.
Piru bëlag ya mamag̓ipës,
kung indi,
mas pang ya namagkëkëndalën ang namagkëkëndalën ang mag̓aning,
“Amëëy,
yawang manubli ra tung paggaraëmën ni Adi David,
ildawayami ka!”
32 Atii dayun dang nagtadëng ti Jesus ang guminuuy tung nirang mag̓aning,
“Ta,
unu pay gustu ming buatënu para tung numyu?”
33 Mag̓aning tanirang nansituw̓al,
“Aay amëëy,
gustu rin yamën ang mabuskad da yang mga mata yamën.”
34 Atii ya ra ngaildaw ti Jesus ang nagdëën tung mga mata nira.
Pagkadëën na,
atiang lag̓i nangaita si ka man.
Pagkatapus dayun da kang namagpakignunut tung anya.