Yang Nag̓ipananglit Ni Jesus Natëtëngëd Tung Kadërërëpën Yang Mga Tauan Nang Pangambay Tung Dios (18:1-8)
18
Numanyan may sam bilug sing pananglit ang ipinagngël ni Jesus tung mga tauan na.
Yang pag̓asikad na ang tanira pirming magpadërëp ang mag̓ampu tung Dios,
ang maskin magpanaw pa tung mabuay-w̓uay yang tuw̓al na,
indi ka ëngëd magpaluw̓ay yang mga kinaisipan nira.
Lucas 18:1-17
2 Mag̓aning yang pananglit na,
“Numanyan may sasang wis ang pagtinir duun tung sasang lansangan.
Yang wis ang naa,
anday pag̓ëlëd na tung Dios ig anda kay panggalang na tung mga masigkatau na,
maskin tinu pa.
3 Numanyan may sasang balung baw̓ay tung lansangan ang atii.
Pirming pagpabalik-balik tung wis ang pagpataw̓ang ëngëd ang mag̓aning,
‘Maginuung wis,
taawaw si pagdangëp tung nuyu,
taw̓angay kang dipindiran tung taung atiing panlëpës tung yëën,’
ag̓aaning.
4 Nabuay ra yang pagpabalik-balik na,
piru indi ra ka ëngëd sinapët yang wis.
Numanyan atiing masyadu ra ëngëd yang pagpataw̓ang yang balu,
napag̓isip da yang wis.
Pinapagkësën-kësën na ra yang isip nang maning taa:
‘Yuu,
tung bag̓ay anday pag̓ëlëru tung Dios,
pagpadamëlaw ra ilëm yang ityuraw tung mga masigkatauu.
5 Abaa piru magamu ra ilëm tung kuluu yang pagpabëra-w̓ëra yang balung naa tung yëën.
Maayën pa dipindiranu ra ilëm tung makali ang para mapalus da tung kuluu.
Muya kung indi taw̓anganu,
paluw̓ayanaw ra ilëm anya ta pagpabalik-balik.’”
6 Numanyan mag̓aning ti Ginuu tang nagpasanag,
“Ta,
isipën mi ra kanay ta mupia yang inaning yang wis ang atiang durug kasayud ta ug̓ali.
7 Yang Dios pa kaya ang pulus tama yang pag̓abuat na,
indi w̓a mas pang magdipindir tung mga tauan nang sadili ang yay pangambay tung anyang pagpataw̓ang kaldaw law̓ii?
Ayw̓a kanisip mi tia paw̓aya-w̓ayaan na ra ilëm tanira?
8 Iugtulu tung numyu,
dipindiran na tia tung makali.
Ug̓aring ilëm,
ta yëën ang pag̓aningën ang Maninga Tau,
kung kaw̓utun da nganing yang uras ang ipaglëkatu taa tung kaliw̓utan ang naa ang duru ka man agliwag yang nag̓apasaran yang mga tau,
duru pa w̓asung kaw̓utanung pagpadayun pa ka ëngëd yang pagtaralig̓ën nira tung yëëna?”
Yang Pagpaabwat, Ya Iparanëkay, Yang Pagparanëk, Ya Ipaabwatay (18:9-14)
9 Numanyan may sasa si kang pananglit ang ipinagngël ni Jesus.
Yang rumbu na para tung duma asan ang pagtalig tung mga sadili nira ang tanira nagkabag̓ay ra tung pagtërëlëngën yang Dios ang yang mga masigkatau nira yay nag̓alamku nirang tëlëb ta kasalanan.
10 Maning taa yang pananglit na,
“Simanyan may durua nga tauan ang nanungul duun tung pagtuuan ang pinakalusu ang para magtuu tung Dios.
Yang sam bilug Pariseo,
yang sam bilug manigpanukut ta mga balayaran tung gubirnu.
11 Numanyan,
pagkaw̓ut nira duun,
naang Pariseo nagpaag̓ës-ag̓ës da tung kadaklan ang yay nag̓apamiruan na ang pagkatapus nag̓ampu ra ta maning taang pag̓arampuën ang ya ka ag̓ipagngëlay na tung sam bilug.
‘Ampuanung Dios,
pagpasalamataw tung nuyu ang yuu bëlag̓anaw pariu tung kadaklan ang mga manlëlëpës,
mga mandaraya,
mga maniglimbung,
ang katulad da ëngëd tung manigpanukut ang naang talagang tëlëb ang pisan ta kasalanan.
12 Ay ta yëën,
tung sëlëd san linggu may duruang kaldaw ngani ang ag̓ipamlëku yang pagparanganënu.
Dispuis yang tanan ang mga pangitaw pati yang tanan ang mga pruduktuu,
luw̓us agparti-partiënu ngani ta sam puluk ang parti ang para yang sam parti yay nag̓ikdulu tung nuyub,’
ag̓aaning.
13 Taa numanyan naang manigpanukut tanya,
duun da ilëm ngakdëng tung alawid-lawid tung kadaklan ang pamagtuu ang yang anyang pag̓arampuën,
indi ra nganing natingara tung langit,
kung indi,
ya ra ilëm mamukpuk tung dëbdëb naang mag̓aning,
‘Ay Ampuanung Dios,
duruaug kakinasalananën.
Ildaway kang patawarën ug̓ud indiaw dangatën yang kasisilag̓ën mu.’”
14 Numanyan mag̓aning ti Jesus ang nagpasanag,
“Iugtulu tung numyu,
yang taung naang sam bilug,
baklu ra nandanëk ang minulik tung balay na,
ya ra kang lag̓i ay inusgaran yang Dios ang salu rang pisan tung pagtërëlëngën na,
bëlag̓an yang sam bilug.
Kipurki kung tinu pay pagpaabwat tung sadili na,
ya iparanëkay yang Dios ang kaskasay.
Piru kung tinu pay pagparanëk tung sadili na,
ya ipaabwatay nang tapnayay,”
ag̓aaning.
Yang Taung Risibiën Yang Dios Ya Ra Yang May Pagkamula Na (18:15-17)
15 Taa numanyan maskin mga mamulang gërëg̓ësyë,
pag̓apangkëlan da yang mga ginikanan nira duun tung ni Jesus ang para pampabisaën da nira tung anya.
Piru pagkaita yang mga taung atiang nag̓apangugyatan ni Jesus,
diritsyu rang sinambëng nira.
16 Piru ti Jesus tanya,
anday dumang binuat na,
yang mga mamulang atia ginuuyan nang mamagpadayun da ka ëngëd tung anyang mamagpalëngët.
Pagkatapus dayun na rang inaning yang mga taung nag̓apangugyatan na ang “Ëëy,
yang mga mamulang atia,
paw̓ayaan mi ra ilëm ang mamagpalëngët da tani tung yëën.
Indi mi ra ëngëd pagsagangën,
ay kipurki kung tinu pay may pagtalig nira tung Dios ang katulad ka tung pagtaralig̓ën yang mga mamulang naang bug̓us tung mga ginikanan nira,
lug̓ud da tung mga taung pamagpagaëm dang bug̓us tung Dios.
17 Iugtulu tung numyu yang kamatuuran,
kung indiamu ra magpakbung tung mga mamulang mapinagparanëk tung mga may idad tung nira,
tay puis,
indi mi ra ëngëd maispirinsiaan tung mga sadili mi kung unu pay palaksu yang paggaraëmën yang Dios tung pagpangabui mi.”
Yang Sasang Manggaranën Durug Liwag Ang Magpalamtuk Yang Pundu Yang Kinaisipan Nang Magpagaëm Tung Dios (18:18-30)
18 Numanyan may sasang taung may katëngdanan duun tung banwang atii ang ya ray nagbugnu tung ni Jesus ang mag̓aning,
“Amëëy,
nag̓askëanu ang yawa sasang maayën ang tau.
Kung mga sarang tung nuyu,
may gustuu rin ang talimaanënu tung nuyu.
Unu pay dapat ang buwatënu ang para mapagpasapënaw tung Dios ang anday katapus-tapusan?”
Lucas 18:18-43
19 Mag̓aning ka ti Jesus ang nagtimalës,
“Muya indi mu ilëm nag̓askëan kung unu pay linagpakan na atiing inaningaw ra nuyung maayën.
Anday dumang sarang ang maaning mung maayën kung indi ultimu ilëm yang Dios.
20 Yang mga katuw̓ulan na,
nag̓askëan mu ra ka siguru.
Ulitënu ra kanay ang ipadëmdëm tung nuyu.
‘India maglimbung tung kasawa mu,
india mangimatay tung masigkatau mu,
india manakaw,
india manistigus ta bukli tung katalungaan yang ustisia,
ig galangën mu ti tatay mu may ti nanay mu.’”
21 Ag̓aaning ka yang taung atiang nagtimalës,
“Piru ëlat kanay,
Amëëy.
Yang tanan ang atiang mga katuw̓ulan ang sinambit mu,
luw̓us dang nag̓atumanu mag̓impisa pang atiing paran-paranaw pa.”
22 Pagkagngël ni Jesus yang tuw̓al na,
mag̓aning tung anya,
“Ya ra ilëm taa yang pagkakulang tung nuyu.
Mulika ra kanay.
Yang tanan ang kamanggaran mu ipaalang mu ra.
Yang kabayaran nang kuarta ipamakdul-pakdul mu ra tung mga maliliwag̓ën.
Kung yay tumanën mu,
ay tia simpanana ra yang Dios ta kamanggaran mu duun tung langit.
Pagkatapus ta pamakdul-pakdul mu,
magbalika ra ka tani ang magpaugyat tung yëën,”
mag̓aning.
23 Numanyan pagkagngël na tia inampayan da ta kapupungawën nang duru.
Ay ya pa ag̓ari,
durung kamanggaran na.
24 Numanyan pagkaita ni Jesus tung anyang magpungawën da,
dayun dang nagbitala tung mga tau ang mag̓aning,
“Durug liwag ang yang sasang manggaranën magpalamtuk yang pundu yang kinaisipan nang magpagaëm ta bug̓us tung Dios.
25 Kung maliwag ngani ang yang kamilyu pumuyuk tung buli yang tingway,
mas pang maliwag ang yang sasang manggaranën magpalamtuk yang pundu yang kinaisipan nang magpagaëm ta bug̓us tung Dios,”
ag̓aaning.
26 Atii,
yang nangagngël tung inaning ni Jesus ang atia,
namag̓araning-aningan da,
“Tay,
kung maning tii pala ang maski nganing yang mga manggaranën ang kanisip tang alëngët tung Dios,
indi nganing pala matapnay,
ya pa yang kadaklan ang mga tau?”
27 Mag̓aning ka ti Jesus ang nagtuw̓al,
“Yang indi kayanan ta mga tau,
yay kayanan yang Dios,”
ag̓aaning.
28 Atii,
ti Pedro ya ray nabngang mag̓aning,
“Tëëd mu,
Amëëy,
ta yaming pagpaugyat tung nuyu,
pinalpasan da yamën yang tanan ang nabtang tung pudir yamën basta magpakignunutami ra ilëm tung nuyu.”
29-30 Mag̓aning ti Jesus ang nagtimalës tung nirang tanan,
“Iugtulu tung numyu,
kumpurming tinu pay namutwan tung sadiling pamalay-w̓alay na ubin tung kasawa na,
ubin tung mga putul na,
ubin tung mga ginikanan na,
ubin tung mga ana na man arangan da ilëm tung pagparakaw̓utun na tung mga tau natëtëngëd tung paggaraëmën yang Dios ang naang baklung pag̓atukuru,
ya ray pakdulan na ta kapakli yang tanan ang atiang pinamutwanan na ang pira-pira rang dubli numanyan tung panimpung naa ig tung baklung panimpung kaw̓utun tung uri,
magpasapën da ka tung Dios ang asta tung sampa,”
mag̓aning.
Maklung Mainambit Ni Jesus Ang Natëtëngëd Tung Kamatayën Na (18:31-34)
31 Numanyan yang mga tauan ni Jesus ang atiang sam puluk may durua,
pinampaligbin nang pinampasanag̓an ang inaning,
“Ta,
taawita rag panungul ang panganing duun tung Jerusalem.
Muya mabërëngamu tung ianingung naa tung numyu.
Kung kumaw̓utita ra nganing duun,
magkamatuud da yang tanan ang nagkarasulat yang mga manig̓ula natëtëngëd tung yëën ang pag̓aningën ang Maninga Tau.
32-33 Kipurki iintrigaaw ra tung pudir yang bëlag̓an mga masigkanasyun ta ang anda ëngëd ay pag̓intindi nira tung Dios.
Buatënaw ra nirang sasang kayaman,
dëëg-dëëg̓anaw ra ka nirang lawayan yang mga tinanguniu ang pagkatapus pikadaanaw ra ka nira ta burdun bakluaw ra imatayay nira.
Piru tung pagkaw̓ut yang yaklung kaldaw,
pabungkarasënaw ra ka ëngëd yang Dios,”
mag̓aning.
34 Piru yang mga aruman nang pinag̓aning na,
midyu tung anda ray naërëm.
Midyu tung sasang pasig̓ëm ang indi ëngëd nira namarësmësan kung unu pay nag̓adapatan na.
Yang Pagpabuskad Ni Jesus Tung Mata Yang Sasang Buray (18:35-43)
35 Numanyan atiing alëngët da tanira tung Jerico,
may sasang buray ang yag kakarung tung binit yang dalan ang pagpalimus.
36 Numanyan,
pagkasinti na ang may mga taung buntun ang pamagtaklib da,
nagtalimaan da tung mga taung katëpad na kung unu pay nag̓adapatan na.
37 Mag̓aning ka yang dumang nagtimalës,
“Ti Jesus ang atiang tag̓a Nazaret magtataklib da.”
38 Pagkagngël na ang ti Jesus da tia,
dayun dang nagkëkëndalën ang mag̓aning,
“Jesus,
yawang manubli ra tung paggaraëmën ni Adi David,
ildaway ka!”
39 Numanyan yang mga taung atiang pamagtukaw tung nirang sam paluyug̓an,
ya ray namagsambëng tung anyang mag̓ipës da.
Piru bëlag ya mag̓ipës,
kung indi,
mas pang ya magkëkëndalën ang magkëkëndalën ang mag̓aning,
“Yawang manubli ra tung paggaraëmën ni Adi David,
ildaway ka!”
40 Numanyan diritsyu rang nagtadëng ti Jesus ang nagkalalangan tung mga tau ang yang buray guyuran da kanay duun tung anya.
Numanyan pagkaw̓ut yang buray,
dayun dang tinalimaan ni Jesus ang inaning,
41 “Ta,
unu pay gustu mung buwatënu para tung nuyu?”
Mag̓aning yang buday ang nagtuw̓al,
“Ay Amëëy,
gustuu rin ang maitaw si.”
42 Ag̓aaning ti Jesus ang minlës,
“Ala,
maitaa si!
Natëtëngëd itinalig mu ra tung yëën yang sadili mu,
naulikan da tia!”
43 Atii,
lag̓i-lag̓ing naita si ka man.
Pagkatapus dayun dang nagpakignunut tung ni Jesus ang sigi-sigi ra ilëm yang pagdarayawën na tung Dios.
Asta yang tanan ang mga taung nangaita tung nainabung atia,
duru kang pagdarayawën nira tung Dios.