Kanugun Yang Mabtangan Yang Kumpurming Magpatalang Tung Sasang Pagtalig Da Tung Ni Jesus (17:1-3a)
17
1-2 Numanyan mag̓aning ti Jesus tung mga taung nag̓apangugyatan na,
“Indi maimung anday makanayan ta ipagpatalang yang sasang taung may pagtalig na tung yëën ang asta magpakasalak da ubin mamalpas da dayun tung yëën.
Ug̓aring kung tinu pay matëngëran yang pagpakasalak na ubin yang pamalpas na,
kanugun yang pagkabëtang na tung uri.
Ay mas malbat yang kalainan ang maagmaan na kay tung buntug̓an da ilëm duun tung alauran.
Indi ilëm magdayun ang papagtalangën na yang maskin sam bilug ang aranëk ta pagkabëtang ang pariu ka tung mga mamulang naa.
Lucas 17:1-19
Yang Pagparatawarën Tung Aruman Tang Nagpakasalak Tung Yatën (17:3b-4)
“Dispuis pa kung may aruman ming nagbuat ta kasalanan tung numyu,
pakigkësënan mi ta matinlu ang basi pa ra ilëm madëmdëman na yang binuat na.
Kung tanya aminadu tung kasalanan na,
ay tia patawarën mi.
4 Maski pang muya-muyang magbuat ta kasalanan tung numyu ang pagkatapus kada magpakasalak,
kung aminën na ka tung numyu,
dapat mi ka ëngëd ang patawarën,”
ag̓aaning.
Andang Pisan Ay Indi Ta Kayanan Maskin Unu Pag Liwag, Kung Ustu Ilëm Yang Pagtaralig̓ën Ta Tung Dios (17:5-6)
5 Mag̓aning yang mga apustul ni Ginuu ta tung anya,
“Ginuu,
kung maimu ilëm,
taw̓angayami kang para mas dumakul yang pagtaralig̓ën yamën tung Dios.”
6 Mag̓aning ka ti Ginuu tang nagtimalës,
“Maskin mag̓adawa ra ilëm din agkadakul yang pagtaralig̓ën mi tung anya,
kayanan mi ra rin ang buatën yang pag̓atëlëngan ming midyu indi maimung buwatëna,”
ag̓aaning.
Yang Pagpaturuw̓ulun Yang Sasang Tumatalig Tung Ni Ginuung Jesus Bëlag̓an Pautang Ang Kanëëman Ang Ubligadung Balësan Na (17:7-10)
7 Mag̓aning si ti Jesus tung mga tauan na,
“Ipabëtangu,
yamu may sasang turuw̓ulun ming pag̓aradu,
ubin pagpastur tung kaayëpan mi.
Kung matapus na ra nganing yang ubra nang mulik da tung balay,
magkatama w̓asung aningën mi ang tanya ra kanay ay tukaw ang mamangan?
8 Bëlag bang yang ianing mi tung anya ang tanya ra kanay ay magsimpan yang mayapun mi ang pagkatapus mangimara rang maglamisa tung numyu ang asta matapusamu ra ta pagyapun mi,
baklu ra mamangan tanya?
9 Ayw̓a,
may utang mi pang kanëëman tung turuw̓ulun ming atia natëtëngëd tung pagturumanën na yang itinuw̓ul mi tung anya?
10 Maning kang pisan tia tung numyung mga tauanu.
Kung matuman mi ra nganing yang tanan ang ag̓ituw̓ulu tung numyu,
yamu ra ag̓aaning,
‘Yami,
mga turuw̓ulun mu ka ilëm.
Bëlag bag̓ay ang yami balësan mu pa.
Tutal,
yang tinuman yamën,
ya ra ka ilëm yang dapat kang lag̓ing ubligarën yamën,’”
ag̓aaning duun ti Jesus tung nira.
Pagpamaayën Ti Jesus Tung Sam Puluk NGa Laliian Ang May Dispirinsiang Makamamansa Tung Ulit Nira (17:11-19)
11 Taa numanyan sigi-sigi yang pagparanawën ni Jesus ang pagdistinu duun tung Jerusalem.
Duun tanya napanaw tung pag̓ëlaan yang Samaria may yang Galilea.
12-13 Numanyan,
atiing alëngët da tung sasang baryu,
may napanawan nang sam puluk nga laliian ang may mga dispirinsia nira tung mga ulit nirang makamamansa tung sadili nira.
Namagtadëng da ilëm ang namagpadistansia ang sigi ra ilëm yang pagkëkëndalën nirang mag̓aning,
“Maginuung Jesus,
ildawayami ka!”
14 Numanyan pagtëlëng ni Jesus tung nira,
dayun na rang inaning,
“Ala,
mangayamu ra kanay duun tung mga paring masigparikisa tung nira yang mga tinanguni mi kung puidiamu rang tugtan nirang magpakilakët si tung mga kaarumanan mi,”
mag̓aning.
Numanyan tung pagparanawën nira,
namagmaayën da.
15 Numanyan yang sam bilug,
mapanimanan na yang tinanguni nang maayën da,
diritsyu rang nagbalik tung ni Jesus ang durug tunul yang busis nang nagdarayawën tung Dios.
16 Pagkaw̓ut na tung ni Jesus,
ya ra papadagpa tung pinagtalungaan nirang durua ang nagpasalamat.
Naa pala yang taung naa sasang tag̓a Samaria.
17 Numanyan pagtëlëng ni Jesus tung anya,
dayun dang nagbitala tung mga aruman nang mag̓aning,
“Bëlag bang sam puluk nga tauan ang namagmaayën da?
Ay ra kaya yang siam?”
18 Naa pala anda ray dumang nagbalik taa ang para magdayaw tung Dios,
ya ra ilëm taang sam bilug ang bëlag ka pa man masigkanasyun ta?”
ag̓aaning.
19 Pagkatapus dayun na rang binugnu yang taung atiang pinamaayën nang inaning,
“Ala,
këmdënga ra,
padayunan mu ra kanay yang pagparikisa mu tung mga pari.
Natëtëngëd itinalig mu ra tung yëën yang sadili mu,
nagmaayëna ra,”
ag̓aaning.
Yang Paggaraëmën Yang Dios Naa Rang Lag̓i Tung Tëpad Piru Yang Kabug̓usan Na Ya Pa Kay Ipaluaay Ni Jesus Tung Paglëkat Na (17:20-37)
20 Numanyan may mga Pariseong namagtalimaan tung ni Jesus kung sanu pa kumaw̓ut yang paggaraëmën yang Dios tung bilug ang kaliw̓utan.
Ag̓aaning ti Jesus ang nagtuw̓al,
“Yang paggaraëmën yang Dios,
anday mga sinyalis nang matandaan kung sanu pa kumaw̓ut.
Lucas 17:20-37
21 Bëlag kang igbaralita ang mag̓aning,
‘Uay,
tëlëngan mi w̓a,
nani ra!’
ubin ‘Uay,
atii ra!’
Kipurki yang palaksu yang paggaraëmën yang Dios naa ra tung tëpad mi,
pag̓andar da nganing,”
ag̓aaningb.
22 Pagkatapus dayun dang nagbira ang nagpasanag tung mga taung atiang nag̓apangugyatan nang mag̓aning,
“May uras ang kaw̓utun ang duru rang paglalangkag̓ën mi tung yëën ang pag̓aningën ang Maninga Tau ang para balikanamu ra yëën tung makali ug̓ud ipalapusu ra yang kabug̓usan yang paggaraëmën yang Dios tung bilug ang kaliw̓utan.
Piru indi mapalapusu mintras indi pag kaw̓utun yang tipu nang kaldaw.
23 Muya aningënamu ta mga tau ang,
‘Uay,
yang pag̓aningën ang Cristo nani ra!’
ubin aningënamu nirang,
‘Uay,
atii ra!’
Indiamu ëngëd magsagyap.
24 Kipurki ta yuung pag̓aningën ang Maninga Tau,
kung magpalapusaw ra nganing yang kabug̓usan yang paggaraëmën yang Dios,
maintindian da tung bilug ang kaliw̓utan.
Ay yang kaalimbawaan na,
maning pa tung kidlat ang inali yang singgat na ang bistu ra tung duw̓ali magduw̓aling langit.
25 Piru baklu ra ipalapusayu tia,
kaministiran ang mapasaranaw ra ta pinitinsiang durug lëbat natëtëngëd tung panambing tung yëën yang mga masigkanasyun ta.
26 Dispuis pa kung ya pa ag̓ari yang palaksu yang panimpu ni Noe,
yang pisan yang palaksu yang panimpu ang yuung pag̓aningën ang Maninga Tau makaliaw rang maglëkat.
27 Kipurki atii kanay,
baliwala ka ilëm tung mga isip yang mga tau yang sintinsiang magkakaw̓ut da tung nira.
Yang pinadayunan nirang pinabilug̓an ta mga isip nira,
ya ka ilëm yang mga pag̓urubraën nira tung pangaldaw-kaldaw ang katulad ka tung pagparanganën nira may yang pag̓irinëmën nira may yang pagkarasawaën nira may tung pagparakasawaan nira tung mga ana nira.
Ya ra ka ilëm tii yang inintindi nira ang asta ra ilëm kinaw̓ut yang uras ang ipinagsaay na Noe tung parka,
ang pagkatapus kuminaw̓ut da yang palëmpan ang ya ra kay nalmësan nirang tananc.
28 Pati yang mga tau atii kanay ang tag̓a Sodoma tung timpu pa ni Lot pariu kang pisan yang palaksu yang mga pag̓irisipën nira.
Baliwala ka ilëm tung mga isip nira yang sintinsiang magkakaw̓ut da tung nira.
Yang pinagamënan yang mga isip nira,
ultimu ka ilëm yang pagparanganën nira,
yang pag̓irinëmën nira,
yang pag̓aralangën nira ta mga kaministiran nira,
yang pagnirigusyuën nira,
yang pagluluakën nira,
may yang pagparakdëngën nira ta mga balay nira.
Asan da ilëm agtëtëgka yang mga isip nira.
29 Piru pagkaw̓ut yang uras ang na Lot namansiliit da duun tung siudad ang atiing Sodoma,
inaling pinabungsaran yang Dios yang banwang atii ta apuy ang midyu tung kuran ang may kalakët na kang asupri ang ya ray nagsupuk tung nirang tanand.
30 Maning kang pisan tia yang palaksu yang pag̓irisipën yang mga tau kung uras dang yuung pag̓aningën ang Maninga Tau makaliaw rang maglëkat taa tung kaliw̓utan ang naa ang para magsintinsiaaw ra tung nira.
31 Kung kaw̓utun da nganing yang uras ang atia,
kung tinu pay pagpalimasmas tung sagpaw yang balay na,
indi na ra kanugunun yang mga ëkël-ëkël na duun tung kaklëran ang maning paranëkan na pang ëklan.
Ya ka yang taung duun dag kaw̓utay tung kaluakan na,
indi na ra balikan yang balay na.
32 Padëmdëman mi ra ilëm yang nainabu tung kasawa ni Lot atiing pagbalyëd nang nangandëm tung mga ëkël-ëkël nang nagkarabutwan duun tung Sodomae.
33 Kipurki kung tinu pay ag̓alëlyag ang yang sadili na ilibri na tung malain,
asan da nga kapa-kapaay na yang kaampiran na tung yëën.
Piru kung tinu pay mamirdi tung sadiling kalëlyag̓an na natëtëngëd ilëm tung yëën ang yuu ray nag̓ipalusu na ta gëgma na,
asan da nga siguruay na yang kaampiran na tung yëën ang yay pagnatisan nang asta tung sampa.
34 Iugtulu tung numyu,
tung uras ang atiang kaw̓utun,
kung alimbawa law̓ii yang ipaglëkatu,
puiding may durua nga tauan ang mag̓ëlkën ang pagdalan.
Yang sam bilug ëklan,
yang aruman na mabutwan.
35 Ubin may durua nga baw̓ayan ang pagtinaw̓angay ta paggaling yang bëyëd yang trigu,
yang sam bilug ëklan,
yang aruman na mabutwan.
36 Dispuis duun tung kaluakan puiding may durua ka nga tauan ang pamag̓ubra.
Yang sam bilug ëklan,
yang aruman na mabutwan,”
mag̓aning.
37 Numanyan mag̓aning yang mga tauan nang namagtalimaan,
“Ginuu,
ay pang banwaay kaya mainabu yang mga bag̓ay ang atia?”
Mag̓aning ti Jesus ang tuminuw̓al,
“Basta mainabu,
indi mataluk tia.
Magkapariu ra tung nag̓ipananglit yang mga mamaëpët ang kung ay pa unu ay may patay,
indi unu mataluk ay natëtëngëd duun ka unu pamaglangët ang pamagpatipay-tipay yang mga lamlam ang atiang pamamangan ta mga ayëp ang patay,”
ag̓aaning ti Jesus.