Nag̓ipananglit Ni Jesus Ang Dapat Mas Pa Patarëmën Yang Mga Tauan Na Yang Isip Nira Tung Pagpakignunut Nira Tung Mga Masigkatau Nira (16:1-8)
16
Utru si nagpagngël si ti Jesus ta sasang pananglit tung mga taung nag̓apangugyatan nang mag̓aning,
“May sasang manggaranën.
Yang manggaranën ang naa,
may kubransadur na.
Numanyan naugtul da tung manggaranën ang yang kamanggaran na unu nag̓apalangaasan da yang kubransadur na.
Lucas 16:1-18
2 Purisu anday dumang binuat yang manggaranën,
dayun na rang pinaguuyan yang kubransadur nang inaning,
‘Unu pa taang nag̓adëngël-dëngëlu ang natëtëngëd tung nuyu?’
Yang kubransadur na,
inding pisan nag̓iw̓ëk-iw̓ëk.
Mag̓aning si yang ag̓alën na tung anya,
‘Buinu,
ipakdul mu ra tung yëën yang tanan ang listaan yang mga agsaduru,
ay indi ra puidi ang yawa magpadayun pa tung pagkakubransadur mu taa tung yëën.’
3 Numanyan dayun dang luminampud yang maning kubransadur na rin.
Yang mabtangan na ya ray ipinagkësën-kësën na tung isip nang maning taa:
‘Abaa,
ya ra ag̓ari w̓asu taa,
naang magkuatënaw ra pa man yang ag̓alënu tung pagkakubransaduru?
Indiaw ka pa man makayan ang mag̓agsa,
makakaëyak kang magpalimusaw.
4 Aa,
nag̓askëanu ra yang pagpalusutanu.
Kung yay magdayun yang planuung naa,
maskin paliitënaw ra nganing tung ubraw,
may mga tau kang mag̓asikasu tung yëën tung mga pamalay-w̓alay nira,’
mag̓aning.
5 Purisu numanyan yang binuat na,
yang tanan ang atiang mga agsadur ang may mga paraulikan tung ag̓alën na,
luw̓us dang pinampaguuyan nang sasa may sasa ang kinsën.
Numanyan yang primirung kuminaw̓ut,
tinalimaan na ang,
‘Ta,
magkatama ka taa yang paraulikan mu tung ag̓alënu?’
6 Mag̓aning ka yang agsadur ang nagtuw̓al,
‘Ëë,
walung gatus ka man ang galun ang lana.’
Mag̓aning ka yang kubransadur,
‘Ia,
yang listaan mu.
Kumarunga ra kanay asan.
Umanën mu yang nabtang asan.
Ëpat da ilëm ang gatus yang ilista mu asan.
Kali-kaliën mu,
aa?’
7 Pagkatapus,
pagkaw̓ut yang nagdasun,
tinalimaan na kang,
‘Ta,
magkatama ka taa yang paraulikan mu tung ag̓alënu?’
Mag̓aning ka yang agsadur ang nagtuw̓al,
‘Ëë,
sang gatus ka man ang sakung trigu.’
Mag̓aning ka yang kubransadur,
‘Ia,
yang listaan mu.
Umanën mu,
walung puluk da ilëm yang ilista mu asan.’
Maning dang maning yang binuat na tung nirang tanan.
8 Numanyan tung pagpakdul na yang mga listaan tung ag̓alën na,
naskëan da yang ag̓alën na kung unu pay binuat na.
Pagkatapus ya rag dayaway na yang kubransadur na rin ang mandaraya,
bëlag̓an natëtëngëd tung pagdarayaën na,
kung indi,
natëtëngëd ginamit na yang isip na.
Kipurki duru ka man agkataku yang mga taung pamagpaguyud tung sistimang pangkaliw̓utan tung pagpakignunut nira tung mga masigkatau nira.
Kung isip-isipënu,
midyu magdërëëg̓ën nira ta kataku yang mga taung namampalaktëd da tung kasadlawan,”
ag̓aaninga.
Yang Nag̓ipasanag Ni Jesus Tung Mga Tauan Na Natëtëngëd Tung Paggaramitën Nira Tung Kamanggaran (16:9-15)
9 Mag̓aning si ti Jesus tung nirang nagsugpat yang bitala na,
“Taa numanyan,
may gustuu pang ianing tung numyu.
Gamitën mi yang manggad ming pangkaliw̓utan ang itaw̓ang tung mga putul ming pagparakaw̓utun natëtëngëd tung yëën.
Ay kung ya ray buwatën mi,
kung kaw̓utun da nganing yang uras ang anda ray kaministiran mi,
yang kumpurming nagkarataw̓angan ming para magkatinir da ka ta kalibrian,
duru rag sadya yang mga isip nirang mamagpakigbag̓as tung numyu duun tung sasang pamalay-w̓alay ang ya ray pagnatisan ming tanan ang asta tung sampa.
10 Kipurki yang taung matalig̓an,
maskin tung gësyë ilëm ang bag̓ay,
maski tung dakulu,
puidi kang matalig̓an.
Piru yang taung indi nganing matalig̓an maskin tung gësyë ilëm ang bag̓ay,
maskin tung dakulu,
indi ra ka ëngëd matalig̓an.
11 Kapurisu kung indiamu matalig̓an tung manggad ang pangkaliw̓utan simanyan,
ya pa ag̓aring matalig̓anamu tung matuud ang manggad tung uri?
12 Ig kung indiamu matalig̓an tung bëlag̓an kang lag̓ing numyung sadili ang ya ka ilëm kanay nag̓ipaëpëtay yang Dios tung numyu,
ya pa ag̓aring matalig̓anamu anya tung kaayënan ang pag̓iëlat na ang ya ra rin ay gustu nang ipasadili tung numyu?
13 Yang sasang tau,
indi ëngëd maimung magbilug yang isip na kung duruay pangag̓alënan na.
Ay kung durua,
anday dumang mainabu,
yang sam bilug ya ray maalën nang panirbian ta ustu,
piru yang sam bilug,
ya ray silag̓an nang duminarën.
Purisu asan da ngaintindiay mi ang kung manggad yang nag̓apagamënan mi,
indi ëngëd maimu ang yang Dios ya pay mapanirbian mi,”
mag̓aning.
14 Atii pala,
may mga Pariseo asan ang tung pagkagngël nira yang tanan ang atiang inaning ni Jesus,
dayun da nirang dinag̓ësan.
Ay ya pa ag̓ari,
tanira durug kaamluk tung kuarta.
15 Purisu ti Jesus,
dayun dang nagtuw̓al tung nirang mag̓aning,
“Yamu,
yang ug̓ali mi,
pagpaita-itaamu ilëm tung katalungaan yang mga tau.
Piru yang Dios yay nag̓asangkad kung unu pa ëngëd ay pag̓asikad mi.
Ay ya pa ag̓ari,
may nag̓apakumaal ta mga tau ang ya kang pisan ay nag̓alawayan yang Dios,”
ag̓aaning.
Yang Baklung Pitik Ang Panuw̓alan Yang Mga Tau Tung Dios (16:16-18)
16 Mag̓aning si ti Jesus tung nirang nagpadayun,
“Nag̓askëan mi ang yang mga katuw̓ulan yang Dios pati yang ipinagpadapat yang mga manigpalatay yang bitala na ya ray pag̓andar ang asta luminua ra ti Juan ang manigbënyag.
Mag̓impisa tii,
nag̓ipagpakaw̓ut da yang Matinlung Balita ang yang Dios magtukud da yang paggaraëmën nang baklu tung mga tau.
Purisu duru rang mga taung pamag̓imuras dang mampalg̓ud.
17 Piru bëlag̓an ang mag̓aning ang yang mga katuw̓ulan yang Dios naplëkan da ta puirsa na.
Ay matunaw pa yang langit may yang kaliw̓utan,
indi ka ëngëd magpurawas yang mga katuw̓ulan ang atia,
maskin sam parti ilëm ang gësyë.
18 Kapurisu kung tinu pay magpakiblag tung kasawa na ang pagkatapus mangasawa sing uman tung dumang baw̓ay,
tung pagtërëlëngën yang Dios,
asan da nga limbungay na yang kasawa nang dati.
Dispuis pa kung tinu pay mangasawa tung sasang baw̓ay ang binlag̓an da yang dating kasawa na,
tung pagtërëlëngën yang Dios,
asan da ka nga sirungay na yang dating may kasawa,”
ag̓aaningb.
Natëtëngëd Tung Panampëtan Yang Sasang Tau Ang Yang Nag̓apagamënën Yang Isip Na, Bëlag̓an Yang Dios, Kung Indi Yang Manggad Na (16:19-31)
19 Mag̓aning ti Jesus ang nagpananglit,
“May sasang manggaranën.
Yang manggaranën ang naa,
yang pag̓asuut na pulus mga aw̓ël ang pinakamatitinlu ang durug maal.
Dispuis kaldaw-kaldaw kang pagpundar ta midyu sasang punsiun ang ya ray pagkalipayan nirang magbararkada.
Lucas 16:19-31
20 Numanyan may sasang maliliwag̓ën ang nag̓aranan tung ni Lazaro.
Ya ra ilëg lalakday asan tung pirgula yang balay yang manggaranën.
Yang tinanguni na baw̓akukangën.
21 Yang gustu na ang basi pa ra ilëm asan da masngat tung mga ëpëd nirang pamamangan duun tung lamisaan yang manggaranën ang ya ra ka ilëm ag̓ipamlëkay tung lua.
Bëlag̓an ilëm maning tia yang pagkabëtang na,
kung indi,
pati mga kirung pagpalëngët tung anya,
indi na ra kayanan ang taw̓uyun,
kung indi,
nag̓apaw̓ayaan na ra ilëm asan ta patilak-tilak tung mga luka na.
22 “Numanyan may sasang kaldaw ang yang maliliwag̓ën ang naa nadayunan da ka ëngëd ang napatay.
Yang ispiritu na dinulung da yang mga angil ang ingkëlan duun tung pag̓atiniran ni Abraham ang kinaampu ta ang para magpakpad da duun tung anyang magpakiugpu tung kasadyaan.
Pagkatapus pati naang manggaranën,
unaw̓is napatay ra ka ang pagkatapus ipinalg̓ud da ka tung lëyang.
23 Tung pag̓apatay na,
yang ispiritu na diritsyu rang minangay duun tung pag̓aningën ang Hades,
ang yang pagkabëtang na duun,
durung pinitinsiang nag̓aagmaan na.
Numanyan natingara na ti Abraham duun tung alawid,
durua tanira ni Lazarong pagtëparan.
24 Pagkatingara na,
dayun dang nangëndal ang mag̓aning,
‘Ay,
apung Abraham,
ildaway ka!
Tuw̓ulun mu ra kanay ti Lazaro ang maskin ya ra ilëm yang tulduk na ay itulpuk na tung wai ang pagkatapus iangay na tani ang ipaturuk tani tung dilaku ang para malinaynayan ka ta gësyë.
Kipurki ya ray nag̓apasaranu yang pinitinsiang naang durug lëbat tani tung apuy ang nani,’
mag̓aning.
25 Mag̓aning ka ti Abraham ang nagtimalës,
‘Ay duduy,
ya ra ilëm ay dëmdëmën mu atiing buia pa rin tung kaliw̓utan,
ang napagustua ra ka tung tanan ang kaayënan ang nakalima mu,
piru naa ti Lazaro,
yang natiniran na pulus kaliwag̓an.
Pagkatapus numanyan tanya aglinga-lingaën da tani,
ang ta yawa,
durug kapinitinsia yang nag̓aagmaan mu asan.
26 Yadwa pa,
atii w̓a tung pag̓ërëlaan ta may bulalut ang yag ngangang durug dalëm.
Nagkamaning da ta maning tia ay ug̓ud yang mga tau tani,
kung alimbawa malëlyag da rin ang magpalaktëd asan tung numyung magtaw̓ang,
indi maimung malaktëd asan.
Asta yang tag̓a asan ka tung numyu indi ka maimung malaktëd tani.’
27 Mag̓aning ka yang manggaranën ang nagtimalës,
‘Tay kung maning tii,
apu,
anday dumang ipakiildawu tung nuyu,
kung maimu ilëm,
tuw̓ulun mu ra kanay ti Lazarong mangay duun tung balay yang tatayu.
28 Kipurki may mga putulu duun ang lima nga laliian.
Paamanën na tanirang mamanligna ra tung mga kasalanan nira ug̓ud indi ra ka magkaradayun tani tung lugar ang naang durug kapinitinsia.’
29 Ag̓aaning ka ti Abraham ang nagtimalës,
‘Dëngël nirang pirmi yang kasulatan.
Pirming agbasaan yang isinulat ni Moises may yang nagkarasulat yang mga manigpalatay yang bitala yang Dios atiing tukaw.
Kaministiran yay intindiën nira ta mupia kung unu pay gustu nang ianing.’
30 Mag̓aning ka yang manggaranën ang nagtimalës,
‘Aa apu,
kulang pa siguru tia.
Piru kung may sasang minatay ang magbungkaras dang magbalik duun tung nira ang bilug ang tinanguni,
talagang asan da mamanligna tung mga kasalanan nira.’
31 Ag̓aaning ka ti Abraham ang nagtimalës,
‘Kung yang isinulat ni Moises may yang nagkarasulat yang mga manigpalatay ya ra nganing ay nag̓apabëngël-w̓ëngëlan nira,
maskin pang may sasang minatay ang magbungkaras pang magpaaman tung nira,
indi ra ka ëngëd tia mamag̓impurmi,’
mag̓aning.
Atia ya ray pananglit ang painu-inuan mi ta mupia,”
ag̓aaning ti Jesus duun tung nira.