Yang Pagdipindir Ni Jesus Tung Sadili Na Tung Nag̓ipagbangdan Tung Anya Natëtëngëd Tung Pagpakigbarkada Na Tung Mga Malilignang Mga Tau (15:1-32)
15
Taa numanyan durung mga taung namagpalëngët tung ni Jesus ang para mamagpamati tung nag̓itulduk na.
Ya ra yang mga manigpanukut ta mga balayaran tung gubirnu pati yang dumang atiang pag̓atëlëngan ka ta duma may ruma ang tëlëb ang pisan ta kasalanan.
Lucas 15:1-10
2 May duun kang mga Pariseo may yang mga sag̓ad tung pinanubli.
Pagkaita nira tung ni Jesus ang midyu durung kalëlyag na tung mga taung mga maning tia,
dayun dang namagburutung-butungan ang namag̓araning-aningan ang mag̓aning,
“Yang taung naa durug ka sayud yang pag̓abuat na.
Pagpakibarkada pala tung mga taung atiang anday kuinta ang punuk ang pisan ta kasalanan.
Pagpakisadu pa ngani tung nira!”
ag̓aaning.
3 Numanyan pagkasiman ni Jesus yang laksu yang pag̓irisipën nira,
dayun dang nagpagngël tung nira ta mga pananglit.
Yang Ipinananglit Ni Jesus Natëtëngëd Tung Karnirung Naplëk (15:4-7)
4 Mag̓aning ti Jesus tung nira,
“Ipabëtangu may asan tung numyung sasang manigpastur ta kaayëpan ang sang gatus nga karniruan.
Numanyan ang bilangën na,
naa pala may sam bilug ang nalsik.
Unu pa w̓asu ay buwatën na?
Simpri anday dumang buwatën na asan,
yang siam ang puluk may siam,
butwanan na ra ilëm kanay duun tung pangaraw̓an nira ang italig tung mga aruman na ug̓ud naang sam bilug ang naplëk,
ya ray dilëmën na ang asta maita na.
5 Numanyan,
kung maita na ra nganing,
anday duma,
saknën na ra ilëm ang mulik ang pagkasadya ra ta duru.
6 Numanyan kumaw̓ut da nganing tung balay,
dayun dang mag̓imbitar tung mga kamalay na may tung mga ungkuy nang mag̓aning,
‘Aliamu ra,
mangayamu ra tani!
Magkalipayitaamu ra.
Ay yang karniruung naang naplëk,
naitaw ra.’
Maning tia ya ray ianing na tung nira.
7 Iugtulu tung numyu,
maning kang pisan tia duun tung langit.
Mas magkalipay yang Dios tung sam bilug ang makinasalananën ang panligna ra tung mga ubra-ubra na kay tung siam ang puluk may siam ang buat na pa maraayën ang mga tau ang yang kalaum nira anday kaministiran nirang manligna,”
ag̓aaning.
Nag̓ipananglit Ni Jesus Yang Mga Tau Tung Kuartang Naplëk (15:8-10)
8 Mag̓aning ti Jesus ang nagsugpat,
“Utru si ipabëtangu si,
may sasang baw̓ay ang may kuarta nang sam puluk ang bilug ang pulus nigal,
ang pagkatapus naplëk da yang sam biluga.
Ta,
unu pa w̓asu ay buwatën na,
kung indi,
magsindi ra kanay ta kingki,
pagkatapus dayun na rang silig̓an yang balay nang magdilëm ta mupia tung kuarta na ang asta maita na.
9 Numanyan kung maita na ra nganing,
dayun dang mag̓imbitar tung mga kamalay na may tung mga ungkuy nang mag̓aning,
‘Aliamu ra,
mangayamu ra tani,
magkalipayitaamu,
ay yang kuartaung naang naplëk,
naitaw ra.’
Maning tia ya ray ianing na tung nira.
10 Purisu iugtulu tung numyu,
maning kang pisan tia tung mga angil ang pag̓apanuw̓ul yang Dios.
Kung maita ra nganing nira yang sasang tau ang makinasalananën ang panligna ra tung mga ubra-ubra na,
durug dakul yang kasadyaan nirang pamagtëlëng tung anya,”
mag̓aning.
Nag̓ipananglit Ni Jesus Yang Mga Tau Tung Duruang Magputul Ang Pariung Nagpablag Ta Kinaisipan Tung Ni Tatay Nira (15:11-32)
11 Mag̓aning si ti Jesus ang nagsugpat,
“Utru si ipabëtangu si,
may sasang maëpët.
Yang maëpët ang naa,
duruay ana nang lalii.
Lucas 15:11-32
12 Numanyan mag̓aning yang gësyë tung ni tatay na,
‘Tatay,
ipakdul mu rang lag̓i numaan tung yëën yang partiu ang masubliu tung nuyu,’
mag̓aning.
Purisu numanyan yang maëpët,
nagpauyun da ilëm ang namarti yang intirung ganadus na tung nirang duruang mga ana na.
13 Numanyan yang gësyë,
indi pa ilëm nabuay tung kalima na yang anyang kaparti,
ipinaalang na ra,
ang pagkatapus yang bayad nang kuarta ingkëlan na rang naglayas duun tung alalawid ang banwa.
Ang duun da,
sigi ra ilëm yang pagwaraswasën na yang kuarta na tung mga barkada na ang anda ray pamatëng-patëng na.
14 Numanyan atiing nalw̓usan da ta kuarta na,
kinaw̓utan da ta puirting panuw̓uk yang banwang atiing pinaglayasan na.
Purisu pati tanya nadamay ra ka duun ang nagkaliwag ta duru.
15 Purisu kumus alang-alang da yang pagkabëtang na,
anday dumang naisip na,
nagpalëngët da tung sasang tau ang tag̓a duun.
Ya ray pinag̓amu-amu na ang maskin anday suul na,
basta papaanën da ilëm tanya.
Purisu anday dumang ipinakdul tung anyang trabaw,
yang kaaranëkan ang pisan,
manigbuug da ilëm tung mga baw̓uy.
16 Numanyan kumus kulang yang nag̓ipapaan tung anya,
maski nganing yang mga burak ang atiang mapakit-pakit ang nag̓apapangan yang mga baw̓uy,
ya ray nalëlyag̓an nang mabialan na ra rin.
Basin maning da tii yang pagkabëtang na,
piru anda ka ëngëd ay nagtëlëng tung anya.
17 Numanyan atiing namanmanan da,
pinagkësën-kësën na ra yang isip nang maning taa:
‘Duun tung ni tatay,
kadakël yang mga ubrirus na ang pagustu ilëm yang pamangan nira.
Piru yuu taa,
yuu ra ag̓alulutay!
18 Maayën pa magpanawaw rang mulik duun tung ni tatay.
Maning taa yang bitalaënu tung anya,
“Ama,
nagbuataw ta kasalanan ang durug dakul tung Dios,
pati tung nuyu.
19 Indi ra ëngëd magkabag̓ay ang aningënaw pa nuyung ana mu.
Maayën pa,
ipaklërayaw ra ilëm nuyung sasa ra ilëm ang ubrirus mu.”’
Atia,
ya ray ipinagkësën-kësën na tung isip na.
20 Kapurisu numanyan,
nagpanaw ra ka man ang minulik duun tung ni tatay na.
Numanyan atiing alawid-lawid pa tung baryu,
nabandaw ra ni tatay na.
Pagkabandaw na,
inampayan da ta kaildaw nang duru.
Anday duma,
ya rag paglaksung pagpakigbag̓as tung ana na,
ang pagkatapus ya ra ngalw̓u tung anyang inara-araan ta mupia.
21 Pagkatapus dayun dang nagbitala yang ana nang mag̓aning,
‘Ama,
nagbuataw ta durug dakul ang kasalanan tung Dios,
pati tung nuyu.
Indi ra ëngëd magkabag̓ay ang aningënaw pa nuyung ana mu,’
mag̓aning.
22 Numanyan yang maëpët,
dayun dang nagkalalangan tung mga turuw̓ulun nang namanikad da ka tung anya ang mag̓aning,
‘Ala,
kalitan mi ra kanay ang ëklan yang aw̓ëlung atiing langkuy,
atiing pinakamatinlu.
Ya ray ipasuut mi taa tung anaw.
Pati yang titingu,
ëklan mi ra kang ipasuut tung tulduk na,
asta sapatusu pa,
ya ka,
ëklan mi ra kang ipasuut tung kakay nab.
23 Pati tiang sinday tang baka ang pinatambëk ta,
ëklan mi ra ka duun tung balay ang imatayën.
Ay magpasalamatitang magkumbira.
24 Kipurki yang anaung naa,
yang kanisipung pisan patay ra,
piru maning pa tung nabui sing uman.
Naplëk da rin tung yëën,
ang pagkatapus naitaw si,’
ag̓aaning ti tatay na.
“Purisu numanyan duun tung balay namag̓impisa ra tanirang namagsararuan.
25 Yang uras dang atii,
yang ana yang maëpët ang dakulu,
duun tung kaluakan pag̓ubra.
Pagkatapus numanyan atiing ag̓ulik da rin ang alëngët da tung balay,
naa pala,
may nagngël na rang pamagkarantaan tung kaklëran,
may nasirib na pang pamagtaralëkan.
26 Numanyan anday dumang binuat na,
ginuuyan na yang mulang lalii ang pamagkarayam tanira yang mga aruman na asan tung lua.
Pagpalëngët yang mula,
pinabalitaan na kung unu pa kaya ay nag̓adapatan na tii.
27 Mag̓aning yang mulang minlës,
‘Yang ari mu takaa ra,
minulik da.
Purisu ti ama mi nagpaimatay ra yang sinday ming baka ang pinatambëk mi,
ay natëtëngëd tung ari mung naulik dang maayën ang tinanguni,’
ag̓aaning duun yang mula.
28 Numanyan,
pagkagngël na tia,
nasilag da ta duru.
Anda ra ëngëd ay gustu nang magpaklëd pa tung balay.
Piru ti tatay na ya pa ka ëngëd ay naglua ang nag̓intra ra alam-alam tung anya ang para magpasakëp tung kumbira.
29 Piru tinabkaw yang ana nang inaning,
‘Tëëd mu,
tung tantung kabuay rang pira-pira rang takun yang pagpakirëpënu tung nuyu,
indiaw ang pisan naglampas tung katuw̓ulan mu may sam bilug.
Piru indiaw ang pisan pinakdulan mu ta maskin kambing da ilëm ang para mapagkalipayami ka rin yang mga barkadaw.
30 Pagkatapus pagbalik yang ana mung nakaa ang yang manggad mu ya ra ilëm durug̓asay nang iginastus tung mga baw̓ay ang impurtada,
pagkatapus ya pa ka ëngëd ay pinaimatayan mu yang sinday tang baka ang pinatambëk ta?’
ag̓aaning.
31 Mag̓aning ti tatay nang nagtuw̓al,
‘Abaa,
anaw,
pirmia taa tung yëën.
Purisu yang tanan ang bag̓ay taa tung ganadus ta nuyu kang lag̓i.
32 Piru indi maimu ang yang ari mu indi ta ipagkasadya ang kumbiraën ay natëtëngëd yang kanisip ta tia patay ra,
ang pagkatapus maning pa tung baklu sing nabui.
Naplëk da rin tung yatën,
ang pagkatapus naita ta si,’
ag̓aaning yang maëpët duun tung ana nang dakulu.
Atia,
ya ray mga pananglit ang painu-inuan mi ta maayën,”
ag̓aaning ti Jesus duun tung nira.