May Sasang Taung Nag̓apamaayën Ka Ëngëd Ni Jesus Tung Kaldaw Ang Nag̓ipamaënay Maskin Kuntra Tung Mga Pariseo (14:1-6)
14
Taa numanyan,
may dumang kaldaw ang nag̓ipamaënay ang ti Jesus inimbitar da ta sasang pagpakigmaëpët tung mga Pariseo ang para magpakigsaru duun tung balay na.
Numanyan yang mga imbitasiun nang duma,
nag̓amalungan nira ta mupia ti Jesus kung unu pay urubraën nang lampas tung riglamintu nira sigun tung kaldaw ang atia.
Lucas 14:1-24
2 Naa pala may sasang laliing nagpakigtalunga tung ni Jesus ang paglambuk yang mga tinanguni na.
3 Numanyan ti Jesus,
tanya,
dayun na rang binugnu yang mga kasadu nang atiang mga Pariseo pati mga sag̓ad tung pinanubli.
Ag̓aaning tung nira,
“Ëlat kanay,
kung mga sarang tung numyu,
unu pay pag̓intindi mi tung katuw̓ulan natëtëngëd tung kaldaw ang nag̓ipamaënay?
Uyun w̓asu ang yang taung paglaru puiding pamaayënën,
u bawal?”
4 Numanyan pagkagngël nira yang itinalimaan nang atia,
inding pisan namag̓iw̓ëk-iw̓ëk.
Pagkatapus,
anday dumang binuat ni Jesus,
diritsyu rang dinëënan na yang taung atia ang pinamaayën.
Pagkatapus tinugtan na rang mulik.
5 Numanyan dayun na rang pinakdulan ta pag̓isipan nira yang mga kasadu nang atia ang inaning,
“Alimbawa kung may sasang ana mi ubin baka mi ang nabugsu tung bug̓ang,
indi mi w̓asu batakën ang lag̓i ang ipalua maskin natuun tung kaldaw ang nag̓ipamaënay ta?”
ag̓aaning.
6 Atii,
andang pisan ay mabitala nira,
may san tag̓a.
Yang Ipinaëtad Ni Jesus Tung Mga Inimbitasiun May Tung Nag̓imbitar Tung Nira (14:7-14)
7-8 Numanyan nag̓apaniiran ni Jesus yang mga aruman nang mga imbitasiun ang pamagkaralaw tung mga puistung nag̓itig̓ana para tung darakulung mga tau.
Purisu dayun dang nagpakdul ta sasang alimbawa ang mag̓aning,
“Alimbawa,
kung imbitarënamu ra nganing ta sasang taung magpasakëp tung kumbira yang ana na,
maayën pang indiamu magpilik ta mga puistung nag̓itig̓ana na para tung darakulung mga tau.
Muya may kumaw̓ut dang dumang inimbitar na ang mas abwat ta pagkabëtang tung numyu.
9 Anday duma,
palëngtanamu ra anyang aningën ang,
‘Ungkuy,
indi ilëm maglain yang isip mu.
Ipatug̓ay ta ra tia tung aruman tang naang baklung kaw̓ut.’
Unaw̓is maëyakamu ra ka ilëm ang magpapuistu tung binit.
10 Kung indi,
yang mas maayën pang usuyun mi,
kung imbitarënamu ra nganing tung sasang punsiun,
ay duunamu ra kanay ilëm magpapuistu tung binit.
Ay tia,
kung may gustu yang may punsiun,
palëngtanamu ka anyang aningën ang ‘Ungkuy,
tania ra magpapuistu tung alëngët-lëngët tung yëën.’
Ta,
indi magkadëngëg̓anamu ra tung katalungaan yang kadaklan ang mga kasadu mi?
11 Ay ya pa ag̓ari,
kung tinu pay pagpalandaw tung sadili na,
ya iparanëkay,
piru kung tinu pay pagparanëk tung sadili na,
ya ipalandaway,”
mag̓aning.
12 Numanyan dayun na rang inaning yang nag̓imbitar tung anyang mag̓aning,
“Ungkuy,
tung dumang uras,
kung mag̓imbitara ra nganing tung mga tau tung balay mu ang para mamagsararuanamu ra,
india magpilik ang maning ya ra ilëm yang mga barkada mu may yang mga putul mu may yang may mga kaampiran tung nuyu may yang mga kamalay mung maraayën ka ta pagkabëtang.
Kipurki anday dumang pakaw̓utun na,
balësëna si ka ilëm nirang imbitasiunun.
Asana ra ka ilëm nga balësay tung binuat mu.
13 Kung indi,
yang pangimbitarën mu ëngëd,
ya ra yang mga maliliwag̓ën,
yang mga barik,
yang mga pilay,
asta yang mga buray.
14 Ay kung yay buwatën mu,
talagang pakaayënëna ra yang Dios,
ay kipurki maskin anda ka man ay mablës nira tung nuyu,
balësana ka ëngëd yang Dios tung uras ang ipagpabungkaras na tung mga taung kumpurming matadlëng tung pagtërëlëngën na,”
ag̓aaning.
Yang Taung Magpakuindi Tung Pag̓imbitar Ni Jesus Tung Anya, Indi Ëngëd Malg̓ud Tung Kaayënan Ang Anday Katapusan Na (14:15-24)
15 Taa numanyan yang sam bilug ang kasadu ni Jesus,
pagkagngël na tia,
dayun dang nabnga ang mag̓aning tung anya,
“Tama ka man tia,
pakaayënën da ka man yang Dios yang kumpurming tugtan nang magpakigsaru tung punsiun ang dakulua ang tukurun na tung uras ang ipagpabistu na ra ëngëd yang paggaraëmën na tung kaliw̓utan ang baklu,”
ag̓aaning.
16 Pagkagngël ni Jesus tia,
dayun dang nagtimalës ang nagpagngël ta sasang pananglit ang mag̓aning,
“May sasang taung pagtukud ta punsiun nang dakulu ig dakëlë ra yang mga taung pinangimbitar na.
17 Numanyan pagkaw̓ut da yang uras ang ya ray tipu yang pagpunsiun na,
nanuw̓ul da tung sasang turuw̓ulun nang mag̓aning,
‘Panliguën mu ra yang tanan ang mga taung pinangimbitaru.
Panganingën mu ang mag̓arangayan da,
ay simpan da yang tanan ang bag̓ay,’
ag̓aaning.
18 Numanyan tung paglig̓u yang turuw̓ulun na,
naa pala sasa may sasa tung mga imbitasiun yang ag̓alën na,
masigbaliw̓ad da ang indi ra masakëp.
Mag̓aning yang sam bilug ang nagbaliw̓ad,
‘Aningën mu ti ungkuy ang tanya ra kanay ay balang magpasinsia tung yëën ta dakulung pagpasinsia.
Indiaw masakëp,
ay bakluaung nangalang ta tanëk.
Kaministiran angayënu ra kanay ang tëlëngan,’
ag̓aaning.
19 Mag̓aning ka yang baliw̓ad yang sam bilug,
‘Aningën mu ti ungkuy ang tanya ra kanay ay balang magpasinsia tung yëën ta dakulung pagpasinsia.
Indiaw masakëp,
ay bakluaung nangalang ta limang pariang mga baka.
Kaministiran ang angayënu ra kanay ang para maprubalanung iaradu,’
ag̓aaning.
20 Yang sam bilug kang imbitasiun,
yang anyang baliw̓ad maning taa:
‘Bakluaw ilëm ang pisan nga kasawa.
Purisu indiaw ra siguru masakëp,’
ag̓aaning.
Maning dang maning yang baliw̓ad yang mga tau.
21 Numanyan pagkatapus yang turuw̓ulun ta paglig̓u na,
dayun dang nagbalik tung ag̓alën nang nagbaw̓alitaën.
Pagkagngël yang ag̓alën na,
durung kasilag na.
Dayun sing nanuw̓ul tung turuw̓ulun nang mag̓aning,
‘Ala,
pakalia rang maglilig̓uën tung mga karsada taa tung lansangan,
pati mga dalan pabalik-balikan mu.
Kung tinu pa man ay mapanawan mung maliliwag̓ënay,
kung mga barik,
basin mga buray,
ubin mga pilay man,
ya ray pangkëlan mu taa,’
mag̓aning.
22 Numanyan indi ilëm nabuay yang turuw̓ulun na ta paglig̓u,
asan da tung anya nagbalik ang mag̓aning,
‘Amëëy,
tinumanu ra yang itinuw̓ul mu tung yëën.
Piru kulang pa midyu,
malugar pa yang balay ta,’
ag̓aaning.
23 Numanyan diritsyu sing nanuw̓ul yang ag̓alën na tung anyang mag̓aning,
‘Kung malugar pa,
maayën pa lumua kanay duun tung mga kabiw̓init-binitan,
maskin ay pang dalanay patungul paranëk man,
yay usuyun mu.
Kumpurming tinu pa man ang tauay mapanawan mu,
yay pangimbitarën mung magpasakëp tung punsiun ta ug̓ud gëtëk dang pisan ta tau yang balay ta,’
ag̓aaning yang ag̓alën na tung anya.
24 Atia,
ya ray pananglit ang nagngël mi ra tung yëën.
Purisu iugtulu tung numyu,
kumpurming tinu pay imbitarënu ang pagkatapus ya ray pangindian na yang pag̓imbitaru tung anya,
indi ra ëngëd mapagpakigsaru tung punsiun ang tukurunu tung uri,”
ag̓aaning ti Jesus.
Nag̓ipasanag Ni Jesus Kung Unu Pay Kundisiun Ang Dapat Usuyun Yang Sasang Tau Baklu Risibiay Nang Tauan Na (14:25-33)
25 Numanyan ti Jesus nagpadayun da yang pagparanawën na.
Durug dakël yang mga taung pamagpakignunut tung anya.
Numanyan dayun dang nagtadëng ti Jesus ang nagbëdlëng tung nirang nanalunga.
Lucas 14:25-35
26 Mag̓aning tung nira,
“Kung tinu pay magpalëngët tung yëën ang para magpaugyat da tung yëën,
kaministiran yuuy ipalusu na ëngëd tung tanan ang nag̓agëgmaan na ang katulad ka tung ginikanan na ubin tung kasawa na ubin tung mga ana na ubin tung mga putul na ang kapin da ëngëd tung sadili na.
Kaministiran ang yang gëgma na tung yëën lusu ëngëd ang pisan ang kung ikumpalar pa tung gëgma na tung duma,
ya ra ag̓aningay nirang dëmët.
Kung bëlag maning tiag kalusu yang gëgma na tung yëën,
indi pa ka ëngëd maimung magpaugyat tung yëën.
27 Kung tinu pay indi magpakatëntën ang mag̓agwanta tung mga kaliwag̓an ang maskin ipalansang pa tung krusb,
yang taung atia indi ka ëngëd puiding magpaugyat tung yëën.
28 Talagang matuud tia,
ay kipurki maskin tung numyu,
kung may sam bilug asan ang malëlyag dang magpakdëng ta balay nang dakulu,
simpri baklu impisaay na,
ipaënay na ra kanay ang ipamatëng-patëng kung pira pay magastus na ang para maskëan na kung yang kuartang natuw̓ud na bastanting ipagpatapus na tung balay na u kung kulangën.
29-30 Ay kung indi na ra patëng-patëngën ang ya ra ilëg kali-kaliay nang impisaan ta pakdëng yang mga adili na,
muya indi na ra ka ilëm mapatapus yang balay na.
Kung tinu pay magtëlëng asan,
intraan da ilëm nira talangkak ang mag̓araning-aningan ang ‘Abaa yang taung nakaa!
Naimpisaan na ra ta pakdëng yang balay na,
piru naa pala,
indi na ra ka ilëm masarangan ang mapatapus,’
ag̓aaning.
31 Utru si ipabëtangu,
may sasang ading pag̓isip dang magbatuk tung gira.
Yang ading naa may mga sundalu nang mga sam puluk ang liw̓u nga tauan.
Yang ading kabatuk nang pag̓ayat ta gira,
may mga sundalu nang duruang puluk ang liw̓u nga tauan.
Simpri baklu magpadayun yang sam bilug tung panuyu na,
ipaënay na kanay ang ipamatëng-patëng ta mupia kung kayanan nirang talungaën yang kuntrariu nira.
32 Kung mapatëng-patëng na ra nganing ang midyu indi nira masarangan,
anday dumang buwatën na,
mintras alawid pa yang kabatuk na,
manuw̓ul da tung mga tauan nang mamagpakigbag̓as da duun tung Ading sam bilug ang panuyu ra ang para mamagpakigkësën da kung unu pay kundisiun ang para indi ra idayun yang gira.
33 Kapurisu ya ra ka man tiang nag̓ipag̓aningu tung numyu,
maskin tinu pa asan tung numyu ang indi manalyud tung tanan ang nag̓amaal na ang para yuuy ipalusu na ta gëgma na,
ay tia,
indi pa ka ëngëd puiding magpaugyat tung yëën,”
mag̓aningc.
Kung Tinu Pay Bëlag̓an Maning Pa Tung Tëma Yang Gëgma Na Tung Ni Jesus, Indi Maimung Mag̓ing Tauan Na (14:34-35)
34 Mag̓aning ti Jesus ang nagpadayun yang bitala na,
“Maskin tung kasin puidi kang ipananglitu.
Kung tung bag̓ay masabur ang gamitën.
Piru kung magkasa-kasa ra natëtëngëd nalaktan da ta dumang bag̓ay,
anda ray rimidyung sarang mabuat ang para maulikan pa yang pagkatëma nad.
35 Indi ra ka tia magamit tung dumang bag̓ay,
maskin iabunu pa,
basin ilakët pa tung tarambakan ang pangkëlan ta abunu,
andang pisan ay gamitan na.
Kung indi,
anday dumang buwatën asan,
iplëk da ilëm.
Kapurisu,
kung tinu pay ag̓agngël,
ipabalay na ra tung isip na yang nag̓agngël na,”
ag̓aaning ti Jesus.