11
Numanyan atiing pagkatapus ni Jesus tung pagparabalunun na ta mga bitala tung yamën ang nag̓apangugyatan nang sam puluk may durua,
dayun dang nagliit tung lugar ang atii ang nagliliw̓utun tung mga lansangan ang alëlëngëtën ug̓ud magturuldukun tung mga tau ang nunut da ka ta pagparakaw̓utun na tung nira yang Matinlung Balita.
Yang Nag̓ituw̓al Ni Jesus Tung Pinanuw̓ul Ni Juan Ang Mamagpasiguru Tung Anya (11:2-19)
2 Numanyan ibalik ta ra kanay tung ni Juan ang atiang manigbënyag ang duun da ka man tung kalabusa.
Atiing nabalitaan na ra natëtëngëd tung mga buat-buat ni Jesus ang tung anyang pag̓intindi ya ra yang pag̓aningën ang Cristo,
nanuw̓ul da tung pinangugyatan nang duma ang mansiangay ra kanay duun tung anyang mamagpasiguru.
3 Numanyan tung pagkaw̓ut nira,
mag̓aning tung ni Jesus,
“Minangayami ilëm taa,
ay gustu yamën ang magtalimaan tung nuyu kung yawa ka man yang pag̓aningën ang Cristong Mananapnay ang nag̓aëlatan kang lag̓i yamën u kung may duma pang dapat ang ëlatan yamën?”
mag̓aning.
4 Mag̓aning ka ti Jesus ang nagtuw̓al,
“Ala,
magbalikamu ra duun tung ni Juan.
Ibalita mi ra tung anya yang kumpurming nag̓agngël mi kag nag̓aita mi taa.
5 Aningën mi ang yang mga buray pangaita ra,
pati mga barik pangapanaw ra ka,
pati mga taung may dispirinsia tung mga ulit nirang makabiw̓iru,
nag̓apanguatan da ka ta pagkamansadu nira,
pati mga bëngël pangagngël da ka,
pati mga patay nag̓apampabungkaras da ka.
Asta yang mga taung kumpurming aminadu ra ang anda ray sarang ang mabuat nirang matinlu ang para risibiën yang Dios,
ya ra kay nag̓apampakaw̓utan ta Matinlung Balita kung ya pa ag̓aring mapalg̓uran da nira yang paggaraëmën nab.
6 Kidispuis pa aningën mi ka dayun ti Juan ang durug tinlu yang mabtangan yang sasang taung indi ëngëd maplëkan ta ipagtalig na tung yëën,”
mag̓aning ti Jesus duun tung nira.
Yang Pagdayaw Ni Jesus Tung Ni Juan (11:7-19)
7 Numanyan atiing namagliit da yang mga tauan ni Juan ang atia,
ya ray pagpasanag ni Jesus tung mga taung atiang buntun natëtëngëd tung ni Juan.
Mag̓aning tung nira,
“Atiing pag̓angay mi tung ni Juan duun tung banwang atiing palag-palag yang tau na,
unu pang klasiay ta tau ang nag̓alaum ming maita mi duun?
Yang kalaum mi w̓asu tanya sasang taung guruyud-guyuran ta tau ang katulad ka tung tigbaw ang kung ëyëpën da nganing ta palët,
pagpanunut-nunut da ilëm?
8 Kung bëlag̓an kang ya tii,
unu pa w̓asu ay inangay mi duun?
Gustu mi ilëm basung magtëlëng tung sasang taung pagsuut ta durug tinlung aw̓ël?
Bëlag ka siguru,
ay kipurki yang mga taung mga maning tia yang bisti nira duun da ilëm ngaitaay mi tung mga palasiu yang mga adi.
9 Kung bëlag̓an kang ya tii ay inangay mi,
tay unu pa w̓asu yang katuyuan mi duun?
Gustu mi w̓asung magtëlëng tung sasang taung tinuw̓ul yang Dios ang magpalatay yang bitala na tung numyu?
Anday duma,
talagang yaa,
ya ra ka man tii ay naita mi duun.
Piru iugtulu tung numyu yang taung atiing naita mi duun,
landaw pa nganing tung mga manigpalatay yang bitala yang Dios ta namagtukaw ang mga panimpu.
10 Ay kipurki ti Juan ang naa ya ka man ay nag̓adapatan yang sasang inaning yang Dios tung sasang aruman na ang napabtang tung kasulatan ang mag̓aning,
‘May sasang taung tuw̓ulunung magpalatay yang bitalaw tung mga tau ang yay ipatkawu tung nuyu ug̓ud katulad ka tung sasang pagliway yang dalan,
yay maning pa tung magliway tung mga isip nira ug̓ud simpan da tanirang mamampauyun da tung nuyu,’
mag̓aningc.
11 Iugtulu tung numyu,
tung tanan ang mga manigpalatay ta namagtukaw ang mga panimpu,
anda ray lumandaw tung ni Juan ang naang manigbënyag.
Piru maskin pang maning tia,
yang sasang tauanung napalg̓ud da tung palaksu yang paggaraëmën yang Dios,
maskin pag̓atëlëngan ang aranëk ta pagkabëtang,
piru may nalandawan na pa ka ëngëd tung ni Juand.
12 Dispuis,
mag̓impisa pa atiing paglua ni Juan ang manigbënyag ang asta ra ilëm simanyan ang tung yëën da,
yang palaksu yang paggaraëmën yang Dios ang naang baklu,
mapuirsa yang abanti na ig mapuirsa ka yang mga taung kumpurming pag̓imuras dang magpalg̓ude.
13 Ang pagkatapus,
kung unu pay palaksu yang paggaraëmën nang atia,
nagkaraula yang tanan ang mga manigpalatay yang bitala yang Dios pati yang nagkaraula ni Moises.
Piru baklu pa nag̓impisang nagkamatuud da yang nagkaraula nira,
tung paglua ni Juan.
14 “Ig kung gustu ming manangëd tung inula yang sasang manigpalatayf,
asan da ngaintindiay mi ang ti Juan ang naa ya ray nanubli tung katëngdanan ang pinggësan ni Elias ang tukaw.
15 Purisu yang nag̓agngël yang mga talinga mi,
ipabtang mi tung mga isip mi.
16-17 Piru ay pa w̓a?
Yang mga tau simanyan ang indi mamag̓impurmi tung yëën,
unu pay mapananglitanu tung nira?
Anday duma tanira maning pa tung mga mamula ang pamagkarayam tung plasa ang maskin unyën pa ta paiwan-iwan yang mga kaarumanan nira,
indi ka ëngëd mapatunu-tunuan yang kalëlyag̓an nira.
Ya ra ag̓aningay yang mga kaarumanan nirang,
‘Uay,
duruamug kaduruma!
Ang magtarangit-tangitënaming mag̓urulimëngmëng-ulimëngmëngën,
indiamu ra malëlyag ang magpakigsampura.
Utru si ang patikanamu yamën,
indiamu si ka ëngëd malëlyag ang magtaralëkan.’
18 Talagang yay magkatamang mapananglitanu tung mga taung atia ay kipurki atiing paglua ra ni Juan ang manigbënyag,
maita yang mga tau yang ug̓ali nang pamlëk ang kaisan tung pagparanganën na ig indi ka panginëm ta binu,
indi ra nauyunan nira,
kung indi,
ya ra ag̓aningay nirang pag̓aëkël-ëkëlan ta dimunyu.
19 Utru si ang tung yëën dang pag̓aningën ang Maninga Tau,
tung pagluaw tung mga tau,
maita ra nganing nira yang ug̓aliu ang indiaw pamlëk tung pagparanganënu kag panginëmaw kang kaisan ta binu,
indiaw ra ka nauyunan nira,
kung indi,
yuu ka ag̓aningay nirang takaw̓aw ig bulatsiruaw pa kumus pagpakigbarkadaw tung mga manigpanukut may tung duma ang ya kay nag̓alamku nirang mga tëlëb ta kasalanan.
Piru yang planu yang Dios ang atiang nag̓apangindian da nira,
duun da nga pruibaay tung mga taung kumpurming pagpauyun tung yamën ni Juan ang talagang durug tinlung planu sigun tung pinakaw̓ut na tung nira,”
mag̓aning duun ti Jesus.
Nag̓apanganugunan Ni Jesus Yang Mga Taung Namagpakuindi Tung Anya (11:20-24)
20 Numanyan may uras ang ti Jesus nag̓intra ra biw̓italaën natëtëngëd tung katëtëg̓asën yang mga taung tag̓a duma-rumang mga lansangan ang ya ray pinagpaitaan na ta durung mga pruibang maktël ang pagkatapus indi ra ka ëngëd nangapanligna tung mga kasalanan ang pag̓abuat nira.
21 Mag̓aning tanyang nagbitala,
“Kanugun yang mabtangan yang mga taung atiang tag̓a Corasin may Betsaida.
Kipurki kung kisira duunaw ra rin tung Tiro may Sidon napagpalapus ta mga pruibang maktël ang pariu ka tung ipinagpaluaw duun tung mga lansangan nirang atia,
siguru yang mga taung atii nabuay ra ka rin ang nangapanligna tung mga kasalanan nira.
Nabuay ra ka rin ang nangapagsuut ta mga aw̓ël ang magig̓ilëk ang nangapagbukbuk ta mga kaw̓u tung mga kulu nira ang para asan da mamagpailala ang tanira pamanligna rang matuud.
22 Piru iugtulu tung numyu,
kung kaw̓utun da nganing yang uras ang ipagsintinsia yang Dios tung tanan ang mga tau,
malakan-lakan pa yang parusang dangatën yang mga tag̓a Tiro may Sidon kay tung dangatën yang mga tag̓a Corasin may Betsaida.
23 Pati yang mga taung atiang tag̓a Capernaum,
ya ka,
kanugun ka yang mabtangan nira.
Ay kipurki yang kanisip nira mamagkatinir da ta dëngëg nirang mas abwat ang asta mamanungkuk da duun tung langit ang pagkatapus duun da ka ilëm mangalambëg tung Hades.
Kipurki yang mga pruibang maktël ang ipinagpalapusu duun tung lansangan nira,
kung duun pa rin tung lansangan ang Sodoma nga paluaay atiing tukaw,
ang asta ra ilëm simanyan duun pa ka rin yang lansangan ang atii.
24 Piru iugtulu tung numyu,
kung kaw̓utun da nganing yang uras ang ipagsintinsia yang Dios tung tanan ang mga tau,
malakan-lakan pa ta gësyë yang parusang dangatën yang mga tag̓a Sodoma kay tung dangatën yang mga tag̓a Capernaum,”
ag̓aaning duun ti Jesus.
Yang Pag̓imbitar Ni Jesus Tung Mga Inusinting May Mga Kalbatan Ang Mamampalëngët Da Tung Anya (11:25-30)
25 Numanyan tung mga uras ang atii ang midyu durung pamagkuntra tung ni Jesus,
anday dumang binuat na,
nag̓ampu ra tung Dios ang mag̓aning,
“Amang makagag̓aëm tung tanan,
mag̓ing tung kalangitan may tung katanëkan man,
durug dakul yang pagpasalamatu tung nuyu.
Ay pinapaglaw̓uk mu ra yang isip yang mga taung pagtalig tung pagkamataku nira ang para indi ka ilëm maintindian nira sigun tung paggaraëmën mung naang baklu ang nag̓ipagpakaw̓utu.
Ang pagkatapus binuskad mu yang isip yang mga taung mga inusinti ug̓ud mamarësmësan da nira yang mga bag̓ay ang atia.
26 Salamat,
Ama,
ang nagkamaningan da ka man ta maning tia ay natëtëngëd ya kang lag̓i ay uyun tung kalëlyag̓an mu,”
mag̓aning.
27 Numanyan pagkatapus na ta pag̓ampu,
dayun dang nagpasanag tung mga tau ang mag̓aning,
“Yang tanan ang atiang nag̓ipagpalatayu tung numyu,
luw̓us dang ipinag̓intriga tung yëën ni Ama.
Andang pisan ay nag̓asangkad yang kabag̓ay-bag̓ayan yang pagkabëtangu ang yuuy pag̓aningën nang Ana na,
kung indi,
tanya ilëm ang pag̓aningënung Amaw.
Pati tanya,
anda kang pisan ay nag̓asangkad yang kabag̓ay-bag̓ayan yang pagkabëtang nang tanyay pag̓aningënung Amaw,
kung bëlag̓an,
yuu ka ilëm ang pag̓aningën nang Ana na pati yang kumpurming nag̓alëlyag̓anung pabunayag̓an.
28 Nag̓askëanung magluw̓ayënamu rang aglëbatan natëtëngëd tung mga katuw̓ulan ang atiang nag̓ipatuman tung numyu yang mga manigtulduk.
Magpalëngëtamu ra tung yëën ay kuatanamu ra yëën tung lëbat ang atiang pag̓asakan mi ug̓ud maënayanamu ra.
29 Kung tung bakang magsingkawan da ipananglitayu,
magpagaëmamu ra tung yëën ang magpatulduk.
Ay yuu bëlag̓anaung maisëg ang magkalalangan tung numyu,
kung indi,
duruaug kaamumu.
Purisu kung magpagaëmamu ra tung yëën,
talagang maënayanamu ra ka man ang matuud tung lëbat ang atia.
30 Ay kipurki yang nag̓ipatumanu tung numyu,
malpës ilëm ang pauyunan mi ig malakang ka ilëm ang usuyun mi,”
mag̓aning duun ti Jesus.