Yang Nag̓ipaëtad Ni Jesus Tung Mga Tauan Nang Pitung Puluk May Durua Ang Pag̓apanuw̓ul Nang Mamagliliw̓utun (10:1-12)
10
Taa numanyan tung pira pang kaldaw,
ti Ginuu ta nagpanulduk-tulduk si tung dumang mga tauan nang pitung puluk may durua ang para pamakdulan na ra ka ta mga katëngdanan nira.
Pagkatapus ya ray pinanuw̓ul nang mamagpanaw ra ta taludua-taludua nga tauan ang para mamagtukaw ra tung anya duun tung mga lansangan may tung mga baryu ang kumpurming nag̓aplanu nang bisitaan.
Lucas 10:1-12
2 Numanyan,
baklu ra papanaway na yang mga tauan nang atii,
pinampagngël na pa ta sasang pananglit ang mag̓aning,
“Duru-durung mga tau ang simpan dang mamagpamati tung bitalaw.
Yang kaalimbawaan nira,
maning pa tung paray ang malapad ang arayëg̓ën da.
Piru durug kakulang yang mga manig̓ayëg.
Purisu kumus yang Dios yay maning pa tung pag̓ërëkëlën yang ayëg,
mag̓ampuamu ra tung anya ang may duma pang matuw̓ul nang mamagtaw̓ang ta ayëg yang paray na.
3 Purisu ala,
magpanawamu ra tung pag̓ipanuw̓ulu tung numyu.
Piru mangamanamu.
Yang kaalimbawaan mi,
yamu maning pa tung mga karnirung mga butu pa ang duunamu ra ipaangayayu tung mga taung maning pa tung mga kirung talunanën ta kaisëg.
4 Ug̓aring indiamu ilëm mag̓ëkël-ëkël ta mga kuarta pati mga puyu-puyu ang pariu ka tung pag̓aëkël-ëkëlan ta mga manigpalimus.
Maskin mga sandalyas pang mga risirba mi,
anda ray kaministiran ang mag̓ëkël-ëkëlamu pa.
Kidispuis pa,
alimbawa kung may mga taung mabag̓as mi tung dalan,
indiamu magpaërëk-ërëk ang magpakalingat ang mangësën-kësën tung nira.
5 Dispuis kung ariamu pang balayay ngangay,
bakluamu ra magtakwal,
aningën mi yang may balay ang ‘Yamung tanan ang pagtinir asan,
puidiamu rang pakaayënën ta mupia yang Dios.’
6 Pagkatapus,
kung mamanangëd tanira tung ipagpakaw̓ut mi tung nira natëtëngëd tung kaayënan ang atiang sinambit mi,
tung nira ra ka man mag̓inëtëg.
Piru kung indi ra mamanangëd,
indi ra ka mangapakinaw̓ang tung kaayënan ang atiang ipakdul da rin yang Dios tung nira.
7 Dispuis pa,
kung ariamu pang balayay patakwalay,
ay duunamu ra ilëm magdayun ang mag̓inëtëg.
Ang papaanënamu ra nganing nira,
mamanganamu ra ilëm ang anday dalëndën mi.
Ay yang sasang manigparakaw̓utun,
bag̓ay kang asikasuën tung mga kaministiran na ang yay maning pa tung suul na.
Indiamu ilëm maglaktëd-laktëd tung duma-rumang balay.
8 Dispuis kung ariamu pang lansanganay nga distinu,
kung risibiënamu nira,
kumpurmi ilëm yang ipapaan nira tung numyu,
ya ray pasalamatan ming risibiën.
9 Dispuis,
kung tinu pay may mga laru tung lansangan ang atia,
pampamaayënën mi.
Panganingën mi ka dayun yang mga tau ang,
‘Atia,
ya ray pruibang pagpailala ang kinaw̓utanamu ra ka man yang puirsa yang paggaraëmën yang Dios ang baklu.’
10-11 Piru kung ariamu pang lansanganay nga distinu,
kung alimbawa,
indiamu ka ëngëd risibiën nira,
tung paglua mi tung lansangan nira ang duunamu pa tung mga karsadag pagpanaw,
yamu ra ag̓aaning tung mga taung atia,
‘Maskin apuk da ilëm taa tung lansangan mi ang nadpët tung mga kakay yamën,
pipiën pa yamën ang ibutwan ang para asan da nga maladmaray mi ang yang kasalanan asan da ilëm tung numyung mag̓inëtëg.
Piru naa w̓a yang dapat ang intindiën mi.
Pinakdulanamu ra ka ta lugar ming magpalg̓ud da rin tung paggaraëmën yang Dios ang baklu,
ang pagkatapus yamu kay panulmun.’
Maning tia,
ya ray ianing mi tung nira.
12 Iugtulu tung numyu,
kung kaw̓utun da nganing yang uras ang ipagpabungkaras yang Dios tung tanan ang bëlag̓an mga tauan na ang para sintinsiaan na,
malakan-lakan pa yang sintinsiang dangatën yang mga tag̓a lansangan ang Sodoma kay tung dangatën yang mga taung tag̓a maskin ay pang lansanganay ang kumpurming indi ra namagrisibi tung numyu,”
ag̓aaning.
Nag̓apanganugunan Ni Jesus Yang Mga Taung Namagpakuindi Tung Anya (10:13-16)
13 Mag̓aning ti Jesus ang nagsugpat yang bitala na,
“Iugtulu tung numyu,
tung uri ta kaldaw,
kanugun yang mabtangan yang mga taung tag̓a Corasin may yang tag̓a Betsaida.
Kipurki kung duunaw ra rin tung Tiro may Sidon napagpalapus ta mga pruibang maktël ang pariu ka tung ipinagpaluaw duun tung mga lansangan nirang atia,
siguru nabuay ra ka rin ang nangapanligna tung mga kasalanan nira.
Nabuay ra ka rin ang nangapagsuut ta aw̓ël ang magig̓ilëk ang nangapagrumug ta kaw̓u tung mga tinanguni nira ang para asan da mamagpailala ang tanira pamanligna rang matuud.
Lucas 10:13-24
14 Piru maskin indi ka man nangapanligna,
kung kaw̓utun da nganing yang uras ang ipagsintinsia yang Dios tung tanan ang mga tau,
malakan-lakan pa yang parusang dangatën yang mga tag̓a Tiro may Sidon kay tung dangatën yang mga tag̓a Corasin may tag̓a Betsaida.
15 Pati yang mga taung atiang tag̓a Capernaum,
ya ka,
kanugun ka yang mabtangan nira.
Ay kipurki ang kanisip nira mamagkatinir da ta dëngëg nirang mas abwat ang asta mamanungkuk da tung langit,
ang pagkatapus duun da ka ilëm mangalambëg tung pag̓aningën ang Hades.
16 Kapurisu ta yamung pag̓apanuw̓ulu,
tandaan mi yang bitalaw.
Kung tinu pay mamati tung numyu,
katimbang nang yuu kay pamatiën na.
Piru kung tinu pay magpakuindi tung numyu,
katimbang na kang yuu kay pangindian na.
Kidispuis pa,
bëlag̓an ilëm yuuy pangindian na,
kung indi,
pati yang nagtuw̓ul tung yëën,
ya kay pangindian na,”
mag̓aning.
Atia ya ray ipinampaëtad ni Jesus tung mga tauan na baklu papanaway na.
Namagbaralikan Da Yang Pitung Puluk May Durua Ang Mga Tauan Ni Jesus Ang Pinanuw̓ul Na (10:17-20)
17 Taa numanyan tung pagbalik yang pitung puluk may dura nga tauan ang atia,
pinangampayan da ta kasadyaan nirang duru.
Mag̓aning yang balita nira,
“Ginuu,
maskin nganing yang mga dimunyung pamagpasilaw̓ët tung mga tau,
kung lalangan nganing yamën,
antimanung mamanangëd dang lag̓ing mamaglayas ay natëtëngëd tung kagaëman ang ipinagpiar mu tung yamën.”
18 Mag̓aning ti Jesus ang minlës,
“Anday dumang pagpamalaru tung pagparanangërën nirang atia tung numyu,
kung indi,
duun da nga bistu ang ti Satanas ang pagmangulu tung nira talagang lumagpak da ka ëngëd tung uri.
Manulad tung kudlap ang gulpi ra ilëm ang lumagpak.
19 Kapurisu asan da ngaintindiay mi ang matuud ka man ang pinakdulanamu ra yëën ta kagaëman mi ang para madëëg̓an mi yang pag̓apanuw̓ul ni Satanas ang atia.
Maskin durug kaansianu tanira ang katulad ka tung mga iraw,
maskin madalit pa ang katulad ka tung mga sipitan,
kayanan mi ka ëngëd yang tanan ang puirsa nirang dëëg̓ën.
Indiamu maunu pa tung niraa.
20 Ug̓aring ilëm,
kaministiran ang bëlag̓an masyadu ang yay ipagkalipay mi yang pagsurukuën yang mga dimunyu tung numyu,
kung indi,
yang pagkalipayan mi ëngëd ang yamu rinisibiamu ra yang Dios ang yang mga aran mi ipinaglista na ra duun tung langit,”
mag̓aning.
Yang Pagpilik Yang Dios Tung Mga Taung Inusinti Yay Nag̓ikasadya Ni Jesus (10:21-24)
21 Yang uras dang atii,
ti Jesus pinaëyangan da yang Espiritu Santo ta kasadyaan nang duru ang nag̓ampu tung Dios ang mag̓aning,
“Amang makagag̓aëm tung tanan,
mag̓ing tung kalangitan may tung katanëkan man,
durug dakul yang pagpasalamatu tung nuyu.
Ay pinapaglaw̓uk mu ra yang isip yang mga taung pagtalig tung pagkamataku nira ang para indi ka ilëm maintindian nira sigun tung paggaraëmën mung naang baklu ang nag̓ipagpakaw̓utu.
Ang pagkatapus binuskad mu yang isip yang mga taung mga inusinti ug̓ud mamarësmësan da nira yang mga bag̓ay ang atia.
Salamat,
Ama,
ang nagkamaning da ka man ta maning tia,
ay natëtëngëd ya kang lag̓i ay uyun tung kalëlyag̓an mu,”
mag̓aning.
22 Numanyan pagkatapus na ta pag̓ampu,
dayun dang nagpasanag tung mga tau ang mag̓aning,
“Yang tanan ang atiang nag̓ipagpalatayu tung numyu,
luw̓us dang ipinag̓intriga tung yëën ni Ama.
Andang pisan ay nag̓asangkad yang kabag̓ay-bag̓ayan yang pagkabëtangu ang yuuy pag̓aningën nang Ana na,
kung indi,
tanya ilëm ang pag̓aningënung Amaw.
Pati tanya,
anda kang pisan ay nag̓asangkad yang kabag̓ay-bag̓ayan yang pagkabëtang na ang tanyay pag̓aningënung Amaw kung bëlag̓an yuu ka ilëm ang pag̓aningën nang Ana na pati yang kumpurming nag̓alëlyag̓anung pabunayag̓an,”
mag̓aning.
23 Numanyan,
pagkatapus ta pagpasanag na tung mga tau,
dayun dang nanalunga tung mga taung atiang nag̓apangugyatan na.
Ay may iksën na tung nira ang indi na mapagngël tung kadaklan.
Mag̓aning tung nira,
“Tëëd mi tiang kaayënan ang nag̓ipakdul yang Dios tung numyung nag̓aita tung mga bag̓ay ang nag̓aita mi simanyan tung yëën.
24 Ag̓aningënamu ra yëën ta maning tia ay atiing tukaw pang mga panimpu,
dakëlëng mga manigpalatay yang bitala yang Dios pati mga adi pa ang duru ka rin ang kalëlyag nirang mangaita yang nag̓aita mi numanyan tung yëën,
ang pagkatapus indi ra ka naita nira.
Duru ka rin ang kalëlyag nirang mangagngël yang nag̓agngël mi numanyan tung yëën ang pagkatapus indi ra ka nagngël nira,”
ag̓aaning.
Yang Paggërëgmaën Ang Anday Pinilikan Yay Dapat Ang Usuyun (10:25-37)
25 Taa numanyan may sasang pagpakigmaëpët asan ang sag̓ad tung pinanubli tung mga kinaampu ang ya ray kumindëng ang nagtalimaan tung ni Jesus ang basi pa ra ilëm matuung na.
Mag̓aning,
“Amëëy,
may gustuu rin ang magtalimaan tung nuyu.
Unu pa w̓asu ay dapat ang buwatënu ang para mapagpasapënaw tung Dios ang anday katapus-tapusan?”
Lucas 10:25-42
26 Mag̓aning ka ti Jesus ang tuminuw̓al,
“Abir,
unu pay napabtang tung kasulatan?
Unu pay pag̓intindi mu tung nag̓abasa mu asan?”
27 Tumuw̓al yang pagpakigmaëpët,
“Yang katuw̓ulan ang nag̓aintindianu maning taa:
‘Pabuyukan mi ta gëgma mi ti Yawi ang yay Dios mi.
Yang paggërëgmaën mi tung anya dapat ang tëdëk ang pisan tung mga kinaisipan mi ang indi ka magtënakan.
Ya ra kay papruibaan mi tung tanan ang mga buwat-buwat mi,’
mag̓aningb.
Dispuis may sam bilug pang mag̓aning,
‘Gëgmaan mi yang mga aruman mi ang katulad ka tung paggërëgmaën mi tung sadili mi,’
mag̓aningc.
Atia,
yay nag̓askëanu,”
ag̓aaning.
28 Mag̓aning ka ti Jesus ang minlës,
“Tama ka man tiang tuw̓al mu.
Kung yay pirming tumanën mu,
atia mapagpasapëna ra tung Dios ang anday katapus-tapusan,”
mag̓aning.
29 Numanyan yang taung atia,
kumus nasëëkan da,
yang gustu na,
magdipinsa tung sadili na.
Purisu dayun na sing tinalimaan ti Jesus ang inaning,
“Piru Amëëy,
tinu pa ëngëd ay arumanu ang dapat ang gëgmaanu?”
ag̓aaning.
30 Numanyan anday dumang itinuw̓al ni Jesus tung anya,
kung indi,
nagpananglit dang mag̓aning,
“May sasang taung nanliit tung Jerusalem ang minangay duun tung Jerico.
Numanyan atiing panuldak da tung karsada,
napanawan da ta mga tulisan.
Pagdëëp nira tung anya,
dayun da nirang linuasan ta mga aw̓ël na ang pagkatapus tinaraw̓angan da nira ta palu ang pinaëpdan da ilëm nira ta linawa nang gësyë,
baklu butwanay nira.
31 Taa numanyan may sasa kang paring panuldak da ka tung karsadang atii.
Numanyan pagkaita na tung taung atiang tinulisan,
dayun na ra ka ilëm ang linilingan ang tinakliw̓an.
32 Utru si may sasa kang manig̓asikasu tung pagtuuan ang pinakalusu ang pagpanaw ka tung karsadang atii.
Kaw̓utan na yang tinulisan,
pinaalëngtan nang tinëlëngan ang pagkatapus,
tinakliw̓an na ra ka ilëm ang binutwanan.
33 Taa numanyan may sasang taung tag̓a Samariad ang pagpanaw ra ka tung karsadang atii.
Kaw̓utan na yang tinulisan,
pagtëlëng na,
ya ra ngaildaw.
34 Anday dumang binuat na,
dayun na rang pinaalëngtan ang binulung yang mga luka na.
Ninagnag̓an na ra ta irinëmën ang gësyë,
ang pagkatapus piniiran na ra ka ta lana,
baklu putusay na ta sinabat.
Pagkatapus ta pagbulung na,
dayun na rang ipinasaay tung asnung atiang pag̓asaayan na ra rin ang ginuyuran duun tung balay ang darayunan ta mga dayuan ang para maasikasu na duun.
35 Pangayag yang kaliw̓utan,
dayun dang nanduuk ta kuarta tung puyu-puyu nang ipinakdul tung may balay ang mag̓aning,
‘Kung mga sarang tung nuyu,
asikasuën mu ra kanay yang taung naa.
Ug̓aring kung alimbawa magkakulang da yang ipinakdulu tung nuyu,
kung pira pay magastus mu tung anya,
yuu ray balang magbayad tung nuyu tung uman ang pagbaliku taa,’
ag̓aaning yang tag̓a Samaria duun tung may balay.”
36 Ag̓aaning ti Jesus ang nagsugpat yang bitala na tung pagpakigmaëpët,
“Ta,
tung nuyung pag̓intindi,
tung tulung atiing nagkarapanaw duun tung taung atiing tinulisan,
tinu pa w̓asu tung nira ay nag̓ilala tung anyang yay aruman nang dapat ang gëgmaan na?”
37 Mag̓aning yang pagpakigmaëpët ang tuminuw̓al,
“Siguru yang naildaw tung anyae.”
Tumuw̓al ti Jesus,
“Ala,
pati yawa,
maning ka tia yang buwatën mu,”
mag̓aning.
Yang Pinilik Ni Maria Ang Mas Matinlu (10:38-42)
38 Taa numanyan atiing pagpadayun da na Jesus yang pagparanawën nirang pamagdistinu tung Jerusalem,
nanakluy ra kanay ti Jesus tung sasang baryu.
May baw̓ay duun ang nag̓aranan tung ni Marta ang yay nag̓imbitar tung anyang magpadayun tung balay na.
39 Yang baw̓ay ang naa may ari nang nag̓aranan tung ni Maria ang ya ray luminupakpak tung pinagtalungaan nira ni Jesus ang para mamati tung pag̓itulduk na.
40 Ug̓aring naang aka na,
yang isip na duru rag kalingalag tung pagsirimpanën nang duru.
Purisu numanyan,
anday dumang binuat na,
nagpalëngët dang nagkig̓a tung ni Jesus ang mag̓aning,
“Ay yawa Ginuu,
anda ra pala tung isip mu ang yang ariung atiang ya ra ilëm aglupakpak asan,
pinaw̓ayaanaw ra ilëm anya tani tung tanan ang pagsirimpanënung naa?
Purisu kung panganuguna ka w̓a tung yëën,
aningën mu ra kanay ang magtaw̓ang da tani tung yëën,”
mag̓aning.
41 Mag̓aning ka ti Ginuu tang nagtimalës,
“Aa Marta,
midyu nag̓abëgbëg̓an da ta mupia yang kulu mu.
Duru-durung nag̓apatarantaan mu.
42 Piru sam bilug ilëm yang dapat ang impurtaën.
Yang ipinalandaw ni Maria,
ya ra yang durug tinlu ang indi ra ëngëd mabawi tung anya,”
mag̓aning.