2 Kapurisu,

mag̓aning ti Jesus ang minlës,

“Kung mag̓ampuamu ra nganing tung Dios,

maning taa yang ianing mi tung anya:

5 Numanyan dayun da ti Jesus ang nagpananglit ang mag̓aning tung nira,

“Ipabëtangu,

yamu may sasang ungkuy mi tung baryu ang ya ray pandampan mi tung tënganan ta law̓ii ang aningën,

‘Ungkuy,

pablësay kanay ta tulung bilug ang tinapay.

6 Bakluaung kinaw̓utan ta bisita ang sasa kang ungkuyu ang alawid yang pinagliitan na.

Kulangaw pa ka man ta mapapaanu tung anya.’

7 Magkatama w̓asung tuw̓alënamu ra anyang,

‘Aa ungkuy,

indiaw ra pasilabtan mu.

Yawa rag tëtëlëng,

siradu ra yang purta,

lumbug̓anami ra nganing ang mamag̓ana.

Ya pa ag̓aring magbangunaw pang magpakdul tung nuyu,

ungkuy?’

8 Iugtulu tung numyu,

alimbawa,

maskin baliwalaën na pa yang pag̓inungkuyay mi,

piru natëtëngëd anday gustu nang mapaëyak tung kadaklan ang mga masigkabaryu mi,

anday dumang buwatën na,

kung indi,

magbungkaras dang lag̓i ang para magpakdul da yang kumpurming unu pay nag̓aministir tung anya.

Ya pa yang Dios ang indi maskëng magkërëng tung unur nang mag̓asikasu tung mga kaministiran mi?

9 “Kidispuis pa,

nani pa yang sam bilug ang ag̓ipaëtaru tung numyu natëtëngëd tung pag̓arampuën mi tung Dios.

Kung unu pay pagkakulang mi,

ya ray ingalukun mi tung Dios ta muya-muya.

Atia,

ipakdul na tung numyu yang nag̓aingaluk mi.

Muya-muyang idangëp mi tung anya yang nag̓asagyap mi.

Atia,

papag̓itaënamu ka anya yang nag̓asagyap mi.

Kung ya ray pambungun mi yang taung muya-muyang managbalay,

ay patakwalënamu ra ka anya.

10 Ag̓aningënamu ra yëën ta maning tia,

ay kipurki kumpurming tinu pay mag̓ingaluk tung Dios ta muya-muya,

ya ray pakdulan na.

Kumpurming tinu pay magdangëp ta muya-muya tung anya,

ya ray papag̓itaën na yang nag̓asagyap na.

Kumpurming tinu pay mambung tung taung muya-muyang managbalay,

ya ray maning pa tung patakwalën na.

11 Yamung mga amaën,

kung yang ana mi pandawat da ta ian tung numyu,

magkabag̓ay w̓asu ang yang ipakdul mi,

iraw?

12 Kung pandawat ta kiklug,

magkatama w̓asu ang yang ipakdul mi,

sipitan?

13 Ig disir kung yamu nganing ang mga taung pagkamali pa ngani,

nag̓askëamu nganing ang magpakdul yang matinlu tung mga ana mi,

ya pa yang Ama mi duun tung langit ang indi maskëng magpatinir tung Espiritu Santo tung kumpurming pag̓ingaluk tung anya?”

mag̓aning.

14 Taa numanyan may dumang kaldaw ang ti Jesus nagpalayas da ta dimunyu ang yay nagpaapa tung taung atiang pag̓aëkël-ëkëlan na.

Purisu numanyan,

pagkalayas da yang dimunyu,

diritsyu rang nabitala yang taung atiang nag̓apa ra rin.

Pagkagngël yang mga tau,

ya ray nabërëngan nira ta mupia.

15 Piru may duma asan ang namansianing,

“Natëtëngëd ilëm tung ni Satanas^a ang pagmangulu tung mga dimunyu,

nag̓apagpalayas ta mga dimunyu yang taung atia!”

ag̓aaning.

16 Yang duma may gustu nirang mamagtag̓am ta tuung tung ni Jesus.

Purisu pirming pag̓asig̓-asig nirang magpaita ta pruibang liit tung langit ang para ya ray magpailala tung anyang talagang may kagaëman na ka man ang liit tung Dios.

17 Numanyan ti Jesus,

kumus nag̓askëan na ra kang lag̓i kung unu pay laksu yang pag̓irisipën nira,

dayun dang nagtuw̓al ang mag̓aning tung nira,

“Ag̓askëan mi,

maskin ay pang inadianay,

kung mamagkuruntraan da yang mga kinasakpan nang mamagbaratukan,

makali ra ilëm ang madiadu yang inadian ang atia.

Maskin tung sam pamilya,

kung magkuruntraan dang magsuruayan,

diadu ra ka yang pagsarasaan nira.

18 Kapurisu kung tama yang numyung rasun ang ti Satanas yay pagpaktël tung yëën ang pagpalayas tung mga dimunyu,

ig disir,

pagsuruag-suag̓an da rin tanira yang mga dimunyung nag̓amanguluan na.

Ya pa ag̓aring magdayun pa yang paggaraëmën na?

19 Kidispuis pa kung tama yang numyung atia ang yuug paktëlay ni Satanas,

tinu pa kaya ay pagpaktël tung mga aruman ming pagpalayas ka tung mga dimunyu kung bëlag̓an ka tanya!

Maski nganing yang mga aruman ming atia,

puidi ra kang mamarik tung katadlëngan ming atia.

20 Ug̓aring kung ya ka man yang Dios mismu yang pagpaktël tung yëën ang para mapagpalayasaw tung mga dimunyu,

ig disir,

duun da ka nga pruibaay mi ang kinaw̓utanamu ra ka man yang puirsa yang paggaraëmën nang naang baklung pag̓atukuru.

21 Para maintindian mi yang pagkinuntraay yamën ni Satanas,

maning taa tung pananglit ang naa.

Kung may sasang mupiang lalii ang armadung pisan ang yay pagbantay tung balay na,

indi maunu pa yang mga ëkël-ëkël na.

22 Piru kung may sasang mas maktël tung anya ang yay manuyu duun tung anya,

ya ray mandëëg tung anyang magpangalaw yang mga armas nang atiang panalig̓an na ra rin.

Pati mga ëkël-ëkël nang pinanulisan na tung duma,

pangkëlan na ra ka ilëm ang ipamarti-parti tung mga kaarumanan na.

23 Intunsis kumus maning da ka man tia yang pagbinatukay yamën ni Satanas,

kung tinu pay indi magpakigsasa tung yëën tung panagpunu tung mga tau,

katimbang nang pagpakigkuntra tung yëën ang pagpangwasak tung nira ang para mas dang mamampalawid tung yëën,”

ag̓aaning.

24 Numanyan dayun dang sinugpatan ni Jesus yang bitala nang mag̓aning,

“Alimbawa,

kung may dimunyung lumayas da tung sasang taung sinuutan na ra rin,

unu pay mainabu?

Anday duma,

duun da ilëm magpaalyu-alyu tung banwang palag-palag yang tau na,

ay magsagyap da rin ta taung masuutan na.

Piru kung anday maita na,

maning taa yang ipagkësën-kësën na tung isip na:

‘Maayën pang magbalikaw ra ilëm duun tung dating pinagtiniranung liniitanu.’

25 Numanyan tung pagbalik na,

kaw̓utan na yang taung atiing liniitan na,

yang kaalimbawaan na,

maning pa tung sasang balay ang sinilig̓an dang ipinatayu-tayu yang mga garamitën.

26 Purisu anday dumang buwatën yang dimunyung atia,

magpangkël da tung mga aruman nang pitu nga dimunyuan ang mas pang malain kay tung anya.

Pagkatapus tanirang tanan,

dayun dang mamagsuut tung taung atia ang para asan da mamagtinir tung anya.

Purisu yang luaan na,

mas dang maliwag yang malambëg̓an yang taung atia kay tung primiru ang sam bilug pa ilëm din yang dimunyung pag̓ëkël-ëkël tung anya,”

mag̓aning.

27 Pagkaaning ni Jesus tia,

may sasang baw̓ay asan ang pamati ang tininluan da ta mupia tung pagparasanag̓ën nang atia.

Purisu dayun dang nabnga ang nagpadakul yang busis nang mag̓aning tung anya,

“Talagang pinakaayën da yang Dios ta mupia yang nangana tung nuyung nanalaana,

ay natëtëngëd tung nuyung ana nang ag̓ikadëngëg na,”

ag̓aaning.

28 Mag̓aning ti Jesus ang minlës,

“Sabag̓ay tama ka man.

Piru mas pang pakaayënën na yang kumpurming pag̓intindi tung bitala nang nag̓ipagpakaw̓utu ang pagkatapus ya ra kay magtumanën na,”

mag̓aning.

29 Taa numanyan atiing ya rag pagdulang agpagdulang yang kinadakël yang mga taung pamagsaragpun asan,

napagbitala ra ti Jesus ang mag̓aning,

“Durug kalain yang palaksu yang pag̓irisipën yang kadaklan ang mga tau simanyan.

Pamagtag̓am ta rëg̓ës tung yëën ang magpaitaw ta pruibang makabëw̓ërëng ang para ya ray magpailala ang yuug tuw̓ulay ka man yang Dios.

Piru indi ra paitaanu ta pruibang maning tia,

puira pa tung sam bilug ang magkaanggid tung napanawan ni Jonas.

30 Kipurki tung napanawan nang atia,

asan da nga pruibaay yang mga tag̓a Nineve ang tanya tinuw̓ul ka man yang Dios ang magparakaw̓utun tung nira.

Pariu ka tung yëën ang pag̓aningën ang Maninga Tau.

Ay may sasang mapanawanu ang asan da ka nga pruibaay mi ang yuu tinuw̓ul ka man yang Dios ang magparakaw̓utun tung numyu^b.

31 Kung kaw̓utun da nganing yang uras ang ipagsintinsia yang Dios tung mga tau ang tanirang tanan pampabungkarasën na,

yang sasang baw̓ay ang yay manigmangulu tung sasang banwa ang ampir duun tung salatan atiing tukaw,

ya ray pakdëngën yang Dios ang sasa kang mulidung ipagpasunaid na tung mga taung katulad ka tung nainambitu nungayna ang duun da ka ipatiëlay na yang katadlëngan nang magsintinsia tung nira.

Kipurki yang baw̓ay ang atii,

maskin alawid ang pisan yang banwang pinanliitan na,

piru nagpaawat da ka ëngëd ang nag̓angay taa tung banwa ta,

basta mapagpamati ilëm tung nag̓itulduk ni Adi Solomon ang makawawayang ta isip.

Ang pagkatapus yang mga taung naang nainambitu,

ag̓ad nani rang pisan tung tëpad nira yang sasang taung landaw pa ta nag̓askëan kay tung ni Adi Solomon ang ya kay pagturuldukun tung nira,

ang pagkatapus indi ra ka nirag pamatiën.

32 Dispuis pa tung uras ang atia,

pati yang mga taung atiing tukaw pa ang tag̓a Nineve,

ya ra kay pakdëngën yang Dios ang sasa kang mulidu ang ipagpasunaid na tung mga taung katulad ka tung nainambitu nungayna.

Duun da ka ipatiëlay na yang katadlëngan nang magsintinsia tung nira.

Kipurki yang mga tag̓a Nineve,

atiing pinagpakaw̓utan da ni Jonas,

lag̓i-lag̓i rang namanligna tung mga kasalanan nira.

Ang pagkatapus yang mga taung naang nainambitu,

indi pa ka ëngëd nag̓apanligna tung mga kasalanan nira,

ag̓ad nani ra tung tëpad nira yang sasang landaw pa tung ni Jonas ang pagparakaw̓utun ka tung nira.

33 “Ayw̓a,

tinu pay nag̓aintindian ming tau ang magsindi ta kaas ang pagkatapus ya ra italukay na ubin ya ra sukluw̓ay na?

Simpri asan ipabtangay na tung bistuan ug̓ud masanag̓an da yang mga taung pamagtakwal.

Ya ray kaalimbawaanung pagparasanag̓ën tung numyu.

34 Ipananglitu ra kanay tung mga tinanguni mi.

Yang maning pa tung kaas na,

ya ra yang mga mata mi.

Kung masadlaw,

pati intirung tinanguni mi,

damay ra ka tung masadlaw.

Piru kung makiklëp,

tay pati intirung tinanguni mi,

umid da ka tung makiklëp.

35 Kuidaw,

pati mga isip ming maning pa ka tung kaas tung mga sadili mi ang kanisip ming malëmëk,

nusias nag̓apatëg̓as mi pa ka ëngëd tung nag̓ipagpasanag̓u ra rin tung numyu.

36 Piru kung yang pambungun mi,

ya ra yang sasang taung masadlaw yang mata na ang yang intirung tinanguni na damay ra ka tung masadlaw ang andang pisan ay makiklëp ang nag̓alakët,

ig disir,

kayananamu ra ka yëën ang pasanag̓an.

Maning pa tung asanamu ra nga patingkalayu ta kaas,”

mag̓aning.

37 Pagkatapus ni Jesus ta pagbitala,

may sasang Pariseo ang yay nag̓imbitar tung anyang mamangan tung balay na.

Purisu dayun dang nagpaklëd ti Jesus tung balay nang nagpakigsaru tung anya.

38 Numanyan yang Pariseong naa,

durug dakul yang pagkabërëng na tung ni Jesus ang ayw̓at indi ra nangug̓as yang kalima na ta magkabag̓ay baklu namisik yang pamangan^c.

39 Numanyan pagkaita ni Ginuu ta yang pagkabërëng yang Pariseong atia,

dayun na rang inaning,

“Abaa yamung mga Pariseo,

duruamug kasinulipëtën tung pagrilimpiuën mi tung mga tasa mi may tung mga pinggan mi sigun tung mga riglamintung atiang pinanubli mi tung mga kinaampu ta ang yang kanisip mi ya ray mauyunan yang Dios tung numyu.

Piru naa pala yang tung pundu yang mga pupusukun mi,

indi mi pala ag̓insapuën ang yay kargadung pisan ta mga malalain ang pagtirimaën.

Kuw̓ali panalënsënamu tung tanan ang bag̓ay sibaya malëpës mi yang mga masigkatau mi.

40 Midyu baliskad dang pisan yang mga pag̓irisipën mi.

Ayw̓a,

yang nag̓imu tung sagpaw ang yag dawalay bëlag ba ang pati yang tung adalëm ang indi maita ya kay inimu na?

Bëlag bang dapat ang ya kay intindiën ming insapuën?

41 Purisu yang tung sagpaw indi mi pagsulipëtën ang limpiuan,

kung indi,

yang mas matinlung buwatën mi,

kung unu pay nag̓ipabtang mi tung tasa mi may mga pinggan mi,

ya ray ipamarti-parti mi tung mga taung nag̓aliwag̓an.

Indiamu ilëm mabërëng ang aningënamu ra yëën ang kung ya ray pabilug̓an ming usuyun,

pati nganing yang tanan ang garamitën mi,

limpiu ra tung pagtërëlëngën yang Dios,

maskin indi mi intraan pangug̓as sigun tung pinanubli ming atia.

42 Piru ay pa w̓a?

Yamung mga Pariseo,

kanugun yang pagkabëtang mi tung uri ay kipurki maski nganing yang mga luak ming gërëg̓ësyëng pisan ang ya ilëm ag̓ipasaburay mi tung mga sëra mi^d,

pati yang tanan ang gurulayën mi,

ya pay panëpët-sëpëtën ming pamatëng-patëngën ta sam puluk ang parti ang para yang sang parti ya ray nag̓ibuluntad mi tung Dios^e.

Piru yang nag̓ipatuman ëngëd yang Dios tung numyu ang yamu ra rin ay magpabuyuk yang gëgma mi tung anya ig ang yamu ra rin ay magbuat ta magkatama tung mga masigkatau mi,

ya pay nagbaliwalaën mi.

Dapat da rin ang ya ëngëd ay pabilug̓an ming tumanën atiang may mga timbang na ang indi mi ka paw̓ayaan yang pagpalartiën ming atia tung Dios ta yasampuluk ang parti.

43 Yamung mga Pariseo,

kanugun yang pagkabëtang mi tung uri.

Kipurki yang pag̓asikad ming magsimba tung mga pagsaragpunan mi ang yamu paklëramung kumarung tung parada ang para maitaamu ra ta kadaklan ang mga tau ang yamu dayawën nirang duruamu kag katinuuën.

Dispuis pa kung yamu mamasyar tung mga plasa,

yang kalëlyag mi ang pakigbag̓asanamu ta tanan ang mga taung kumustaën.

44 Yang sasa pang panganugunanu tung numyu ya taa.

Yang kaalimbawaan mi yamu maning pa tung lëyang ang pinanlug̓uran ta taung patay ang pagkatapus anday marka na.

Ang masag̓iran ta mga tau,

anday kaliw̓utan nirang asan da tanira nga mansaay ta sasang patay^f.

Yang pisan yang kalimbawaan mi ay natëtëngëd yang mga taung pamagpatulduk tung numyu,

anda kay kaliw̓utan nira ang naa pala asan da ka tanira nga saliray tung mga ug̓ali ming sayud,”

ag̓aaning.

45 Atii,

may sasang sag̓ad ang mataku tung mga urdinansang pinanubli ang ya ray suminublang ang mag̓aning,

“Ëlat kanay,

Amëëy.

Ang magbitalaa,

anda kay pagpatëng-patëng mu!

Pati yami ag̓igapil mu kang nag̓insultuën,”

ag̓aaning.

46 Mag̓aning ti Jesus ang minlës,

“Pati yamung mga sag̓ad,

ya ka,

kanugun ka yang pagkabëtang mi tung uri.

Kipurki yang mga tau ya rag palbatay ming nag̓iksirën tung sari-sari ilëm ang mga urdinansang inimu-imu mi ka ilëm ang idinulang tung mga katuw̓ulan yang Dios.

Kung tung mga sarakanën pa,

imurat da ilëm ang kayanan nira.

Piru indiamu ka ëngëd magtaw̓ang ta sakan,

maskin tung madëën da ilëm yang mga kalima ming magduul.

47 Talagang kanugun yang pagkabëtang mi tung uri.

Buat na pa durung pagmaal mi tung mga manigpalatay yang bitala yang Dios ang tukaw sindu yang mga lëyang ang pinanlug̓uran tung nira nag̓apaisa-isaan mi nganing ang nag̓apakdëngan ta mga matitinlung pantiun.

Piru yang mga kinaampu mi yay namagpangimatay tung nira.

48 Purisu asanamu ra pagpailala ang yang binuat nirang atii nag̓apauyunan mi ka gatëd taniray namagpangimatay,

yamung may mga irinsia tung nira,

yamu ray pagpaisa-isang pagtapus tung inimpisaan nira.

49 Kapurisu para matuungamu,

ya taa yang disisiun yang Dios para tung numyu:

Paangayanamu si ka anya tung mga manigpalatay yang bitala na ang yay magparakaw̓utun tung numyu ang katulad ka tung binuat na tung mga kinaampu ming tukaw ang para asanamu ra nga sukdaay na kung ya pa ag̓ari yang paggaralangën mi tung nira.

Pagkatapus anday dumang buwatën mi tung nira,

yang duma ya ra ipaimatayay mi,

yang duma ya ra pandëëg-dëëg̓ay ming panigbakay.

50-51 Purisu yang pagpakuindi ming atia tung nira,

anday dumang pakaw̓utun na,

tung numyu ëngëd ang mga masigkanasyunu nga dilëmay yang Dios yang dug̓u yang tanan ang mga manigpadapat yang bitala na,

mag̓impisa pa tiing primiru tung ni Abel ang asta ra tung kauri-urian ang tung ni Zacarias ang yay inimatay yang mga kinaampu mi tung kaklëran yang pagtuuan ang pinakalusu.

Duun ka pa man mismu imatayay nira tung pag̓ëlaan yang karakulan na may yang midyu lamisaan ang atiang darasag̓an ta mga ayëp.

Iugtulu tung numyu yang kamatuuran,

yamung mga masigkanasyunu numanyan tung panimpung naa,

talagang tung numyu ëngëd dilëmay na yang kamatayën nirang tanan^g.

52 Dispuis pa yamung mga sag̓ad kanugun yang pagkabëtang mi tung uri,

ay dakulu yang panuw̓alan mi tung Dios.

Ay yang maning pa tung liabi ang ipag̓abri mi ra rin tung linëgdangan yang kasulatan,

ipinlëk mi ra.

Purisu indi mi ra nag̓atultulan yang gustu nang ianing.

Pati yang mga taung nag̓apanuldukan mi ang duru ka rin ang kalëlyag nirang matultul,

ya ra ilëm ag̓intraay mi ta lingalag,”

ag̓aaning ti Jesus duun tung nira.

53-54 Taa numanyan,

paglampud ni Jesus asan tung balay ang atiing pinamanganan na,

pag̓adëmtan da ta mupia naang mga Pariseo may naang mga sag̓ad tung pinanubli.

Purisu nag̓apabalitëktëkan nirang nag̓apabalitëktëkan ta pagpaisplikar tung sari-saring bag̓ay ang para madëëpan ilëm nira ta puntus tung mga tuw̓al na,

ang yay sarang ang mapadatëlan nira ta kasalanan.