Natëtëngëd Tung Pagsirintinsiaën Tung Duma (7:1-5)
7
Taa numanyan nagpadayun ti Jesus yang pagturuldukun na tung nira ang mag̓aning,
“Indiamu ra ëngëd magtag̓am ta sintinsia tung mga aruman mi ug̓ud indiamu ra ka sintinsiaan yang Dios.
2 Kipurki kung ya pa ag̓ari yang pagsirintinsiaën mi tung mga aruman mi,
ya ra kay usuyun yang Dios ang magsintinsia tung numyu.
Kung unu pay pitik ang gamitën ming magsintinsia tung nira,
ya si kay gamitën nang magsintinsia tung numyu.
3 Ta yamung naanad dang magtag̓am ta sintinsia tung duma,
ayw̓a kaya ang yang maning pa tung sasang lëtëk ka ilëm tung mata yang putul mi,
atii pala yay nag̓apadëkdëkan mi ang pagkatapus atia ngani tung mata mi may mag̓abatang ang yag këkëtëg ang indi mi pala nag̓adipara?
4 Ayw̓a palangaasan mi pa ka ëngëd yang putul ming aningën ang ‘Maimu ilëm,
putulu,
kuatën ta ra tiang lëtëk tung mata mu?’
Ang pagkatapus atia ngani tung mata mi may sasang mag̓abatang ang yag këkëtëg ang indi mi pala nag̓adipara?
5 Abaa yamu ilëm agpagpakaayën-ayën!
Kaministiran ya ra kanay ay tukawën ming kuatën yang mag̓abatang ang atiang yag këkëtëg tung mata mi.
Atia,
manadlaw ra yang panëlëng mi ang para tung matinlu yang panguat mi tung lëtëk tung mata yang putul mi.
6 Indi mi ikdul tung mga kiru yang sasang bag̓ay ang sagradu.
Muya balikdënamu ra ilëm nirang tëngkakën.
Indi mi ka iplëk tung mga baw̓uy yang mga musia mi natëtëngëd likëd-likëran da ilëm niraa.”
Natëtëngëd Tung Pag̓arampuën Ang Tëdëk Tung Kinaisipan (7:7-11)
7 Mag̓aning si ti Jesus ang nagpadayun yang pagbaradbarën na tung mga isip yamën,
“Kung unu pay pagkakulang mi,
ya ray ingalukun mi tung Dios ta muya-muya.
Atia,
ipakdul na tung numyu yang nag̓aingaluk mi.
Muya-muyang idangëp mi tung anya yang nag̓asagyap mi.
Atia,
papag̓itaënamu ka anya yang nag̓asagyap mi.
Kung ya ra kay pambungun mi yang sasang taung muya-muyang managbalay,
ay maning pa tung patakwalënamu ra ka anya.
8 Ag̓aningënamu yëën ta maning tia,
ay kipurki kumpurming tinu pay mag̓ingaluk tung Dios ta muya-muya,
ya ray pakdulan na.
Kumpurming tinu pay magdangëp ta muya-muya tung anya,
ya ray papag̓itaën na yang nag̓asagyap na.
Kumpurming tinu pay magpakbung tung taung muya-muyang managbalay,
ya ray maning pa tung patakwalën na.
9 Yamung mga amaën,
kung yang ana mi pag̓ingaluk da ta tinapay,
magkabag̓ay w̓asu ang pakdulan mi ta batu?
10 Ubin kung yang nag̓aingaluk na ian,
magkabag̓ay w̓asu ang pakdulan mi ta iraw?
11 Ig disir kung yamu nganing ang makinasalananën,
nag̓askëamu nganing ang magpakdul yang matinlu tung mga ana mi,
ya pa yang Ama mi duun tung langit ang indi w̓asu maskëng magpakdul yang matinlu tung kumpurming tinu pay pag̓ingaluk tung anya?
12 “Kapurisu kung papagbilug̓unu ra yang tanan ang atiang ipinagwaswasu tung numyub,
ya ra taa:
yang dapat ang buatën mi tung duma,
ya ra yang matinlu ang yay nag̓alëlyag̓an ming buatën nira tung numyu.
Kipurki ya ëngëd ay nagarumbuan yang mga katuw̓ulan ang ibinutwan ni Moises may yang ipinagpadapat yang mga manigpalatay yang bitala yang Dios atiing tukaw,”
ag̓aaning duun ti Jesus.
Natëtëngëd Tung Duruang Dalan (7:13-14)
13 Taa numanyan nagpadayun da ti Jesus yang pagturuldukun na tung yamën ang nagpakdul ta sasang pananglit ang mag̓aning,
“Kung gustu ming magsarapënanamu ra yang Dios ang anday katapusan,
asanamu ra magpaklëd tung purtang piët.
Kipurki mawayang yang purta ig marugal yang dalan ang duun da manampët tung kadiaduan ang anday katapus-tapusan na.
Dakëlë nganing yang mga taung pamagpaklëd asan.
14 Kapiët yang sambilug ang purta ig durung kaliwag̓an ang mapasaran yang kumpurming mag̓usuy tung dalan ang yang panampëtan na magsarapënan da tanira yang Dios ta unaynay.
Malaka ilëm nganing yang mga taung nag̓atultul.
Natëtëngëd Tung Duruang Ayu (7:15-20)
15 “Mangamanamu ra ta mupia tung mga taung pamag̓ambu ang tanira mga manigpalatay yang bitala yang Dios.
Kung magpailala ra nganing tung numyu,
magpasuad-suad dang durug kaayën ang mga tau ang katulad ka tung sasang karnirung durug kaalam.
Piru tung adalëm aparti ra yang pag̓asikad nira,
ay yang kaalimbawaan nira maning pa tung mga kirung talunun ang pagmalung ta matëkëb nira.
16 Asan da nga puntusay mi tung mga ubra-ubra nira.
Simpri yang mga sapinit indi pamurak ta pumangga ig yang aruma indi ka pamurak ta langka c.
17 Yang ayung madalumama,
matinlu ka yang nag̓ipamurak na.
Piru yang ayung kësëg-kësëg,
sayud ka yang nag̓ipamurak na.
18 Anday ayung matinlu ang sayud yang nag̓ipamurak na.
Anda kay ayung sayud ang matinlu yang nag̓ipamurak na.
19 Yang ayung kumpurming bëlag̓an matinlu yang nag̓ipamurak na,
ya ray pëlarën ang iplëk tung apuy.
20 Purisu duun da tung mga ubra-ubra nira nga dëëpay mi yang mga taung atiang pamag̓ambu ang tanira unu mga manigpalatay yang bitala yang Dios.
Nag̓asambit Ni Jesus Kung Tinu Pay Malg̓ud Tung Palaksu Yang Paggaraëmën Yang Dios Ang Baklu May Yang Indi Malg̓ud (7:21-23)
21 “Bëlag̓an ang mag̓aning ang yang tanan ang mga tau ang kumpurming pag̓inambit yang aranu ang yuu unu ti Ginuu na ang yay mangalg̓ud tung palaksu yang paggaraëmën yang Dios tung uri,
kung indi,
sulaminti ilëm yang kumpurming pagtuman yang nag̓alëlyag̓an yang pag̓aningënung Amaw duun tung langit.
22 Ay kung kaw̓utun da nganing yang uras ang ipagsintinsiaw ra tung mga tau,
durung mag̓aning tung yëën ang maning taa:
‘Ginuu,
Ginuu,
palg̓urayami ka kipurki nagparakaw̓utunami ka yang bitala yang Dios tung mga tau ang yang aran mu yay pirming sinambit yamën.
Ya kay sinambit yamën ang nagpalayasami tung mga dimunyung namansisuut tung mga tau.
Duru-duru nganing ang mga pruibang makabëw̓ërëng ang ipinagpalapus yamën natëtëngëd tung pagsambit yamën yang aran mu.’
23 Pagkatapus prangkaënu ra ilëm tanira ang panganingën:
‘Anda kang lag̓i ay kalalabtën mi tung yëën.
Paaw̓ig̓amu ra ilëm taa tung yëën,
ay ta yamu nagpadayunamu ra ka ëngëd tung mga ubra-ubra ming balaw̓ag tung kalëlyag̓an yang Dios.’
Yang Pananglit Natëtëngëd Tung Duruang Mga Manigpakdëng Ta Balay (7:24-27)
24 “Purisu kung tinu pay pamati tung mga bitalaung naang nag̓ipagpadapatu,
ang pagkatapus tumanën na ra ka,
ya ray nag̓ipananglitu tung sasang taung mawayang yang kinaisipan na.
Ay tung pagpakdëng na yang balay na,
yang pinabunsaran yang adili na kaw̓ut ëngëd duun tung kabatuwan.
25 Pagkatapus kuminuran da yang banwa ta tudu-tudu ang asta linëmpanan da.
Pati yang palët kumintël da ka ta duru ang asta pinamilug̓an da yang balay nang binungsaran.
Piru indi ra ka ëngëd naunu pa ay sangkad tung kabatuwan yang mga adili na.
26 Piru kung tinu pay pamati tung mga bitalaung naa ang pagkatapus indi na ra ka ilëm tumanën,
ya si kay nag̓ipananglitu tung sasang taung kiput yang isip na.
Ay tung pagpakdëng na yang balay na,
duun da ilëm ipakdëngay na tung kënay.
27 Pagkatapus kuminuran da ta tudu-tudu,
diritsyu rang linëmpanan yang banwa,
pati yang palët kumintël da ka ta duru ang asta pinamilug̓an da yang balay nang binungsaran.
Anday dumang pinakaw̓ut na,
ya ra magkalipuat ang gëw̓a rang pisan,”
ag̓aaning duun ti Jesus.
28 Purisu nagkainabu ra ang atiing pagtapus da ni Jesus tung pagparadapatën na yang mga bitalang atia,
durung pagkabërëng yang mga tau tung pasais nang nagturuldukanën.
29 Ay yang nabërëngan nira tung anya,
yang pagturuldukun na tung nira may builu nang maktël ang yay pagpailala ang tanya may katëngdanan na ka man ang ipinakdul yang Dios tung anya.
Bëlag̓an pariu tung pasais yang mga sag̓ad ang yay dating mga manigtulduk tung nira.