Yang Pagpamaayën Ni Jesus Tung Sasang Taung May Dispirinsia Tung Ulit Nang Makamamansa (8:1-4)
8
Taa numanyan,
tung pandanëk ni Jesus tung napabukatud ang atiing pinagtuldukan na,
duru-durung mga taung namagpakignunut da tung anya.
2 Buay-w̓uay ta gësyë,
may sasang taung nagpalëngët tung anya ang may dispirinsia tung ulit nang makamamansaa.
Dayun dang nagluud tung pinagtalungaan nirang durua ang nagpakiildaw tung anyang mag̓aning,
“Amëëy,
kung malëlyag̓a ilëm,
nag̓askëanu ang sarangan mung kuatën tung yëën yang dispirinsiaung naang pagpamansa tung pagkatauu,”
mag̓aning.
3 Numanyan,
dayun dang dinëënan ni Jesus ang inaning,
“Ag̓alëlyag̓aw ka,
kuatana ra yëën,”
mag̓aning.
Pagkatapus lag̓i-lag̓ing nakuatan da ka man tung dispirinsia nang atia.
4 Numanyan nagkalalangan da ti Jesus tung anyang mag̓aning,
“Kuidaw,
india ra ëngëd magbaw̓alitaën maskin tung ninu pa natëtëngëd tung binuatung naa tung nuyu.
Anday dumang buatën mu,
mag̓angaya ra kanay duun tung sasang pari ang magpatëlëng ang yawa limpiu ra.
Pagkatapus magpadasag̓a ra ka dayun tung anya ta sasang ayëp ang iprisintar na tung Dios ang katulad ka tung urdinansang ibinutwan ni Moises ang tukawb ug̓ud asan da nga kumpurmiay yang mga tau ang anda ray dapat ang pamiruan nira tung nuyu,”
mag̓aning.
Nag̓adayaw Ni Jesus Yang Pagtaralig̓ën Yang Sasang Kapitan Ang Durug Dakul (8:5-13)
5-6 Taa numanyan,
atiing ti Jesus kuminaw̓ut da duun tung lansangan ang Capernaum,
may nagpakigbag̓as tung anyang sasang kapitan tung sang grupung mga sundalung atiang mga tag̓a Roma.
Durung pakiildaw na tung ni Jesus ang mag̓aning,
“Amëëy,
yang turuw̓ulunu paglaru.
Ya ra ilëg lalakday takaa tung balay ang indi ra mapangimi-kimi.
Durug liwag yang pagkabëtang na.”
7 Mag̓aning ti Jesus ang nagtimalës,
“Angayënu ra kanay ang pamaayënën.”
8 Mag̓aning ka yang kapitan ang nagtuw̓al,
“Amëëy,
indi ra.
Bëlag̓anaw bag̓ay tung nuyu ang yawa pay patakwalënu tung balayu.
Basta magkalalangana ra ilëm,
atiang lag̓i magmaayën da yang turuw̓ulunu.
9 Kipurki maskin nganing yuu,
kabisaduaw ra ka tung pagpalalang tung mas abwat ta katëngdanan tung yëën ig kabisaduaw ra ka tung pagkalalangan tung mga sundaluu.
Kung lalanganu yang sam bilug ang mangay duun,
atiang lag̓i magpanaw ra ka man.
Pati yang sam bilug ya ka,
kung guuyanung magpalëngët tung yëën,
atiang lag̓i,
magpalëngët da ka man.
Asta yang sasang kirëpënu ya ka,
kung lalanganung mag̓ubra ta sasang bag̓ay,
atiang lag̓i ubraën na ra ka man,”
ag̓aaning.
10 Pagkagngël ni Jesus tia,
nabërëng da ta mupia.
Dayun dang nagbitala tung mga taung atiang pamagpakignunut tung anya ang mag̓aning,
“Iugtulu tung numyu yang kamatuuran,
taa tung banwa tang naang Israel,
anda pay taung nag̓apanawanung maning taag dakul yang pagtaralig̓ën na tung yëën.
11 Iugtulu tung numyu,
kung ipabistu ra nganing yang Dios yang paggaraëmën na tung baklung kaliw̓utan,
durung mga taung tag̓a maskin ay pang banwaay ang bëlag̓an pa man mga masigkanasyun ta ang ya ray panlugtan yang Dios ang mamagpakisaru ra tung na Abraham,
ni Isaac,
may ni Jacobc.
12 Piru yang kadaklan ang mga kanubli nira simanyan ang mabakëd yang pagtalig nira ang tanira ray bag̓ay ang mangalg̓ud,
ya pa kay pangaskasën yang Dios ang ipamlëk duun tung sasang lugar ang makiklëp ang alawid ang pisan tung anya.
Duun da tanira mamagtarangitën ang mamagkarëtkët yang mga isi nirang mamagpapinitinsia,”
mag̓aning.
13 Pagkatapus dayun na sing inaning yang kapitan ang,
“Puidia ra kang mulik.
Magkamaningan da ka man yang kumpurming itinalig mu tung yëën,”
ag̓aaning.
Pagkatapus tung uras ang atii,
nagmaayën da ka man yang turuw̓ulun yang kapitan.
Duru-durung Mga Tau Ang Nag̓apampamaayën Ni Jesus (8:14-17)
14 Taa numanyan,
pagkaw̓ut ni Jesus duun tung balay ni Pedro,
ya ray naita na yang punyangan nang baw̓ay ang ya ra ilëm aglalakday asan.
Ay agkinitën da.
15 Numanyan pagdëën ni Jesus tung kalima na,
lag̓i-lag̓ing naumpawan yang maëpët.
Pagkatapus diritsyu rang nagbangun ang nag̓impisa rang nag̓asikasu tung anya.
16 Numanyan,
atiing pagkasantëk da yang kaldaw,
durung mga taung agdimunyuwën ang ipinampadangëp da yang mga aruman nira tung ni Jesus.
Numanyan sam pabitala ra ilëm ni Jesus,
antimanung namaglalayasan da yang mga dimunyu.
Pati yang mga taung may mga laru,
luw̓us na ra kang pinampamaayën tung uras ang atii.
17 Nagkamaningan da ta maning tia ug̓ud asan da magkamatuud yang sasang ipinaula yang Dios tung ni Isaias ang sasang manigpalatay nang tukaw ang mag̓aning,
“Tanya mismu yang magpamaayën tung yatën tung mga kaladuan ta,
yay magpanguat tung mga masiit ang nag̓asinti ta,”
mag̓aningd.
Yang Nag̓asikad Ëngëd Ni Jesus Tung Sasang Taung Nag̓alëlyag Dang Mag̓ing Tauan Na (8:18-22)
18 Taa numanyan pagkaita ni Jesus ang duru-durung mga tau ang pamagrikudu tung anya,
nagkalalangan da tung yamën ang mga tauan na ang mag̓aning,
“Ala,
magpatindakita ra kanay,”
ag̓aaning.
19 Numanyan tamang tamang magsaayami ra rin na Jesus,
may sasang sag̓ad tung mga urdinansang pinanubli tung mga kinaampu ang ya ray nagpalëngët tung anyang mag̓aning,
“Amëëy,
magpakignunutaw ra tung nuyung magpaugyat,
maskin aria pa manganing,”
ag̓aaning.
20 Mag̓aning ti Jesus ang minlës,
“Maayën pa yang mga dayap tung talun,
may mga anas nirang siguradu,
pati mga lamlam may mga bayay nirang sadili.
Indi ra ilëm yuung pag̓aningën ang Maninga Tau ang anday pirmaminting pag̓ëlkanu,”
mag̓aning.
21 Pagkatapus may sam bilug pang taung pagpaugyat da tung ni Jesus ang yay nabngang mag̓aning tung anya,
“Amëëy,
bakluaw ra magpadayun tung pagpaugyatu tung nuyu,
kung maimu ilëm tung nuyu,
tugtayaw ra kanay nuyung mulik ang para kung mapatay ra nganing ti tatay,
mapalg̓uru ra tung lëyang,”
ag̓aaning.
22 Mag̓aning ti Jesus ang nagtuw̓al,
“Bilug̓un mu ra ilëm yang isip mung magpaugyat tung yëën.
Yang bag̓ay ang atiang nainambit mu,
ipatug̓ay mu ra ilëm tung duma ang pamanalugpatay pa tung Dios.
Bag̓ay ang pisan tung nirang mamanlug̓ud tung mga aruman nirang patay ra,”
mag̓aning.
Yang Pagpalinaw Ni Jesus Tung Tampung Durug Këtël (8:23-27)
23 Pagkatapus tia,
dayun da ka ëngëd ang nagsaay ti Jesus tung balangay,
kasiraanami ra kang nag̓apangugyatan na.
24 Numanyan tung pagpalayag yamën tung lalaguna,
nainalianami rang binungsaran ta tampung durug këtël ang asta yang balangay gësyë ra ilëm ang napnukan.
Piru ti Jesus tanya sigi ra ilëm ang ëlëk.
25 Numanyan dayun dang pinalëngtan yamën ang pinuaw ang inaning,
“Amëëy,
taw̓ang!
Magkaralëmësita ra taa,”
ag̓aaningami.
26 Mag̓aning ka ti Jesus ang nagtimalës,
“Ayw̓a pinatalaw mi ra yang mga isip mi?
Midyu tung nag̓apakulangan mi ra yang pagtaralig̓ën mi tung yëën,”
mag̓aning.
Pagkatapus dayun dang nagbangun ang nagsambëng tung palët may tung lakun.
Lag̓i-lag̓ing naglinaw rang pisan.
27 Atii,
durung pagkabërëng yamën ang mga kaarumanan na.
Purisu nag̓araning-aninganami ra ilëm ang mag̓aning,
“Unu ra kayang klasiay ta tau taa?
Maskin yang palët pati yang lakun,
luw̓us dang pamanangëd tung anya!”
mag̓aning.
Nag̓apalayasan Ni Jesus Ta Mga Dimunyu Yang Durua NGa Tauan (8:28–9:1)
28 Taa numanyan,
pagkaw̓ut ni Jesus duun tung tindak yang lalaguna duun tung baw̓anwaan yang mga Gadareno,
binag̓as da ta durua nga tauan ang pariung pag̓aëkël-ëkëlan ta mga dimunyu.
Duun mamanliit tung may mga lëyang ang pinanlug̓uran ta mga patay.
Kumus durug karaisëg,
anday magpanayang-nayang ang magpanaw duun tung karsadang atia.
29 Numanyan pagbag̓as nira tung ni Jesus,
dayun dang namaglëlpakën yang dimunyung mag̓aning,
“Yawang pag̓aningën ang Ana yang Dios,
ayw̓a nag̓apasilabtanami pa nuyu?
Muya yang inangay mu taa ay parusaanami ra nuyung indi pa nganing agkaw̓utun yang uras ang ipinagtipu yang Dios,”
mag̓aning.
30 Numanyan duun tung tukaw-tukaw,
may sasang kaayëpan ang mga baw̓uy ang gaw̓ung ang pamanulyad-tulyad.
31 Numanyan yang mga dimunyung atia,
namagpakiluuy ra ilëm tung ni Jesus ang mag̓aning,
“Kung yami talagang palayasënami ra ka ëngëd nuyu tung mga taung naa,
maayën pa duunami ra ilëm ipasuutay mu tung mga baw̓uy ang atii,”
ag̓aaning.
32 Mag̓aning ti Jesus ang nagtuw̓al,
“Ala,
sigi ra,”
ag̓aaning.
Purisu dayun dang namansilayas tung durua nga tauan ang atiang namansilaktëd tung mga baw̓uy ang namansisuut.
Pagkasuut nira tung mga baw̓uy,
dayun dang namansikurbut tanirang tanan ang namagpataladtad ang diritsyu ra ilëm tung lalagunang namampakpa ang asta nagkaralëmës da ilëm ang luw̓us.
33 Taa numanyan yang mga manig̓asikasu tung mga baw̓uy ang atia,
dayun dang namaglalaksuan ang namansiangay duun tung lansangan.
Pagkaw̓ut nira duun,
namagbaw̓alitaën da natëtëngëd tung tanan ang nagkarainabu.
Pati yang nainabu tung durua nga tauan ang atiang dinimunyu ra rin,
ya ëngëd ay ipinagbalita nira.
34 Purisu anday dumang dinangat na,
yang mga taung tag̓a lansangan,
alus pa ilëm tanirang tanan namansilua rang namansiangay duun tung ni Jesus ang namagpakigbag̓as.
Numanyan,
pagkabag̓as nira tung anya,
dayun dang namag̓intra amu-amu tung anya ang basta magliit da ilëm duun tung banwa nira.