May Mga Baw̓ay Kang Namagpakignunut Tung Ni Jesus (8:1-3)
8
Taa numanyan,
pagpanaw ra ta pira pang kaldaw,
nagliliw̓utun da ti Jesus tung mga lansangan pati tung mga baryu.
Nagparakaw̓utun yang sasang matinlung balita ang yang Dios mag̓impisa rang magtukud yang paggaraëmën nang baklu tung mga tau.
Yang mga tauan nang atiang sam puluk may durua ya ra kay namag̓ugpu tung anya.
Lucas 8:1-21
2 Kidispuis pa may mga baw̓ay asan ang namagpakignunut da ka tung anya ang tan taa pa pinampamaayën na tung mga laru nira ang yang duma dinimunyu ra rin.
Katulad ka tung ni Mariang atiang tag̓a Magdala ang dinimunyu ra rin ta pitu nga dimunyuan ang ya ray pinalayas ni Jesus tung anya.
3 Yang sam bilug pang baw̓ay ang pagpakignunut ka tung ni Jesus,
yay nag̓aranan tung ni Juana ang kasawa ni Chusa ang may katëngdanan duun tung palasiu ni Adi Herodes.
Yang sam bilug pang baw̓ay yay nag̓aranan tung ni Susana.
Kidispuis pa,
dakëlë pa kang mga baw̓aing duma ang namagpakignunut da ka tung nira ang ya ray namaggastus ang namag̓arasikasuën tung mga kaministiran na Jesus.
Nagpananglit Ti Jesus Natëtëngëd Tung Mga Tanëk Ang Tarakbulan Ta Binik (8:4-8)
4 Numanyan atiing pagliliw̓utun da ti Jesus,
durug dakël yang mga taung namag̓arangayan tung anya ang yang pinanliitan nira maskin ay pang lansanganay.
Numanyan kumus saragpun da tanirang tanan,
pinakdulan da ni Jesus ta sasang pananglit.
5 Mag̓aning tanya,
“Numanyan may taung minangay tung pinagbangtëran na,
ay magtarakbulun da ta binik ang trigu.
Numanyan tung pagtarakbulun na,
yang dumang binik nalagsik da tung dalan ang palanawan ta mga tau tung kakngaan.
Purisu nagkaralikëd-likëran da.
Tëgka na,
kinaw̓utan da ta mga lamlam ang pinagsumpit.
6 Yang duma duun nëpa tung tanëk ang manipis ang may batung tapik ang unayën ang alëngët dang lumput tung ulit yang tanëk.
Numanyan tamang tamang pamagbukngil da,
indi ka ilëm nabuay,
namanlumpayëng da,
ay natëtëngëd langu yang tanëk ang magtëdëkën yang kinit.
7 Yang duma duun nëpa tung tanëk ang may mga laskaw yang sapinit ang indi nadëëg̓an ta kapwa yang aradu.
Purisu dërëngan da ka ilëm tanirang namagtubu ang asta pinanaw̓ëd-saw̓ëran da yang mga trigung asta indi ra namurak.
8 Piru yang dumang binik duun da tung lunsan ang tanëk nëpa.
Purisu nangapagtubu ra ang asta nangapamurak da ang yang mga pangaluay na arabubwat da ang tung katëgkaan na ra,”
ag̓aaning.
Numanyan tung pagtapus na tung pananglit nang atia,
dayun dang nagpadakul yang busis nang mag̓aning,
“Ta,
yang nagngël ta mga talinga mi,
ya ra kay painu-inuan mi ta mupia,”
mag̓aning.
Yang Katuyuan Yang Pagparananglitën Ni Jesus (8:9-10)
9 Numanyan yang mga taung atiang nag̓apangugyatan na,
ya ray namanalimaan tung anya kung unu pay linëgdangan yang ipinananglit nang atia.
10 Tumuw̓al tanya,
“Ta yamung pagpaugyat da tung yëën,
linugtanamu ra yang Dios ang makdëkan mi yang mga bag̓ay ang nag̓aëgtëman na pa rin ang tukaw natëtëngëd tung paggaraëmën nang baklu tung mga tau kung ya pa ag̓ari yang palaksu na simanyan.
Piru tung kadaklan,
yang mga bag̓ay ang atia asan da ilëm nag̓ipapanawayu tung pulus pananglit.
Yang nag̓ipagpananglitu tung nira ay ug̓ud maskin sam puluk ang magtëlëng,
anday sakpën ta mga isip nira,
basin sam puluk ang mamati,
anda ra kay mamarësmësan niraa.
Nag̓ipasanag Da Ni Jesus Kung Unu Pay Linëgdangan Yang Ipinananglit Na (8:11-15)
11 “Piru para maintindian mi,
ya ra taa yang linëgdangan yang ipinananglitu ta nungayna.
Yang binik ang atiang ipinanakbul,
ya ra yang bitala yang Dios ang nag̓ipagpakaw̓ut tung mga tau.
12 Kung natëtëngëd tung dalan ang atiang nalagsikan ta dumang binik,
yang linëgdangan na ya ra yang dumang pamamati tung bitala yang Dios ang pagkatapus nag̓apalëngtan dang lag̓i ni Satanas ang ludasën yang bitalang nag̓agngël nira ug̓ud indi ra ilëm manangëd tanira ang magpatapnay ra rin tung Dios.
13 Yang linëgdangan yang tanëk ang atiang manipis ang may batung manipis ang natampëk,
ya ra yang duma ang kung mapamatian da nganing nira yang bitala yang Dios,
magpauyun dang lag̓i ang duru rag sadya yang isip nira.
Piru kumus indi nalamut ta ustu tung mga kinaisipan nira,
indi ilëm mabuay yang pagparanangërën nira.
Ay kung mapasaran da nganing ta tuksu,
mamalpas da ka ilëm.
14 Yang linëgdangan yang tanëk ang atiang may mga laskaw ang masapinitën,
ya ra yang duma ang maskin pamati tung bitala yang Dios,
piru tung pagpanaw yang uras,
kumus durung pagpakabëgbëg nira tung pagpangabui nira ubin may gustu nirang magmanggad ubin may gustu nirang magpapsaw ra ilëm tung mga kalëlyag̓an nirang sadili,
yang bitalang nagngël nira maning pa tung asan da ilëm nga kipit ang asta anday pinakaw̓ut na.
15 Piru yang linëgdangan yang tanëk ang atiang lunsan,
ya ra yang duma ang malëmëk ta kinaisipan ang yang bitala yang Dios ang nag̓agngël nira,
ya ray nag̓ipatëdëk ëngëd nira ta mupia tung mga isip nira ang asta may pakaw̓utun na ra ka ëngëd ang nag̓auyunan na.
Maskin mapasaran pa ta mga kaliwag̓an ubin tuksu man,
ya pa ka ëngëd ay nag̓apadanayan nirang magtumanën yang mga kalëlyag̓an yang Dios.
Baklu Ra Ngaipabunayag̓ay Ni Jesus Tung Mga Tau Yang Linëgdangan Yang Nag̓ipananglit Na, Kung Ëyangan Da Ta Gustu Nirang Magpasadsad (8:16-18)
16 “Ayw̓a,
tinu pay nag̓aintindian ming tau ang magsindi ta kingki ang pagkatapus ya rag sukluw̓ay na ubin ya ra ag̓ipasirungay na tung katri?
Simpri asan da ag̓ipabtangay na tung tapi-tapi,
ug̓ud kung tinu pay magtakwal,
yag dawalay nira yang sadlaw na.
17 Pariu ka tung yëën,
anday itinaluku tung nag̓ipananglitu sigun tung palaksu yang paggaraëmën yang Dios ang indi ipabunayag̓u,
anda kay tinipig̓anu asan ang indi ipalw̓awu.
18 Purisu amlig̓an mi ta mupia kung ya pa ag̓ari yang pagparamatiën mi tung nag̓ipananglitu.
Kipurki yang taung madërëp ang magpasadsad,
mas pang paëyangan yang Dios ta ipag̓intindi na.
Ig kung tinu pay mapinaw̓aya-w̓ayaën tung pag̓irintindiën na,
maskin yang gësyëng nag̓alaum nang nag̓akdëkan na,
bawiën da ka ëngëd yang Dios tung anya,”
ag̓aaning duun ti Jesus tung nira.
Pagpailala Ti Jesus Kung Tinu Pa Ëngëd Ay Kaw̓ig̓ën Nang May Kaampiran Tung Anya (8:19-21)
19 Atii ya ra kay pagkaw̓ut yang nanay ni Jesus may yang mga putul nang mga lalii.
Ug̓aring ilëm indi mangaalëngët tung anya natëtëngëd tanya ya ngaknga tung mga taung durug damël.
20 Numanyan inugtul da tung anya ang duun tung lua yang nanay na may yang mga putul nang mga lalii ang may gustu nirang mamagpakiksën tung anya.
21 Mag̓aning ti Jesus ang nagtimalës,
“Yang magkaw̓ig̓ënung nanayu ubin mga putulung mga lalii ya ra yang kumpurming pamati tung bitala yang Dios ang naang nag̓ipagpakaw̓utu,
ang pagkatapus magtumanën na ra ka,”
ag̓aaning.
Yang Pagpalinaw Ni Jesus Tung Tampung Durug Këtël (8:22-25)
22 Numanyan,
may dumang kaldaw ang ti Jesus nagsaay ra tung sasang balangay,
kasiraan da ka tanira yang mga taung nag̓apangugyatan na.
Ag̓aaning ti Jesus tung nira,
“Ala,
magpatindakita ra kanay.”
Pagkatapus dayun dang namagpaabwat.
Lucas 8:22-39
23 Numanyan atiing pamagpalayag da tanira,
ti Jesus tanya,
inalapan da ta ëlëk.
Buay-w̓uay ta gësyë,
binungsaran da tanira ta tampung durug këtël.
Numanyan alang-alang da yang pagkabëtang nira,
ay yang balangay nag̓apnukan dang nag̓apnukan.
24 Numanyan dayun dang pinaalëngtan nira ti Jesus ang pinuaw ang inaning,
“Amëëy,
Amëëy,
magkaralëmësita ra!”
Pagkapuaw ni Jesus,
dayun dang nagsambëng tung palët may tung mga lakun ang atiang durug kadarakul.
Lag̓i-lag̓ing nag̓ëltëng da yang palët,
pati yang lalaguna nag̓intang dang naglinaw rang anda rang pisan ay giup-giupun na.
25 Pagkatapus,
mag̓aning ti Jesus tung mga tauan na,
“Ayw̓a,
ay ra ilëm ag̓ari w̓asu yang pagtaralig̓ën mi tung yëën?”
Numanyan nangaimakluan da tanirang namagtëlëng tung anya ang nunut da ka ta pagkabërëng nirang subra tung naita nirang atia.
Namag̓araning-aningan da ilëm ang mag̓aning,
“Abaa,
tinu pa kayang tauay taa?
Baskin palët,
baskin lakun pa,
basta lalangan na ra ilëm nganing,
gulpi ra ilëm ang mamanangëd!”
ag̓aaning.
Nag̓apamaayën Ni Jesus Yang Sasang Taung Pag̓aëkël-ëkëlan Ta Mga Dimunyu (8:26-39)
26 Taa numanyan namagpadayun da yang pagsaay nira ang asta namanampët da duun tung baw̓anwaan yang mga Geraseno ang yag pagtinindakay yang Galilea.
27 Numanyan pagkalampud pa ilëm ni Jesus tung balangay,
may sasang taung tag̓a lansangan ang pag̓aëkël-ëkëlan ta mga dimunyu ang yay nagpakigbag̓as tung anya.
Tung tantung kabuay ra,
indi nag̓asuut-suut ta aw̓ël.
Dispuis indi magtinir tung balay,
kung indi,
duun da ilëm agpaglaug-laug tung mga lëyang ang pinanlug̓uran ta mga patay.
28 Taa numanyan,
pagbag̓as na tung ni Jesus,
dayun dang nagluud tung pinagtalungaan nira ig yang dimunyung pag̓ëkël tung anya naglëlpakën dang mag̓aning,
“Ay Jesus,
yawang pag̓aningën ang Ana Yang Dios ang makagag̓aëm,
ayw̓a nag̓apalabtanaw pa nuyu?
Yang nag̓ipagpakiildawu w̓a tung nuyu ang indiaw ra parusaan mu,”
mag̓aning.
29 Napagpakiildaw ra nganing ta maning tia yang dimunyu,
ay linalangan dang lag̓i ni Jesus ang maglayas da tung taung atia.
Luyut dang luyut,
yang taung atia muya-muyang pinaggaëman yang dimunyung atia.
Kidispuis pa,
kada masinti yang mga masigkabanwa na ang tanya kaw̓utun si,
dayun da nirang dëëpën ang bëgkësën ta kadina tung kalima na may tung kakay na para tung matinlung pagbantay nira tung anya,
piru indi ka ëngëd magnaët.
Agbuntuk-buntukun na,
ang pagkatapus,
ya rag liw̓ërëngay yang dimunyung ëkël-ëkëlan duun tung mga kabiw̓init-binitan ang malaka ka ilëm yang mga tau.
30 Taa numanyan tinalimaan ni Jesus yang dimunyu kung tinu pay aran na.
Mag̓aning kang nagtimalës,
“Yang aranu ti Buntun.”
Tama ka man tiing tuw̓al na ay duru-duru ka man ang mga kaarumanan nang mga dimunyung pamag̓ëkël-ëkël tung taung atia.
31 Numanyan yang binuat yang mga dimunyu,
namag̓intra ra amu-amu tung ni Jesus ang tanira indi na lalangan ang ipaangay duun tung pag̓aningën ang bulalutb.
32 Numanyan may sasang kaayëpan yang mga baw̓uy ang gaw̓ung ang pamanulyad-tulyad tung napabukatud ang alëngët ilëm duun.
Purisu yang mga dimunyung atia,
namagpakiluuy ra ilëm tung ni Jesus ang basin duun da ilëm tung mga baw̓uy tugtay nang mamansisuut.
Pagkatapus tinugtan na ra ka man.
33 Purisu numanyan pagliit nira tung taung atia,
diritsyu ra ka man ang namansilaktëd tung mga baw̓uy ang namansisuut.
Pagkasuut nira tung mga baw̓uy,
dayun dang namansikurbut ang namagpataladtad ang diritsyu ra ilëm tung lalagunang namampakpa ang asta nagkaralëmës da ilëm ang tanan.
34 Taa numanyan,
yang mga manig̓asikasu tung mga baw̓uy,
pagkaita nira yang nainabung atia,
dayun dang namaglalaksuan ang namagbaw̓alitaën tung mga taung kumpurming nag̓apanawan nira duun tung lua ang asta duun tung lansangan.
35 Purisu numanyan yang mga taung nagkarabalitaan,
diritsyu rang namansilua duun tung bakayan ang para mamanginsapu tung nainabung atii.
Numanyan kaw̓utan nira ti Jesus,
unu pay maita nira,
kung indi,
ya ra yang taung atiang dinimunyu ra rin.
Yag lalaptik tung tanëk tung pinagtalungaan nira ni Jesus ang pagpatulduk ta madërëp tung anya.
Dispuis,
bëlag da luas,
kung indi,
napag̓aw̓ël da ay naulikan da yang pag̓irisipën na.
Numanyan pagpaniid yang mga taung atia tung anya,
ya rag pandëlaay.
36 Numanyan yang mga manig̓asikasu ang atiang nangaita tung nainabung atia,
ya ray namagbaw̓alitaën tung mga taung naang baklung namansikaw̓ut kung ya pa ag̓aring nagmaayën da yang taung atiang dinimunyu ra rin.
37 Purisu anday dumang dinangat na,
tanirang tanan ang mga Gerasenong nagkasagpun asan,
namagpakigkësën da tung ni Jesus ang magliit da ilëm duun tung nira.
Ya ray iningaluk nira,
ay natëtëngëd pinamalayan da ta ëlëd nirang duru tung binuat ni Jesus ang atia.
Kapurisu ti Jesus,
pagkagngël na yang bitala nira,
dayun da ka man ilëm ang suminaay tung balangay ang para magbalik si duun tung pinanliitan na.
38-39 Pagkatapus,
simanyan yang taung atiang pinalayasan na tung mga dimunyu,
ya si ay nagpakiildaw tung anya kung puiding magpakignunut da tung anya ang para mag̓ing sasang tauan na.
Piru indi ra tinugtan na,
kung indi,
ya ra ag̓aningay nang,
“Maayën pa,
ungkuy,
mulika ra ilëm,
magbaw̓alitaëna ra tung mga masigkabanwa mu natëtëngëd tung tanan ang binuat yang Dios tung nuyu,”
ag̓aaning.
Purisu yang taung atia,
diritsyu rang minulik ang naglig̓u ra tung intirung lansangan ang nagbaw̓alitaën tung mga tau kung unu pay binuat ni Jesus tung anyang durug tinlu.
Yang Pagpamaayën Ni Jesus Tung Sasang Baw̓ay May Yang Pagpabui Na Si Kang Uman Tung Sasang Mulang Baw̓ay (8:40-56)
40 Taa numanyan,
atiing pagparuung na Jesus duun tung tindak,
durug dakël yang mga taung namagpakigbag̓as da tung anya,
ay tanirang tanan pamagpakbat da kang lag̓i tung anya.
Lucas 8:40-56
41 Yang uras dang atii,
may taung baklung kaw̓ut ang nag̓aranan tung ni Jairo.
Tanya sasang may katëngdanan tung pagsaragpunan ta mga masigka Judio na.
Pagkaw̓ut na tung ni Jesus,
ya rag padagpa tung pinagtalungaan nirang durua ang nagpakiluuy tung anyang mangay ra kanay duun tung balay na.
42 Ay yang ana nang baw̓ay ang bugtung ka pa man tag̓umatayën da.
Pag̓idaran da ta sam puluk may duruang takun.
Numanyan atiing pagkanunutan da tanira ni Jesus,
yang mga tau pamagpakigsag̓ësë tung anya ang asta imurat da ilëm ang mapanaw.
43 Taa numanyan tung kinadamël yang mga taung atia,
naa pala may sasang baw̓ay ang nalakët ang tung sëlëd sam puluk may duruang takun muya-muya ra ilëm ang nag̓aawasanc.
44 Purisu numanyan,
anday dumang binuat na,
yag sisikup ang papalëngët tung ni Jesus ang nagdëën tung sam bilug ang mabiw̓ilug-bilug ang atiang yag tatakëd tung sidsirën yang aw̓ël nang langkuy.
Pagkadëën na,
atiang lag̓i nagpëët da ka man yang dug̓u na.
45 Numanyan mag̓aning ti Jesus ang nagtalimaan,
“Tinu pay nagdëën tung yëën?”
Kumus anda ray nangamin,
ti Pedro ya ray nabngang nagtuw̓al ang mag̓aning,
“Ginuu,
magtalimaana pa ka ëngëd atiang duru rang taung nangaliw̓ut tung nuyung pamagsag̓ësë?”
46 Mag̓aning ti Jesus ang nagtuw̓al,
“Indi!
Talagang may nagdëën tung yëën ta nungayna,
ay natëtëngëd napanimananu rang lag̓i tung sadiliu ang may sasang taung nagmaayën da ëkël tung kagaëmanu,”
ag̓aaning.
47 Numanyan pagkasinti yang baw̓ay ang atii pala indi nataluk,
anday dumang binuat na,
nagpalëngët da ka ëngëd ang nagpadagpa ra ilëm tung pinagtalungaan nirang durua ang duru ra atiing pagpangërël nad.
Maskin duru pa ka man ang mga taung pamamati,
binatas na ra ka ëngëd yang ëyak nang nag̓ubligar tung ni Jesus kung unu pay ipinagdëën na tung anya ang pagkatapus ya ra kang lag̓i ay pinagmaayënan yang pag̓alaru na.
48 Numanyan mag̓aning ti Jesus ang nagsugpat tung anya,
“Ipag,
nagmaayëna ra nganing tung linaru mung atia ay natëtëngëd itinalig mu ra kang lag̓i tung yëën.
Ala,
mulika ra,
may paglimëngan da yang isip mu,”
mag̓aning.
49 Taa numanyan,
indi pa ngani nag̓atapus ti Jesus ta pagbitala,
asan da kuminaw̓ut yang sasang taung duun manliit tung balay ni Jairo ang ya ray nagbaw̓alitaën tung anyang mag̓aning,
“Napatay ra yang ana mu.
Maskin indi mu ra aw̓alaën ti Amëëy,”
ag̓aaning.
50 Pagkagngël ni Jesus tia,
dayun na rang pinaktël yang isip ni Jairo ang inaning,
“India ra ilëm magpadla,
kung indi,
magtalig̓a ra ilëm tung yëën ta ustu.
Atia,
mabui si kang uman yang ana mu,”
ag̓aaning.
51 Numanyan pagkaw̓ut nira tung balay,
anday dumang tinugtan nang numunut tung anyang magpaklëd,
kung indi,
ya ra ilëm ti Pedro,
may ti Juan,
duruang mag̓aka ni Santiago,
pati yang amaën may yang inaën.
52 Numanyan asan tung kaklëran,
durung mga taung pamagtarangitën dang pamag̓urulimëngmëngën natëtëngëd tung mulang naang napatay.
Pagkaita ni Jesus,
dayun dang nagbitala tung nirang mag̓aning,
“Ustu ra tiang tangit mi.
Bëlag̓an patay yang mula,
ang indi ag̓ëlkën ilëm,”
ag̓aaning.
53 Pagkagngël nira yang bitala ni Jesus,
ya ra ilëm agtalangkakay nira,
ay natëtëngëd nag̓asiguru ra nira ang talagang patay ra.
54 Piru ti Jesus tanya,
anday dumang binuat na,
pinalëngtan na yang mulang pinggësan tung kalima na ang pagkatapus pinadakul na yang busis na ang mag̓aning,
“Nini,
magbungkarasa ra!”
ag̓aaning.
55 Pagkatapus naulik da yang linawa yang mula,
lag̓i-lag̓ing nagbungkaras da.
Pagkatapus nagkalalangan da ti Jesus ang papaanën da kanay yang mulang baw̓ay.
56 Numanyan yang ginikanan na,
nangabërëng da ta mupia.
Purisu pinagpaamanan dang lag̓i ni Jesus ang indi rang pisan mamagbaw̓alitaën tung duma may ruma ang natëtëngëd tung nainabung atia.