Pagkuruntraan Da Ti Jesus May Yang Mga Pariseo Natëtëngëd Tung Pagturumanën Yang Katuw̓ulan Sigun Tung Kaldaw Ang Nag̓ipamaënay (12:1-8)
12
Numanyan may mininsa ang ti Jesus napanaw ra tung dalan ang naknga tung katriguan,
kasiraanami ra kang nag̓apangugyatan na.
Natuun tung kaldaw ang nag̓ipamaënay tang mga Judio tung mga pag̓urubraën.
Kumus yami nag̓aampayanami ra ta suw̓uk,
anday dumang binuat yamën,
yang pagparanawën yamën ya ra kay pag̓aplut-aplut yamën yang mga kaluay yang trigu ang pagkatapus pag̓akërëkësë yamën ang pag̓adëkëm yang mga bëyëd na.
2 Numanyan may mga Pariseo asan ang nangaita tung pag̓abuat yamën ang atia.
Pagkaita nira,
dayun dang namag̓istinggir tung ni Jesus ang mag̓aning,
“Ba tia,
ayw̓at pamaglampas da yang mga taung nag̓apangugyatan mung atia tung urdinansa ta ang anday mag̓urubraën ta maning tia tung kaldaw ang nag̓ipamaënay?”
mag̓aning.
3 Mag̓aning ka ti Jesus ang nagtuw̓al,
“Ayw̓a,
indi mi pa ka ëngëd nag̓amarësmësan yang sasang napabtang tung kasulatan natëtëngëd tung sasang binuat ni Adi David atiing tanya duru ra atiing suw̓uk na pati yang mga aruman na?
4 Indi w̓a nagpaklëd tanya duun tung balay-w̓alay ang atiing pinagtuuan pa rin nira tung Dios atii kanay ang pagkatapus pinangan na yang tinapay ang atiing sagradu ang ya ag̓ipabtangay tung katalungaan yang Dios ang ya pa ka man ay bawal ang panganën na pati mga aruman na kumus bëlag̓an mga pari?
Piru maskin bawal,
indi ra ka ipinakusalak yang Dios tung niraa.
5 Dispuis indi mi pa ka ëngëd nag̓amarësmësan yang sam bilug pang katuw̓ulan ang tung kaldaw ang nag̓ipamaënay may nag̓ipaubra tung mga pari duun tung pagtuuan ang pinakalusu?
Purisu kung ikumpalar duun,
puiding aningën ta ang ya rag likday nira yang urdinansang bawal ang ipag̓ubra nira tung kaldaw ang nag̓ipamaënay.
Piru indi ra ka nag̓ipakusalak yang Dios tung nira yang pag̓urubraën nirang atia.
6 Piru iugtulu tung numyu,
may sasang kuminaw̓ut da taa tung numyu ang mas pang landaw kay tung pagtuuan ang atiang pinakalusung pag̓ubraan yang mga paring atia tung kaldaw ang nag̓ipamaënay.
7 Isipën mi ra kanay yang sasang napabtang tung kasulatan ang mag̓aning,
‘Mas ang may timbang tung yëën ang mag̓irildawanamu kay tung magpadasag̓amu ilëm ta mga ayëp ang ya ag̓iintrigay mi tung yëën,’
ag̓aaningb.
Kisira rin ang nag̓amarësmësan mi ra kung unu pay linagpakan na tia,
siguru indiamu ra rin nagpakusalak tung mga taung naang bëlag kang kasalanan yang pag̓abuat nira.
8 Ag̓aningënamu ra yëën ta maning tia ay yuung pag̓aningën ang Maninga Tau,
yuu ray pamala tung mga tauanu kung ya pa ag̓ari yang pag̓urusuyun nira tung katuw̓ulan yang Dios natëtëngëd tung kaldaw ang nag̓ipamaënay,”
mag̓aning.
Ti Jesus Nag̓apakusalak Yang Mga Pariseo Sigun Tung Kaldaw Ang Nag̓ipamaënay (12:9-14)
9 Numanyan nagliit da ti Jesus tung lugar ang atia ang minangay duun tung pagsaragpunan nirang sam bilug ang nagpaklëd.
10 May tau duun ang napilayan da yang kalima nang sam bëlak.
Taa numanyan may mga Pariseo duun ang ya ray namanalimaan tung ni Jesus ang mag̓aning,
“Uyun basu tung urdinansa ang yang sasang taung may dispirinsia tung tinanguni na pamaayënën pa ka ëngëd ta aruman nang tau maskin kaldaw ang nag̓ipamaënay?”
Yang ipinagtalimaan nira ta maning tia ay gustu nirang may madëëpan nira ta puntus tung anya ang para madimanda nira tung mga ustisia.
11 Mag̓aning ka ti Jesus ang tuminuw̓al,
“Ipabëtangu kanay,
kung may karniru mi ang nabugsu tung bug̓ang,
indi mi w̓asu taw̓angan ang lag̓ing akunun,
maskin natuun pa tung kaldaw ang nag̓ipamaënay?
12 Ig disir kumus yang sasang tau mas maal kay tung sasang karniru,
uyun dang pisan tung katuw̓ulan yang Dios ang magbuatita ta ikaayën yang sasang masigkatau ta maskin tung kaldaw ang nag̓ipamaënay,”
mag̓aning.
13 Pagkatapus dayun na rang inaning yang taung napilayan yang kalima na,
“Ala,
iunat mu ra tiang kalima mu,”
ag̓aaning.
Tamang-tamang ag̓iunat na,
naulikan dang lag̓i ang pariu tung duw̓aling kalima na.
14 Piru pagkaita yang mga Pariseo tia,
dayun dang namaglua ang namag̓urunta-untaan da kung ya pa ag̓ari yang pagpaimatay nira tung ni Jesus.
Natëtëngëd Tung Pasais Yang Sasang Turuw̓ulun Ang Pinilik Yang Dios (12:15-21)
15 Numanyan,
pagkabalita ni Jesus ang tanya nag̓atimaan da nira ta maning tia,
dayun dang nagliit tung lugar ang atia ang may mga taung duru ang namagpakignunut da tung anya.
Pagkatapus kumpurming tinu pa tung nira ay paglaru,
luw̓us na rang pinampamaayën.
16 Tung pagpamaayën na tung nira,
dayun na rang pinaglalangan ang indi ëngëd mamagbaw̓alitaën ang natëtëngëd tung anya.
17 Tung maning tiang pasais na tung nira,
nagkamatuud da yang sasang ipinaula yang Dios tung ni Isaias ang manigpalatay ang tukaw ang mag̓aning,
18 “Atia yang turuw̓ulunung piniliku.
Tanyay nag̓agëgmaanu ig ya kay nag̓auyunanu ta mupia.
Ya ray patiniranu tung Espiritu Santong para yay magpaktël tung anyang magparakaw̓utun tung mga tag̓a duma-rumang nasyun kung ya pa ag̓aring mapakinaw̓angan nira yang kalibrian ang nag̓isimpanu.
19 Piru tung pagparakaw̓utun na tung mga tau,
anda tung anya ang magpakigdiskusiun ang pabalalaan.
Indi na ka nganing paknulun yang busis nang magdiskursu tung mga karsada.
20 Kung tinu pay magluw̓ayën dang midyu nag̓aplëkan da ta pagtalig na tung Dios,
ya ray paamumuan na ta maayën.
Kung tinu pay indi na ra sarangan yang sadili na,
indi na ka palbatan,
kung indi,
ya ra nganing ay paitaan na yang kanëëman na.
Ya ray prusigiran na ang asta magtukud da yang kalibrian ang mabakëd.
21 Purisu pati yang mga tag̓a duma-rumang nasyun,
ya ra kay panalig̓an nirang magpalua yang kaayënan ang pinangakuan yang Dios,”
mag̓aningc.
Yang Nag̓ituw̓al Ni Jesus Tung Nag̓ibangdan Tung Anya Ang Ti Satanas Unu Yay Pagpaktël Tung Anya (12:22-37)
22 Numanyan may nag̓iatëd da tung ni Jesus ang taung buray ig apa pa natëtëngëd pag̓aëkël-ëkëlan ta dimunyu.
Pagkatapus pinamaayën ni Jesus ang asta naita si kag nabitala si.
23 Pagkaita yang mga taung atiang buntun,
durung pagkabërëng nirang namag̓araning-aningan dang mag̓aning,
“Ya ra w̓asu taa yang manubli tung paggaraëmën ni Adi David ang ya kang lag̓i ay nag̓aëlatan ta?”
ag̓aaning.
24 Numanyan pagkagngël yang mga Pariseo tia,
dayun dang namagsulingaag tung nirang mag̓aning,
“Yang taung atia,
indi nganing mapagpalayas ta mga dimunyu kung bëlag̓an tung ni Satanasd ang yay pagmangulu tung nira!”
mag̓aning.
25 Numanyan kumus nag̓askëan da kang lag̓i ni Jesus kung unu pay nag̓abtang tung mga isip nira,
dayun dang nagbitala tung nirang mag̓aning,
“Ag̓aatkëan mi,
maskin ay pang inadianay,
kung mamagkuruntraan da yang mga kinasakpan nang mamagbaratukan,
makali ra ilëm ang madiadu yang inadian nira.
Maskin tung sasang lansangan ubin tung sam pamilya pa,
kung magdarapig-dapig̓an da tanirang magsuruay-suayan,
rangga ra ka yang pagsarasaan nira.
26 Kapurisu kung tama yang numyung atia ang ti Satanas yay pagpaktël tung yëën ang pagpalayas tung mga dimunyu,
ig disir pagsuruag-suag̓an da pala tanira yang mga dimunyung nag̓amanguluan na mismu.
Ya pa ag̓aring magdayun pa yang paggaraëmën na?
27 Dispuis kung tama yang numyung atia ang nag̓apaktëlaw ni Satanas ang pagpalayas tung mga dimunyu,
tinu pa kaya ay pagpaktël tung mga aruman ming pagpalayas ka tung mga dimunyu?
Aningën ming ti Satanas?
Bëlag siguru.
Ig disir maski nganing yang mga aruman ming atia,
puidi rang mamarik tung katadlëngan ming atia.
28 Piru kung ya ka man yang Espiritu Santo mismu yang pagpaktël tung yëën ang para mapagpalayasaw tung mga dimunyu,
ig disir asan da ka nga pruibaay mi ang kinaw̓utanamu ra ka man yang puirsa yang paggaraëmën yang Dios ang naang baklung pag̓atukuru.
29 Piru tung pagkamatuud,
yang pagkinuntraay yamën ni Satanas ay maning taa tung pananglit ang naa.
Kung may sasang mupiang lalii,
anday maklëd tung balay na ang para mag̓akwat da rin tung mga ëkël-ëkël na kung indi na ra tukawën ang gapusun yang may balay.
Atia,
pagustu ra yang akwat na tung mga ëkël-ëkël na.
30 Purisu kumus maning da ka man tia yang pagkinuntraay yamën ni Satanas,
kung tinu pay indi magpakigsasa tung yëën tung panagpunu tung mga tau,
katimbang nang pagpakigkuntra tung yëën ang pagpangwasak tung nira ang para mas dang mamampalawid tung yëën.
31 Purisu tandaan mi ta maayën yang bitalaw.
Maskin mapatawad yang mga tau tung maskin unu pang kasalananay ang binuat nira,
maskin pang duminarën pa nira yang Dios,
piru kung yay sawayan nira yang pag̓urubraën yang Espiritu Santo,
atia ya ray kasalanan ang indi ra ka ëngëd mapatawad na.
32 Kung tinu pay magduminar tung yëën ang pag̓aningën ang Maninga Tau,
puiding patawarën pa yang Dios tung kasalanan nang atia kung pagsug̓atan na.
Piru kung tinu pay mag̓ëngëd ang magduminar tung Espiritu Santo ang yang pag̓urubraën na ya ray sawayan na,
tay tia,
indi ra ka ëngëd mapatawad yang Dios tung panimpung naa pati tung panimpung kaw̓utun ang anda ëngëd ang pisan ay katapus-tapusan na.
33 Ipananglitu ra kanay yang bag̓ay ang atia tung mga ayung mga manugburak.
Kung yang ayu matinlu,
pati yang burak na matinlu ka.
Piru kung sayud,
pati burak na sayud ka.
Kipurki yang sasang ayu asan da tung burak na nga pruibaay kung matinlu u kung sayud.
34 Yang kaalimbawaan mi,
yamu maning pa tung mga iraw ang madaralit.
Ya pa ag̓aring mapagbitalaamu ta matinlu atiang malainamu kang lag̓i?
Ay simpri kumpurming unu pay nag̓ipabalay yang sasang tau tung isip na,
indi maimu ang indi na ipaluang ibitala.
35 Yang taung maayën,
maayën ka yang nag̓ipalua na ay natëtëngëd ang ya ra kang lag̓i ay nag̓ipabalay na tung isip na.
Pati yang taung malain,
malain ka yang nag̓ipalua na ay natëtëngëd ang ya ra kang lag̓i ay nag̓ipabalay na tung isip na.
36 Iugtulu tung numyu,
kung kaw̓utun da nganing yang uras ang ipagsintinsia yang Dios tung mga tau,
papanuw̓alën na tanira tung tanan ang mga ibinitala nirang anday kumpas na.
37 Kipurki kung unu pay nag̓ibitala mi,
ya ray pitik ang usuyun nang magpatuw̓al tung numyu kung yamu nga sintinsiaay na tung kalainan u kung yamu nga sintinsiaay nang anday kasalanan,”
mag̓aning ti Jesus.
Yang Sasang Pruibang Dapat Ang Intindiën Yang Mga Tau (12:38-42)
38 Numanyan namansisublang da yang mga Pariseo may yang mga sag̓ad ang mag̓aning tung anya,
“Amëëy,
gustu yamën ang may maita yamën ang pruibang makabëw̓ërëng ang ipalapus mu rang lag̓i numaan,”
ag̓aaning.
39 Mag̓aning ka ti Jesus ang minlës,
“Abaa yang kadaklan ang mga tau simanyan,
durug kalain yang palaksu yang mga pag̓irisipën nira.
Yang paggërëgmaën nira tung Dios nagrusaw ra.
Maning pa tung gëgma yang sasang baw̓ay ang paglimbung da tung kasawa na.
Pamagtag̓am ta rëg̓ës tung yëën ang magpaitaw ta pruibang makabëw̓ërëng ang para ya ray magpailala ang yuug tuw̓ulay ka man yang Dios.
Piru indi ra paitaanu ta pruiba puira pa tung sam bilug ang magkaanggid tung napanawan ni Jonas ang sasang manigpalatay.
40 Ay kipurki katulad tung ni Jonas ang tulung kaldaw yang tinir na duun tung tian yang dakulung iane,
ta yëën ang pag̓aningën ang Maninga Tau,
tulu kang kaldaw yang tiniru tung adalëm yang tanëk.
41 Purisu kung kaw̓utun da nganing yang uras ang ipagsintinsia yang Dios tung mga tau ang tanirang tanan pampabungkarasën na,
yang mga taung atiing tukaw pa ang tag̓a Ninive,
ya ra kay pakdëngën yang Dios ang mulidung ipagpasunaid na tung mga tau simanyan.
Duun da ka ipatiëlay na yang katadlëngan nang magsintinsia tung nira.
Kipurki tanira atiing pinagpakaw̓utan da ni Jonas,
lag̓i-lag̓ing namanligna ra tung mga kasalanan niraf.
Ang pagkatapus,
yang mga tau simanyan,
indi pa ka ëngëd nag̓apanligna tung mga kasalanan nira ag̓ad naa ra yang sasang landaw pa tung ni Jonas ang pagparakaw̓utun ka tung nira.
42 Tung uras ang atia,
may sasang baw̓ay ang yay manigmangulu tung sasang banwa ang ampir duun tung salatan atiing tukaw,
ya ra kay pakdëngën yang Dios ang sasa kang mulidung ipagpasunaid na tung mga tau simanyan,
ang duun da ka tung anya ipatiëlay na yang katadlëngan nang magsintinsia tung nira.
Kipurki yang baw̓ay ang atii,
maskin alawid ang pisan yang banwang pinanliitan na,
piru nagpaawat da ka ëngëd ang nag̓angay taa tung banwa ta,
basta mapagpamati ilëm tung nag̓itulduk ni Adi Solomon ang makawawayang ta isip.
Ang pagkatapus yang mga tau simanyan,
ag̓ad naa rang pisan tung tëpad nira yang landaw pa ta nag̓askëan kay tung ni Adi Solomon ang ya kay pagturuldukun tung nira,
ang pagkatapus indi ka nirag pamatiën.
Ipinananglit Na Yang Pamagkuntra Tung Anya Tung Sasang Balay Ang Maskin Sinilig̓an Da, Piru Anda Pay Pagtinir (12:43-45)
43-44 “Alimbawa,
kung may dimunyung lumayas da tung sasang taung sinuutan na ra rin,
unu pay mainabu?
Anday duma,
duun da ilëm magpaalyu-alyu tung banwang kapas ay magsagyap da rin ta matiniran na.
Piru kung anday maita na,
maning taa yang ipagkësën-kësën na tung isip na:
‘Maayën pa magbalikaw ra ilëm duun tung dating pinagtiniranung liniitanu.’
Numanyan tung pagbalik na,
kaw̓utan na yang taung atiing liniitan na,
yang kaalimbawaan na,
maning pa tung sasang balay ang sinilig̓an dang ipinatayu-tayu na yang mga garamitën ang pagkatapus bakanti pa.
45 Purisu anday dumang buatën yang dimunyung atia,
magpangkël da tung mga aruman nang pitu nga dimunyuan ang mas pang malain kay tung anya.
Pagkatapus,
tanirang tanan dayun dang mamagsuut tung taung atia ang para asan da mamagtinir tung anya.
Purisu yang luaan na,
mas dang maliwag yang malambëg̓an yang taung atia kay tung primiru ang sam bilug pa ilëm din yang dimunyung pag̓ëkël-ëkël tung anya.
Maning kang pisan tia ay malambëg̓an yang kadaklan ang mga tau simanyan ang durug kalain yang palaksu yang mga pag̓irisipën nira,”
mag̓aning.
Pagpailala Ti Jesus Kung Tinu Pa Ëngëd Ay Kaw̓ig̓ën Nang May Kaampiran Tung Anya (12:46-50)
46 Numanyan atiing indi pa nag̓atapus ti Jesus ta pagbitala tung mga taung atiang buntun,
asan da namansikaw̓ut ti nanay na may yang mga putul nang mga lalii.
Asan da ilëm këmdëngan tung lua yang balay ang pamag̓ëlat,
ay may gustu nirang mamagpakiksën tung anya.
47 Numanyan may sasang taung nagpaskë tung anya ang mag̓aning,
“Amëëy,
nakaa ra tung lua ti nanay mu may yang mga putul mung mga lalii.
Gustu nirang mamagpakiksën tung nuyu,”
ag̓aaning.
48 Mag̓aning ti Jesus ang nagtimalës,
“Ayw̓a,
tung nuyung pag̓intindi,
tinu pa w̓asu ay nanayu?
Tinu pa w̓asu ay mga putulu?”
ag̓aaning.
49 Pagkatapus yaming nag̓apangugyatan na,
yami ray pinanulduk na ang nunut da ka ta pasanag nang mag̓aning,
“Atia ra yang nanayu may yang mga putulu.
50 Ay kipurki kumpurming tinu pay pagtuman yang kalëlyag̓an ni Ama duun tung langit,
yay magkaw̓ig̓ënung putulung lalii ubin putulung baw̓ay ubin nanayu,”
mag̓aning duun ti Jesus.