Yang Pagpapaan Ni Jesus Tung Ëpat Ang Liw̓u NGa Tauan (8:1-10)
8
1-2 Taa numanyan tung mga kaldaw ang atii,
namagsaragpun si yang mga taung buntun duun tung ni Jesus.
Atiing nangalubsan da tanira ta mga balun nirang pamangan,
ginuuyan da ni Jesus yang mga taung nag̓apangugyatan nang inaning,
“Abaa,
yuu ra ag̓aildaw tung mga taung naang buntun.
Tëëd mi,
pangyaklu rang kaldaw taa tung yatën numaan ang pagkatapus nangalubsan da ta mga balun nirang pamangan.
3 Kung pampapanawënu ra ilëm ang pampaulikën ang indi pa pangapamangan,
muya pampaklag̓ën pa ta suw̓uk tung dalan,
ay alawid ka yang ulikan yang duma.”
4 Mag̓aning yang mga tauan nang namagtimalës,
“Maskin mag̓aninga,
ay pay pangkëlan ta pamangan taa tung banwang naang kapas ang para ipapaan tung mga taung atia?”
5 Mag̓aning ka ti Jesus ang nagtalimaan tung nira,
“Ayw̓a,
pira pang bilug ang tinapay ang nadipara mi asan?”
Yang tuw̓al nira,
“Ay pa taa?
Pitu ra ilëm ang bilug ang gërëg̓ësyë,”
mag̓aning.
6 Numanyan,
nagkalalangan da ti Jesus tung mga taung atiang buntun ang mamansikarung da kanay asan tung tanëk.
Pagkatapus dayun na rang dinawat yang mga tinapay ang atiang pitung bilug ang ya ray pinasalamatan na tung Dios.
Pagkatapus,
dayun na rang pinagpingas-pingas ang ipinamakdul-pakdul tung mga taung atiang nag̓apangugyatan na ang para ipanagtag-tagtag nira tung mga taung atiang buntun.
Ang pagkatapus ya ka ra ka man ay binuat nira.
7 Dispuis may pira pa ilëm ang bilug ang mga ian ang gërëg̓ësyë ang nasëpët ka nira ang ya si kay pinasalamatan na tung Dios.
Pagkatapus itinuw̓ul na ra ka dayun tung mga tauan nang ipamparawat-dawat da ka nira tung mga tau.
8 Taa numanyan,
nangapamangan da tanirang asta namampabial.
Pagkatapus atiing ëëpën da yang mga tauan ni Jesus yang mga ëpëd nirang namamangan,
pitu pa nga bëgyasan yang napnuk nira.
9 Kung bilangën yang mga taung atiang namamangan,
nagdangat da tung mga ëpat ang liw̓u nga tauan.
Pagkatapus numanyan,
pinampapanaw ra ni Jesus yang mga taung atiang buntun ang para mamag̓urulikan da.
10 Pagkatapus,
dayun dang nagsaay tung balangay ang nagpatindak duun tung banwang sinakëpan yang Dalmanuta,
kasiraan da ka tanira yang mga taung nag̓apangugyatan na.
May Pruibang Nag̓aingaluk Yang Mga Pariseo Ang Ya Ra Kay Pagtag̓am Nira Ta Tuung Tung Ni Jesus (8:11-13)
11 Taa numanyan,
may mga Pariseong namansikaw̓ut dang namag̓intra pakigsug̓a tung ni Jesus.
Namag̓ingaluk da tung anya ang paitaan na tanira ta pruibang liit tung langit ang para asan da nga tuungay nira kung may kagaëman na ka man ang liit tung Dios.
12 Pagkagngël ni Jesus tia,
dayun dang duminag̓ës ang mag̓aning,
“Uu,
yamung mga {tauamung mga} masigkanasyunu simanyan!
Ayw̓at pag̓ingalukamu pa ka ëngëd ta pruiba bakluamu ra manangëd tung yëën?
Iugtulu tung numyu yang kamatuuran ang sumpaanu pa tung Dios,
talagang anda ëngëd ay pruiba ang ipaita tung maning tung numyu,”
mag̓aning.
13 Pagkatapus dayun na ra ilëm ang binutwanan yang mga taung atiang nagsaay si tung balangay ang nagpatindak,
kasiraan da ka tanira yang mga tauan na.
Indi Pa Ka Ëngëd Nag̓amarësmësan Yang Mga Tauan Ni Jesus Ang Tanya May Kagaëman Na Ka Man Ang Liit Tung Dios (8:14-21)
14 Taa numanyan,
tung pagsaay nira,
nangalipat da yang mga tauan ni Jesus ang namagbalun ta mga tinapay.
Sam bilug ilëm yang ëkël nira tung balangay.
15 Numanyan mag̓aning ti Jesus ang nagpaaman tung nira,
“Kuidaw,
amanan mi ta mupia yang pampalëskag ang nag̓agamit yang mga Pariseo pati ni Adi Herodes,”
ag̓aaninga.
16 Pagkagngël nira tia,
dayun da nirang pinagkërësënan ta maluw̓ay ang mag̓aning,
“Siguru napagbitala ra ta maning tia ay sasang pasaplid na tung yatën ay indiita ra ka man napagbalun ta mga tinapay.”
17 Numanyan pagkasiman ni Jesus kung unu pay pinagkërësënan nira,
dayun na rang tinalimaan ang inaning,
“Ayw̓a ya ray nag̓apagkërësënan mi ang anday ëkël ming balun ang tinapay?
Indiamu pa ka ëngëd nag̓aintindi?
Anda pa ka ëngëd ay nag̓amarësmësan mi?
Talagang maluw̓ay pa ka ëngëd yang pagtaralig̓ën mi tung yëën.
18 May mata mi,
piru indiamu matakung magtëlëng?
May talinga mi,
piru indiamu matakung mamati?
19 Ayw̓a,
indi mi ra nag̓adëmdëman atiing may lima ilëm ang bilug ang tinapay ang pinagpingas-pingasung ipinampapaan tung limang liw̓u nga tauan kung pira pa nga baayan ang punuk ta mga ëpëd nirang inëëp mi?”
Mag̓aning ka tanirang nansituw̓al,
“Sam puluk may durua.”
20 Mag̓aning si ti Jesus ang nagpadayun yang bitala na,
“Pati atiing may pitu ilëm ang bilug ang tinapay ang ipinampapaanu tung ëpat ang liw̓u nga tauan,
nag̓alipatan mi ra ka kung pira pa nga bëgyasan ang punuk ta mga ëpëd nirang inëëp mi?”
Mag̓aning ka tanirang namagtimalës,
“Pitu.”
21 Mag̓aning si ti Jesus ang nagsugpat,
“Ta,
indiamu pa ka ëngëd nag̓aintindi?”
mag̓aning.
Yang Pagpabuskad Ni Jesus Tung Mata Yang Sasang Buray Duun Tung Betsaida (8:22-26)
22 Taa numanyan,
namagpatindak si tanira na Jesus duun tung Betsaida.
Mamansikaw̓ut duun,
may sasang buray ang idinangëp yang mga tau tung ni Jesus ang ipinagpakiildaw ang dëënan nang pabuskarën yang mata na.
23 Purisu dayun dang pinggësan ni Jesus tung kalima nang ingkëlan duun tung lua yang lansangan.
Numanyan dayun na rang linawayan yang mata nang pagkatapus dinëënan na pa kang inaning,
“Ta,
may nag̓aita mu?”
ag̓aaning.
24 Atii,
itinëlëng na yang mata nang ipinikat-pikat ang pagkatapus dayun dang nagtuw̓al tung ni Jesus ang mag̓aning,
“Ëë rin.
Nag̓aitaw ra rin ta mga taung pamagpanaw-panaw,
piru ang tëlënganu kuari ra ilëm mga ayu,”
mag̓aning.
25 Atii dinëënan si ni Jesus ang uman yang mata na.
Pagkadëën na tung mata na,
tuminëlëng da ta madëkdëk ang ya ra kay pagkaulik yang panëlëng na.
Masadlaw ra yang tanan ang pag̓atëlëngan na.
26 Numanyan dayun dang pinaulik ni Jesus duun tung balay na ang may bitalang ipinabalun na tung anyang mag̓aning,
“India ra ilëm manggëtës taa tung lansangan ang magbaw̓alitaën,”
mag̓aning.
Nag̓ailala ni Pedro Ang Ti Jesus Ya Ra Yang Pag̓aningën Ang Cristo (8:27-30)
27 Taa numanyan,
minangay ra ti Jesus duun tung mga baryung sinakëpan yang lansangan ang nag̓aguuyan tung Cesarea Felipe,
kasiraan da ka tanira yang mga taung nag̓apangugyatan na.
Atiing pagpanaw nira tung karsada,
napagtalimaan da ti Jesus tung mga aruman nang mag̓aning,
“Ëlat kanay,
kung yuu pagkërësën-kësënan da ta mga tau,
unu pay pagpabëtang nira tung yëën?”
28 Mag̓aning tanirang namagtimalës,
“Kalaum yang mga tau ang yawa unu ay sasang taung napatay ra ang ya si ka unu ay nagbalik taa tung kaliw̓utan ang naa.
Ay mag̓aning yang duma ang yawa unu ti Juan ang manigbënyag.
Yang duma pag̓aning ka ang yawa unu ti Ëliasb.
Yang pintu yang duma ang yawa unu sasang manigpalatay yang bitala yang Dios atiing tukaw ang nabui si kang uman.”
29 Mag̓aning ti Jesus ang nanalimaan si,
“Ay ta numyu,
unu pay numyung pagpabëtang tung yëën?”
Atii,
ti Pedro ya ray nagtuw̓al ang mag̓aning,
“Yawa yang pag̓aningën ang Cristo.”
30 Numanyan dayun dang nagkalalangan ti Jesus tung nirang tanan,
“Luay!
Indiamu ra kanay magbaw̓alitaën maskin tung ninu pa ang yuu yang pag̓aningën ang Cristo,”
mag̓aningc.
Nag̓ipasanag Ni Jesus Kung Unu Pay Dapat Ang Panawan Na Pati Yang Dapat Kang Panawan Yang Kumpurming Mga Tauan Na (8:31–9:1)
31 Atii,
ya ray ipinag̓impisa nang nagpasanag tung mga taung nag̓apangugyatan na ang mag̓aning,
“Yang pinalanu yang Dios para tung yëën ang pag̓aningën ang Maninga Tau,
dapataung mapasaran ta pinitinsiang durug lëbat.
Kipurki pangindianaw yang mga pamagpakigmaëpët kasiraan da ka tanira yang mga paring arabubwat ta katëngdanan may yang mga sag̓ad.
Pagkatapus ipaimatayaw ra ka dayun nira.
Piru maskin pang maning tia yang dapat ang mapasaranu,
tung pagkaw̓ut yang yaklung kaldaw,
pabungkarasënaw ra ka ëngëd yang Dios,”
mag̓aning.
32 Durug kasanag yang pagpaintindi nang atia tung nira.
Numanyan,
pagkagngël ni Pedro tia,
dayun na rang ingkëlan ti Jesus ang ipinabinit ang pagkatapus pinag̓intraan na ra sambëng.
33 Atii,
nagbëdlëng da ti Jesus ang pati yang kadaklan ang nag̓apangugyatan na nakatalungaan na ka ang pagkatapus dayun na rang sinambëng ti Pedrong inaning,
“Paaw̓ig̓a ra taa!
Yawa ra pala ay pagsatanas tung yëën!
Ay kipurki tung pag̓ampalar mung atia tung yëën,
bëlag̓an yang nag̓aisipan yang Dios yang nag̓usuyun mu,
kung indi,
ya ka ilëm yang isip ta tau,”
mag̓aning.
34 Numanyan dayun dang ginuuyan ni Jesus yang mga taung atiang buntun pati yang mga taung atiang nag̓apangugyatan nang mamagpalëngët da tung anya.
Pagkatapus dayun na kang inaning,
“Kung tinu pay nag̓alëlyag dang magpakignunut tung yëën,
yang sadili na ya ra lipatay na.
Yang isip na ya ag̓ipatëntënay nang mag̓agwanta tung mga pinitinsia,
maskin ilansang pa tung krusd.
Dapat maning tia yay ipabalay na tung isip na kung gustu nang magpaugyat tung yëën.
35 Ay kipurki kung tinu pay ag̓alëlyag ang yang sadili na ilibri na tung malain,
asan da nga kapa-kapaay na yang kaampiran na tung yëën.
Piru kung tinu pay mamirdi tung sadiling kalëlyag̓an na natëtëngëd ilëm tung yëën ang yuu ray nag̓ipalusu na ta gëgma na ig natëtëngëd ka tung Matinlung Balita natëtëngëd tung yëën ang ya ray gustu nang ipagpakaw̓ut tung mga tau,
asan da nga siguruay na yang kaampiran na tung yëën ang yay pagnatisan nang asta tung sampa.
36 Ay kipurki unu pa pay pakinaw̓ang yang sasang taung magkatinir da ta tanan ang nag̓alëlyag̓an na taa tung kaliw̓utan ang naa ang pagkatapus asan da nga plëkay ta ipagnatis na tung kaliw̓utan ang baklu?
Andang pisan!
37 Ay kung ya pay maplëk tia,
unu pa pay sarang ang mabailu na ang para bawiën na pa rin?
Andang pisan!
38 Ag̓aningënamu ra yëën ta maning tia ay natëtëngëd yang kadaklan ang mga masigkanasyun mi numanyan durug kakinasalananën ig rusaw ra yang gëgma nira tung Dios.
Purisu kung tinu pay maëyak ang mangërëngan tung yëën ubin yang bitalaw ikaëyak na kang ipagngël tung nira,
tay tung uras ang ipaglëkatu,
ikaëyaku kang ingwaraën ang tanya bëlag̓an tauanu.
Ay ta yëën ang pag̓aningën ang Maninga Tau,
kung maggaraëmënaw ra nganing tung kaliw̓utan ang baklu,
yang kasusulawën ang pag̓atiniran ni Ama ya ra kay tiniranu ig magkasira-siraanami ra ka yang mga angil ang sagradu,”
mag̓aning.