Natëtëngëd Tung Pinanubli Nira Tung Mga Kinaampu Nira Ang Ya Ray Nag̓ipalandaw Nira Tung Katuw̓ulan Yang Dios (15:1-20)
15
Tung pira pang kaldaw may mga Pariseo pati mga sag̓ad tung mga urdinansang pinanubli tung mga kinaampu ta ang ya ray namansiangay duun tung ni Jesus ang liit tung Jerusalem.
2 Pagkaw̓ut nira,
dayun dang namag̓istinggir tung anyang mag̓aning,
“Ayw̓a yang mga taung nag̓apangugyatan mung atia pamaglampas tung sasang riglamintung pinanubli ta tung mga kinaampu ta?
Ay indi pamangug̓as yang mga kalima nira ta magkabag̓ay baklu mamangan,”
ag̓aaninga.
3 Mag̓aning ti Jesus ang nagsulili,
“Ayw̓a,
yamu paglampasamu ka tung katuw̓ulan yang Dios basta mapagtumanamu ilëm yang urdinansang pinanubli mi ka ilëm tung mga kinaampu ta?
4 Ay kipurki may sasang katuw̓ulan yang Dios ang maning taa yang palaksu na.
‘Galangën mu ti tatay mu may ti nanay mu’b.
Dispuis may sugpat na pa ka ang mag̓aning,
‘Kung tinu pay magpalagpak ta mga bitalang malain tung ni tatay na u tung ni nanay na,
dapat ang ipaimatay ra ilëm’c.
5-6 Piru yang numyung nag̓ipatuman tung mga tau ay maning taa.
Kung tinu pay masilag tung ni tatay na u tung ni nanay na ang ya ra panumpaay nang aningay,
‘Indi mi ëngëd mapakinaw̓angan yang sinisirbianu ra rin ang naa tung numyu ay natëtëngëd ipinag̓intrigaw ra tung Dios,’
yang taung atia indi mi ra ka ëngëd lugtan ang manggalang pang mandul tiing sinisirbian na ra rin tung ginikanan na ay natëtëngëd tung sinumpaan na.
Purisu tung pagparatumanën mi tung mga tau tung pinanubli ming atia tung mga kinaampu ta,
asan da nga tampëkay mi yang bitala yang Dios ang asta anda ray kapulutan na.
7 Abaa,
yamung pagpakaayën-ayën ka ilëm,
tëmëng dang pisan tung numyu yang sasang bitala yang Dios ang ipinagpadapat ni Isaias ang tukaw ang mag̓aning,
8 ‘Yang mga taung naa,
yang paggaralangën nira tung yëën,
tung tumbung ka ilëm yang mga dilak nira,
ig yang rumbu yang mga isip nira alawid ang pisan tung yëën.
9 Anda ëngëd ang pisan ay kapulutan na yang pagturuuën nirang maning tia tung yëën,
ay natëtëngëd yang nag̓ipatuman nira tung mga kaarumanan nira ang ya ra ag̓aningay nirang mga katuw̓ulanu buat,
ya ra ka ilëm yang mga riglamintung inimu-imu ta mga masigkapariu ka ilëm nirang mga taud,’”
mag̓aning.
10 Numanyan ginuuyan ni Jesus yang mga taung atiang buntun ang mamagpalëngët da tung anya ang pagkatapus inaning na rang,
“Pamatian mi ra kanay ang intindiën yang papintung naang ipagngëlu tung numyu.
11 Bëlag̓an ang mag̓aning ang yang magpapaklëd tung nganga yang sasang tau ang ya ray pagpamansa tung anyang indi ra magkabag̓ay tung pagtërëlëngën yang Dios.
Kung indi,
yang maglulua tung nganga na yay pagpamansa tung anya,”
ag̓aaning.
12 Numanyan yaming nag̓apangugyatan ni Jesus,
nagpalëngëtami ra tung anyang nagkig̓a ang,
“Nag̓askëan mu,
Amëëy,
pagkagngël yang mga Pariseo yang inaning mung atia tung nira,
ya ray pinaglainan yang mga isip nira tung nuyu.”
13 Mag̓aning ka ti Jesus ang nagtimalës,
“Yang mga Pariseong atia kung tung mga luak pa ipananglitayue,
bëlag̓an ti Ama tung langit ang yay may luak tung nira.
Purisu anday dumang buatën na tung nira,
pamundukun na ra ilëm.
14 Paw̓ayaan mi ra ilëm tanira.
Ay yang kaalimbawaan nira maning pa tung mga buray ang yang mga aruman nirang mga buray ka ya ray magtag̓aman nirang magmanguluan.
Simpri yang sasang buray kung ya pay magguyud tung aruman nang buray,
anday dumang pakaw̓utun na,
parariu ka ilëm tanirang mangabugsu tung lungasug,”
mag̓aning.
15 Ag̓aaning ka ti Pedrong nabnga,
“Pasanag̓ayami ka kung unu pay gustung ianing yang papintu mung atia nungayna natëtëngëd tung magpapaklëd may tung maglulua tung nganga yang sasang tau,”
mag̓aning.
16 Mag̓aning ka ti Jesus ang minlës,
“Abaw,
pati yamung mga tauanamu pa ka man yëën,
indiamu pa ka pala maskëng mag̓intindi?
17 Ayw̓a,
indi mi pa ka ëngëd nag̓aintindian ang kumpurming unu pay magpapaklëd tung nganga yang sasang tau,
tung tian na ra ka ilëm manganing ang pagkatapus itaki na ka ilëm?
18 Piru yang kumpurming maglulua tung nganga na,
duun nag̓aëyang tung sadiling kinaisipan na ang pagkatapus ya ray pagpamansa tung sadili na ang indi ra magkabag̓ay tung pagtërëlëngën yang Dios.
19 Ay kipurki duun tung kinaisipan na nag̓aëyang yang pagtirimaën ang malalain ang ya ra kay maning pa tung panuw̓ul tung anyang mangimatay ra tung masigkatau na,
ubin maglimbung da tung kasawa na,
ubin mangumbaw̓ay ra ubin mangunlalii ra ubin manakaw ra,
ubin manistigus da tung bëlag̓an kamatuuran,
ubin magliw̓ak da tung aruman na.
20 Yang mga ubra-ubrang mga maning tia ya ray pagpamansa tung bilug ang pagkatau yang sasang tau ang indi ra magkabag̓ay tung pagtërëlëngën yang Dios.
Piru ang tanya mamangan ang anday ug̓as-ug̓as yang mga kalima na ang katulad ka tung nag̓apapaktëlan nira,
atia bëlag̓an ang yay tëlëngan yang Dios tung anyang indi ra magkabag̓ay tung anya,”
mag̓aning.
Nag̓adayaw Ni Jesus Yang Pagtalig Tung Anya Yang Sasang Baw̓ay Ang Bëlag̓an Masigkanasyun Nang Israel (15:21-28)
21 Taa numanyan ti Jesus nagliit da tung banwang atia ang minangay duun tung kakunayungan yang mga lansangan ang Tiro may Sidon kasiraanami ra kang mga tauan na.
22 Simanyan may sasang baw̓ay ang tag̓a duun ang nagdangëp da tung anya.
Tanya bëlag̓an Israel,
kung indi,
yang mga kinaampu na dating tag̓a Canaan ang atiing tukaw ya pay aran yang banwang atia.
Numanyan yang pagpalëngët na tung ni Jesus,
ya kay pagkëkëndalën nang mag̓aning tung anya,
“Amëëy,
yawang manubli tung paggaraëmën ni Adi David,
ildaway ka.
Ay yang anaung baw̓ay agdimunyuwën ig nag̓aliwag̓an da ta mupia.”
23 Piru ti Jesus inding pisan nag̓iw̓ëk-iw̓ëk.
Numanyan dayun dang pinalëngtan yamën ang nag̓apangugyatan nang nag̓amu-amu tung anyang mag̓aning,
“Abaw Amëëy,
ipapaaw̓ig mu ra ilëm yang baw̓ay ang atia!
Masyadu ra tiang ginla nang pagpagamu tung yatën,”
ag̓aaning.
24 Mag̓aning ka ti Jesus ang minlës ang yang baw̓ay ang atia ya kay nag̓apagngël na,
“Yang itinuw̓ul yang Dios tung yëën ang taw̓angan ya ilëm yang mga masigkanasyun tang mga Israel ang yang kaalimbawaan nira,
maning pa tung mga karnirung nagkaratalang da,”
ag̓aaning.
25 Numanyan pagkagngël yang baw̓ay tia,
dayun sing nagpalëngët tung anyang nagluud tung pinagtalungaan nirang durua ang mag̓aning,
“Aay amëëy,
ildaway kang taw̓angan,”
ag̓aaning.
26 Numanyan tung itinuw̓al ni Jesus,
yang mga Judio ya ra ipananglitay na tung mga mamula ang mag̓aning,
“Indi ra magkabag̓ay ang yang pamangan yang mga mamula ya pa iplëkay tung mga kiru.”
27 Mag̓aning ka yang baw̓ay ang nagtimalës,
“Kung tung bag̓ay,
tama ka rin,
Amëëy.
Piru maskin mga kiru ka man ilëm,
nag̓asibsib ka nganing yang mga mumu ang pagkarabugsu tung sirung yang lamisaan ang pamanganan yang mga ag̓alën nira.”
28 Mag̓aning ka ti Jesus ang minlës,
“Ay ipag,
talagang durug dakul pala yang pagtalig mung atia tung yëën.
Magkamaningana ra tung nag̓alëlyag̓an mung atia,”
mag̓aning.
Numanyan tung uras kang lag̓ing atii nagmaayën da ka man yang ana nang baw̓ay.
Nag̓apampamaayën Ni Jesus Yang Dakëlëng Mga Tau (15:29-31)
29 Taa numanyan pagliit da ni Jesus duun tung banwang atii,
dayun dang nagparanëk duun tung lalagunang atiang yag lulg̓ud tung sakëp yang Galilea.
Kumaw̓ut tung bakayan,
dayun dang nagbakay ang pagkatapus nanungul da tung sasang bukatud ang kuminarung.
30 Pagkatapus may mga taung buntun da ang namagpalëngët duun tung anya ang may ëkël nirang mga taung barik,
mga buray,
mga pilay,
mga apa,
may dakëlë pang may mga laru ka nirang duma.
Pagkatapus ipinandangëp da nira tung ni Jesus ang ipinamtang tung katalungaan na.
Numanyan tanirang tanan luw̓us dang pinampamaayën na.
31 Yang pinakaw̓ut na,
durung pagkabërëng yang mga taung atiang buntun tung pagkaita nira tung mga apa ra rin ang simanyan pangabitala ra,
pati mga pilay ra rin ang simanyan pangapanaw ra ta matandës,
pati mga barik da rin ang simanyan nangaulikan da,
asta mga buray ra rin ang simanyan pangaita ra.
Purisu durung pagdarayawën nira tung Dios ang ya kang lag̓i ay pag̓atuuan yang nasyun nirang Israel.
Yang Pagpapaan Ni Jesus Tung Ëpat Ang Liw̓u NGa Tauan (15:32-39)
32 Taa simanyan yaming nag̓apangugyatan ni Jesus dayunami rang ginuuyan nang magpalëngët da tung anya ang pagkatapus inaningami anya ang “Abaa,
yuu ra nag̓aildaw tung mga taung naang buntun.
Tëëd mi,
pangyaklu rang kaldaw taa tung yatën numaan ang pagkatapus nangalubsan da ta mga balun nira.
Indiaw ka malëlyag ang pampaulikënu tanira mintras indi pa pangapamangan ay muya pampakla;
[an pa ta suw̓uk tung dalan,”
ag̓aaning.
33 Mag̓aningami kang nagtimalës,
“Maskin mag̓aninga,
ariita pa w̓asu mangkël ta bastanting pamangan ang mapapaan ta tung kinadaramëlën nirang atia ang taawita pa ka man tung banwang naang kapas?”
34 Mag̓aning ti Jesus ang nagtalimaan tung nira,
“Ayw̓a,
pira pang bilug ang tinapay ang ëkël mi asan?”
Ag̓aaning ka tanira,
“Ay pa taa?
Pitu ra ilëm ang bilug may pira pa ka ilëm ang bilug ang mga ian ang gërëg̓ësyë,”
mag̓aning.
35 Purisu numanyan nagkalalangan da ti Jesus tung mga taung atiang buntun ang mamansikarung da kanay asan tung tanëk.
36 Pagkatapus dayun na rang dinawat yang mga tinapay ang atiang pitung bilug may yang mga ian ang atia ang ya ray pinasalamatan na tung Dios.
Pagkatapus dayun na rang pinagpingas-pingas ang ipinamakdul-pakdul tung yamën ang nag̓apangugyatan na ang ya si kay ipinamparawat-dawat yamën tung mga tau.
37 Pagkatapus numanyan tanirang tanan nangapamangan da ang asta namampabial da.
Pagkatapus atiing ëëpën da yamën yang mga ëpëd nirang namamangan,
pitu pa nga bëgyasan yang napnuk yamën.
38 Kung bilangën yang mga taung atiang namamangan,
nagdangat da tung mga ëpat ang liw̓u nga tauan,
puira pa tung mga baw̓ay may mga mamula.
39 Numanyan pinampapanaw ra ni Jesus yang mga taung atiang buntun ang para mamag̓urulikan da.
Pagkatapus dayun dang nagsaay tung balangay ang nagpatindak duun tung banwang sinakëpan yang Magadan,
kasiraanami ra kang mga tauan na.