Natëtëngëd Tung Kamatayën Ni Juan Ang Manigbënyag Kung Unu Pay Natëngëran Na (14:1-12)
14
Numanyan tung mga uras ang atii,
naang ti Gubirnadur Herodes nabalitaan da yang natëtëngëd tung mga pruibang makabëw̓ërëng ang nag̓ipagpalapus ni Jesus.
2 Mag̓aning tung mga taralig̓an na,
“Anday dumang taung may ubra tia,
kung bëlag̓an ti Juan ang manigbënyag ang ya si kay nabuing uman.
Ya ray natëngëran na ang may kagaëman nang magpalapus ta mga pruibang maning tiang maktël,”
ag̓aaning.
3 Balikan ta ra kanay ti Juan ang manigbënyag kung unu pay natëngëran yang kamatayën na.
Atii kanay ipinadëëp ni Gubirnadur Herodes ang pagkatapus pinapusasan nang ipinakalabus.
Ya ray binuat na natëtëngëd ilëm tung ni Herodias ang kasawa na ang yay kinalaw na tung putul nang ti Felipe.
4 Ay pa ag̓ari,
pirmi ilëm ang mag̓aningën ni Juan yang Gubirnadur ang lampas da tung katuw̓ulan yang Dios ang magkakasawaan tanira ni ipag na.
5 Numanyan maskin gustu rin yang Gubirnadur ang ti Juan ipaimatay na ra ilëm,
may pangamanan na tung mga tau ang muya mamagpundar ta gulu.
Ay yang pagpabëtang nira tung ni Juan sasang manigpalatay yang bitala yang Dios.
6-7 Ug̓aring atiing kinaw̓ut da yang ipagsilibra ni Gubirnadur Herodes tung kakaldawan yang pagkapangana tung anya,
yang ana ni Herodias ang darala nagtalëk da tung katalungaan yang mga imbitasiun ni Gubirnadur.
Kumus sinadyaan da ta durung ginanaan tung pagtalëk yang darala,
dayun dang nagpangaku tung anya ang pinaugtunan na pa ta panumpa ang maskin unu pay ingalukun na tung anya,
siguradung ipapakdul na tung anya.
8 Numanyan kumus pinaëtaran da ni nanay na kung unu pay ingalukun na,
dayun dang nagbitala yang darala ang mag̓aning,
“Maginuung Adi,
pakdulay kanay yang kulu ni Juan ang manigbënyag.
Taa ra ilëm ipabtangay tung basyada,”
ag̓aaning.
9 Pagkagngël yang Adi tia,
pinungaw ra yang isip na.
Piru kumus pinanumpaan na yang pangaku na tung katalungaan yang mga imbitasyun na,
anday dumang binuat na,
nagkalalangan da ilëm ang ipakdul da tung darala yang iningaluk na.
10 Purisu ti Juan pinatuw̓ulan na ra ilëm tung sasang sundalung pinapug̓usan ta dikël na duun tung kalabus.
11 Pagkatapus ta pagpug̓us,
yang kulu na ingkëlan da duun tung daralang ipinakdul ang yag bëbtang tung basyada.
Pagkatapus ingkëlan da yang darala tung ni nanay na.
12 Numanyan pagkabalita yang mga namagpaugyat da rin tung ni Juan,
dayun dang namansiangay duun tung kalabus ang ingkëlan yang tinanguni nang ipinalg̓ud tung sasang lëyang.
Pagkatapus diritsyu rang namansiangay tung ni Jesus ang namagbaw̓alitaën.
Yang Pagpapapaan Ni Jesus Tung Limang Liw̓u NGa Tauan (14:13-21)
13 Numanyan atiing nabalitaan da ti Jesus,
dayun dang nagliit tung banwang atia.
Nagsaay tung balangay ang napaugbay duun tung banwang anday tatau na.
Kasiraanami ra kang nag̓apangugyatan na ang yami yami ilëm.
Numanyan pagkabalita yang mga tau,
dayun dang namagliliitan tung mga lansangan ang buntun dang namanikad tung ni Jesus ang ya ra ilëm namagbakay.
14 Numanyan pagkaw̓ut yamën na Jesus tung lugar ang atiing dinistinu yamën,
tung paglampud na tung balangay,
ya ray naita na yang mga taung atiang buntun da ang pamag̓ëlat tung anya.
Pagkaita na tung nira,
ya ra ngampayay ta kakaildawën nang duru tung nira ang pagkatapus yang may mga laru tung nira,
ya ray pinampamaayën na.
15 Taa numanyan atiing alëngët dang masantëk yang kaldaw,
yaming nag̓apangugyatan ni Jesus,
nagpalëngëtami ra tung anyang mag̓aning,
“Alang-alang da yang uras.
Naawita ra tung banwang kapas.
Maayën pa pampapanawën mu ra ilëm yang mga taung atia tung mga baryung alëngët taa ang para mamangalang da ta mapangan nira.”
16 Mag̓aning ka ti Jesus ang minlës,
“Anday ministir ang tanira mamagpanaw pa,
kung indi,
yamu ray magpapaan tung nira.”
17 Mag̓aning ka tanirang namansituw̓al,
“Abëë,
anday mga balun ang nadipara yamën tung mga taung naa,
kung indi,
limang bilug ilëm ang tinapay ang gërëg̓ësyë may duruang bilug ang ian.”
18 Mag̓aning si ti Jesus tung yamën,
“Ala,
ëklan mi ra kanay tani tung yëën,”
ag̓aaning.
19 Numanyan dayun dang nagkalalangan ang yang mga taung atiang buntun mamansikarung da kanay asan tung kailamununan.
Pagkatapus pagdawat na yang mga tinapay ang atiang limang bilug may yang mga ian ang atiang duruang bilug,
dayun dang tuminingarang nagpasalamat tung Dios natëtëngëd tung pamangan ang atia.
Pagkatapus ta pagpasalamat na,
dayun na rang pinagpingas-pingas yang mga tinapay ang atia ang pagkatapus ipinamakdul na tung yamën ang nag̓apangugyatan na ang yami si kay nanagtag-tagtag tung mga taung atiang buntun.
20 Numanyan tanirang tanan nangapamangan da ang asta namampabial dang luw̓us.
Pagkatapus atiing tuw̓urun da yamën yang mga ëpëd nirang namamangan,
sam puluk may durua pa nga baayan yang napnuk yamën.
21 Kung bilangën yang mga taung atiang namamangan,
may limang liw̓u nga tauan,
puira pa tung mga baw̓ay may tung mga mamula.
Yang Pagpanaw Ni Jesus Tung Ulit Yang Aw̓uyuk (14:22-33)
22 Taa numanyan,
atiang lag̓i,
yaming nag̓apangugyatan ni Jesus,
itinulmunami ra anyang magsaay tung balangay ang magtukawami tung anya duun tung tindak.
Ay pampaulikën na pa unu yang mga taung atiang buntun ang pampapanawën.
23 Numanyan atiing pinampaulik na ra,
dayun dang nanungul ta sam bilug duun tung bukid ang para mag̓arampuën da tung Dios.
Atiing law̓ii ra yang kaliw̓utan,
sam bilug pa ka ëngëd duun.
24 Yang balangay ang pag̓asaayan yamën duun da tung alauran ang duru rang pagpaasung-asung na tung mga lakun ang darakulu ay sungsung yang palët.
25 Numanyan atiing sam parti pa mangayag,
ti Jesus baklu pa nanikad tung yamën ang ya ra ilëg pagpanaw tung ulit yang lalaguna.
26 Mabandaw yamën ang yag pagpanaw tung ulit yang lalaguna,
natarantaami ra ta mupia.
Kumus dërëëg̓ënami ra yang ëlëd yamën ang subra,
nagkëkëndalënami rang nag̓araning-aningan ang,
“Aruuy,
uay,
atia ra yang kalag!”
27 Atii dirtsyuami rang lag̓ing pinag̓aning ni Jesus ang mag̓aning,
“Paisëg̓ën mi ra yang mga isip mi.
Yuu ra taa.
Indiamu ra mag̓ëlëd.”
28 Atii,
ti Pedro dayun dang nabngang mag̓aning,
“Ginuu,
kung talagang yawa ka man tia,
lalangay kang mangay asan tung nuyung magpanaw ka tung ulit yang lalaguna.”
29 Mag̓aning ka ti Jesus ang nagtimalës,
“Ala,
tania!”
Purisu paglampud ni Pedro tung balangay,
nag̓impisa ra ka man ang nagpanaw tung ulit yang lalaguna ang para mangay ra rin tung ni Jesus.
30 Ug̓aring ilëm,
pagkasinti na yang palët ang durug këtël,
inlëran da.
Numanyan atiing nag̓impisa rang nag̓itagbëng,
kuminëndal da ang mag̓aning,
“Ginuu,
ilibriay ka!”
31 Atii,
lag̓i-lag̓ing dinawat ni Jesus ang pinggësan tung kalima nang inaning,
“Abaa ungkuy,
midyu pinaluw̓ay mu ra yang pagtaralig̓ën mu tung yëën.
Ayw̓a pinapagdua-dua mu ra yang isip mu?”
mag̓aning.
32 Numanyan pagkasaay nirang durua tung balangay,
nag̓ëltëng da yang palët.
33 Yaming mga aruman nira tung balangay,
dayunami rang nagluud tung pinagtaralungaan yamën na Jesus ang mag̓aning,
“Yawa ka man yang pag̓aningën ang Ana Yang Dios!”
mag̓aning.
Pinampamaayën Ni Jesus Yang May Mga Laru Duun Tung Kadatalan Ang Pag̓aguuyan Ang Genesaret (14:34-36)
34 Taa numanyan,
dayun-dayun yang pagpalaktëd yamën ang asta duunami ra nasampët tung bakayan tung may kadatalan ang nag̓aguuyan tung Genesaret.
35 Pagkatapus ti Jesus nailala rang lag̓i yang mga lalii ang tag̓a duun ang pagkatapus ya si kay namanuw̓ul tung duma ang mamagbaw̓alitaën da tung mga tau tung intirung paliw̓ut yang banwa nirang atia ang ti Jesus asan da.
Pagkatapus kumpurming tinu pay may mga laru ipinampadangëp da yang mga aruman nira duun tung anya.
36 Numanyan namagpakiildaw ra tung anya ang kung maimu ilëm ang maskin ya ra ilëm yang mga mabiw̓ilug-bilug ang yag tatakëd tung sidsirën yang aw̓ël nang langkuy ang ya ray madëënan yang mga aruman nirang may mga laru.
Ang pagkatapus kumpurming tinu pay nagdëën,
ya ray nagmaayën tung pag̓alaru na.
Jesus Walks on Water (Mateo 14:22-36)