Kung Unu Pay Pinakaw̓ut Yang Pagpapaan Ni Jesus Tung Limang Liw̓u NGa Tauan (6:1-15)
6
Numanyan,
pira pang kaldaw,
ti Jesus nagpalaktëd da tung tindak yang aw̓uyuk ang paggug̓uuyan ang Galilea.
(Tung panimpu ta numanyan,
yang aw̓uyuk ang atia,
paggug̓uuyan ang Tiberias).
2 Pagkaw̓ut na,
buntun yang mga taung namagpakignunut da tung anya,
natëtëngëd naita ra nira yang mga pruibang ipinagpalapus nang nagpamaayën tung mga taung pamaglaru.
Jesus feeds a multitude (Juan 6:1-15)
3 Simanyan,
nanungul da ti Jesus tung bukid ang kuminarung,
kasiraanami ra kang nag̓apangugyatan na.
4 Yang uras ang atii,
alëngët da ka ilëm ang kumaw̓ut yang pista yamën ang mga Judiong pag̓aningën ang Taklib.
5 Taa simanyan,
pamandaw ni Jesus,
ya ray naita na yang mga taung atiing buntun ang pamagtungul tung anya.
Purisu,
dayun na rang tinalimaan ti Felipe ang mag̓aning,
“Ta,
Felipe,
ariita ra kaya w̓asu maalang ta tinapay ang mapapaan ta tung mga taung atii?”
mag̓aning.
6 Naa pala,
napag̓aning da ta maning tii,
ay ti Felipe nag̓asukdaan na.
Piru tanya nag̓askëan na ra kang lag̓i kung unu pay buatën na.
7 Simanyan,
mag̓aning ti Felipeng minlës,
“Maskin balur ta mga duruang gatus yang tinapay ang alangën,
maskin mëkël ilëm ta gëg̓ësyë ang ipagsëngat-sëngat nira sasa may sasa,
indi ka ëngëd magkarampëd,
yang kinadaramëlën nirang atia!”
8 Simanyan,
tung yamën ang nag̓apangugyatan ni Jesus,
may sam bilug ang suminalëët ang ti Andres ang ari ni Simon Pedro.
9 Mag̓aning tanya,
“Nakaa w̓a,
may kaw̓ataan ang may balun nang limang bilug ang tinapay ang gëg̓ësyë ig may ian na kang duruang bilug.
Piru pira ra ka ëngëd takaa tung kinadaramëlën nirang atia?”
10 Numanyan,
mag̓aning ti Jesus tung yamën,
“Pampakarungun mi ra kanay yang mga tau,”
mag̓aning.
Duun tung bukid ang atii,
durung ilamunun.
Purisu ya ray pinangarung-karungan nirang tanan.
Ang bilangën yang mga lalii ilëm,
nagdangat tung limang liw̓u nga tauan.
11 Taa numanyan,
dinawat da ni Jesus yang mga tinapay ang atia,
ang ya ra kay pinasalamatan na tung Dios.
Pagkatapus ta pagpasalamat na,
dayun na rang ipinampatagtag tung nirang kumarungan asan.
Asta yang mga ian maning ka tia yang binuat na.
Tanirang tanan nangapagustu ra kang namamangan.
12 Atiing mga bial da tanira,
mag̓aning ti Jesus tung yamën ang nag̓apangugyatan na,
“Ala,
pangimësën mi ra kanay yang namagsubra.
Muya magasta,”
mag̓aning.
13 Purisu dayun dang pinangimës yamën ang may sam puluk may durua nga baayan ang napnuk.
Ya ray nagkaraëpëd tung limang bilug ang tinapay ang atiang pinamanganan nira.
14 Simanyan,
pagkaita yang mga tau yang pruibang atiang ipinalapus ni Jesus ang makabëw̓ërëng,
namag̓araning-aningan da tanira ang mag̓aning,
“Talagang ya ra ka man taa yang manigpalatay yang bitala yang Dios ang nag̓aëlatan tang maglua tung kaliw̓utan,”
mag̓aninga.
15 Simanyan,
pagkasiman ni Jesus ang tanya ray nag̓aisipan nirang rëgsën ang papag̓adiën tung banwa nira,
dayun dang nagliling si duun tung kabukiran,
ang tanya ilëm ang sam bilug.
Yang Pagpanaw Ni Jesus Tung Ulit Yang Aw̓uyuk (6:16-21)
16 Taa simanyan,
atiing panlikarëm da,
yaming nag̓apangugyatan ni Jesus,
nandanëkami ra tung bakayan.
Jesus walks on the water (Juan 6:16-22)
17 Diritsyuaming nagsaay tung balangay ang para magpalaktërami ra rin duun tung Capernaum.
Taa simanyan,
nalaw̓iianami ra ta pag̓ëlat ang ti Jesus indi pa ka ëngëd nag̓alput tung bakayan.
Purisu,
diritsyuami rang nagpatabuk.
18 Taa,
simanyan,
nagkëtël da yang palët,
darakulu ra yang lakun.
19 Sigi-sigi yang paggarayungun yamën.
Atiing alawirami ra tung bakayan ang liniitan yamën,
distansia ta mga lima asta ënëm ang kilometro,
nabandaw ra yamën ti Jesus ang pagpanaw tung ulit yang lalagunang pagpalëngët tung yamën tung balangay.
Purisu binalayanami ra ta ëlëd yamën ang duru.
20 Mag̓aning ti Jesus ang nagtalna tung yamën,
“Ëëy,
indiamu ra magpakataranta!
Yuu ka taang aruman mi.”
21 Pagkagngël da yamën yang busis na,
duun da kumintël yang mga isip yamën ang nagpasaay tung anya tung balangay.
Tung pagsaay na,
atiang lag̓i,
nanampët da yang balangay duun tung nag̓adistinuan yamën.
Pagpailala Ti Jesus Ang Tanya Ilëm Ay Ultimung Pagpaëyang Ta Baklung Pagkataung Uyun Tung Dios (6:22-59)
22 Pangayag yang kaliw̓utan,
yang mga taung atiing buntun ang nangabutwan,
duun pa ka.
Nadëmdëman nira ang ta nungapun,
sam bilug ka ilëm yang balangay duun tung bakayan.
Yadwa pa,
naskëan da ka nira ang ti Jesus indi nanunut tung yamën ang nag̓apangugyatan na,
ang indi,
ta yami ilëm ay nagsaay tung balangay ang atia.
The Bread of Life (Juan 6:22-71)
23 Naa pala asan tung tukaw-tukaw ang bëlag̓an alawid tung pinamanganan nira yang tinapay ang atiing pinasalamatan ni Ginuung Jesus,
may pira pang bilug ang balangay ang namansiparuung dang duun liit tung lansangan ang Tiberias.
24 Purisu,
pag̓asiguru ra nira ang ti Jesus anda ra duun,
pati yaming nag̓apangugyatan na anda ka,
diritsyu rang namanaayan yang duma tung mga balangay ang atia ang namampatindak duun tung lansangan ang Capernaum ang para mamagsagyap da duun tung ni Jesus.
25 Simanyan,
atiing namampalaktëd da duun tung tindak,
naita ra nira.
Dayun da nirang tinalimaan ang mag̓aning,
“Rabbi,
sanua pa pa taa?”
26 Mag̓aning ti Jesus ang minlës,
“Iugtulu tung numyu,
yang nag̓ipagsagyap mi tung yëën bëlag̓an natëtëngëd ang panangëramu ra tung yëën natëtëngëd tung mga pruibang atiang ipinagpaitaw tung numyu,
ang indi,
natëtëngëd ilëm tung tinapay ang atiing ipinapaanu tung numyu ang yay pinagustuan ming nabialan.
27 Indi mi ra impurtaën yang pamangan ang maning tiang nag̓arangga,
ang indi,
yang sikarën mi,
ya ra yang pamangan ang anday karanggaan na,
ang asanamu ra nga paëyangay ta baklung pagpangabui ming ya kay pagnatisan ming asta tung sampa.
Yang pamangan ang atia,
yuung pag̓aningën ang Maninga Tau,
yuu ray magpakdul tung numyu,
sipurki yuuy pinakdulan ta katëngdanan yang Dios ang ya kay pag̓aningënung Amaw.”
28 Simanyan,
mag̓aning tanirang namagtalimaan,
“Unu pay dapat ang ubraën yamën ang para asanami ra ngauyunay yang Dios?”
29 Mag̓aning ti Jesus ang nagtuw̓al,
“Ya taa yang dapat buatën ming para mauyunanamu ra anya.
Magtalig̓amu ra ilëm yang mga sadili mi tung yëën ang tinuw̓ul na.”
30 Mag̓aning ka tanirang namagtimalës,
“Ay kung maning tia,
abir,
unu pang pruibaay ang mapalua mu ang para yay maita yamën bakluami magtalig yang mga sadili yamën tung nuyu?
Tëlëngan ta,
kung unu pay mapalapus mu!
31 Basu mapalandawan mu pa yang pruibang atiing ipinagpaita tung mga kinaampu tang tukaw atiing duun pa rin tanira tung banwang kapas?
Ay kipurki tanira nangapamangan nganing ta sasang palanganën ang ginuuyan nirang mana ang katulad ka tung napabtang tung kasulatan ang may pamangan unung liit tung langit ang ya ray ipinapaan na tung nirab.”
32 Mag̓aning si ti Jesus ang minlës,
“Iugtulu tung numyu yang kamatuuran,
bëlag̓an ang mag̓aning ang ti Moises yang nagpapaan tung mga kinaampu ta yang pamangan ang atiing liit tung langit,
ang indi,
ti Ama yay nagpamakdul.
Kidispuis pa,
yang pamangan ang atii,
bëlag̓an ang ultimung liit tung langit.
Piru simanyan ang mga uras ang naa,
ti Ama ya ra kay pagpakdul tung numyu yang maning pa tung pamangan ang ultimung liit tung langit.
33 Ay kipurki yang maning pa tung pamangan ang naang nag̓ipakdul yang Dios tung numyu ya ra yang sasang nanliit tung langit ang nagparanëk taa ang para magpaëyang tung mga tau ta baklung pagpangabui nirang uyun tung Dios.”
34 Mag̓aning tanirang namagtimalës,
“Pakdulayami kang pirmi yang pamangan ang atiang nag̓ianing mu.”
35 Mag̓aning si ti Jesus ang nagtimalës,
“Yuu ra taa yang maning pa tung pamangan ang atiang magpaëyang ta baklung pagpangabui.
Kung tinu pay magtalig yang sadili na tung yëën ang magpagaëm,
kung ipananglit pa tung pag̓asuw̓uk may pag̓akanal,
indi ra ëngëd masuw̓uk ang uman ig indi ra ka kanalën ang uman.
Ay ya pa ag̓ari,
nabilug̓an na ra yang pinagyëngët-yëngëtan yang isip na kung ya pa ag̓aring magkabag̓ay ra tanya tung pagtërëlëngën yang Dios.
36 Ug̓aring ilëm katulad tung inaningu tung numyu nungayna,
ang ag̓ad naitaw ra ka man numyung pagpalapus ta mga pruiba,
piru indiamu ka ëngëd magtalig yang mga sadili mi tung yëën.
37 Piru yang tanan ang nag̓ipagtalig ni Ama tung yëën,
luw̓us ang magkaradangëp tung yëën ang para mampatapnay tung yëën,
ig kumpurming tinu pay magdangëp tung yëën,
indi ra ka ëngëd pangindianu.
38 Sipurki nanliitaw tung langit ang nagparanëk taa bëlag̓an ang mag̓aning ang para magtumanaw yang sadiling kalëlyag̓anu,
ang indi,
para magtalusaw tung kalëlyag̓an yang nagpangay tung yëën.
39 Ya taa yang kalëlyag̓an yang nagpangay tung yëën,
ang tung nirang tanan ang nag̓ipagtalig na tung yëën,
andang pisan ay maplëk tung yëën,
may sam bilug.
Kung indi,
tanirang tanan luw̓us dang pampabungkarasënu tung uri ta kaldaw.
40 Sipurki ya taa yang kalëlyag̓an ni Ama.
Kung tinu pay mag̓intindi tung yëën ang pag̓aningën ang Ana Na ang asta magtalig da ka dayun yang sadili na tung yëën ang magpagaëm,
atiang lag̓i,
paëyanganu ra ta baklung pagpangabui nang anday pagtapusan na.
Ay ya pa ag̓ari,
yang taung atia,
yuu ray magpabungkaras tung anya tung uri ta kaldaw,”
mag̓aning.
41 Atii,
yang mga pamagpakigmaëpët pinaninëkan dang pamamati.
Namagtarag̓aman da ta burutung-butung natëtëngëd tung bitala na ang tanya unu maning pa tung pamangan ang duun manliit tung langit.
42 Namag̓araning-aningan dang mag̓aning,
“Ta,
indi,
yang taung naa,
ti Jesus ang atiang ana ni Joseng atiang nag̓ailala ta,
asta ti nanay na nag̓ailala ta ka?
Buat na pa tanya nanliit duun tung langit?”
43 Mag̓aning ti Jesus ang nagngël,
“Ustu ra tiang pagburutung-butungun mi.
44 Anday masarang ang magdangëp tung yëën kung indi yang kinaisipan na bëkngën da ni Ama ang yay nagpangay tung yëën.
Ang pagkatapus,
yuu ray magpabungkaras tung taung atia tung uri ta kaldaw.
45 Katulad tung isinulat yang sasang manig̓ula atiing tukaw ang may kaldaw unung kaw̓utun ang tanirang tanan pasanag̓an da ta mupia yang Dios mismuc.
Bilang kung tinu pay magpauyun tung nag̓ipagpasanag ni Ama tung anya natëtëngëd tung yëën,
asan da ngabtëng yang isip nang para magdangëp tung yëën.
46 Yang gustuung ianing tia,
bëlag̓an ang mag̓aning ang may naita tung ni Ama ay natëtëngëd ultimu ilëm yuung nanliit tung anya,
ultimu ilëm yuu ay naita tung anya.
47 Iugtulu tung numyu yang kamatuuran,
kung tinu pay magtalig yang sadili na tung yëën ang magpagaëm,
atiang lag̓i paëyanganu ra ta baklung pagpangabui nang anday pagtapusan na.
48 Ay ta yëën,
yang kaalimbawaanu,
maning pa tung sasang pamangan ang asan maniël yang baklung pagkatau ang uyun tung Dios.
49 Maskin may mana ang pinagpangan yang mga kinaampu ta atii kanay duun tung banwang kapas,
nagkarapatay ra ka ëngëd.
50 Piru naang nag̓ianingung maning pa tung pamangan ang duun manliit tung langit,
kung tinu pay magpangan tia,
indi ra ëngëd mablag tung Dios ang asta tung sampa.
51 Yuu ra mismu yang maning pa tung pamangan ang atiang nanliit tung langit ang yang ipaëyangu tung mga tau ya ra yang baklung pagkatau nirang uyun tung Dios.
Purisu kung tinu pay magpangan tung maning pa tung pamangan ang naa,
asan da ngaëyangay ta baklung pagkatau nang ya ra kay pagnatisan nang asta tung sampa.
Ig kidispuis pa yang maning pa tung pamangan ang naang ipakdulu,
ya ra taang tinanguniu mismu.
Ya ray ilug̓utu ug̓ud mapakinaw̓angan yang mga tau taa tung kaliw̓utan ang para asan da tanira ngaëyangay ta baklung pagkatau ang uyun tung Dios,”
mag̓aning ti Jesus.
52 Purisu yang pinakaw̓ut na,
ya ray nagaraan ta pagbaralalaan yang mga pamagpakigmaëpët.
Mag̓aning yang duma,
“Abaa,
yang tau kang atia ka!
Ya pa ag̓aring mapakdul na yang tinanguni na tung yatën ang para mapangan ta?”
53 Mag̓aning ti Jesus ang suminalëët,
“Iugtulu tung numyu yang kamatuuran,
kung indiamu mamangan yang tinanguniu,
ang yuu ka man yang pag̓aningën ang Maninga Tau,
kung indiamu ka manginëm yang dug̓uu,
indiamu ra ëngëd ëyangan ta baklung pagkatau ming uyun tung Dios.
54 Yang kumpurming tinu pay pag̓usap-usapd tung tinanguniu ig panginëm yang dug̓uu,
ya ray may pagpangabui nang baklu ang anday pagtapusan na natëtëngëd maskin mapatay,
yuu ray magpabungkaras tung anya.
55 Ag̓aningënamu yëën ta maning tia,
ay kipurki kung yang pamangan may yang wai yay paniëlan yang kabui yang mga tau,
mas pang yang tinanguniu may yang dug̓uu yay paniëlan yang baklung pagpangabui.
56 Kung tinu pay pag̓usap-usap tung tinanguniu,
ig panginëm yang dug̓uu,
pagkinapulitayami ra.
57 Ti Amang nagpangay tung yëën taa,
kumus mapuirsa yang ulag na,
purisu ta yëën,
ya ka,
ëkël tung pagkinapulitay yamën ang durua.
Maning ka tia tung kumpurming pag̓usap-usap tung yëën.
Yang kaalimbawaan na maning pa tung taa ra ka tung yëën nga sëpsëpay na yang pagpangabui nang baklu.
58 Yuu ra ka man taa yang nag̓ianingung pamangan ang duun manliit tung langit ang nagparanëk taa.
Kung tinu pay pag̓usap-usap tung yëën,
ya ray may pagpangabui nang baklu ang anday pagtapusan na.
Bëlag̓an pariu tung mga kinaampu tang atii ang maskin nangapamangan ka man ta mana,
piru nagkarapatay ka ëngëd,”
mag̓aning.
59 Yang mga bag̓ay ang atia,
pinag̓aning ni Jesus atiing pagturuldukun na tung mga tau tung pagsaragpunan nira duun tung Capernaum.
60 Taa,
simanyan dakëlëng mga taung pamagpaugyat tung anyang pamamati.
Pagkagngël da nira yang inaning nang atia,
durung pinaninëkan.
Namag̓araning-aningan dang mag̓aning,
“Abaa,
duru rag kaduma yang pag̓itulduk nang atia.
Tinu pa w̓ay mapagpauyun tiang balaw̓ag dang pisan?”
mag̓aning.
61 Simanyan nasiman da ni Jesus ang yang nag̓ipagbutung-butung nirang atia ay natëtëngëd tung nag̓itulduk na ang buminalaw̓ag da tung mga isip nira.
Purisu,
diritsyu rang pinag̓aning na ang,
“Atia pala,
asanamu ra nga plëkay ta ipagtalig mi tung yëën?
62 Ay kung alimbawa yuung pag̓aningën ang Maninga Tau,
maitaw numyung pagpaabwat duun tung pinanliitanu,
balaw̓ag pa ka ëngëd tung mga isip mi?
63 Yang Espiritu Santo yay sarang ang magpaëyang ta baklung pagkatau ming uyun tung Dios.
Kipurki kung yang dating pagkatau mi ya pay talig̓an mi,
anday pakaw̓utun na.
Naang nag̓ipagpakaw̓utu tung numyu ya ray gamitën yang Espiritu Santong magpaëyang ta baklung pagpangabui mi.
64 Piru may duma asan tung numyu ang indi pala panangëd tung nag̓ibitalaw,”
mag̓aning ti Jesus.
Ay nag̓askëan da kang lag̓i ni Jesus kung tinu pa asan tung nira ang indi malëlyag ang magtalig tung anya.
Asta kung tinu pay magtraidur tung anya tung uri,
nag̓askëan na ra ka.
65 Simanyan,
mag̓aning ti Jesus ang pagsugpat,
“Kapurisu,
ya ray ipinag̓aningu tung numyu ta nungayna ang anday masarang ang magpalëngët tung yëën kung indi paëyangan ni Ama ta ipagtalig nang bug̓us tung yëën,”
mag̓aninge.
66 Kapurisu,
yang dinangat na simanyan,
yang mga taung atiang pamagpaugyat da rin tung anya,
kadakël dang namamalpas da ka ëngëd ang dayun tung anya.
Indi ra namagpakignunut ang uman tung anya.
67 Kapurisu,
mag̓aning si ti Jesus tung yamën ang sam puluk may durua nga tauan na,
“Basu,
pati yamu,
may gustu mi ra kang magpablag tung yëën?”
68 Mag̓aning ti Simon Pedrong minlës,
“Ginuu,
tung ariami pa w̓asu magdangëp kung bëlag tung nuyu?
Ay kipurki sulaminting yawa ilëm ay may bitala ang kung panangërën yamën,
asanami ra ngaëyangay ta baklung pagpangabui yamën ang anday pagtapusan na.
69 Dispuis ta yamën,
pag̓ingmatuurami ra kang lag̓i tung nuyu ay nag̓asigurua ra ka yamën ang yawa ka man yang pinilik yang Dios ang magpundar yang paggaraëmën na.”
70 Mag̓aning ti Jesus ang minlës,
“Ta,
indi,
yamung pinamiliku,
sam pulukamu may durua?
Piru may sam bilug tung numyu ang ya ray magsatanas tung yëën!”
mag̓aning.
71 Anday dumang pinatëmëngan na tii,
ya ra ti Judas ang ana ni Simon Iscariote.
Ay tung uri,
ya ray magtraidur tung anya,
ag̓ad na pa sasa ka tung yamën ang sam puluk may durua nga tauan ni Jesus.