Yang Pag̓arangayën Ni Jesus Tung Pista Nag̓aëklan Na Ra Ilëm Tung Anday Naskë (7:1-13)
7
Pagkatapus tia,
duun da ilëm tung Galilea nagliliw̓utun ti Jesus.
Ay ya pa ag̓ari,
anday gustu nang magliliw̓utun duun tung Judea natëtëngëd agtimaan dang imatayën yang mga pamagpakigmaëpët duun.
2 Simanyan,
indi ra ilëm buay,
kaw̓utun da yang uras ang ipagsilibra yamën ang mga Judio yang pistang pag̓aningën ang Pista Yang Mga Balay-w̓alay.
Jewish leaders want to kill Jesus (Juan 7:1-24)
3 Purisu yang mga putul ni Jesus ang mga lalii,
namagsëdyët da tung anyang mag̓aning,
“Ala,
sigi!
Mupia pa,
magliita ra ka taang mangay duun tung Judea ug̓ud yang mga taung nag̓apangugyatan mu duuna,
maita ra ka nira yang mga pruibang nag̓ipagpalapus mu.
4 Kung tinu pay taung ag̓alëlyag dang magpabantug,
yang buat-buat na,
indi na ra italuk.
Simpri tia ipabistu na.
Ay kumus yawa nag̓apagbuata ra ta mga maning tiang pruibang makabëw̓ërëng,
ipaita mu ra ka tung kadaklan!”
ag̓aaning tanirang pamagsëdyët.
5 Naa pala,
nangapagbitala ta maning tia ay maskin mga putul na,
indi ka pamanangëd ang tanya yang pag̓aningën ang Cristo.
6 Simanyan mag̓aning ti Jesus ang minlës,
“Ta yëën,
indi pa magkakaw̓ut yang uras ang ipinagtipu tung yëën.
Piru ta numyu,
maski unu pang urasay,
pariu ka ilëm.
7 Yang mga taung pamagpasuag tung kalëlyag̓an yang Dios,
anday maita nira tung numyu ang para ipagdëmët nira.
Piru yuu nag̓adëmtanaw ra nira kipurki yang mga buat-buat nirang mga malalain,
nag̓ipagpatalungaw rang pirmi tung nira.
8 Ala,
sigi,
yamu ra ilëm ay mangay duun tung pista.
Ta yëën,
indiaw mangay,
ay natëtëngëd indi pa magkakaw̓ut yang uras ang ipinagtipu tung yëën,”
mag̓aning.
9 Purisu,
pagkaaning na tia,
nagpabutwan da ilëm tanya duun tung Galilea.
10 Simanyan atiing duun da yang mga putul na tung pistang pamagpasakëp,
baklu ra tanya nanikad duun.
Ug̓aring yang pagparanawën na,
indi nagpakigluyug tung kadaklan ang pamamista,
ang indi,
ingkëlan na ra ilëm tung anday naskë.
11 Purisu simanyan,
ya ra ilëm agdilëm-dilëmay yang mga pamagpakigmaëpët duun tung pista.
Pamanalimaan-talimaan tung duma may ruma kung ay pa tanya.
12 Taa numanyan yang mga sumasakëp ang atiang buntun,
durung aralas-alasan nirang pamagkërësën-kësën natëtëngëd tung anya.
Yang duma pamansianing ang tanya unu maayën ang tau.
Yang duma pamansianing kang lain unung tau,
ay pagpatalang da unu tung mga tau.
13 Piru anday nagpangaas ang nagsambit tung publiku natëtëngëd tung anya,
ay pangaman dang muya kung magngël da yang mga pamagpakigmaëpët,
mamagpakulain ang mamagparusa tung nira.
Yang Nag̓ipanuw̓al Ni Jesus Tung Mga Pamagpakigmaëpët Ang Pamagdiskumpiar Tung Anya (7:14-24)
14 Taa,
simanyan,
atiing pagkasuw̓ungan da yang pista,
baklu ra nag̓angay ti Jesus duun tung pagtuuan ang pinakalusu.
Pagkaw̓ut na,
dayun dang nagturuldukun tung mga tau.
15 Purisu durung pagkabërëng yang mga pamagpakigmaëpët ang pamamati tung anya.
Namag̓araning-aningan da tanirang mag̓aning,
“Abaa,
yang tau kang naa ka.
Ya pa ag̓ari kaya nag̓aintindi yang kasulatan,
atiang indi nganing naaral tung mga manigtulduk ang abubwat ang pariu ka tung pag̓araralën ta?”
16 Pagkagngël ni Jesus tia,
dayun dang nanuw̓al ang mag̓aning,
“Yang nag̓itulduku bëlag̓an ang sadiling bëët-bëëtu,
ang indi,
liit tung nagtuw̓ul tung yëën.
17 Kung tinu pay malëlyag ang magtuman yang kalëlyag̓an yang Dios,
yay magmaskë kung yang nag̓itulduku liit tung anya u kung sadiling bëët-bëëtu ilëm.
18 Simpri yang taung pagbëët-bëët ilëm ang pagbitala,
yang pag̓asikad na ang para tanya bantug̓un.
Piru yang taung yang pag̓asikad na ang para yang nagtuw̓ul tung anya yay bantug̓un,
yay matalig̓an ig anday mabuat nang malain.
19 Ti dipuntu apu tang Moises,
bëlag bang yay nagbutwan tung numyu yang mga katuw̓ulan yang Dios?
Ang pagkatapus ta numyu simanyan anday pagtuman yang mga katuw̓ulan nang atia,
may sam bilug tung numyu.
Kung indi,
ay pa w̓a?
Yuu rag balakay ming imatayay!”
20 Mag̓aning yang mga taung atiang buntun tung anya,
“Yawa,
pag̓aëkël-ëkëlana ta dimunyu!
Anda kay pagtimang mangimatay tung nuyu!”
21 Mag̓aning ti Jesus ang minlës,
“Tan taa pa,
yuu may sasang binuatanung makabëw̓ërëng tung kaldaw ang nag̓ipamaënay ang ya ray nabërëngan ming tananb.
22 May sasang urdinansang ibinutwan ni dipuntu apu tang Moises tung nasyun ta ang yang sasang mula unung lalii,
dapat ang buatan ta tanda yang tinanguni na tung yawalung kaldaw.
Purisu maskin matuun pa tung kaldaw ang nag̓ipamaënay,
buatan mi ra ka ëngëd agyapun yang sasang mulang lalii.
Kung tung bag̓ay,
kung sikarën ta pa ka ëngëd yang pinanliitan yang urdinansang atia,
bëlag̓an ti dipuntu apu tang Moises ay nagpaguad tia,
kung indi,
yang mga kinaampu tang atiing namagtukaw pa tung anyac.
23 Kapurisu,
kung ya buatay yang sasang mula ta tanda tung kaldaw ang nag̓ipamaënay basta indi ilëm malampasan yang urdinansang atia,
ayw̓a nag̓adëmtanaw pa numyu natëtëngëd tung pagpatimlatu tung tinanguni yang sasang tau tung kaldaw ang nag̓ipamaënay?
24 Ustu ra tiang pagpabëtang mi tung sasang tau natëtëngëd tung nag̓alaum mi ilëm tung anya,
kung indi,
dapat asan da ipausuyay mi yang pagpabëtang mi tung pitik ang magkatamang gamitën,”
mag̓aning duun ti Jesus.
Nag̓apagkërësën-kësënan Yang Mga Tau Ti Jesus Kung Tanya Ya Ra Ka Man Yang Matuud Ang Pag̓aningën Ang Cristo (7:25-31)
25 Taa,
simanyan,
yang dumang mga dating tag̓a Jerusalem,
namag̓araning-aningan dang mag̓aning,
“Uay,
bëlag bang ya ra atia yang taung nag̓abalakan yang mga pamagpakigmaëpët ang imatayën?
Jewish leaders try to arrest Jesus (Juan 7:25-53)
26 Piru tëlëngan mi w̓a,
atia ra,
pagparakaw̓utun da tung publiku,
piru anda pa nganing ay pag̓ampalar tung anya!
Ayw̓a w̓asu?
Nag̓asiguru ra kaya nira ang ya ra ka man taang pag̓aningën ang Cristo?
27 Piru yang dipirinsia,
kung kumaw̓ut da nganing yang pag̓aningën ang Cristo,
anda unu ay makdëk yang pinanliitan na.
Tay yang taung naa,
nag̓akdëkan ta kang lag̓i kung ay pa liit!”
mag̓aning.
28 Kapurisu,
simanyan,
tung pagturuldukun ni Jesus duun tung pagtuuan ang atiang pinakalusu,
dayun dang nagpadakul yang busis nang mag̓aning,
“Ta,
yang kalaum mi talagang nag̓ailalaw ka numyu aa?
Nag̓askëan mi ka nganing yang pinanliitanu aa?
Piru,
indiaw minangay taa tung sadiling kagustuanu.
Kung indi,
talagang may nagtuw̓ul tung yëën ang ya pa ka man ay indi mi nag̓ailala.
29 Piru yuu,
nag̓ailalaw tanya,
sipurki duunaw liit tung anya ig tanya ka man ay nagtuw̓ul tung yëën,”
mag̓aning.
30 Atii,
dëëpën da rin yang duma.
Piru anda ëngëd ay napangalima tung anya,
may sam bilug,
natëtëngëd indi pa ag̓akaw̓ut yang uras ang ipinagtipu tung anya.
31 Piru maski pang maning tia,
asan tung mga taung atiang buntun,
duru rang namag̓ingmatuud tung anya ang ya ra yang pag̓aningën ang Cristo.
Namag̓araning-aningan da tanira ang mag̓aning,
“Ayw̓a,
kung kumaw̓ut da nganing yang pag̓aningën ang Cristo,
magdëëg pa kaya tung taung naa tung pagpalua ta mga pruibang maktël?”
mag̓aning.
Ti Jesus Nag̓apatuw̓ulan Yang Mga Pamagpakigmaëpët Tung Mga Guardia Ang Para Dëëpën Nira (7:32-36)
32 Simanyan may mga Pariseo duun ang ya ray nangasalimët tung pag̓aralas-alasan yang mga taung atiang buntun natëtëngëd tung ni Jesus.
Purisu anday dumang dinangat na,
namagsaranyug da ta maayën tanira yang mga paring atiang arabubwat ta katëngdanan ang ti Jesus patuw̓ulan da nira tung mga guardia tung pagtuuan ang atia ang para dëëpën da nira.
33 Kapurisu simanyan,
nagbitala si ti Jesus tung nirang tanan asan ang mag̓aning,
“Indi ra ilëm buay yang tiniru taa tung numyu,
ay magbalikaw ra tung nagtuw̓ul tung yëën.
34 Tung uras ang atia,
sagyapënaw pa numyung magtaw̓ang tung numyu,
piru indiaw ra ka ëngëd maita mi.
Kipurki kung ariaw pa manganing,
ta yamu indiamu ra maangay.”
35 Pagkagngël yang mga pamagpakigmaëpët yang inaning nang atia,
namag̓araning-aningan dang mag̓aning,
“Ay ra w̓asu manganing yang taung atia ang indi ta masagyapan?
Ayw̓a,
maglayas pa kaya duun da tung mga banwang pinagsarapën-sapënan yang mga masigka Judio tang duma ang para duun magturuldukanën tung mga kaarumanan nirang tag̓a duma-rumang nasyun?
36 Unu pay gustu nang ianing ang tanya,
maskin sagyapën ta,
piru indi ra ka ëngëd unu maita ta,
ay indi ita unu maangay duun tung panganingan na?”
mag̓aning.
Nag̓ipananglit Ni Jesus Yang Espiritu Santo Tung Waing Tubdun Ang Mag̓asubag Kaaw̓unda (7:37-39)
37 Simanyan,
kaw̓utun yang kamaalan yang pistang atia,
ti Jesus kumindëng dang nagpadakul yang busis nang mag̓aning tung mga tau,
“Kung tinu pay maning pa tung pagkanalënd,
magdangëp da ilëm tung yëën ang para maning pa tung paigmënu ta maayawan na.
38 Yang taung kumpurming magtalig yang sadili na tung yëën,
yang pananglitanu tung anya,
maning pa tung may waing tubdun ang magbëw̓ëëk ang duun manliit tung sadili na mismu ang mag̓asubag kaaw̓undae.
Magkamaningan da ta maning tia katulad tung napabtang tung kasulatanf,”
mag̓aning ti Jesus.
39 Anday dumang ipinananglit ni Jesus tung waing atiang tubdun ang mag̓asubag kaaw̓unda,
ya ra yang Espiritu Santo ang yay nag̓aisipan yang Dios ang ipatinir na tung mga taung kumpurming magtalig da yang mga sadili nira tung ni Jesus.
Ug̓aring ilëm ka man tung uras ang atii,
indi pa nag̓ipatinir na tung nira gatëd ti Jesus tanya indi na pa nag̓apadëngëg̓an ëngëdg.
Bëlag̓an Dang Pariu-pariu Yang Pagpabëtang Yang Mga Tau Tung Ni Jesus (7:40-44)
40 Pagkagngël yang duma asan tung kërësën-kësën yang mga taung atiang buntun,
namansianing da ang,
“Talagang ya ra ka man tia yang manigpalatay yang bitala yang Dios ang atiing pinangakuan yang Dios ang magluah.”
41 Yang duma namansianing da kang,
“Ya ra yang pag̓aningën ang Cristo,”
mag̓aning.
Piru mag̓aning yang duma,
“Abëë,
bëlag̓an tia yang pag̓aningën ang Cristo,
ay kipurki kung kumaw̓ut da nganing tia,
anda unu tung Galilea manliit.
42 Bëlag bang may napabtang tung kasulatan ang yang pag̓aningën ang Cristo unu mag̓ing kanubli ni Adi Davidi ig duun ka unu tung Betlehem ipanganaay ang ya kay banwang natauan ni Adi Davidj?”
ag̓aaning.
43 Purisu,
simanyan,
yang mga taung atia,
nagbërëlag̓an da ta kinaisipan may kinaisipan sigun tung pagpabtang nira tung ni Jesus.
44 Purisu yang dinangat na,
yang gustu yang duma,
dëëpën dang lag̓i nirang idimanda.
Piru anday napangalima tung anya,
may sam bilug.
Anda Ëngëd Ay Gustu Yang Mga Pariseong Mamanangëd Tung Ni Jesus (7:45-52)
45 Taa,
simanyan,
tung pagbalik yang mga guardiang atiang pinanuw̓ul nirang mamagdëëp tung ni Jesus,
dayun dang inusisa yang mga paring atiang arabubwat ta katëngdanan may yang mga Pariseo.
Mag̓aning tung nira,
“Ta,
ay ra?
Ayw̓a indi mi ra ka ingkëlan taa?”
46 Mag̓aning yang mga guardiang namansituw̓al,
“Bakluami ilëm nag̓agngël ta taung nag̓apagbitala ta maning tiing ibinitala yang taung atii!”
ag̓aaning.
47 Pagkagngël da yang mga Pariseo tia,
pinangërëpan da.
Mag̓aning tung mga guardia,
“Naa pala,
asta yamu,
muya napadëëg̓amu ra ka ilëm tung anya ta kulu!
48 Ayw̓a,
tinu pay naintindian ming may katëngdanan ubin tung yamën ang mga Pariseo ang nanangëd da tung anya?
Andang pisan,
may sam bilug!
49 Piru yang mga taung naang buntun ang pamanangëd da tung anya,
andang pisan ay naërëm tung mga kulu nira natëtëngëd tung napabtang tung kasulatan.
Talagang ipinanumpa ra tanira yang Dios!”
mag̓aning.
50-51 Atii,
may aruman nirang sam bilug ang suminublang.
Ya ra ti Nicodemong atiang minangay ta law̓ii tung ni Jesusk.
Mag̓aning tung mga kaarumanan nang pamagpakigmaëpët,
“Ëlat kanay kung mangasarang ilëm tung numyu.
Ayw̓a,
magkatama w̓asu tung mga katuw̓ulan ang nag̓ausuy ta ang sintinsiaan dang lag̓i yang sasang taung indi pa nganing nag̓abista kung unu pay nag̓abuat na?”
ag̓aaning.
52 Mag̓aning tanirang minlës,
“Midyu yawa tag̓a Galileaa kang pandapig tung anya!
Pasadsaran mu ta mupia yang kasulatan para maskëan mu ang andang pisan ay manigpalatay yang bitala yang Dios ang maglua ang tag̓a Galilea,”
mag̓aning.
53 Atii,
dayun dang namagbërëlag ang namag̓urulikan tung anya-anyang balay.