Ti Jesus Pag̓atag̓aman Da Rin Yang Mga Pariseong Papagkamaliën Sigun Tung Sintinsiang Ipakdul Tung Sasang Baw̓ay Ang Nagpakasalak (8:1-11)
8
Piru ti Jesus tanya,
duun da minangay tung bukid ang atiang durung mga ayung pag̓aningën ang olibo.
2 Mangayag ang timpranu,
nagbalik si duun tung pagtuuan ang atiang pinakalusu.
Duun si ka yang mga taung buntun ang ya ray namagtaripukpuk tung anya.
Purisu kuminarung da tanyang nag̓impisang nagturuldukanën tung nira.
Jesus forgives a condemned woman (Juan 8:1-11)
3 Simanyan,
may mga sag̓ad tung mga katuw̓ulan ang namansikaw̓ut da,
kasiraan da ka tanira yang mga Pariseo.
May sasang baw̓ay ang nag̓aguyuran nira ang yay nasëëkan dang pisan ang paglimbung tung kasawa na.
Numanyan dayun da nirang ipinakdëng tung katalungaan yang mga tau ang para bistaën da nira.
4 Mag̓aning tanira tung ni Jesus,
“Amëëy,
yang baw̓ay ang naa,
nasirtaan dang pisan ang paglimbung tung kasawa na.
5 Tung katuw̓ulan ang pag̓ausuy ta may sasang urdinansang ibinutwan ni Moises tung yatën ang kung may baw̓ay unung maning tia yang binuat na,
dapat unung batwën dang imatayëna.
Ay ta nuyu,
unu pay nuyung disisiun asan?”
mag̓aning.
6 Naa pala,
inaning nira ti Jesus ta maning tia,
ay pag̓atag̓aman da nirang papagkamaliën para madëëpan nira ta puntus ang ipagdimanda nira tung anya.
Piru ti Jesus tanya,
anday dumang binuat na,
dayun da ilëm ang tuminukuk ang nagsulat-sulat yang tulduk na tung apuk.
7 Atiing sigi-siging ag̓apabalitëktëkan nirang ag̓atalimaan,
dayun dang nanuklid ti Jesus ang nagbitala ang mag̓aning,
“Kung tinu pa asan tung numyu ay anday binuatan nang kasalanan,
yay magtukaw ang mamatu tung anya,”
mag̓aning.
8 Pagkatapus tia,
dayun sing tuminukuk ang nagsulat-sulat tung apuk.
9 Pagkagngël nira yang tuw̓al na,
amat-amat dang namagliliitan dang namagdarasun-dasun ang yang mga mamaëpët,
ya ra kay namagtukaw ang asta ti Jesus da ilëm ay nabutwan duun,
kasiraan da ka tanira yang baw̓ay ang duun pa kag këkdëng tung pinagtaralungaan nira yang mga tau.
10 Simanyan,
dayun sing nanuklid ti Jesus ang nagbugnu tung baw̓ay ang mag̓aning,
“Ta,
nini,
ay ra tanira?
Anda ray nabutwan taa ang para magsintinsia tung nuyu?”
11 Mag̓aning yang baw̓ay ang minlës,
“Anda ra,
Amëëy.”
Mag̓aning si ti Jesus ang nagsugpat,
“Maskin yuu,
indiaw ra ka magsintinsia tung nuyu.
Ala,
mulika ra.
Mag̓impisa ra simanyan,
india ra mag̓uman ang magpakasalak,”
mag̓aning.
Ti Jesus Maning Pa Tung Sasang Kaas (8:12-20)
12 Taa,
simanyan,
nagparakaw̓utun si ti Jesus tung mga taung atiang buntun duun tung pagtuuan ang atiang pinakalusu.
Mag̓aning tung nira,
“Yuu,
yang kaalimbawaanu,
maning pa tung sasang kaas ang pagpasanag tung isip yang mga tau taa tung kaliw̓utan.
Kung tinu pay panangëd da tung yëën,
bëlag dang makiklëp yang palaksu yang pag̓irisipën na,
kung indi,
nag̓apasanag̓an da yang kaas ang naang pagpaëyang ta baklung pagpangabui nang anday pagtapusan na,”
ag̓aaning.
Jesus is the light of the world (Juan 8:12-30)
13 Atii dayun dang namansisublang yang mga Pariseong mag̓aning,
“Yawa,
pagkërënga ra ka ilëm tung sadili mu.
Intunsis bëlag̓an matuud yang bitala mu.”
14 Mag̓aning ka ti Jesus ang nagtuw̓al,
“Maskin pagkërëngaw ka man tung sadiliu,
piru yang bitalaw matalig̓an ming matuud ay natëtëngëd ta yëën,
ag̓askëanu yang pinanliitanu may yang panganinganu.
Piru,
ta numyu,
indi mi nag̓askëan kung ariaw pa manliit kung ariaw pa manganing.
15 Yamu,
yang pagpabëtang mi tung yëën sigun ka ilëm tung nag̓alaum mi ang ya kang lag̓i ay kadagmitan ang pagparabëtangën mi tung kadaklan.
Piru ta yëën,
indiaw pagpabëtang tung sasang tau tung maning tia,
maskin tung ninu pa.
16 Ug̓aring kung alimbawa may kaministiran ang yuu magpabëtang tung sasang tau,
yang pagpabëtangu tung anya tamang pisan.
Sipurki yang pagpabëtangu bëlag̓an yëën ang bëët-bëët,
ang indi,
sanyug̓ami ka ni Amang nagtuw̓ul tung yëën.
17 Dispuis pa,
maski tung mga katuw̓ulan ang atiang nag̓apapaktëlan mi,
may nasambit ang kung may durua nga tauan ang yang panistigus nira pariu,
intunsis matuud yang dikta nirab.
18 Katulad tung yëën simanyan,
yuu pagkërëngaw tung sadiliu,
pati ti Amang nagtuw̓ul tung yëën,
pagkërëng ka tung yëën.”
19 Mag̓aning tanirang namagtalimaan,
“Ay pa ti Ama mu?”
Magtuw̓al ti Jesus,
“Indiaw nganing nag̓ailala mi!
Ya pa ag̓aring mailala mi ti Ama?
Sipurki kung nag̓ailalaw ëngëd numyu,
pati ti Ama nag̓ailala mi ka rin,”
mag̓aning.
20 Yang mga bitala ni Jesus ang atia ipinagpadapat na tung pagtuuan ang pinakalusu,
duun tung kuartu ang may mga alkansiang burugsuan ta kuarta.
Anday napagdëëp tung anya natëtëngëd indi pa nag̓akaw̓ut yang uras ang ipinagtipu tung anya.
Yang Pagpadayun Ni Jesus Yang Panuw̓al Na Tung Mga Pariseo (8:21-30)
21 Numanyan nagpadayun si ti Jesus yang bitala na tung nirang mag̓aning,
“Indi ra ilëm buay,
yuu magliitaw ra.
Dilëmënaw ra numyu,
piru mapatayamu ra ilëm ang indiamu pa nag̓akuatan yang pagkamakinasalananën mi.
Indiamu ra mangay tung angayanu,”
mag̓aning.
22 Atii,
namag̓araning-aningan da yang mga pamagpakigmaëpët ang mag̓aning,
“Unu pa kayay gustu nang ianing ang kung ay pa manganing tanya indiita unu maimung maangay?
Unu pa w̓asu,
manëg̓ët da yang tinanguni na?”
23 Mag̓aning ti Jesus ang nagtuw̓al,
“Yamu tag̓a taa ka ilëm tung aranëk,
piru yuu tag̓a duun tung abwat.
Ta yamu,
lug̓uramu kang lag̓i tung sistimang pangkaliw̓utan,
piru yuu bëlag̓anaw lug̓ud asan.
24 Kapurisu pinaamananamu rang lag̓i yëën nungayna ang muya mapatayamu ra ilëm ang yang mga kasalanan mi indi ra napatawad.
Siguradung yay mainabu tung numyu kung indiamu ra ëngëd manangëd ang yuu asanaw ra kang lag̓ic.”
25 Mag̓aning tanirang nagtuw̓al,
“Ayw̓a,
yawa,
unu pay pagpabëtang mu tung sadili mu?”
Mag̓aning ti Jesus ang minlës,
“Anday duma,
yuu ra ka man taang nag̓ipag̓aningu kang lag̓i tung numyu disti pa tung primiru.
26 Duru pa rin ang puiding masambitu natëtëngëd tung numyu ang nunut pa ka rin ta pagsintinsiaw tung numyu,
piru indi ilëm buatënu numanyan.
Kung indi,
yang sarang ang ipagpakaw̓utu tung mga tau taa tung kaliw̓utan,
kumpurmi ra ilëm yang nag̓agngëlu tung nagpangay tung yëën ang pagkatapus tanya talagang matalig̓an ang pulus matuud yang nag̓ianing na,”
mag̓aning.
27 Taa,
simanyan,
indi ra nira namarësmësan ang ti Ama na yay nadapatan yang ibinitala na.
28 Kapurisu,
ti Jesus dayun dang nagsugpat yang bitala na ang mag̓aning,
“Yuung pag̓aningën ang Maninga Tau,
kung ipaabwataw ra nganing numyu,
baklu mi ra ngaintindiay ang yuu asanaw ra kang lag̓i ig anday nag̓abuatu tung sadiling bëët-bëëtu ilëm,
kung indi,
kumpurmi yang itinulduk ni Ama tung yëën,
ya ra ilëm ay nag̓ipagpakaw̓utu.
29 Dispuis yang nagtuw̓ul tung yëën,
pagpakigsasa ka tung yëën.
Indiaw ra ka nag̓apaw̓aya-w̓ayaan na natëtëngëd pirmiaw kang pag̓usuy tung nag̓auyunan na,”
mag̓aning.
30 Simanyan,
indi pa ngani ag̓atapus ti Jesus ta pagbitala,
dakëlë ra asan ang namag̓ingmatuud da tung anya.
Pag̓asukdaan Ni Jesus Yang Mga Taung Atiang Namag̓ingmatuud Da Tung Anya (8:31-59)
31 Kapurisu,
dayun dang pinampaktël ni Jesus yang mga taung atiang baklung namag̓ingmatuud da tung anya ang mag̓aning,
“Kung yang bitalang naang nag̓ipagpakaw̓utu tung numyu ya ray pagnatisan mi,
asanamu ra magluang mga analadung nag̓apangugyatanu.
Jesus confronts false disciples (Juan 8:31-59)
32 Asanamu ra ka maintindi yang kamatuuran natëtëngëd tung planu yang Dios,
ig tung pag̓irintindiën mi tung kamatuuran ang atia,
asanamu ra ka nga luasay tung pagpakirëpën mi.”
33 Mag̓aning tanirang namagtimalës,
“Kirëpën ay?
Indiami kang lag̓i pagpakirëpën ang maski tung ninu pa,
ay yami mga kanubli kang lag̓i ni dipuntu apu tang Abraham.”
34 Mag̓aning ti Jesus ang minlës,
“Iugtulu tung numyu yang kamatuuran,
kung tinu pay pagpadayun tung pagpakasalak na,
yang kaalimbawaan na tia maning pa tung sasang kirëpën.
Ay indi ra mapangindi tung sulsul yang kalëlyag̓an nang magpakasalak ang yay maning pa tung pirming panuw̓ul tung anya.
35 Ang kung tung tau pa,
basta kirëpën,
ang asta tung sampa,
anday pagkabëtang nang magnatis tung pamalay-w̓alay yang ag̓alën na.
Bëlag̓an pariu tung sasang ana yang may pamalay-w̓alay ang yay may pagkabëtang nang magnatis.
36 Kapurisu kumus yuu yang pag̓aningën ang Ana Yang Dios,
kung yuuy magpaluas tung numyu tung pagpakirëpën mi,
intunsis luasamu rang matuud.
37 Kung tung bag̓ay,
nag̓askëanu ka ang yamu kanubli ka ni dipuntu apu tang Abraham,
piru pagbalakamu pang magpaimatay tung yëën natëtëngëd balaw̓ag tung kinaisipan mi yang bitalang naang nag̓ipagpakaw̓utu.
38 Yang kumpurming ipinaita ni Ama tung yëën ya ray nag̓ipagpakaw̓utu.
Katulad ka tung numyu ang yang kumpurming nagngël mi tung pinakaama mi ya ra kay pag̓abuat mi,”
mag̓aning.
39 Mag̓aning tanirang namansituw̓al,
“Ëëy,
yang pinakaama yamën ti dipuntu apu tang Abraham.”
Mag̓aning ti Jesus ang nagtimalës,
“Kung matuud ang ti dipuntu apu tang Abraham yay pinakaama mi,
intunsis yang buat-buat mi usuy ka rin tung buat-buat na.
40 Piru simanyan pagbalakamung magpaimatay tung yëën,
ang yuu ka man sasang taung nagpakaw̓ut tung numyu yang kamatuuran ang nagngëlu tung Dios!
Bëlag maning tia yang binuat ni dipuntu apu tang Abraham.
41 Kung indi,
yamu,
yang pag̓abuat mi usuy ang pisan tung buat-buat yang pinakaama mi.”
Mag̓aning tanirang namansituw̓al,
“Unu pay ilyag mung ianing?
Ta yami indiaming pisan nag̓atalang tung ustung pagturuuën tung Dios!
Anday dumang pinakaama ëngëd yamën kung indi ultimu ilëm tanya!”
42 Mag̓aning ti Jesus ang minlës,
“Kung yang Dios matuud ang yay ultimung pinakaama mi,
puis,
nag̓agëgmaanaw ra rin numyu kipurki duunaw liit tung anya.
Minangayaw ra nganing taa bëlag̓an ang mag̓aning tung sadiling kalëlyag̓anu ilëm,
kung indi,
yuu paangayay na.
43 Natëtëngëd tung unu pa indi mi nag̓aintindian yang bitalaw?
Anday duma,
natëtëngëd indiamu malëlyag ang mag̓intindi tung yëën.
44 Yamu,
anday dumang pinakaama mi,
ya ra ti Satanas.
Kapurisu gustu ming mag̓usuy tung kalëlyag̓an na.
Ay ya pa ag̓ari,
disti pa atiing primiru,
durung kalëlyag nang mangimatay tung mga tau.
Dispuis andang pisan ay kalalabtën na tung kamatuuran ay balaw̓ag kang lag̓i tung isip na.
Kung magbukli ra nganing,
natural na tia ay bukliën kang lag̓i ig ya kang lag̓i ay pinakaama yang tanan ang mga bukliën.
45 Ta yëën,
natëtëngëd pagpakaw̓utaw ka man yang kamatuuran,
purisu ya ra yang indi mi ag̓ipagpanangëd tung yëën.
46 Abir,
kung tinu pa asan tung numyu ay mapagpaita ta pruiba ang ta yuu may kasalanan?
Kung pagpakaw̓utaw yang kamatuuran,
natëtëngëd tung unu pa indiaw rag panangdën mi?
47 Kung tinu pay binuat da yang Dios ang ana na,
ya ray pag̓intindi tung bitala na.
Yang indi mi nag̓ipag̓intindi tung nag̓ianingu tung numyu,
bëlag̓anamung mga ana na,”
mag̓aning.
48 Mag̓aning tanirang namansituw̓al,
“Ta,
indi tama ka man yang ag̓aaning yamën ang yawa pariua ka tung sasang Samarianën ig pag̓aëkël-ëkëlana ka ta dimunyu?”
49 Mag̓aning ti Jesus ang minlës,
“Yuu,
indiaw pag̓aëkël-ëkëlan ta dimunyu,
kung indi,
pagpadëngëg̓aw tung ni Ama.
Ang pagkatapus ta numyu,
yuu rag duminaray mi.
50 Yuu indiaw pagsikad yang sadiling kadëngëg̓anu.
May pagsikad tia ang ya ra ka man ay magsintinsia kung tinu pay may katadlëngan tung yatën.
51 Iugtulu tung numyu yang kamatuuran,
kung tinu pay manangëd tung nag̓itulduku,
indi ra ka ëngëd madëëg̓an ta kamatayën.”
52 Mag̓aning yang mga pamagpakigmaëpët ang namagtimalës,
“Uay,
yang tau kang naa ka!
Asana ra nga dëëpay yamën ta puntus ang yawa talagang pag̓aëkël-ëkëlana ra ka man ta dimunyu!
Ay kipurki ti dipuntu apu tang Abraham napatay,
asta yang mga manigpalatay yang bitala yang Dios ang tukaw,
nagkarapatay ra ka.
Pagkatapus simanyan mag̓aninga pa ka ëngëd ang kung tinu pay manangëd tung nag̓itulduk mu,
indi ra ka ëngëd madëëg̓an ta kamatayën?
53 Ayw̓a,
maglandawa pa tung ni Abraham ang kinaampu ta ang napatay ra ka man?
Ayw̓a,
maglandawa pa ka tung mga manigpalatay yang bitala yang Dios ang tukaw ang luw̓us ka ilëm ang nagkarapatay?
Unu pa ëngëd ay pagpabëtang mu tung sadili mu?”
54 Mag̓aning ti Jesus ang nagtuw̓al,
“Kung alimbawa kung yuu magpabantug̓aw pa tung sadiliu,
intunsis anday kuinta yang kadëngëg̓anu.
Ang indi,
ti Ama ya ray pagpadëngëg tung yëën,
ang ya ka man mismu yang pag̓aningën ming Dios mi.
55 Tanya indi mi ra kang lag̓i nag̓ailala,
piru yuu nag̓ailalaw tanya.
Kung alimbawa,
mag̓aningaw ang indi nag̓ailalaw,
magkapariuaw ra ka ilëm din tung numyung bukliën.
Piru ag̓ailalaw tanya ig yang bitala na nagtumanënu.
56 Kung natëtëngëd tung kinaampu tang atiang nag̓asambit mi ang ti dipuntu apu tang Abraham,
durung pisan agkasadya yang isip nang nagpakbat din tung uras ang ipag̓ingtauu taa tung kaliw̓utan.
Ang pagkatapus numanyan,
naita na ra ka man ang duun da nagkalipay yang isip na ta mupia.”
57 Mag̓aning yang mga pamagpakigmaëpët ang namagtimalës,
“Abaa,
nag̓itaamu pa ni dipuntu apu tang Abraham ang anda pa ngani ay limang puluk ang takun yang idad mu?”
58 Mag̓aning ti Jesus ang minlës,
“Iugtulu tung numyu yang kamatuuran,
baklu ipanganaay ti dipuntu apu tang Abraham,
yuu,
asanaw ra kang lag̓i,”
mag̓aning.
59 Atii,
lag̓i-lag̓ing namamisik da ta mga batung para ipamatu nira tung anyang imatayënd.
Pagkatapus dayun dang nantaluk ti Jesus,
ang pagkatapus luminua ra dayun duun tung pagtuuan ang atiang pinakalusu.