Yang Pagpamaayën Ni Jesus Tung Sasang Taung Paglaru Ang Asan Da NGa Bistu Ang Pagsinasaay Tanira Yang Dios Ta Buat-buat (5:1-18)
5
Taa numanyan,
tung pira pang kaldaw,
kinaw̓ut da yang uras ang ipagsilibra si yamën ang mga Judio ta pista.
Purisu ti Jesus nanungul si duun tung Jerusalem ang para magpasakëp.
2 Duun tung Jerusalem ang alëngët tung purtang paraklëran ta mga karnirung nag̓ipandasag,
may pagdirigwan ang tung bitala yamën ang Hinebreo paggug̓uuyan ang Betesda.
Tung binit na may lima ngaintabladuan ang paralirungan ta mga tau.
Jesus heals on the Sabbath (Juan 5:1-15)
3-4 Durung mga taung may mga laru nirang lumakdayan asan.
May mga buray,
may mga barik,
may mga taung kapëypëyëna.
5 Asan may sasang tau ang tulung puluk may walu rang takun yang pag̓alaru na.
6 Simanyan naita ra ni Jesus ang yag lalakday asan.
Naskëan na ra ka ang tung tantung kabuay ra yang paglaru na.
Purisu dayun na rang inaning,
“Yawa,
malëlyag̓a rang magmaayën?”
7 Mag̓aning yang taung atiang minlës,
“Amëëy,
anday mag̓ëkël tung yëën ang para manulpuk tung wai kung uras dang bumulyak.
Mintras ag̓imurasënu ra rin ang paranëkan,
ag̓atkawanaw ka ëngëd ta duma.”
8 Mag̓aning ti Jesus tung anya,
“Ala,
këmdënga ra,
ëklan mu ra tiang papag mung magpanaw,”
mag̓aning.
9 Atii,
lag̓i-lag̓ing nagmaayën da yang taung atia.
Diritsyu ra ka man ang ingkëlan na yang papag nang nagpanaw.
Taa numanyan yang nainabung atia natuun tung kaldaw ang nag̓ipamaënay.
10 Kapurisu,
yang mga pamagpakigmaëpët tung nasyun yamën ang mga Judio,
pagkaita nira yang taung atiang nagmaayën da,
pinag̓istinggir da nirang inaning,
“Ëëy,
indi mu nag̓aintindian,
numanyan kaldaw ang nag̓ipamaënay?
Bawal ang mag̓ëkël-ëkëla tiang papag mu!”
11 Mag̓aning yang taung minlës,
“Yang taung nagpamaayën tung yëën,
yay nag̓aning tung yëën ang ëklanu ra yang papag̓ung magpanaw,”
mag̓aning.
12 Dayun da nirang tinalimaan,
“Tinu pang tauay nag̓aning tung nuyung ëklan mu ra yang papag mung magpanaw?”
mag̓aning.
13 Piru yang taung atiang pinamaayën,
anday kaliw̓utan na kung tinu pa.
Ay ti Jesus nagpanaw rang lag̓ing nanakat-sakat tung kadamlan yang mga tau.
14 Buay-w̓uay ra ta gësyë,
napanawan si ni Jesus yang taung atia duun tung pagtuuan ang pinakalusu.
Dayun na rang inaning ang,
“Ta,
maayëna ra simanyan.
Purisu india ra ilëm magpadayun tung pagpakasalak mu,
ug̓ud india ra mataktakan ta mas maliwag,”
mag̓aning.
15 Atii,
diritsyu rang nagpanaw yang taung atiang minangay tung mga pamagpakigmaëpët.
Nag̓ugtulun da ang ti Jesus yang nagpamaayën tung anya.
16 Simanyan natëtëngëd tung buat-buat ni Jesus ang mga maning tia tung kaldaw ang nag̓ipamaënay,
ya ray ipinakusalak yang mga pamagpakigmaëpët tung anyang nagaraan yang pagpakigkuntra nira tung anya.
Jesus defends his authority (Juan 5:16-47)
17 Kapurisu,
simanyan,
dayun dang nagbitala ti Jesus tung mga pamagpakigmaëpët ang atia ang mag̓aning,
“Ti Ama,
ang asta ra ilëm simanyan,
anday kapaënay-ënayan yang pag̓urubraën nang pagpakaayën tung mga tau.
Purisu ta yuu,
ya ka.
Anda kay kapaënay-ënayanu tung pag̓urubraënu.”
18 Pagkadngël nira tia,
mas pang naglain yang isip nirang namagdisididung mamagpaimatay tung anya.
Ay bëlag ilëm ang yang riglamintu nira natëtëngëd tung kaldaw ang nag̓ipamaënay ay pinaglikdan na,
kung indi,
ginuuyan na pa ka yang Dios ang ya ëngëd ay anyang sadiling Ama.
Bilang nagpakpëng da tung anyab.
Yang Nag̓ipanuw̓al Ni Jesus Tung Mga Pamagpakigmaëpët Natëtëngëd Tung Pagsasaan Nirang Duruang Mag̓ama Tung Pagkadios (5:19-47)
19 Kapurisu,
nagpadayun si ti Jesus yang bitala na tung nirang mag̓aning,
“Iugtulu tung numyu yang kamatuuran,
yuung pag̓aningën yang Dios ang Ana Na,
anday mabuatu tung sadiling kalëlyag̓anu ilëm.
Ang indi,
kumpurmi yang nag̓aitaw ang pag̓abuat ni Ama,
ya ka ilëm ay pag̓abuatu.
Bilang kumpurming unu pay pag̓abuat na,
ya ka mismu ay pag̓abuatu.
20 Ay kipurki nag̓agëgmaanaw anya.
Purisu ya ray nag̓ipagpaita na tung yëën yang tanan ang pag̓abuat nang para ya kay buatënu.
May mas pa nganing ang ipaita na tung yëën ang para buatënu ug̓ud yamu ray mabërëng.
21 Ay katulad tung anyang may kagaëman nang magpabungkaras tung mga minatay ang para mangabui si kang uman,
yuung pag̓aningën nang Ana Na,
ya ka.
May kagaëmanu kang magpaëyang ta baklung pagkatau tung mga taung kuari mga patay tung pagtërëlëngën yang Dios ang kumpurming tinu pay nag̓alëlyag̓anu.
22 Asta yang pagsirintinsiaën tung kalainan tung uri ta kaldaw,
bëlag̓an ang mag̓aning ang ti Ama yay magsintinsia tung mga tau,
kung indi,
yuung pag̓aningën nang Ana Na,
yuu ray piniaran nang magsintinsia tung nira.
23 Ay yang ipinagpiar na tung yëën tia,
ay ug̓ud yang tanan ang mga tau mamagpadëngëg tung yëën ang pag̓aningën nang Ana Na ang kumpurmi yang pagpadëngëg nira tung anyang pag̓aningënung Amaw.
Purisu,
kung tinu pay indi magpadëngëg tung yëën ang pag̓aningën nang Ana Na,
indi na kag padëngëg̓an ti Amang nagtuw̓ul tung yëën.
24 “Iugtulu tung numyu yang kamatuuran,
kung tinu pay panangëd tung bitalang naang nag̓ipagpakaw̓utu ang asan dag pagpailala yang pagtaralig̓ën na tung ni Amang nagtuw̓ul tung yëën,
may pagkatau na rang baklu ang ya ray pagnatisan nang asta tung sampa.
Anda ray ëlatan nang sintinsiaan pa tung kalainan,
kung indi,
naliit da tung dating pagkatau nang alawid tung Dios ang nalaktëd da tung baklung pagkatau nang uyun tung Dios.
25 Iugtulu tung numyu yang kamatuuran,
magkakaw̓ut da yang uras,
kuminaw̓ut da ka ëngëd ang yang mga taung alawid tung Dios ang maning pa tung patay tung pagtërëlëngën na,
magngël da nira yang busisung pag̓imbitar tung nira ang yuu ka man yang pag̓aningën ang Ana yang Dios.
Kumpurming tinu pay magpabtëng tung yëën,
asan da magkatinir ta pagkatau nang baklu.
26 Ay kipurki katulad ka tung ni Ama ang yay may pudir ang magpaëyang ta baklung ipagpangabui yang mga tau,
yuung pag̓aningën nang Ana Na,
ya ka,
ay natëtëngëd pinakdulanaw ra anya ta pudirung magpaëyang ka ta maning ka tia.
27 Bëlag ilëm maning tia,
ang indi,
pinakdulanaw ra ka anya ta pudirung magsintinsia tung kalainan tung mga tau natëtëngëd yuu ka man yang pag̓aningën ang Maninga Tau.
28 Indiamu mabërëng tung inaningu ang atiang yuu yang manigsintinsia.
Ay kipurki may uras ang kaw̓utun ang yang tanan ang mga taung nagkarapatay ra magngël da nira yang busisu ang magkalalangan tung nira.
29 Magngël da ngani nira yang busisu,
mamansilapus da tung pinanlëbngan tung nira.
Kung tinu pay nagpadayun tung mga ubra-ubrang nag̓auyunan yang Dios,
ya kay pabungkarasënu ang para magpasapën da tung anya ang asta tung sampa.
Yang kumpurming nagpadayun man tung mga buat-buat nang anday kuinta,
ya kay pabungkarasënu ang para sintinsiaanu ra tung kalainan.
30 “Bëlag̓an ang mag̓aning ang bëët-bëëtanu ra ilëm yang pagsirintinsiaënung atia.
Ang indi,
kumpurmi ra ilëm yang ipagngël ni Ama tung yëën,
ya ray usuyunung magsintinsia.
Purisu tamang pisan yang sintinsiang ipakdulu.
Kipurki bëlag̓an yang sadiling kalëlyag̓anu ang yay pag̓asikaru,
ang indi,
ultimu ilëm yang kalëlyag̓an yang nagtuw̓ul tung yëën.
31 Kung alimbawa,
yuu ilëm ang sam bilug ay pagkërëng tung sadiliu,
intunsis puiding maskin indiaw ra panangdën mi.
32 Piru may sam bilug pang pagpaingmatuud natëtëngëd tung yëën.
Kidispuis ag̓askëanu ang yang nag̓ipagpaingmatuud na natëtëngëd tung yëën talagang tama.
33 Yamu nganing ay nagtuw̓ul tung mga kaarumanan ming mamanginsapu tung ni Juan ang pagkatapus yay nagdiklara yang kamatuuran natëtëngëd tung yëënc.
34 Bëlag̓an ang mag̓aning ang yuu pagkaministiran ta tau ang para magkërëng ilëm tung yëën.
Ang indi,
nag̓asambitu ilëm tiang pagpaingmatuud ni Juan tung yëën ug̓ud basi pa ra ilëm magpauyunamu ra kang magpatapnay tung yëën.
35 Kipurki ti Juan ang naa,
maning pa tung sasang kaas ang nagdëkal ang nagpasanag ta mupia.
Piru ta numyu,
midyu gësyë ka ilëm yang uras ang ikinasadya mi yang ipinagpasanag na tung numyu.
36 Piru,
yuu,
may sasang pagpaingmatuud natëtëngëd tung yëën ang mas landaw pa kay tung pagpaingmatuud ni Juan.
Ay kipurki yang mga buat-buat ang naang nag̓ipaitaw ang ya ra kang lag̓i ay itinalig ni Ama tung yëën ang talusunu,
ya ra kay pagpailala tung yëën ang pag̓atuw̓ulaw ka man anya.
37 Pati nganing ti Amang nagtuw̓ul tung yëën,
ya kay pagpaingmatuud natëtëngëd tung yëën.
Kung tung bag̓ay,
yang busis na indi mi nag̓agngël,
pati pirsunal na,
indi mi ka nag̓aita.
38 Asta yang bitala nang nag̓ipagpagngëlu tung numyu,
indi mi ra ka nag̓ipabalay tung isip mi.
Talagang matuud tia,
ay tëlëngan mi ra ilëm.
Yuung tinuw̓ul na mismu,
indiaw ra ka ilëm agpanangdën mi.
39 Tung bag̓ay pagpasadsaramu ta mupia tung kasulatan,
ay yang kalaum mi tung pagsurulipëtën mi yang mga katuw̓ulan na,
asanamu ngaëyangay ta pagkatau ming baklu ang ya ra ka rin ay pagnatisan ming asta tung sampa.
Piru yang kasulatan ang atiang nag̓apadërëpan mi,
yuu ra ka man taang nag̓adapatan na!
40 Ang pagkatapus indiamu ra ka ëngëd nag̓alëlyag ang magpagaëm tung yëën ang para magkatiniramu ra rin yang pagkatau ming atiang baklu ang uyun tung Dios.
Nag̓ipagpaluw̓aw Ra Ni Jesus Yang Indi Ëngëd Nira Nag̓ipagpanangëd Tung Anya (5:41-47)
41 “Indiaw pagsikad ang yuu dayawën ta mga tau.
42 Piru suutung pisan yang pundu yang mga kinaisipan mi ang yamu ang anda ëngëd ay paggëgma ming ustu tung Dios.
43 Yuu nagluaaw ra taa tung publiku,
natëtëngëd tung katëngdanan ang ipinakdul ni Ama tung yëën ang pagkatapus nag̓apangindianaw ra ka ilëm numyu.
Kung may duma pang maglua taa tung numyu tung sadiling bëët-bëët na ilëm,
atia ya ray dilantadung pauyunan mi.
44 Ya pa ag̓aring mapagtalig̓amu tung yëën ang maning da tiang pag̓amaal mi ang yamu magparabantug-bantug̓an?
Piru ang yamu bantug̓un yang ultimung Dios ang yay indi mapakdingan,
bëlag̓an ang yay magsikarën mi.
45 Indiamu maglaum ang yuu pay magbangdan tung numyu tung katalungaan ni Ama ang ayw̓at indiamu ra nanangëd tung yëën.
Kipurki may sasang magbangdan tung numyu.
Anday duma,
ya ra ti Moises.
Ya ka man mismu yang panalig̓an ming mangërëngan tung numyu natëtëngëd tung pagturumanën mi yang mga katuw̓ulan ang ipinagsulat na.
46 Sipurki kung panangëramu ta ustu tung isinulat na,
intunsis simanyan,
nanangëramu ra ka rin tung yëën.
Ay yuu ra ka man taang nag̓adapatan yang isinulat na.
47 Piru simanyan kumus indiamu panangëd tung isinulat na,
ya pa ag̓aring panangdën mi yang yëën ang nag̓ipagpakaw̓ut tung numyu?”
mag̓aning ti Jesus.