May Pruibang Nag̓aingaluk Yang Mga Pariseo May Yang Mga Saduseo Ang Ya Kay Pagtag̓am Nira Ta Pagtuung Tung Ni Jesus (16:1-4)
16
Taa numanyan may mga Pariseong namagpalëngët da tung ni Jesus,
kasiraan da ka tanira yang mga Saduseo.
Kumus gustu nirang mamagtag̓am ta pagtuung tung anya,
namag̓ingaluk da tung anya ang paitaan na rang lag̓i ta pruibang maktël ang para ya ray magpailala tung anya ang talagang may kagaëman na ka man ang liit tung Dios.
2 Mag̓aning ti Jesus ang nagtimalësa,
“Kung masantëk da nganing yang kaldaw tung sag̓iid ig maita mi ra ka nganing yang langit ang panipula rang paliw̓ut,
mag̓aningamu kang andamal matinlung timpu.
3 Utru si kung mandiklat da nganing yang sag̓iid ang manipula ra ka yang langit ig magalëm,
mag̓aningamu kang kumuran.
Matakuamu nganing ang magpamalad tung nag̓aita mi tung kalangitan,
piru indiamu pala maskëng magpamalad tung mga pruibang pagkarainabu numanyan ang ya ra kay pagpailala kung unu pang panimpuay ta simanyanb.
4 Abaa yang mga taung naang mga masigkanasyunu simanyan.
Durug kalain!
Rusaw ra yang gëgma nira tung Dios!
Purisu ya ray nag̓ipagsagyap nira ta pruiba baklu mamanangëd tung yëën.
Piru anday dumang pruibang ipaita tung nira,
kung indi,
ya ra ilëm yang magkaanggid tung ipinagpaita yang Dios ang tukaw atiing pagkainabu tung ni Jonas,”
ag̓aaningc.
Numanyan pagkaaning ni Jesus tia,
dayun na ra ilëm ang binutwanan yang mga taung atiang nagliit,
kasiraanami ra kang mga tauan na.
Nag̓apaamanan Ni Jesus Yang Mga Tauan Na Natëtëngëd Tung Maning Pa Tung Pampalëskag Tung Sang Masang Arina (16:5-12)
5 Taa numanyan pagkatindak yamën na Jesus,
naa pala yaming nag̓apangugyatan na,
nalipatami rang napagbalun ta mga tinapay.
6 Numanyan mag̓aning ti Jesus tung yamën,
“Kuidaw,
amanan mi ta mupia yang pampalëskag ang nag̓agamit yang mga Pariseo may yang mga Saduseo.”
7 Pagkagngël yamën tia,
dayun dang pinagkërësënan yamën ta maluw̓ay ang mag̓aning,
“Siguru napagbitala ra ta maning tia ay pasaplid na ra tung yatën ay indiita ra ka man napagbalun ta mga tinapay.”
8 Numanyan pagkasiman ni Jesus kung unu pay nag̓apagkërësën-kësënan yamën,
dayunami rang tinalimaan nang inaning,
“Ayw̓a ya ray nag̓apagkërësën-kësënan mi ang anday ëkël ming balun ang tinapay?
Midyu pinaluw̓ay mi ra yang pagtaralig̓ën mi tung yëën natëtëngëd tung mga kaministiran ta.
9 Ayw̓a,
indiamu pa ka ëngëd nag̓aintindi?
Indi mi ra pala nag̓adëmdëman ang atiing may lima ilëm ang bilug ang tinapay ang ipinampapaanu tung limang liw̓u nga tauan kung pira pa nga baayan ang napnuk mi ta mga ëpëd nira?
10 Pati atiing may pitu ilëm ang bilug ang tinapay ang ipinampapaanu tung ëpat ang liw̓u nga tauan,
nag̓alipatan mi ra ka kung pira pa nga bëgyasan ang napnuk mi ta mga ëpëd nira?
11 Ayw̓a kaya ang indi mi pa ka ëngëd nag̓aintindian ang bëlag̓an tinapay yang nag̓adapatan yang inaningung atia tung numyu?”
mag̓aning.
12 Atii,
baklu ra nga marësmësay yamën ang naa pala,
yang pampalëskag ang atiang sinambit ni Jesus bëlag̓an yang pampalëskag ta tinapay,
kung indi,
ipinananglit na ra ilëm tung nag̓itulduk yang mga Pariseo may yang mga Saduseo ang puirting tumagmak tung mga painu-inu yang mga taung pagpatulduk tung nira.
Pariu tung pagtagmak yang pampalëskag tung sang masang arinad.
Nag̓ailala Ni Pedro Ang Ti Jesus Ya Ra Yang Pag̓aningën Ang Cristo (16:13-20)
13 Taa numanyan minangayami ra na Jesus duun tung sinakëpan yang lansangan ang nag̓aguuyan tung Cesarea Felipe.
Numanyan tinalimaanami ra anyang inaning,
“Ëlat kanay,
ang yuung pag̓aningën ang Maninga Tau kung pagkërësën-kësënanaw ta mga tau,
unu pay pagpabëtang nira tung yëën?”
14 Mag̓aningaming kang nagtimalës,
“Mag̓aning yang duma ang yawa unu ti Juan ang manigbënyag ang nabui si kang uman.
Yang duma pag̓aning ka ang yawa unu ti Eliase.
Yang pintu yang duma ang yawa unu ti Jeremias ubin yang duma pang manigpalatay yang bitala yang Dios atiing tukaw ang ya si kay nabuing uman.”
15 Mag̓aning ti Jesus ang nanalimaan si tung yamën,
“Ay ta numyu,
unu pay numyung pagpabëtang tung yëën?”
16 Numanyan ti Simon ang yay pinapuanggaan da kang lag̓i ni Ginuung Jesus tung ni Pedrof,
ya ray nagtuw̓al ang mag̓aning,
“Yawa yang pag̓aningën ang Cristo,
bilang yang pag̓aningën ang Ana Yang Dios ang Makagag̓aëm!”
mag̓aning.
17 Mag̓aning ka ti Jesus ang minlës,
“Simon,
ana ni Jonas,
tëëd mu tiag katinlu yang ipinagpabunayag yang Dios tung nuyu!
Ay kipurki yang sinambit mung atia,
bëlag̓an tau yang nagpaintindi tung nuyu,
kung indi,
mismu yang Amaw duun tung langit,
ya ray nagpabunayag tung isip mu natëtëngëd tung pagkabëtangu kung yuu tinu pa.
18 Purisu ta yëën,
nani ra yang gustuu rang ianing tung nuyu.
Yawa,
Pedro yang kinaulug̓an yang puangga mung atia,
sasang batug ig tung batung naa ipakdëngayu yang maning pa tung sasang balay ang dakulu ang ya ray kaalimbawaan yang intirung kabilug̓an yang kumpurming magtalig tung yëën ang magpagaëmh.
Maskin kamatayën pa,
anday puirsa nang magdëëg tung nirai.
19 Piarana yëën ta katëngdanan mung magmangulu tung mga taung kumpurming magpagaëm ang bug̓us tung Diosj.
Kung unu pay bawalën mu tung nira taa tung katanëkan,
bawal ka duun tung langit.
Kung unu pay ilug̓ut mu tung nira taa tung katanëkan,
lug̓ut ka duun tung langit.”
20 Pagkatapus ni Jesus yang pagpasanag nang atia tung ni Pedro,
dayun dang nagpasëbën tung yamën ang tanan ang nag̓apangugyatan nang mag̓aning,
“Kuidaw!
Indiamu ra kanay magbaw̓alitaën maskin tung ninu pa ang yuu yang pag̓aningën ang Cristo,”
mag̓aningk.
Nag̓ipasanag Ni Jesus Kung Unu Pay Dapat Ang Panawan Na Pati Yang Dapat Kang Panawan Yang Kumpurming Mga Tauan Na (16:21-28)
21 Taa numanyan,
ya ray ipinag̓impisa ni Jesus ang nagpasanag ta mupia tung yamën ang nag̓apangugyatan na kung unu pay dapat ang panawan na tung uri.
Mag̓aning tung yamën,
“Yang nag̓aingaluk yang Dios tung yëën ang yuu dapat mangayaw ka ëngëd duun tung Jerusalem.
Kung duunaw ra nganing,
papinitinsiaanaw ra ta mupia yang mga pamagpakigmaëpët may yang mga paring arabubwat ta katëngdanan pati yang mga sag̓ad,
ang pagkatapus ipaimatayaw ra ka dayun nira.
Piru maskin pang maning tia yang dapat ang mapasaranu,
tung pagkaw̓ut yang yaklung kaldaw,
pabungkarasënaw ra ka ëngëd yang Dios,”
mag̓aning.
22 Numanyan pagkagngël ni Pedro tia,
dayun na rang ingkëlan ti Jesus ang ipinabinit ang pagkatapus pinag̓intraan na ra sambëng ang inaning,
“Aay Ginuu,
india ra ilëm magbiw̓italaën ta maning tia.
Paalawid da ilëm yang lain tung tinanguni mu ang asta tung sampa ildawana yang Dios,”
mag̓aning.
23 Atii dayun dang nagbëdlëng ti Jesus ang nanalunga tung anyang mag̓aning,
“Paaw̓ig̓a ra taa!
Yawa ra pala ay pagsatanas tung yëën!
Naa pala,
nag̓atag̓amanaw ra nuyung patalangën tung pinagplanu yang Dios tung yëën.
Kipurki tung pagsambëng mung atia tung yëën,
bëlag̓an yang nag̓aisipan yang Dios yang nag̓usuyun mu,
kung indi,
ya ka ilëm yang isip ta tau,”
mag̓aning.
24 Atii dayun dang nagbitala ti Jesus tung yamën ang nag̓apangugyatan nang mag̓aning,
“Kung tinu pay nag̓alëlyag dang magpaugyat tung yëën,
yang sadili na ya ra lipatay na.
Yang isip na ya ag̓ipatëntënay nang mag̓agwanta tung mga pinitinsia,
maskin ilansang pa tung krusl.
Dapat maning tia yay ipabalay na tung isip na kung gustu nang magpaugyat tung yëën.
25 Ay kipurki kung tinu pay nag̓alëlyag ang yang sadili na ilibri na tung malain,
asan da nga kapa-kapaay na yang kaampiran na tung yëën.
Piru kung tinu pay mamirdi tung sadiling kalëlyag̓an na natëtëngëd ilëm tung yëën ang yuu ray nag̓ipalusu na ta gëgma na,
asan da nga siguruay na yang kaampiran na tung yëën ang yay pagnatisan nang asta tung sampam.
26 Ay kipurki unu pa pay ikaayën yang sasang tau ang yang tanan ang nag̓alëlyag̓an na taa tung kaliw̓utan ang naa luw̓us dang mag̓apakinaw̓angan na ang pagkatapus asan da nga plëkay ta ultimung pagpangabuing magnatis ang asta tung sampa?
Anda ra ëngëd ang pisan!
Unu pa pay sarang ang mabailu na ang para bawiën na pa rin yang ultimung pagpangabuing atiang naplëk tung anya?
Anda ra ëngëd ay maimu na!
27 Agpamanënamu ra yëën ta maning tia ay natëtëngëd ta yuung pag̓aningën ang Maninga Tau,
siguradung magbalikaw ang ya ray uras ang ipagbalësu tung sasa may sasa ang kumpurmi ra ilëm tung binuatan na.
Ay yuu maggaraëmënaw tung bilug ang kaliw̓utan ang yang kasusulawën ang pag̓atiniran kang lag̓i ni Ama ya ra kay tiniranu ig magkasira-siraanami ra ka yang mga angilu.
28 Iugtulu tung numyu yang kamatuuran.
May duma asan tung numyu ang baklu magkarapatay,
yuung pag̓aningën ang Maninga Tau,
mabilug̓an da ka ëngëd nira kung ya pa ag̓arig katinlu yang paggaraëmënu,”
ag̓aaning ti Jesus duun tung nira.