Yang Paglëw̓ad Yang Pagkabëtang Ni Jesus (17:1-13)
17
Taa numanyan pagkataklib da yang ënëm ang kaldaw,
ingkëlan da ni Jesus ti Pedro may ti Santiagong duruang mag̓ari ni Juan ang namansitungul tung sasang bukid ang makbu ang tanira tanira ra ilëm.
2 Atiing duun da tanira,
naglëw̓ad da yang pagkabëtang ni Jesus tung pinagtaralungaan nira.
Yang ityura na nagsulaw ra ang midyu tung kasusulawën yang kaldaw,
pati yang aw̓ël na durung pisan agkakulit ig duru kang pisan agkasulaw.
The Transfiguration (Mateo 17:1-13)
3 Numanyan asan da nansilput ti Moises durua ni Elias.
Pamagkërësën tanira ni Jesus.
4 Numanyan nabnga ra ti Pedrong mag̓aning tung ni Jesus,
“Ginuu,
maayën ilëm naawami ra ka.
Kung gustu mu,
magpakdëngaw ra ta tulu nga layang-layangan,
salëgsang bilug mi ni Moises may ni Elias,”
mag̓aning.
5 Numanyan atiing indi pa ag̓atapus ti Pedro ta pagbitala,
may sasang panganud ang durug sulaw ang tëlëngan ang ya ray nagpaulung tung nirang tanan.
May nagngël da nirang busis ang asan manliit tung panganud ang mag̓aning ang pagbitala,
“Uay,
atia ra yang pag̓aningënung anaw ang nag̓apabuyukanu ta gëgmaw ay ya ra kang lag̓i ay nag̓auyunanu ta mupia.
Intindiën mi ra ta maayën yang kumpurming ianing na tung numyu,”
mag̓aning.
6 Numanyan pagkagngël yang mga aruman yamën ang atia yang busis ang atia,
ya ra mamansipadagpa tung tanëk ang mamagtuu ay pinandëlaan da ta mupia.
7 Atii dayun dang pinalëngtan tanira ni Jesus ang pinandëënan ta kalima nang inaning,
“Ala,
këmdëngamu ra asan.
Indiamu ra magpadla,”
ag̓aaning.
8 Numanyan tingaraën nira,
anday dumang naita nira,
kung indi,
ti Jesus da ilëm ang sam bilug.
9 Numanyan atiing pamandanëk da tanira tung bukid,
pinag̓urdinan da tanira ni Jesus ta mupia ang pinag̓aning,
“Indiamu ra kanay magbaw̓alitaën maskin tung ninu pa natëtëngëd tung ipinagpaitang atia tung numyu ang asta kaw̓utun da ilëm yang uras ang yuung pag̓aningën ang Maninga Tau pabungkarasënaw ra yang Dios,”
mag̓aning.
10 Purisu simanyan ya ray ipinagtalimaan nira tung ni Jesus ang mag̓aning,
“Ay kung maning tii yang mainabu tung nuyu,
ayw̓a kaya nag̓itulduk yang mga sag̓ad ang ti Elias ang atiang baklu ka ilëm naita ta dapat unu tukaw ang magbalik baklu lumua yang pag̓aningën ang Cristo?”
11 Mag̓aning ka ti Jesus ang tuminuw̓al,
“Kung tung bag̓ay,
tama ka man yang nag̓itulduk nira ang yang pag̓aningën ang Cristo matkawan ni Elias ang lumua ang pagkatapus yay magpaiwan-iwan ug̓ud simpan da yang mga taung mamampauyun tung pag̓uri tung anya.
12 Ang pagkatapus iugtulu tung numyu yang kamatuuran,
kuminaw̓ut da ka man ti Elias,
piru indi ra inilala yang mga tau,
kung indi,
binuatan da ilëm nira yang kumpurming nalëlyag̓an nira.
Maning ka man tia yang buatën nira tung yëën ang pag̓aningën ang Maninga Tau ang yuu papinitinsiaanaw ka nira,”
mag̓aning.
13 Atii baklu ra nga marësmësay nira ang bëlag̓an pala ti Elias mismu yang nag̓adapatan yang nag̓ianing nang atia tung nira,
kung indi,
ya ra ti Juan ang manigbënyag ang yay nanubli tung katëngdanan ni Elias.
Yang Pagpamaayën Ni Jesus Tung Sasang Mulang Dinimunyu (17:14-20)
14 Taa numanyan pandanëk da nira tung bukid,
kinaw̓utan da nira yang mga taung buntun.
Pagkatapus may sasang taung nagpalëngët tung ni Jesus ang ya ra nga luud tung pinagtalungaan nirang durua.
15 Mag̓aning tung anya,
“Amëëy,
ildawan mu ka yang anaung lalii.
Tanya may laru nang kërë.
Kung kaw̓utun da nganing,
ag̓aliwag̓an da ta mupia.
Kung kaisan magtutumba ra ilëm tung apuy,
ang kaisan tung wai ra ilëm numba.
16 Idinangëpu ra rin nganing tung mga taung nag̓apangugyatan mu,
piru indi ra ka ilëm nasarangan nirang napamaayën.”
17 Mag̓aning ti Jesus ang nagtimalës ang tung nira kang tanan iparumbuay na yang bitala nang mag̓aning,
“Uu,
yamung mga {tauamung mga} masigkanasyunu simanyan!
Ay ra yang pagtalig mi?
Duru pa ka ëngëd agkabaliskad yang laksu yang pag̓irisipën mi.
Midyu tung maglakgasënaw ra tung numyu kung sanuamu ra kaya ngaëyangay ta ipagtalig ming ustu tung yëën.
Ayw̓a,
kaministiran ang mag̓agwantaw pa ta mabuay tung ug̓ali ming maning tia?
Ala,
ëklan mi ra tani tung yëën yang mula,”
mag̓aning.
18 Pagkaw̓ut na tung anya,
dayun na rang linalangan yang dimunyung lumayas da asan ang pagkatapus luminayas da ka man.
Purisu tung uras ang atii,
lag̓i-lag̓ing nagmaayën da yang mula.
19 Numanyan yaming pagpaugyat tung ni Jesus,
nagpalëngëtami ra tung anya ang yami yami ilëm.
Dayunami rang nagtalimaan tung anyang mag̓aning,
“Natëtëngëd tung unu pa w̓asu indiami nasarang ang napagpalayas tung dimunyung atia?”
20-21 Mag̓aning ti Jesus ang nagtuw̓al,
“Ay natëtëngëd tung pagtalig ming may pagkakulang na!
Kipurki iugtulu tung numyu,
kung nag̓aëyanganamu ra ta ipagtalig ming maskin mag̓amustasaa ilëm agkadakul,
kayanan mi ra ka yang midyu may kaliwag̓an nang buatënb.
Anda kay indi mi masarangan,”
mag̓aningc.
Nag̓asambit Si Ni Jesus Yang Dapat Ang Mapasaran Nang Durug Liwag (17:22-23)
Marcos 9:30-32; Lucas 9:43b-45
22-23 Taa numanyan atiing pagsaragpunami ra duun tung banwang atiang Galilea,
mag̓aning ti Jesus tung yamën ang mga nag̓apangugyatan na,
“Yuung pag̓aningën ang Maninga Tau,
indi ilëm buay,
iintrigaw ra tung pudir yang mga taung ya ra ka man ay mamagpaimatay tung yëën.
Piru tung yaklung kaldaw,
pabungkarasënaw ra yang Dios,”
mag̓aning.
Numanyan pagkagngël da yamën tia,
pinamungawami ra ta duru.
Natëtëngëd Tung Pagbayad Ni Jesus Yang Nag̓ipabayad Para Tung Pagtuuan Nirang Pinakalusu (17:24-27)
24 Taa numanyan,
pagkaw̓ut nira na Jesus duun tung Capernaum,
may mga manigkulikta ang ya ray namagpalëngët tung ni Pedro.
Yang kuartang magkuliktaën nira yay nag̓agamit kung unu pay mga kakulangan tung pagtuuan ang pinakalusu duun tung Jerusalem.
Mag̓aning tanira tung ni Pedro,
“Ëlat kanay,
yang ag̓alën mi pagbayad ka yang nag̓ipabayad tung takun-takun para tung pagtuuan tang pinakalusud?”
25 Mag̓aning ka ti Pedrong minlës,
“Simpri.”
Numanyan pagkaw̓ut ni Pedro tung balay,
indi pa nganing nag̓ianing na yang bag̓ay ang atia,
tingkawan da ni Jesus ang inaning,
“Ta,
Simon,
tung pag̓intindi mu,
tinu pay nag̓apampasukutan yang mga adi ta sidula ubin ta dumang balayaran tung mga inadian nira?
Yang may mga kaampiran tung nira u yang dumang mga tau?”
26 Ag̓aaning ti Pedrong nagtuw̓al,
“Simpri yang dumang mga tau.”
Mag̓aning si ti Jesus ang suminugpat,
“Ig disir kung maning tii,
bëlag̓an ubligadung mamagbayad pa yang may mga kaampiran tung nira.
Pariu ka tung yatën ang may mga kaampiran tung Dios.
Anda ra ka rin ay ministir ang magbayarita pa yang nag̓ipabayad para tung pagtuuan ang atiang pinakalusu ang ya ëngëd ay pag̓aistaran na.
27 Ug̓aring ilëm kumus anday gustu ta ang yang mga manigkuliktang atia may paglainan ta mga isip nira tung yatën,
maayën pang mandanëka ra kanay asan tung lalagunang magbila.
Yang primirung ian ang maniw̓ak,
kung mabatak mu ra nganing,
ya ray bëngakën mu yang nganga na.
Asan da maita mu yang sasang nigal ang magkatama ilëm ang pisan ang ibayad tung nag̓ipabayad ang atia tung yatën ang durua nga tauan.
Ya ray ëklan mung ibayad tung mga manigkuliktang atia,”
mag̓aning duun tung anya.