Yang Yadwang Isinulat NI PEDRO
Yang Intrada Yang Sulat (1:1-2)
1
Yang may sulat taa yuung ti Simon Pedrong sasa kang turuw̓ulun ni Jesu-Cristo bilang sasang apustul nang pangërëngan tung anya.
Ipinaëkëlu ra tung numyung kumpurming pinaëyangan da yang Dios ta ipagtalig mi tung ni Jesu-Cristo ang katulad ka tung ipinaëyang na tung yamën ang mga apustul na.
Pariu ka ilëm agkamaal tung anya yang pagtaralig̓ën mi may yang pagtaralig̓ën yamën ay natëtëngëd tanyang yay Dios ang nag̓apanirbian ta ig ya kay pagtapnay tung yatën,
pariu-pariu yang pag̓aratratarën na tung yatën ang anday pinilikan.
2 Yang nag̓ipag̓ampuu para tung numyu ang mas pang maispirinsiaan mi yang kaildaw may yang kalimëngan ang liit tung Dios durua ni Ginuu tang Jesus ëkël tung kaampiran mi tung nira.
Pinakdulan Da Tanira Yang Tanan Ang Kaministiran Nira Ang Para Mapag̓usuy Tanira Tung Nag̓auyunan Yang Dios (1:3-4)
3 Yang tanan ang kaministiran ta ang para mapag̓usuyita ra tung nag̓auyunan yang Dios,
luw̓us dang ipinamakdul na tung yatën ëkël tung kagaëman na.
Nagkamaninganita ra ta maning tia ay natëtëngëd tung kaampiran tang naa tung anya ang yay nagbëtëng tung mga isip tang mag̓ing mga tauan nang sadili ang para tung uri,
malg̓uran ta ra yang sadiling kasusulawën na may yang pagkamatinlu na.
4 Bilang pinakdulanita ra anya yang pinangakuan nang durug kamaal ig durug katimbang yang kantidad na ug̓ud asan da nga puklutay ta yang pagpakëmkëm ta tung sistimang pangkaliw̓utan ang asan da ka rin nga diadu yang pagkatau ta ëkël tung pagparapsawën ta tung mga kalëlyag̓an tang dati.
Asanita ra ka ngaëyangay ta ipagbuat ta yang mag̓atu tung ug̓ali yang Ama tang Dios.
Kaministiran Nirang Magpaawat Ang Para Mamagkatinir Da Ta Pagkatau Nirang Matandës (1:5-11)
5 Kapurisu kung panëëm-nëëman ta yang binuat yang Dios ang atia para tung yatën,
magkabag̓ay rang pisan ang ya ra ka man tia ay ipagpadërëp tang magpaawat ëngëd ang para siguruën ta ang bëlag̓an pa ka ilëm ang ita magpadayun tung pagtaralig̓ën ta tung ni Ginuung Jesus,
kung indi,
prusigiran ta ka ang yang mga ug̓ali ta mag̓ing matitinlu.
Pati mga kinaisipan ta pawayangën ta ka ang para mamarësmësan ta kung unu pay talagang matinlu may yang bëlag.
6 Kaministiran kang maskëitang magsuspindi tung mga kalëlyag̓an tang sadili.
Yang sikarën ta ka ang magtëntën da yang mga isip tang mag̓agwanta tung mga kaliwag̓an ig pirmi kang bilug tung kumpurming nag̓auyunan yang Dios.
7 Sikarën ta ka ang itang mga tumatalig maggërëgmaanita ang katulad ka tung magpurutul ang sërëkëd tung tian.
Sikarën ta ka ang pati yang tanan ang mga masigkatau ta gëgmaan ta ka ta ustu.
8 Kipurki kung ita may mga ug̓ali tang mga maning tia ig kung ya rag dërëgtë agdërëgtë,
indiita ra magluang inutil ang andang pisan ay luluaan nang matinlu yang pagkarapulitan tang naa ni Jesu-Cristo.
9 Alimbawa,
kung tinu pay anda asan tung anya yang mga ug̓aling maning tia,
talagang anday naërëm na ang yay durug kaimpurtanting maita tung sasang matuud ang tumatalig.
Ay ya pa ag̓ari,
nalipatan na ra kung unu pa ëngëd ay kapulutan na ang tanya pinunusan da ni Ginuung Jesus tung mga kasalanan naa.
10 Purisu,
mga putulu,
imbis mag̓usuyita tung taung maning tia,
magpadërëpitang magpaita ta pruiba tung mga sadili ta mismu pati tung duma ang ita talagang matuud ang pinilik yang Dios kag bintëng nang mag̓ing mga tauanita ra anyang sadili.
Kipurki kung padërëpan ta yang mga ug̓aling atiang nagkarasambitub,
indiita ëngëd malambëg ang mabalik pa tung dating pag̓urubraën ta.
11 Yadwa pa,
kung padërëpan ta yang mga pasais ang atia,
kung palg̓urunita ra nganing yang Dios tung paggaraëmën ni Ginuu tang Jesu-Cristong anday katapus-tapusan na ang tanya ka man ay Mananapnay ta,
bëlag̓an basta-w̓asta ilëm yang pagpalg̓ud na tung yatën,
kung indi,
durung pisan agkasadya.
Yang Katuyuan Nang Nagsulat Tung Nira (1:12-15)
12 Purisu gustuu kang lag̓i ang pirmiamung padëmdëmënu natëtëngëd tung mga bag̓ay ang atiac,
maskin nag̓aintindian mi ra,
maskin asintadu ra ka yang mga isip mi tung ipinagtulduk tung numyu atiing primiru ang talagang ya ra ka man yang kamatuuran ang liit tung Dios.
13-14 Tung pag̓intindiu,
mintras buiaw pa,
may ubligasyunu pang magpadëmdëm tung numyu natëtëngëd tung mga bag̓ay ang atia ang para asan da nga paktëlayu yang mga isip ming mag̓usuy.
Ay kipurki nag̓askëanu ang indi ra ilëm mabuay yang tiniru taa tung kaliw̓utan ang naa ang katulad ka tung ipinasanag dang lag̓i tung yëën ni Ginuu tang Jesu-Cristod.
15 Purisu mintras layunaw pa,
indiamu tëgkaanung paiwan-iwanan ta mupia ang para may sasang magamit ming bëlag̓an maliwag ang madëmdëman mi yang mga bag̓ay ang atia tung maskin unu pang urasay,
pagkatapus ang andanaw ra taa.
Nag̓ipasanag Na Tung Nira Kung Unu Pay Nag̓apatiëlan Nang Pagpaprusigir Tung Nira (1:16-21)
16 Kipurki tëlëngan mi.
Atiing pagpaintindi yamën ang mga apustul tung numyu natëtëngëd tung paglëkat ni Ginuu tang Jesu-Cristo taa tung kaliw̓utan ang naa ang ya ray uras ang ipagpabistu na rang pisan yang puirsa nang maggaraëmën,
bëlag̓an ang duun da ipatiëlay yamën tung mga isturia-isturiang atiang inimu-imu ka ilëm ta mga taung ansianung mag̓imu-imu.
Kung indi,
duun da ipatiëlay yamën tung sinakëp ang pisan ta mga mata yamën mismu ang ya ra yang kasusulawën nang nagpailala ang tanya may kagaëman nang maktël.
17 Ay kipurki atiing pagpadëngëg ta mupia ni Ama nang Dios tung anya,
may busis ang duun manliit tung anyang yay Makagag̓aëm tung tanan ig inding pisan mapasiring-siringan yang kadëngëg̓an na ang maning taa yang pagpasapët na tung anya:
“Uay,
atia ra yang pag̓aningënung anaw ang ya ëngëd ay nag̓agëgmaanunge nag̓auyunan ta mupia,”
ag̓aaning.
18 Dispuis yang busis ang atiing liit tung langit,
pati yami mismuy nagngël atiing nagkasira-siraanami ni Jesus duun tung bukid ang atiing nag̓ing sagradu sigun tung nainabu tung uras ang atiif.
19 Kag yadwa pa,
duun da ka nga siguruay ëngëd yamën ang tung uri siguradung magkamatuud da ka man yang nagkaraula yang mga manigpalatay sigun tung paggaraëmën yang pag̓aningën nirang Cristo.
Dakulu kang taw̓ang na tung numyu kung yay pabilug̓an ta mga isip ming intindiën yang nagkaraula nirang atii.
Kipurki ya ray matinlung pitik ang magamit mi ug̓ud asan da nga dëëpay mi kung yang nag̓itulduk ta duma tung numyu matuud u kung bukli.
Yay maning pa tung sasang kaas ang pagdëkal tung makiklëp ang naa ang asta kaw̓utun da ilëm yang uras ang ipaglëkat ni Ginuu tang Jesu-Cristo ang yay maning pa tung pagtëla yang Kalamrag̓anën ang kung maita ra nganing yang pamagpulaw,
nag̓aampayan da ta kasadyaan nirang duru ay nag̓askëan da nira ang indi ra ilëm buay,
mandiklat da yang sag̓iid.
20 Tung pag̓irintindiën mi tung nagkaraula nirang atii,
landaw ra ëngëd tung tanan ang padëmdëman mi ang tung tanan ang nagkaraula nira ang pagkatapus isinulat da ka nira,
anda ëngëd ang pisan ay nanliit tung sadiling pag̓irintindiën nirang mga manig̓ula,
may san tag̓a.
21 Kipurki andang pisan ay inula nira natëtëngëd tung kalëlyag̓an ka ilëm nirang sadili,
kung indi,
pinanggaëman da yang Espiritu Santong pinampabitala yang bitala mismu yang Diosg.