Nag̓apaamanan Na Ang May Mamansiluang Mga Manigtulduk Ang Bukliën (2:1-3)
2
Piru atiing tukaw,
may mga tau asan tung mga Israel ang namag̓ambu ang tanira unu tinalig̓an da ka yang Dios ang magpalatay yang kumpurming ipaskë na tung nira buat.
Maning si ka tia yang mainabu asan tung numyu.
May mga tau kang mag̓ambu ka ang tanira unu mga manigtulduk ka yang bitala yang Dios buat.
May ipasag̓usut nirang mga nag̓itulduk ang kabuklian ang yay ikarangga yang pag̓irintindiën ming ustu tung Dios.
Maskin nganing yang nanggawad tung nira atiing pagpakugmatay na ang para tanya ra rin ay tingaraën nirang may kalalangan tung nira,
ya pay indi nira ag̓ilalaëna.
Purisu inali ra ilëm ang mataktakan ta ikadiadu nira.
2 Ang pagkatapus puiding dakëlë ra asan tung numyung mamanangëd dang mamag̓usuy tung mga pag̓urubraën nirang durug kalalaway ang andang pisan ay ëyak-ëyak nira.
Purisu kung maita ra nganing yang bëlag̓an mga tumatalig,
asan da nga sawayay nira yang kamatuuran ang nag̓ausuy tang mga tumatalig.
3 Dispuis kumus mainamlukun tung kuarta yang mga manigtulduk ang atia,
tag̓amanamu ra nirang lukuën tung nag̓itulduk nirang inimu-imu ka ilëm nira ang basi pa ra ilëm mapag̓inguartaanamu ilëm nira.
Ang pagkatapus bëlag̓an kang lag̓ing intrimis ilëm yang paaman natëtëngëd tung kalainan ang ya ray maagmaan nirang asta tung sampa.
Yang Dios Matakung Magpadangat Ta Sintinsia Tung Kumpurming Pagbatuk Tung Anya Ig Mataku Kang Magpalibri Tung Kumpurming Pag̓usuy Tung Kalëlyag̓an Na (2:4-10a)
4 Talagang matuud tia ay kipurki maskin nganing yang mga angil ang namagpakasalak atiing tukawb,
bëlag ya patawaray yang Dios,
kung indi,
ya ikulungay na duun tung sasang lugar ang nag̓agug̓uuyan tung “Tartarus”c ang durug kapinitinsia ig duru kang pisan agkakiklëp ug̓ud duun da iëlatay na tung uras ang ipagsintinsia nang ultimu tung nira.
5 Pati yang mga tau atiing tukaw pa ang anda ëngëd tung kuinta nira yang Dios,
indi na ra ka pinatawad,
kung indi,
pinadangatan na ta sintinsiang durug lëbat ang yang kaliw̓utan ang atii pinalëmpan na.
Suluminting ipinalibri na walu ilëm nga tauan bilang pamilya ni Noe ang yay nag̓usuy tung magkatama tung pagtërëlëngën yang Dios ang nunut da ka ta pagparakaw̓utun na yang bitala na tung mga masigkatau nad.
6 Pati yang mga taung namagtinir duun tung siudad yang Sodoma durua yang Gomora,
pinagsintinsiaan na kang pinabungsaran ta apuy ang ya ray nagkuw̓ul tung nirang tanan.
Yang mga taung atii ya ray binuat nang sasang mulidu kung unu pay pakaw̓utun yang mga tau ang tanya,
anda tung pag̓intindi nirae.
7 Dispuis,
baklu ra pabungsaray na ta apuy,
ipinalibri na ra na Lotf ang yay sasang taung matadlëng yang mga ubra-ubra na.
Pinagkurian nganing ta mupia ta pag̓isip nang linuw̓ayan natëtëngëd tung mga pag̓urubraën yang mga masigkabanwa nang durung pisan agkalalaway ang andang pisan ay ëyak-ëyak nira ang yang mga katuw̓ulan yang Dios ya ra ilëm aglikëd-likëray nira.
8 Bilang yang taung atiang matadlëng ta ug̓ali,
atiing pagtinir na duun tung nira,
kaldaw-kaldaw,
agsisiitan ta mupia yang isip nang nag̓aita kag nag̓agngël yang mga ubra-ubra nirang pulus ilëm lampas tung mga katuw̓ulan yang Dios.
9 Intunsis asan da ngaintindiay ta ang yang Dios talagang nag̓askëng maglibri tung mga taung kumpurming bilug yang mga isip nira tung kalëlyag̓an na,
maskin unu pag liwag yang mga pagsubuk ang magkakaw̓ut tung anya.
Ig yang kumpurming may mga buat-buat nang mga malalain,
nag̓askë kang magsilut tung nira,
mintras nag̓iëlat na tung uras ang ipagsintinsia nang pangultimu.
10 Yang nag̓aëlatan na ëngëd ta sintinsia,
ya ra taang mga manigtulduk ta kabuklian ang pamagpapsaw tung kumpurming nag̓iblën nirang malalaway ang asan da ka nga mansaay nira yang mga sadili nira ig indi ka ëngëd magpagaëm tung kumpurming may mga kagaëman,
landaw ra tung Dios.
Natëtëngëd Tung Mga Ug̓ali Yang Mga Manigtulduk Ta Kabuklian (2:10b-16)
Natëtëngëd tanira durug kapinalangaasën ig mapinagpanadili,
anday ëlëd nirang magduminar ang magsaway tung kumpurming tinu pay may kagaëman maskin duun tung langit,
maskin taa man tung kaliw̓utan.
11 Piru yang mga angil ang yay mas maktël ta puirsa kay tung nira,
indi nganing pamagpangaas ang pamagbangdan tung nira duun tung katalungaan yang Dios.
12 Kung ay pa atiing indi nira nag̓aintindian,
duun da kag sawayay nirang anda unu ay kuinta na.
Yang kaalimbawaan nira maning pa tung mga ayëp ang talunung ang indi maskëng magtimbang-timbang tung mga isip nira.
Yang mga ayëp ang atia tung pagtërëlëngën ta kadaklan,
anday dumang katuyuan nirang nagkarabui,
kung indi,
pandëëpën da ilëm ang pangimatayën.
Magkapariu ka yang panampëtan yang mga manigtulduk ang atia ay yang mga pag̓urubraën nirang durug kalalaway,
ya ray manggatëd tung nira tung kalainan.
13 Kumpurming mga malalain ang pagkarabuat nira,
duun da patupuay yang Dios yang iblës na tung nira.
Yang masadya tung isip nira,
kumpurming unu ra ilëm yang nag̓iblën yang linawa nira,
ya ray papsawan nira,
sibayang kaldaw pa ang yag dawalay ta mga tau yang mga ubra-ubra nira.
Purisu kung magpakisadu ra nganing tung numyung mga tumatalig ang pagsaragpun,
sigi ra ilëm yang pagparapsawën nira tung mga kalëlyag̓an nira ang ya ra kay nag̓ikasadya nira ta duru.
Tëëd mi,
asanamu rag pakaëyakay nirang agranggaay tung pagtërëlëngën ta duma natëtëngëd tung mga ubra-ubra nirang atia!
14 Indi ilëm mangatëlëng tung mga baw̓ay ang indi mangaisip pa ta malalaway.
Maskin muya-muya ra ilëm ang tanira mamagpapsaw,
anda ëngëd ay katëgka-tëgkaan yang iw̓ël nirang magpakasalak ta maning tia.
Nag̓atag̓aman nganing nira ta sunlug yang mga taung bëlag̓an pang asintadu yang pagtaralig̓ën nira tung ni Ginuung Jesus.
Purisu anday dumang panampëtan yang mga kanunuksung atia,
kung indi,
sintinsiaan da ka ëngëd yang Dios tung kalainan ang anda ëngëd ang pisan ay katapus-tapusan na.
Ay ya pa ag̓ari,
nangaagyat da tung pagpagustu nira tung maskin unu ra ilëm ay nag̓alëlyag̓an nira ang indi ra kayanan nira ta pagsuspindi yang pagpapsaw nira.
15 Kumus binutwanan da nira yang nag̓aintindian da rin nirang magkatama tung pagtërëlëngën yang Dios,
nangapatalang dang namagpaklëd tung mga ubra-ubrang durung pisan agkalalain.
Nangasug̓ut da tung ug̓ali ni Balaam ang ana ni Bosor atiing tukaw pa.
Ay tanya durug kaamluk tung kuartang ipakdul tung anya basta buatën na yang sasang indi ëngëd magkatama tung kalëlyag̓an yang Dios.
16 Piru pinaisip da yang asnu ang nag̓asaayan na,
ang apa kang lag̓i ang unaw̓is ya ray nabnga tung anya ang midyu ra busis ta tau ang nagsambëng tung anya natëtëngëd tung kakabusan ang atiing nag̓atima nang buatën.
Nag̓ipasanag Na Kung Ya Pa Ag̓ari Yang Palaksu Yang Pagdarayaën Yang Mga Manigtulduk ang Bukliën (2:17-22)
17 Yang mga manigtulduk ang naang nag̓ianingu,
anday maëklan ming matinlung kunsiu tung nira,
kung indi,
durug ka daya.
Yang kaalimbawaan nira,
maning pa tung sasang buw̓un ang naitian da ang ya ra rin ay panalig̓an ta mga tau ang maayën unung panabwan nira ta wai.
Bëlag̓an kang asintadu tung kamatuuran yang mga isip nira ang katulad ka tung mga ambun ang kung sampiën da nganing ta palët ang maktël,
magpurawas da ka ilëm.
Kapurisu may sasang lugar ang durung pisan agkakiklëp ang nag̓itig̓ana yang Dios tung nirah.
18 Kung pabitalaën mi tanira,
puirting magpabug̓al,
ig durug katatalig yang mga nag̓ipasanag nira ang pagkatapus anday kuinta na.
Ya ray nag̓agamit nirang pamagtag̓am ta sunlug tung mga taung baklu pa ka ilëm nag̓apuklut tung mga pag̓urubraën ang nag̓ausuy yang mga kaarumanan nirang pamagpatalang pa tung kalëlyag̓an yang Dios.
Yang ipag̓aklës ëngëd nirang ipagdëëp tung isip yang mga taung atia,
paiw̓ëlën si nira tung dating nag̓apapsawan da rin nirang mga malalaway atiing baklu nanangëd tung kamatuuran.
19 Nag̓apangakuan nganing nira yang mga taung atia ang liw̓ianu ra unu tanirang magbuat ta maskin unu pay nag̓alëlyag̓an nirang buatën ang pagkatapus tanira mismung pagpangaku,
pagpakirëpën da nganing tung mga kalëlyag̓an nirang sayud ang ya ray mangumiran tung nira tung ikadiadu yang mga pagkatau nirai.
Talagang kirëpën tanira ay kipurki kung tinu pay dërëëg̓ën ta sasang pag̓urubraën nang malain,
yang ilyag nang ianing,
ya ray pangirëpën tung anyaj.
20 Kung nainu pay nangapuklut da tung pagpakëmkëm nira tung sistima yang kaliw̓utan ang naang makamamansa ëkël tung pagkinapulitay nira ni Ginuu tang Jesu-Cristong yay Mananapnay ta ang pagkatapus magpagamën si yang isip nira tung sistimang atiang binutwanan da rin nira ang ya si kay papaggaëmën nira,
mas maliwag yang mabtangan nirang atiang pag̓uri kay tung primiru atiing indi pa nganing nag̓apuklut.
21 Kipurki maayën pa ang indi ra ilëm natultulan nira yang tamang pag̓urusuyun tung kalëlyag̓an yang Dios.
Luminus ilëm ang natultulan da nira ang pagkatapus ya si panalyuray nira yang nag̓ipanuw̓ul yang Dios tung mga tauan na ang ya ra ka man ay ipinag̓intriga tung nira yang mga apustul ang para usuyun da nira.
22 Kung ya si ay panalyuray nira,
asan da tung nira nga matuuray yang sasang bitala ta mga mamaëpët ang mag̓aning,
“Ug̓ali ra kang lag̓i ta kiru ang pag nasuka ra,
balikan na sing panganën yang isinuka nak.”
May sam bilug pang maning ka tia yang rumbu na ang mag̓aning,
“Ug̓ali ra kang lag̓i ta baw̓uy ang maskin dinig̓u ra,
magbalik si ka ëngëd agyapun tung lugmuk ang para duun si magpabalakad-balakad.”