Nag̓aulit Na Kung Unu Pay Katuyuan Nang Nagsulat (3:1-2)
3
Mga putulung nag̓amaalu,
ya ra tia yang yadwang sulat ang ipinaëkëlu tung numyu.
Parariung ipinaëkëlu tung numyu ug̓ud asan da nga tag̓amayu ta barit yang mga isip ming indi pa nag̓amansaan ta maling nag̓itulduk.
Bilang sasang pagpadëmdëmu ilëm tung numyu natëtëngëd tung mga bag̓ay ang nag̓aintindian mi ra kang lag̓i.
2 Ay gustuung padëmdëman mi yang nagkaraula yang mga manigpalatay ang pinamilik yang Dios atiing tukaw paa,
pati yang itinuw̓ul tung yatën ni Ginuu tab bilang Mananapnay ang ya ra kay ipinagpadapat tung numyu yang mga apustul ang ya ra kang lag̓i ay tinalig̓an ming matuud ang pinanuw̓ul ni Ginuu ta.
Nag̓aulit Na Yang Katadlëngan Yang Duma Ang Ti Ginuung Jesus Unu Indi Ra Maglëkat (3:3-4)
3 Yang impurtanting maintindian mi ang baklu ra maglëkat ti Ginuung Jesus,
may mga taung mamansiluang mamagtag̓am ta saway tung numyu natëtëngëd tung pagpakbat mi tung anyang maglëkat.
Yang ug̓ali nira,
indi ëngëd tëmëgka ang indi ra nira mapapsawan yang mga kalëlyag̓an nirang anday sayudc.
4 Aningënamu ra nira ta maning taa.
“Ta,
indi ti Jesus ang naa may pangaku nang maglëkat?
Piru ay pa w̓a?
Kipurki tëlëngan mi ra ilëm yang mga mamaëpët ang namagmangulu tung numyung namagpakbat da ka rin tung anya.
Piru nagkarapatay ra ilëm ang indi pa ka naglëkat.
Ay ya pa ag̓ari,
disti pa atiing primiru ang asta ra ilëm simanyan,
yang palaksu yang tanan ang bag̓ay ya ka ilëm.
Anda ka ëngëd ay kaumanan yang kaliw̓utan,”
mag̓aning.
Yang Nag̓ipamarik Na Tung Katadlëngan Yang Mga Taung Atiang Pag̓aning Ang Indi Ra Unu Madiadu Yang Kaliw̓utan (3:5-7)
5 Nag̓askëan da kang lag̓i yang mga taung atia ang bëlag matuud yang nag̓ianing nirang anday kaumanan yang kaliw̓utan.
Kipurki kung ya ray papaktëlan nirang itulduk,
ëngëd da ka ëngëd nirang limung-limungun tung mga isip nira kung unu pay binuat yang Dios atiing tukaw pa.
Ay atiing primirung pisan,
ëkël tung sasang kalalangan na,
minyang da yang kaliw̓utan may yang kalangitan.
Pagkatapus wai yang ginamit nang nag̓imu tung kaliw̓utan ig tung wai ka ipaltaway na yang katanëkan.
6 Ang pagkatapus tung kabuayan,
ëkël ka tung pagkalalangan na,
nabunaw ra yang dating kaliw̓utan ang atii ay pinalëmpanan na ra ta waid.
7 Dispuis,
ëkël ka tung pagkalalangan na,
yang kalangitan may yang katanëkan ang naang yag dawalay ta simanyan,
ya ray itinig̓ana nang papasaran ta sasang apuy.
Bilang nag̓iëlat na tung uras ang ipagsintinsia na tung kalainan tung mga taung anda ëngëd tung kuinta nira tanya pati kalëlyag̓an na.
Yang Nag̓ipamarik Na Tung Katadlëngan Nira Ang Ti Ginuung Jesus Unu Indi Ra Maglëkat Ang Para Magsintinsia (3:8-9)
8 Piru mga putulung nag̓amaalu ta duru,
may sasang bag̓ay ang indi mi ëngëd paglipatan.
Tung pagpamalad yang Dios,
yang sang kaldaw katimbang nang san liw̓ung takun ig yang san liw̓ung takun katimbang na kang sang kaldaw ka ilëme.
9 Asan da ngaintindiay ta ang yang Dios bëlag̓an mapinaw̓aya-w̓ayaën ang magkërëng tung pinangakuan na ang katulad ka tung nag̓alaum yang duma.
Kung indi,
durug kapinarurusun tung numyuf.
Ay anda ëngëd ay gustu na ang may mablag tung anyang masintinsiaan tung kalainan ang atiang nasambit,
may sam bilug.
Kung indi,
yang gustu na ang basi pa ra ilëm ang yang tanan ang mga tau ëyangan da ka ta ipagsug̓at nira tung mga kasalanan nira.
Nag̓asambit Na Yang Tamang Panangërën Ang Talagang Maglëkat Da Ka Ëngëd Ti Ginuung Jesus Ig Madiadu Ra Ka Ëngëd Yang Kaliw̓utan (3:10)
10 Piru maskin mapinarurusun tanya,
kung kaw̓utun da nganing yang uras ang ipinagtipu na,
maglëkat da ka ëngëd ti Ginuung Jesus ang para magsintinsia.
Yang pagkaw̓ut na midyu tung paklag ilëm ang katulad ka tung pagkaw̓ut yang sasang takawan ang inding pisan nabantayanh.
Ay tung uras ang atia yang kalangitan maparëng da ang ya kag dënglay yang dinag̓unu nang durug këtël.
Asta yang tanan ang mga parti-parting pagdërëpët-dëpëtan tung maskin unu pang bag̓ayay g magkatunaw ra ka.
Bilang yang katanëkan mismu may yang tanan ang mga bëtang na tunawën yang apuy ang atiang magpasar ang asta indi ra ëngëd maitang uman.
Dapat Ang Pulus Tung Limpiu Yang Tanan Ang Pag̓urubraën Nirang Mga Tumatalig (3:11-13)
11 Purisu kumus magkadiadu ra ka ilëm ka man yang tanan ang atia,
unu pang ug̓aliay ang dapat ipalandaw ming usuyun,
kung indi,
pulus tung limpiu yang tanan ang pag̓urubraën mi ang yang kumpurming nag̓auyunan yang Dios ya ëngëd ay pirming ipalusu ming buatën.
12 Maning tia yang prusigiran mi mintras paglalangkag̓ënamung pagpakbat tung ni Ginuung Jesus ang maglëkat tung uras ang ipinagtipu kang lag̓i yang Dios.
Ang yang uras ang atia ya ra ka man ay magakdan yang kalangitan ta kadiaduan nang sirukun.
Pati yang tanan ang mga parti-parting pagdërëpët-dëpëtan tung maskin unu pang bag̓ayay magkasiruk da kang magkatunaw.
13 Piru maskin mainabu ra ka man yang tanan ang atia,
may baklung kalangitan ig baklung kaliw̓utan ang nag̓aëlatan ta natëtëngëd ya ra kang lag̓i ay pinangakuan yang Diosi.
Duun tung kalangitan ang atia may tung kaliw̓utan ang atia,
yang tanan ang pag̓urubraën pulus tung magkatamang pisan tung pagtërëlëngën yang Diosj.
Nag̓apapagbilug Na Yang Pinakaisi Yang Gustu Nang Ianing Tung Intirung Kabilug̓an Yang Sulat, Mag̓impisa Tung 1:3 Ang Asta Tung 3:13 (3:14-18a)
14 Kapurisu mga putulung nag̓amaalu ta maayën,
kumus yang magkainabung atia yay nag̓aëlatan mi,
padërëpan ming pirmi yang nag̓askëan ming nag̓auyunan yang Dios ug̓ud kung insapuën na ra nganing tung numyu yang mga ubra-ubra mi,
matëlënganamu ra anyang limpiu ig pag̓uruyunanamung magpurutul tung matinlu ang andang pisan ay mabangdan na tung numyuk.
15 Yadwa pa,
anday dumang pagpabëtang mi tung pagpararurusun ni Ginuu tang indi pa nag̓alkat ang para magsintinsia,
kung indi,
nag̓apakdulan na yang mga tau ta rugal nira ang basi pa ra ilëm matultulan da ka nira yang kalibrian ang pinagtukud na.
Maning kang pisan tia yang nasambit tung isinulat ni Pablo tung numyu ang tanya sasa kang putul tang nag̓amaal ta ta duru.
Napagsulat da ta maning tia ay natëtëngëd pinawayang dang lag̓i yang Dios yang isip na ang para mamarësmësan na ta maayën yang mga bag̓ay ang atiang ipinasanag na tung numyu.
16 Maning ka man tia yang inaning na tung tanan ang nagkarasulat na ang kada masambit na yang natëtëngëd tung paglëkat ni Ginuu ta.
Kung tung bag̓ay,
ang kaisan may dumang nagkarasulat nang midyu maliwag-liwag ang madëëp agkali yang gustu nang ianing.
Ang pagkatapus yang mga taung kulang yang nag̓aintindian nira tung kamatuuran ig indi pa nag̓asiguru kung aypay tamang nag̓itulduk,
kung tag̓aman nirang ipasanag tung duma yang nag̓adapatan yang nagkarasulat na,
ya rag baliskaray nira.
Pati yang nag̓adapatan yang kadaklan ang mga kasulatan,
ya ka.
Ang pagkatapus asan da nga gakday nira yang mga sadili nira tung kalainan ang anday katapus-tapusan na.
17 Kapurisu ta yamung nag̓amaalu ta duru,
kumus nag̓apaamananamu rang lag̓i yëën,
magbantayamu ra ta mupia tung mga sadili mi ang para indiamu ëngëd magpaguyud yang mga isip mi tung kabuklian ang nag̓itulduk yang duma tung numyu pati yang mga pag̓urubraën nirang pamaglikëd tung mga katuw̓ulan yang Dios,
ang indi mi ka ëngëd pagamënan ta mga isip mil.
Ay muya kung maalang-alangan mi tia,
asanamu ra ngaëyangay ta ipagdiskumpiar mi tung nag̓apanangëd mi ang asintadu ka rin tung mga isip mi.
18 Ang para indiamu maguyuran nira,
kaministiran ang pirmiamu ra ilëm ang magpataw̓ang ëngëd tung ni Ginuu tang Jesu-Cristong pagtapnay tung yatën ug̓ud asan da mas pang maispirinsiaan ming maispirinsiaan yang kanëëman nang pagpaktël tung numyung magprusigir tung tanan ang nag̓auyunan na.
Kaministiran kang mas pang papëg̓ëtën mi yang pagpakigkapulit mi tung anyam.
Yang Pagtapusan Yang Sulat (3:18b)
Magkabag̓ay ang pisan ang tanyay padëngëg̓an simanyan ang asta ra ilëm tung sampang anda ëngëd ang pisan ay katapus-tapusan na.
Taa ra ilëm tapusayu yang gustuung ianing tung numyu,
Pëdro