Yang may sulat taa ti Juan ang sasang apustul ni Ginuung Jesu-Cristo. Ya kay nagsulat yang sasang librung nag̓aguuyan tung Yang Isinulat Ni Juan Natëtëngëd Tung Ni Jesu-Cristo pati sam bilug ang nag̓aguuyan tung Ipinag̓ubligar Ni Jesu-Cristo Tung Ni Juan. Yang mga tumatalig ang pinampaëklan na yang sulat ang naa, puiding ya ra yang pitu nga pundaanan duun tung sinakëpan yang Asia, bilang duun tung Efeso, Esmirna, Pergamo, Tiatira, Sardis, Filadelfia, may Laodicea ang ya ra ka man yang nagkarasambit tung Ipinag̓ubligar 1:20–3:22.

Yang ipinagsulat na ay natëtëngëd may mga taung namampablag da tung mga kaarumanan nirang mga tumatalig natëtëngëd nag̓aparti ra ta pag̓irintindiën tung kadaklan (2:19). Pamagturuldukun yang bëlag̓an tama sigun tung pagkabëtang ni Ginuung Jesu-Cristo. Ay yang nag̓apapaktëlan nira ang kumus yang mga tinanguni ta unu mansadu ta malain, purisu yang Dios tanya, indi unu puiding mag̓ingtaung bilug kipurki tanya sagradu. Ti Jesu-Cristo unu nagpasuad-suad da ilëm tung tau. Indi unu nag̓ingtaung bilug ang katulad ka tung nag̓itulduk na Juan. Kag yadwa pa, indi ka mamag̓impurmi ang ti Jesus paglinukutay tanira yang Dios tung pagkadios. Tung pag̓intindi nira, tau ka ilëm (2:22-23; 3:23; 4:15; 5:10). Bëlag̓an ilëm mali yang nag̓itulduk nira, kung indi, pati yang mga ubra-ubra nira, indi ka pagkatama. Kipurki tung pag̓intindi nira, anday bali unu ang yang mga tumatalig magpadayun tung pagpakasalak nira ig anday bali unung indi ra maggërëgmaan tanirang magpurutul.

Simanyan, kumus nagkamaning da ta maning tia, nag̓askëan ni Juan ang may durua rang bag̓ay ang kaministiran nirang masiguru ang para mas magbakëd yang paniël-tiël nira tung kamatuuran. (1) Kaministiran ang masiguru nira ang yang balitang nag̓apanangëd nira natëtëngëd tung pagkabëtang ni Jesu-Cristo, talagang matuud ang liit tung Dios. (2) Kaministiran kang masiguru nira ang tanira mismu inana rang matuud yang Dios bilang pinaëyangan na ra ta ipagpangabui nirang baklu ang atu tung pagpangabui na mismu ang anday pagtapusan na.

Purisu kung papagbilug̓un yang gustu ni Juan ang ianing tung sulat ang naa, ya ra taa. Sasa may sasa tung nira, masig̓insapu tung anya-anyang sadili ang para masiguru na ra kung tanya ana yang Dios ang matuud u kung bëlag. Purisu pinakdulan na tanira ta mga pitik ang impurtanting pagpasunairan nira tung panginsapu nira tung mga sadili nira. (1) Kaministiran isipën nira kung unu pay nag̓apanangëd nira sigun tung pagkabëtang ni Jesus. Ay kung tinu pay indi panangëd ang tanya Dios kang lag̓i atiing indi pa nag̓apangintau taa tung kaliw̓utan ang naa, mali yang pag̓irintindiën na (1:1-2; 2:22-23; 3:23; 5:20). Ig kung tinu pay indi panangëd ang tanya nag̓ingtaung bilug ang pariu ka tung pagkatau tang mga tau, ya ka, mali ka (4:2-3). (2) Kaministiran da kang isipën nira yang pagpangabui nirang pangaldaw-kaldaw, kung pagbuat yang magkatama tung pagtërëlëngën yang Dios bilang pagtuman yang nag̓ipanuw̓ul na tung nira u kung anda (3:6-7, 24). (3) Kaministiran kang isipën nira kung paggërëgmaan tanirang magpurutul ta ustu u kung anda (2:9-11; 3:11, 15, 23; 4:7, 20-21). Kung ya ray mga pitik ang gamitën nirang manginsapu tung mga sadili nira, asan da nga siguruay nira kung tanira inana ra yang Dios ang matuud u kung indi (3:9; 4:7; 5:1, 4, 18). Indi mataluk kung pag̓atiniran da tanira yang Espiritu Santo u kung anda (3:24; 4:13). Kung yang sasang tau indi pa nag̓ipanganang uman yang Espiritu Santo, indi makayang magbuat yang magkatama, indi ka makayang magëgma ta ustu tung mga putul na, ig indi ka makayang magtuman yang nag̓ipanuw̓ul yang Dios. Purisu dakulung kaministiran ang sasa may sasa, masig̓insapu tung anya-anyang sadili ang yang mga pitik ang atia ya ray gamitën na ang para asan da ëngëd nga siguruay na kung tanya matuud ang ana yang Dios u kung bëlag. Kipurki yang taung pag̓aning ang tanya pagrinampilay ra tanira yang Dios ig paggëgma ka tung Dios ang pagkatapus yang nag̓ipanuw̓ul yang Dios tung anya, indi na kag tumanën, pati yang mga putul nang mga tumatalig indi na kag gëgmaan, kung indi, ya ra ag̓adëmtay na, talagang bukliën yang taung atia. Piru kung may taung pagtuman da yang nag̓ipanuw̓ul yang Dios ig paggërëgmaën ka ta ustu tung mga putul nang mga tumatalig ig tama ka yang pagparanangërën na natëtëngëd tung pagkabëtang ni Jesu-Cristo, asan da nga siguruay na ang tanya inana rang matuud yang Dios ig pinatiniran na ra ka tung Espiritu Santo.