Yang Primirung Isinulat Ni JUAN
Pagpasanag ti Juan Natëtëngëd Tung Katëngdanan Na Ig Sigun Tung Nag̓ipagsulat Na Tung Nira (1:1-4)
1
Napagsulataw ra tung numyu natëtëngëd tung sam bilug ang naa ang yay maning pa tung bitalang ipinag̓aning yang Dios tung yatën ang mga taua.
Tanya yang pagpaëyang ta pagpangabuing baklu tung nira.
Atiing anda pay nag̓aimu,
asan da kang lag̓i.
Piru atiing pag̓ingtau nang bilug taa tung kaliw̓utan,
nagngël yamën ang nagbitala,
sinakëp ka ta mga mata yamën,
pinagpaniiran ka yamën yang mga pag̓urubraën na,
ig nagkaradëënan ka ta mga kalima yamën.
2 Yang klasi yang pagpangabui na bistung pisan tung yamën ang mga apustul na.
Purisu ya ray nag̓ipagpaingmatuud yamën tung numyu natëtëngëd tung anyang pagpaëyang tung mga tau ta pagpangabui nirang baklu ang anday pagtapusan na.
Disti pa atiing anda pay nag̓aimu,
pagrinampilay kang lag̓i tanira yang pag̓aningën nang Ama na ang pagkatapus,
ipinagpailala ra yang Dios tung yamën.
3 Kapurisu pagpaintindiami ra nganing tung numyu natëtëngëd tung taung naang nag̓asambitung naita yamën kag nagngël yamën ug̓ud magpakiglakëtamu ra ka tung pagsarasaan yamën yang Ama tang Dios durua yang pag̓aningën nang Ana Na ang ya ra ti Jesu-Cristo.
4 Yang ipinagsulatu tung numyu ay ug̓ud asan da ka magbug̓us yang kasadyaan tang tanan ang magpurutul.
Nag̓apaprusigir Na Ang Yag Paatuay Nira Yang Pagkamasadlaw Yang Dios Ug̓ud Pirmi Tung Matinlu Yang Pagnurunutan Nira (1:5–2:2)
5 Ya ra taa yang nagngël yamën tung ni Jesu-Cristo ang pagkatapus numanyan ya ra kay nag̓ipagpaintindi yamën tung numyu.
Yang pagkadios yang Dios limpiung pisan.
Yang kaalimbawaan na maning pa tung sasang durung pisan agkasadlaw ang anda ëngëd ang pisan ay lakët nang makiklëp,
maskin gësyë ilëm.
6 Ig disir,
kung mag̓aningita ang matinlu yang pagpakignunut ta tung Dios ang pagkatapus pag̓usuyita tung makiklëp,
ita ra ka ilëm agpagbukli ig indiita ra ka pag̓usuy tung kamatuuran.
7 Piru kung pag̓usuyita ra tung masadlaw ang atu tung pagkamasadlaw na,
durug tinlu yang pagpakignunut ta tung anya pati yang pagnurunutan tang magpurutul,
ya ka.
Ig kung disgrasia mapagbuatita ta kasalanan,
maimung mapunasanita ka anya ëkël tung pagpaturuk ni Jesus yang dug̓u na ang tanya ka man yang pag̓aningën nang Ana Na.
8 Piru kung mag̓aningita ang anday kasalanan ang binuat ta,
yang sadili ta mismu ya ray nag̓aluku ta ig indiita pa nag̓adultan yang kamatuuran ang ipinagpabunayag yang Dios.
9 Piru kung mangaminita tung Dios ang nagbuatita ra ka man ta kasalanan,
atia,
patawarënita ra anya ang nunut da ka ta pagpunas na tung mansa yang maskin unu pang malainay ang binuatan ta.
Ya ray matalig̓an ta tung anya natëtëngëd ya ra kang lag̓i ay pinangakuan nang indi na maisulan.
Yang pagpatawad na tung yatën bëlag̓an ang mag̓aning ang yang binuatan ta ya ra ilëm agsapay-sapayay na,
kung indi,
may mabakëd ang nag̓apatiëlan nang magpatawad ang ya ra ka man yang pagpakugmatay ni Jesusb.
10 Kung mag̓aningita ang indiita rang pisan nagbuat ta kasalanan,
asan da ngaipaimukliay ta yang Dios ig asan da ka ngaipailalaay ta ang yang bitala na andang pisan ay apiktar na tung yatën.
Ay kipurki may inaning na ra kang lag̓i ang yang tanan ang mga tau luw̓us dang nagbuat ta kasalanan.