2
Yamung agkaw̓ig̓ënung mga anaung sadilia,
yang ipinagsulatu ta maning tia tung numyu ay ug̓ud basi pa ra ilëm indiamu ëngëd magbuat ta kasalanan.
Ug̓aring disgrasia,
kung tinu pa tung yatën ay mapagbuat ta kasalanan,
may sasang pangërëngan tung yatën duun mismu tung katalungaan yang Ama tang Dios ang para asan da mapatawad tung kasalanan na.
Anday duma,
ya ra ti Jesu-Cristo ang yang tanan ang buat-buat na pulus matadlëng tung pagtërëlëngën yang Dios.
2 Tanya mismu yay napasapul tung sintinsia yang Dios ang dapat da rin dumangat tung yatën ug̓ud asan da ngaulikay yang kasisilag̓ën na tung yatën ang para mapatawarita ra anya tung mga kasalanan ta.
Bëlag̓an ilëm yang yatën ang mga kasalanan ang sarangan nang mapatawad,
kung indi,
pati yang mga kasalanan yang tanan ang mga tau tung bilug ang kaliw̓utan,
ya ka.
Kaministiran Ang Yang Mga Ug̓ali Nira Mag̓atu Tung Ug̓ali Ni Jesu-Cristo (2:3-6)
3 Tung maning taang palaksu masiguru ta ra ang ita talagang pagrinampilayita rang matuud yang Dios ëkël tung pagturumanën ta yang nag̓ipanuw̓ul na tung yatën.
4 Kung tinu pay pag̓aning ang pagrinampilay ra tanira yang Dios ang pagkatapus indi ka nag̓apagtuman yang nag̓ipanuw̓ul na tung anya,
bukliën da tanya ig indi pa nag̓adultan yang kamatuuran ang ipinagpabunayag yang Dios.
5-6 Piru kung tinu pay pagtuman yang nag̓ipanuw̓ul yang Dios tung anya,
asan da ta tau ang yang apiktar yang gëgma yang Dios tung anya nasalapay ra tung intinsiun na.
Maning taa masiguru ta ang pagpakigkapulitita ra tung anyang matuud.
Kung tinu pay pag̓aning ang tanya pagpakigkapulit da tung Dios,
dapat ang yang mga ug̓ali na atu tung mga ug̓ali ni Ginuung Jesus atiing taa pa rin tung kaliw̓utan ang naa.
Nag̓apaprusigir Nang Maggërëgmaan Tanirang Magpurutul Ta Ustu (2:7-11)
7 Mga putulung nag̓amaalu,
bëlag̓an baklu yang katuw̓ulan ang naang sambitënu tung numyu,
kung indi,
ya ra yang dating katuw̓ulan ang naintindian mi atiing primirung pag̓intriga mi yang mga sadili mi tung ni Jesu-Cristo.
Yang dating katuw̓ulan ang atia lug̓ud da kang lag̓i tung Matinlung Balitang ipinagngël yamën tung numyu.
8 Utru si,
puidi kang aningënung katuw̓ulan ang may pagkabaklu na gatëd atii kanay baklu ilëm naita ta mga tau tung ni Ginuung Jesus atiing pagtuman na.
Pati simanyan,
baklu ka ilëm nag̓aita yang mga kaarumanan mi tung numyu ëkël tung pagturumanën mi.
Ay ya pa ag̓ari,
binutwanan mi ra yang mga ubra-ubra ming malalain ang maning pa tung nalimwasanamu ra ta makiklëp ang pagkatapus nag̓intraamu ra pagburuatën yang matitinlu ang maning pa tung tinlaanamu ra ta masadlaw.
9 Purisu kung tinu pay pag̓aning ang tanya unu pag̓usuy tung masadlaw ang pagkatapus pagdëmët tung sasang putul na tung ni Ginuu ta,
yang taung atia,
indi pa ka ëngëd nag̓aliit tung makiklëp ang asta ra ilëm simanyan.
10 Piru kung tinu pay paggëgma tung putul na,
talagang yay pag̓usuy ra tung masadlaw ig indi ra ka magbuat ta sasang ikarangga yang pagtaralig̓ën yang putul nang atia b.
11 Kung tinu pay pagdëmët tung sasang putul na tung ni Ginuu ta,
yang taung atia tung makiklëp pa.
Maning pa tung pagdërëb da ilëm tung makiklëp.
Indi na ilëm nag̓askëan yang panalungaan nang malainc.
Ay kipurki yang makiklëp ang atiang pag̓atiniran na,
ya ray namuray tung isip na.
Pagpailala Ra Ti Juan Ang Dakulu Yang Kumpiansa Na Tung Nira Ang Tanira Mga Tumatalig Ang Matuud (2:12-14)
12 Napagsulataw ra tung numyung agkaw̓ig̓ënung mga anaung sadilid ay kipurki nag̓askëanu ra ang atiing primirung pagtalig mi tung ni Jesu-Cristo,
pinatawaramu ra yang Dios tung mga kasalanan mi ëkël tung pagpakugmatay ni Jesu-Cristo.
13 Napagsulataw ra tung numyung pagtëg̓asan da tung pagtaralig̓ën mi ang maning pa tung mga amaën ay kipurki nag̓askëanu ra ang pinaëyanganamu ra ta kaampiran mi tung ni Jesu-Cristo ang atiing anda pay naimu,
asan da kang lag̓i.
Napagsulataw ra tung numyung durug dërëp ang katulad ka tung mga sultirus ang pagsinupang da ay kipurki nag̓askëanu ra ang nadëëg̓an mi ra ti Satanas ang durug kalain yang intinsiun na tung numyu.
14 Napagsulataw ra tung numyung bug̓us yang pagtaralig̓ën mi tung ni Jesu-Cristo ang katulad ka tung mga mamula ay kipurki nag̓askëanu ra ang pinaëyanganamu ra ta kaampiran mi tung Ama tang Dios.
Napagsulataw ra tung numyung pagtëg̓asan da tung pagtaralig̓ën mi ang katulad ka tung mga amaën ay kipurki nag̓askëanu ra ang pinaëyanganamu ra ta kaampiran mi tung ni Jesu-Cristo ang atiing anda pay naimu,
asan da kang lag̓i.
Napagsulataw ra tung numyung durug dërëp ang katulad ka tung mga sultirus ang pagsinupang da ay kipurki nag̓askëanu ra ang durug bakëd yang paniël-tiël mi tung mga tuksu ig agsërëw̓ënamu ra ka yang bitala yang Dios ang asta nadëëg̓an mi ra ti Satanas ang durug kalain yang intinsiun na tung numyu.
Nag̓apaamanan Na Tanira Ang Indi Ëngëd Magpagamën Yang Mga Isip Nira Tung Sistimang Pangkaliw̓utan (2:15-17)
15 Indiamu ëngëd magpagamën yang mga isip mi tung sistimang pangkaliw̓utan ubin yang maskin unu pang mga palaksuay na.
Ay kung tinu pay magpagamën yang isip na asan,
indi ra ka ëngëd masarang ang magëgma tung Ama tang Diose.
16 Ay ya pa ag̓aring mapaggëgma tung Dios ang yang nag̓apagamënan na maning taa yang mga palaksu na.
Asan da ta pagsikad na yang sadiling kalëlyag̓an na ang indi ra tëmëgka ang indi na papsawan.
Asan da ka ta pagsikad tung kumpurming unu pay takës tung pagtëlëng na,
maskin kuntra tung Dios,
ya pa ka ëngëd ay dëmtan nang ëklan.
Asan da ka ta taung mapinagpabug̓al ang yang pagkabëtang nang abwat yay nag̓atalig̓an na.
Yang mga palaksu nang maning tia bëlag̓an liit tung Ama tang Dios,
kung indi,
liit ka ilëm taa tung sistimang pangkaliw̓utan ang naa.
17 Ayw̓a magpagamënita asan sindu magtataklib da ka ilëm pati yang kumpurming nag̓alëlyag̓an yang pamagpaguyud,
ya ka.
Piru kung tinu pay pagtuman yang kalëlyag̓an yang Dios,
yay magnatis tung anya ang asta tung sampa.
Nag̓apaamanan Na Natëtëngëd Tung Duma Ang Pamagpakigkuntra Tung Ni Ginuung Jesus (2:18-25)
18 Yamung magkaw̓ig̓ënung mga anaw,
kung isip-isipënu,
midyu tung alëngët da yang pagtapusan yang panimpung naa.
Nagngël mi ra ka ang tung uri may sasang taung maglua ang yay magpakigkuntra tung ni Ginuung Jesu-Cristog.
Ang pagkatapus numanyan ang mga panguras ang naa,
dakëlë rang mga palatkaw nang pamagluaf.
Purisu asan da nga pamalaray ta ang alëngët da yang pagtapusan yang panimpung naa.
19 Maskin dating mga kaarumanan ta yang mga taung atia,
piru bëlag̓an ang mag̓aning ang yay mga kaarumanan tang matuud.
Kipurki kung tanira mga kaarumanan tang matuud,
namagpadayun pa rin yang pagpakigputul nira tung yatën.
Piru kumus namagpablag da,
bistu ra ang bëlag̓an kang lag̓ing mga putul tang matuudh.
20 Piru ta yamu,
pinaëyanganamu ra ta ipag̓intindi mi tung kamatuuran ëkël tung Espiritu Santong ipinatinir tung numyu ni Jesu-Cristo ang ya ka man yang ultimung Mananapnay ang pinilik yang Dios.
Purisu yamung tanan nag̓aintindi ra kung unu pay matuud ang nag̓itulduk may yang bëlag.
21 Yang ipinagsulatu tung numyu,
bëlag̓an ang mag̓aning ang nag̓ipabtangamu ra yëën ang indiamu pa nag̓askë yang kamatuuran,
kung indi,
natëtëngëd ang nag̓askëanung nag̓aintindian mi ra ig nag̓askëan mi ra ka ang anday nag̓itulduk ang bukli ang mag̓ëyang tung kamatuuran.
22 Yang pinakabukliën ang mga tau ya ra yang kumpurming pag̓aning ang ti Jesus unu bëlag̓an yang pag̓aningën ang Cristo bilang yang Mananapnay ang pinangakuan yang Dios.
Ya ra ka man taang nag̓ianingung pagpakigkuntra tung ni Ginuung Jesus.
Yang pagpakigkuntra nira tung anya ya kay pagpakigkuntra nira tung ni Ama na ay indi ra ag̓ilalaën nira yang kamtangan yang pag̓anaan nirang mag̓ama ang sasay pagkadios nira.
23 Kumpurming tinu pay pag̓aning ang ti Jesus unu indi paglinukutay tanira yang Dios tung pagkadios,
anda ëngëd ay pagpakigsasa na tung Dios mismu ang yay Ama.
Piru kumpurming tinu pay pagpauyun ang ti Jesus sasay pagkadios nira yang Dios,
yay pagpakigsasa tung Dios mismu ang yay Ama.
24 Kapurisu ta numyu,
yang bitalang ipinagngël tung numyu atiing primirung pagtalig mi tung ni Ginuung Jesus,
kaministiran ang ya ëngëd ay pag̓inëtëg̓an ta isip mi ang para dayun-dayun yang pagpakigkapulit mi tung ni Jesus ang yay pag̓aningën ang Ana,
durua tanira yang pag̓aningën nang Ama na.
25 Dispuis ya taa yang pinangakuan yang Dios tung yatën ang kumpurming pagpadayun tung pagpakigkapulit tang atia tung anya.
Tugtanita anyang magpakigsapën tung anya ang asta tung sampa.
Kaministiran Ang Padayunan Nira Yang Nag̓itulduk Yang Espiritu Santo Tung Nira Atiing Primiru (2:26-27)
26 Yang mga bag̓ay ang atia isinulatu ra nganing tung numyu ug̓ud paamanënamu ra yëën natëtëngëd tung mga taung atiang pamagtag̓am tung numyu ta pagpatalang yang pag̓irintindiën mi tung kamatuuran.
27 Piru ta numyu,
yang Espiritu Santong ipinatinir ni Jesu-Cristo tung numyu,
yay pagpakëën da tung numyu.
Purisu anday ministir ang magpatuldukamu pa tung dumang mga manigtulduk,
kung indi,
yang Espiritu Santong yay pagturuldukanën tung numyu yang tanan ang kaministiran ming maintindian ig yang nag̓itulduk na tung numyu,
bëlag̓an bukli,
kung indi,
pulus matuud.
Purisu magpadayunamu tung kumpurming mag̓atu tung dating itinulduk na tung numyu.
Dapat Ang Ipadayun Nira Yang Pagburuatën Nira Yang Magkatama Ug̓ud Kung Maglëkat Da Nganing Ti Jesu-Cristo, Indi Ra Mangaëyak Tung Anya (2:28-29)
28 Yamung magkaw̓ig̓ënung mga anaw,
idayun mi yang pagpakigkapulit mi tung ni Jesu-Cristo ug̓ud kung maglëkat da nganing ang magpabistu,
indiita ra dapat ang mëyak tung anya,
kung indi,
maktël da ka ëngëd yang isip tang manalunga tung anya tung uras ang atia.
29 Kumus nag̓askëan mi ka ang yang Dios pirming pagbuat ta magkatama,
maskëan mi ra ka ang kung tinu pay pagpadayun tung pagburuatën na yang magkatama,
ya ray sasang pruiba ang tanya inana ra ka man yang Dios ang matuud.