Yang sulat ang naa yang yadwang isinulat ni Pedro ig yang mga tumatalig ang pinaëklan na pariu ka tung sinambit na tung primirung isinulat na ang wasak-wasak da (1 Pedro 1:1). Atiing pagpasulat na, naskëan na rang lag̓i ang indi ra ilëm mabuay, mapatay ra (1:13-14). Purisu baklu ra mapatay, gustu nang magbutwan tung nira yang sulat ang naa ug̓ud bëlag̓an maliwag ang madëmdëman nira kung unu pay ipinagtulduk na taa tung isinulat nang naa (1:15).

Duruay katuyuan nang nagpasulat. Primiru, gustu nang magpaktël tung mga isip nirang mamagpadërëp ang yang mga ug̓ali nira mas pang mag̓atu rang mag̓atu tung ug̓ali ni Jesu-Cristong panalig̓an nira ang para asan da nga papruibaay nira ang tanira pagpagaëm dang matuud tung anya (1:3-21).

Yang sam bilug pang katuyuan na, kaministiran ang magpaaman tung nira natëtëngëd tung mga manigtulduk ang bukliën. Ay yang mga ug̓ali nira durug kalalaway ig pag̓atag̓aman da nirang tuksuën yang mga tumatalig ang para mag̓usuy ra tung nira. Ang pagkatapus tung uri, siguradung sintinsiaan yang Dios tung kalainan ang anday katapus-tapusan (2:1-22).

Yang sam klasing nag̓itulduk yang mga taung atia, pamagpaimukli ang indi ra unu maglëkat ti Ginuung Jesu-Cristo natëtëngëd tung tantu unung kabuay ra ang indi pa ka ëngëd nag̓alkat. Piru binarik ni Pedro yang mga katadlëngan nira. Yang Dios bëlag̓an mapinaw̓aya-w̓ayaën ang magkërëng tung pinangakuan na ang ti Ginuung Jesus maglëkat, kung indi, durug kapinarurusun tung mga tau ay pag̓ëlat pang pag̓ëlat tung nirang magsug̓at da tung mga kasalanan nira ay yang gustu na ang basi pa ra ilëm anday mablag tung anyang dapat ang masintinsiaan na tung kadiaduan. Dispuis pa, dayun da kang pinadëmdëm ni Pedro yang mga tumatalig ang kumus magkadiadu ra ka ilëm ka man yang tanan ang bag̓ay, mintras pamagpakbat tanira tung ni Ginuung Jesus ang maglëkat, kaministiran ang yang usuyun nirang ug̓ali pulus tung limpiu, maskin tung unu pang pag̓urubraënay (3:11-13). Ang para makayanan nira tia, pirmi ra ilëm ang magpataw̓ang ëngëd tung ni Ginuung Jesus ug̓ud maispirinsiaan nira yang kanëëman nang magpaktël tung nira. Ig mas pang papëg̓ëtën nira yang pagpakigkapulit nira tung anya (3:18).