Yang Nag̓ituyun Na Tung Mga Pamagmaëpët-ëpët Ang Kada Sam Pundaan (5:1-4)
5
Numanyan ta yamung mga pamagmaëpët-ëpët tung kada sam pundaan,
may sasang nag̓aingaluku tung numyung prusigiran mi.
Ay yuu sasa kang aruman ming pagmaëpët-ëpët ka ang pariu ka tung numyu.
Dispuis pagpaingmatuuraw ka natëtëngëd tung mga pinitinsiang pinasaran yang pag̓aningën ang Cristo ang yay sinakëp ta mataw ig kung ipagpabunayag da nganing yang Dios yang kadëngëg̓an nang durug kasulaw,
madamayaw ra ka.
2 Ya taa yang gustuung ingalukunu tung numyung prusigiran.
Padag̓ën-dag̓ënan mi ta maayën yang mga kaarumanan ming mga tumatalig ang yay maning pa tung sasang kaayëpan yang Dios ang ya ra ka ilëm pa man ay ag̓ipaëpëtay na tung numyu.
Yang pagbarantayën mi tung nira bëlag̓an ang yamu ra ilëm ag̓arëgsanay,
kung indi,
tëdëk buluntad tung mga kinaisipan mi ang katulad ka tung nag̓auyunan yang Dios.
Bëlag̓an natëtëngëd ang may nag̓aëlatan mi ilëm tung nirang mapakinaw̓angan mi,
kung indi,
natëtëngëd ilëm ang yamu duruamu kag kadërërëp ang magtaw̓ang tung nira ang para mas mag̓ëlët yang pagtaralig̓ën nira tung ni Ginuu ta.
3 Indiamu ra ëngëd magpalandaw tung mga sadili ming maglalang da ilëm ang maglalang tung nirang ipinaëpët ka ilëm yang Dios tung numyu,
kung indi,
yang mga tinanguni mi mismu ipaunung mi ra ka tung mga pag̓urubraën ug̓ud may mulidung maita nira tung numyung matinlung mapausuyan nira.
4 Kung ya ray usuyun mi,
kung magpabistu ra nganing ti Ginuung Jesus ang yay manig̓asikasu ang pinakalandaw tung tanan ang yay dapat ang panangdën tang tanan ang mga manig̓asikasu,
may iblës nang ipagpadëngëg na tung numyu ang inding pisan magrusaw yang katinlu na ang asta tung sampa.
Yang Nag̓aingaluk Na Tung Kadaklan (5:5)
5 Yang iningalukung atia tung mga pamagmaëpët-ëpët may lagpakan na ka tung numyung kadaklan ang bëlag̓an mga manigmaëpët-ëpët ang maning pa tung mga kinamamulaan.
Dapat kang magparanëkamung pirmi tung nirang magpalalang.
Yamung tanan,
mga manigmaëpët-ëpët kag bëlag,
dapat kang magpararanëkanamung pirmi ang para mapagsirirbianamu ta matinlu.
Yang pagpararanëkan ming tia yay buatën ming maning pa tung aw̓ël ang pirming yag susuutay mi.
Dapat ya ray usuyun ming kada sam pundaan natëtëngëd may sasang napabtang tung kasulatan ang maning taa yang palaksu na:
“Yang Dios tanya,
pagpakigkuntra tung kumpurming tinu pay pagdakul da yang kulu nang pagpalandaw tung mga aruman na,
piru yang taung kumpurming mapinagparanëk,
yay paitaan na ta kanëëman naa,”
ag̓aaning.
Yang Nag̓ituyun Na Tung Nirang Tanan Ang Mga Tumatalig (5:6-9)
6 Purisu magparanëkamu rang pirmi tung Dios ang yay maktël ang magtaw̓ang tung mga tauan na ig maktël kang magpakigkuntra tung mapinalandawën ug̓ud kung kaw̓utun da nganing yang uras ang itinipu na,
ipaabwatamu ra ka anyang padëngëg̓an.
7 Tung maning taa yang pagparanëk mi tung anya.
Yang tanan ang lëbat yang nag̓apaliw̓ëg̓an da rin ta mga kulu mi,
luw̓us dang ipasakan mi tung anya natëtëngëd tanya,
kung unu pay nag̓asinti mi,
ya kay nag̓asinti nang nag̓apakigdamayan.
8 Pirmiamu ra kang magsuspindi tung mga kalëlyag̓an ming sadili ang nunut da ka ta pagpaabtik ming pagbantay ay yang kuntrariu ming ti Satanas pagdilëm da ta sasang tumatalig ang para diaduën na yang pagtaralig̓ën na.
Katulad ang pisan tung sasang liun ang pagngërëb ang pagpatiw̓ay-tiw̓ay ang pagdilëm ta matëkëb nang baktaën.
9 Ya ray dapat ang panguntiëlan mi ta mupiab ang yang pagtaralig̓ën mi tung Dios yag pabakëray mi ta maayën.
Dëmdëmën mi ka ang bëlag̓an ilëm yamuy magpasaran ta mga maning tiang mga pinitinsia,
kung indi,
pati yang kadaklan ang mga kaputulan ta tung duma-rumang banwa,
ya ka.
Yang Sasang Matinlung Pagbakëran Yang Mga Isip Nirang Mamagprusigir Ang Mamag̓agwanta Tung Mga Pinitinsia (5:10-11)
10 Piru indi mi ëngëd paglipatan ang yang Dios ang nag̓atalig̓an mi durug kainildawën ang magtaw̓ang tung numyu,
maskin unu pay mapasaran mi.
Tanya ka nganing yang nagbëtëng tung mga isip ming para magpalg̓uramu ra tung katinluan yang pagkadios na ang asta tung sampang anday katapus-tapusan na natëtëngëd ilëm tung pagkarapulitan mi ni Jesu-Cristo.
Purisu mintras agpasaranamu ra ta mga pinitinsia tung diput ka ilëm ang timpu,
indi ra ka ëngëd magpaw̓aya yang Dios,
kung indi,
tanya mismu ay magsugpat tung mga kakulangan mi ang para mas pang tumimlat yang pagkatau mi ig magtaw̓ang ka tung numyung para indiamu ra maplëkan ta ipagtalig mi tung anya ig magpaktël ka ta mupia tung mga isip ming para kayanan ming agwantaën yang kumpurming unu pay mapasaran mi ang para asan da magbakëd yang paniël-tiël mi.
11 Tanya ka man ay makagag̓aëm tung tanan ang asta ra ilëm tung sampa.
Talagang matuud ka man tia!
Yang Pinakaisi Yang Katuyuan Nang Nagsulat (5:12)
12 Ti Silas ang sasang putul tang pag̓atëlënganung matalig̓anu,
ya ray pinapag̓ëkëlu yang sulat ang atiang diput ka ilëm.
Pinaëklanamu ra nganing yëën ug̓ud basi pa ra ilëm ang asan da nga paktëlayu yang mga kinaisipan ming para indiamu ra ëngëd magpaluw̓ay.
Kag yadwa pa ug̓ud asanamu ra ka nga paingmatuurayu ang talagang matuud yang tanan ang atiang ipinagpasanag̓u natëtëngëd tung kanëëman ang ipinagpaita yang Dios tung yatën ang asanita ra ka nagkatinir yang kalibrian tac.
Yang Pagtapusan Yang Sulat (5:13-14)
13 Yang sam pundaan ang mga kaputulan mi tani tung sasang siudad ang nag̓ipananglitu tung Babilonia ang ya ra kay pinilik yang Dios ang pariu ka tung numyu,
durung gustu nirang mamagpakikumusta tung numyu asan.
Pati ti Marcos ang yay maning pa tung anaw,
gustu na kang magpakigkumusta tung numyu.
14 Kada magsaragpunamu,
kaministiran magkurumustaanamung magsarapëtan ta matinlu,
ang para asan da nga pruibaay ang yamu matuud ang magpurutul ang paggërëgmaan ta mupia sasa may sasad.
Buinu,
yang nag̓ipag̓ampuu tung Dios para tung numyung tanan asan ang pirmiamu anyang paëyangan ta paglimëngan yang mga isip mi.
Taa ra ilëm tapusayu yang gustuung ianing tung numyu,
Pëdro