Pausuyan Nira Yang Pag̓irisipën Ni Jesu-Cristo Atiing Pagpapinitinsia Na (4:1-6)
4
Kumus ti Jesu-Cristo napasar ka man tung pinitinsia atiing taa pa rin tung kaliw̓utan ang naa,
purisu ta yamu,
pausuyan mi yang palaksu yang pag̓irisipën nang matëntën ang manalunga tung pinitinsia.
Ay kipurki kung tinu pay napasaran da ta pinitinsia arangan da ilëm tung pagkërërëngën na tung ni Ginuung Jesus,
yang apiktar na tung isip na,
mas pang magbilug yang isip nang indi ra magbuat ta kasalanan.
2 Tëgkaan na,
mintras bui pa taa tung kaliw̓utan ang naa,
indi na ra panuntan yang mga kalëlyag̓an nang dati ang yay nag̓ausuy yang kadaklan,
kung indi,
yang kalëlyag̓an yang Dios ya ray ipalandaw nang usuyun.
3 Kipurki tan taa bastanti ra nganing yang uras ang ginasta mi tung pagturumanën mi yang nag̓akursunadaan kang lag̓i ta mga taung anday naërëm nira tung kalëlyag̓an yang Dios.
Asan da ta pagparaklërën mi tung mga pag̓urubraën ang durung pisan agkalalaway ang pagkatapus andang pisan ay ëyak-ëyak mi,
asan da ka ta pagparapsawën mi tung tanan ang mga kalëlyag̓an mi,
asan da ka ta pagparaklërën mi tung pag̓irinëman ang para magpabuuamung magpakasadyang subrang subra ra.
4 Pagkatapus numanyan yang mga barkada ming tukaw,
kung magdarag̓umukan da nganing tung mga pag̓urubraën ang mga maning tia ang para mapapsawan da nira ang anday pamatëng-patëng nira kung unu ray luaan na,
ang pagkatapus indiamu ra ka magpakilakët tung nira ang katulad ka tung nagpaluyut ang naa,
ya ray nag̓abërëngan nira ta mupia tung numyu.
Ang pagkatapus,
ya ra ka dayun ay malainan ta mga isip nira tung numyung ipagpalagpak ta mga bitalang malalain.
5 Piru tanira papanuw̓alën da ka ëngëd yang Dios ang simpan dang magsintinsia tung tanan ang mga tau,
maskin kaw̓utan nang bui pa,
maskin nagkarapatay ra,
parariu ka ilëm ang sintinsiaan na.
6 Ya ray katuyuan na ang yang mga aruman ming mga tumatalig ang nagkarapatay ra,
pinampakaw̓utan dang lag̓i yang Matinlung Balita ay ug̓ud maskin indi ra ka man malibri tung kamatayën ang ya ra ka man ay sasang sintinsiang mapasaran tang tanan ang mga tau,
piru mapagpasapën da ka ëngëd tung Dios ang asta tung sampa ang yang kabui nira ipapariu ra yang Dios tung kabui nang anda ëngëd ang pisan ay katapus-tapusan na.
Yang Dapat Ang Prusigiran Nira Mintras Pamag̓ëlat Tung Pagtapusan Yang Tanan (4:7-11)
7 Alëngët da ilëm yang uras ang pagtapusan da yang tanan ang pagkarainabu taa tung kaliw̓utan ang naa.
Purisu kaministiran ang pirmi tung magkatama yang palaksu yang pag̓irisipën mi ang nunut da ka ta pagsuspindi mi tung mga sadili mi ug̓ud mapag̓ampuamu ra ta ustu tung Dios ang bilug tung mga isip mi.
8 Landaw tung tanan ipadëgtë mi ëngëd yang paggërëgmaan ming magpurutul kipurki kung maggërëgmaanamu ra ta maning tia,
mapagparatawaranamu ra,
maskin durung mga kasalanan ang nagkarabuat mi sasa may sasa.
9 Mag̓arasikasuanamu ra ka tung numyu-numyung mga balay ang pëlëk yang pagburunguy-w̓unguyun.
10 Kumpurming unu pang abilidaray ang ipinaëyang yang Dios tung numyu sasa may sasa,
ya ray gamitën ming magtaraw̓ang-taw̓angan.
Yang dapat ang maita tung numyung paggamit ang yamu maayën ang mga taralig̓an yang Dios ang magpapanaw tung mga abilidad ang atiang sari-saring ipinampaëyang na tung numyu.
11 Kung tinu pay may gustu nang ipasanag tung mga kaputulan,
indi na ra paglipatan ang tanya sasang turuw̓ulun ilëm ang ya ra ilëm agpipiaray yang Dios ang mangërëngan tung anyang magpalatay yang bitala na.
Kung tinu pay mag̓asikasu tung kaministiran yang mga kaputulan,
yang dapat maita tung pag̓arasikasuën na ang tanya ya rag paktëlay yang Dios ang manirbian tung nira.
Tung kumpurming unu pay buatën mi,
siguruën mi ëngëd ang asan da ngaëyangay yang mga tau ta ipagdayaw nira tung Dios natëtëngëd bistu nira ang yamug paktëlay ni Jesu-Cristong pagbuat.
Tanya ka man ay may kadëngëg̓an ig kagaëman ang asta tung sampang anda ëngëd ang pisan ay katapus-tapusan na.
Talagang matuud ka man tia.
Kung Ayw̓a Dapat Ang Ikasadya Nira Yang Mga Pinitinsiang Nag̓apasaran Nira (4:12-19)
12 Mga putulung nag̓amaalu ta mupia,
indiamu ilëm mabërëng tung mga pinitinsiang atiang malbat ang nag̓apasaran mi ang yay maning pa tung sasang maktël ang apuy.
Ay asanamu rag sukdaay yang Dios.
Indiamu ka maglaum ang midyu tung anda ray patinumas yang nag̓ainabung atia tung numyu.
13 Kung indi,
yang kumpurming unu pang pinitinsiaay ang nag̓apasaran mi ang asanamu ra ka nga damay tung mga pinitinsiang pariu ka tung pinasaran yang pag̓aningën ang Cristo,
ya rag ikasadyaay mi ay ug̓ud kung ipagpabunayag na ra nganing yang kadëngëg̓an nang maggaraëmën,
pati yamu asan da nga bag̓asay mi yang kasadyaan ming bug̓us ang pisan.
14 Kung agduminarënamu arangan da ilëm tung pag̓aningën ang Cristong nag̓atalig̓an mi,
tëëd mi tiag katinlu yang nag̓abtangan mi!
Ay kipurki asan da nga pruibaay ang yang Espiritu Santong pagpasapët tung kadëngëg̓an yang Dios asan da tung numyug pagpakëën.
15 Dapat ang anday mainabu ang may asan tung numyung parusaan natëtëngëd nangimatay ta tau,
ubin nanakaw,
ubin nagbuat ta maskin unu pang malalainay,
ubin nagpasilaw̓ët tung pag̓urubraën yang duma.
16 Piru kung papinitinsiaanamu natëtëngëd ilëm ang yamu mga tumatalig tung ni Jesu-Cristo,
indi mi ikaëyak tia,
kung indi,
ya ray pasalamatan mi tung Dios natëtëngëd asan da nga bistu ang binilangamu ra anyang mga tauan yang may aran ang atia.
17 Ag̓aningënamu ra yëën ta maning tia ay natëtëngëd numanyan da yang uras ang nag̓ipag̓impisa yang Dios tung pag̓urusisaën na tung mga tau ang yang tukawën na itang maning pa tung sadiling pamalay-w̓alay na.
Maning pa tung itay ag̓usisaën na ay nag̓asukdaan na yang pagtaralig̓ën ta ëkël tung mga pinitinsiang naang nag̓apasaran ta.
Tay kung itang siguradung may kalibrian ta yay nag̓apasaran da ta mga pinitinsia,
unu pa w̓asu ay pakaw̓utun yang mga taung indi ra nanangëd tung Matinlung Balitang liit tung Dios kung kaw̓utun da nganing yang uras ang ipag̓usisa na tung nira atiang indi ra nagkatinir ta kalibrian nira?
18 Magkanggid tung sasang bitalang napabtang tung kasulatan ang mag̓aning,
“Yang sasang taung matadlëng tung pagtërëlëngën yang Dios ang malibri ka man tung uri,
kung ya pa nganing ay nag̓apasaran ta mga pinitinsia taa tung kaliw̓utan ang naa,
unu pa w̓asug lëbat yang pinitinsiang maagmaan yang mga taung makinasalananën ang baliwala ra ilëm tung mga isip nira kung unu pay kalëlyag̓an yang Diosa?”
ag̓aaning.
19 Kapurisu kung nainu pa asan tung numyu ay nag̓apasaran ta mga pinitinsia sigun tung pagturumanën na yang kalëlyag̓an yang Dios kung yay uyun tung planu na tung nira,
kaministiran ang iintriga ra nira yang mga sadili nira tung anyang ya ka man ay nag̓imu tung nira ig talagang yay matalig̓an nirang magkërëng tung tanan ang pinangakuan na tung nira.
Ig yang pagtaralig̓ën nira asan da ka nga papruibaay nirang mabakëd ëkël tung pagpadayun nira tung pagburuatën nira yang matitinlu.