Tanirang Mga Baw̓ay Dapat Ang Magparanëk Tung Mga Kasawa Nira (3:1-6)
3
Ta yamung mga baw̓ay,
katulad ka tung nag̓aingaluku nungaynaa,
kaministiran magparanëkamu kang pirmi tung mga kasawa mi.
Ya ray dapat ang buatën mi ug̓ud maskin yang duma tung nira pagpakuindi ka man tung Matinlung Balita,
maskin indi mi tag̓aman ang paintindiën,
asan da ilëm tung mga ug̓ali ming matitinlu manlatay yang mga isip nira ang asta manangëd da ka ëngëd ang magtalig.
2 Puiding ya ray mainabu kung maita ra nganing nira ang paggalangamu ta ustu tung nira ig pulus tung matinlu yang mga ubra-ubra ming mga kasawa nira.
3 Luminus ilëm ang tung sagpaw ka ilëm yang pagpatinlu mi tung mga sadili ming yag bistuay ang katulad ka tung dumang pamusturang subra tung mga bua nira ubin tung pagsuruutun nira ta mga alaas ang mga bulawan ubin mga aw̓ël ang mga matitinlu.
4 Kung indi,
yang dapat ang papusturaën mi ta mupia ya ra yang tung adalëm ang indi nag̓aita,
bilang yang nag̓abtang tung mga pupusukun mi ang asan nga mamaladmaray nira tung pagkaamumu mi may tung pagpakalimëng mi ay tia durung pisan agkamaal tung pagtërëlëngën yang Dios.
Atia yay kapusturaan ang andang pisan ay kalëw̓ad-lëw̓aran nang asta tung sampa.
5 Kipurki maning kang pisan tia yang pagpurusturaën yang mga baw̓ay ta namagtukaw ang panimpu ang pirming nagparanëk tung mga kasawa nira.
Ay bilug yang mga isip nira tung kalëlyag̓an yang Dios ang ultimu ilëm tanya ay pinag̓inëtëg̓an yang mga isip nira.
6 Pariu ra duun tung ni Sara ang pirming nagpanangëd tung ni Abraham ang kasawa na ang ya ra ag̓aningay nang ag̓alën na.
Puidiamu kang aningën ang irinsia na kung masug̓ut mi ka yang ug̓ali nang pagbuat yang matitinlu ig kung indiamu ra ka magpataranta tung maskin unu pang bag̓ayay.
Tanirang Mga Lalii Dapat Kang Mag̓istimar Ta Maayën Tung Mga Kasawa Nira (3:7)
7 Pati yamu kang mga lalii,
yang pagkarasawaën ming magkasawa,
dapat ang intindiën mi yang pagkabëtang nirang maluw̓ay ta puirsa kay tung numyu.
Padëmdëman mi ka ang pati tanira pinaitaan da ka yang Dios yang kanëëman nang tinapnay ang tung uri kasiraanamu ra kang magpakigsapën tung anyang asta tung sampang anday katapus-tapusan.
Purisu istimarën ming galangën ta maayën ug̓ud anda ray pagsangkëlan yang pag̓arampuën ming magkasawa.
Yang Nag̓aingaluk Na Tung Nira Rang Tanan (3:8-12)
8 Numanyan kung papagbilug̓unu ra yang gustuung ipatuman tung numyu,
maning taa.
Kaministiran magsarasaanamu rang pirmi ta kinaisipan may kinaisipan,
maggërëgmaanamu kang magpurutul,
magparasunaid-sunairanamu kang mag̓irildaw-ildawan,
ig magpararanëkanamu.
9 Indiamu ëngëd mangimalësan tung nagbuat ta malain tung numyu.
Indiamu ka mag̓insultu tung nag̓insultu tung numyu.
Kung indi,
anday dumang iblës mi tung nira,
ya ingalukay mi tung Dios ang pakaayënën na ta mupia natëtëngëd ya ra ka man ay ipinagbëtëng na tung isip mi atiing primiru ang ya ray buatën mi tung mga masigkatau mi ug̓ud asanamu ra ka nga pakaayënay na.
10-12 Talagang impurtanting usuyun mi yang mga ug̓aling mga maning tia ay kipurki may sasang bitala yang Dios ang napabtang tung kasulatan ang maning kang pisan tia yang rumbu na.
Mag̓aning,
“Kung tinu pay nag̓alëlyag ang magpakasadya taa tung kaliw̓utan
Ang pagkatapus gustu na kang magtinlu yang pagkabëtang na,
Tay puis yang nganga na suspindiën na tung pagbiw̓italaën na yang mga malalain
Ig indi ra ka magbukli.
Kaministiran kang panalyuran na ra yang tanan ang pagburuatën nang malalain ang para magbuat da ta matitinlu.
Yang paawatan na ëngëd ang sikarën,
ang mag̓uruyunan tanira yang mga kaarumanan na tung matinlu.
Kipurki yang nag̓abantayan yang Dios ta mupiang ag̓asikasuën,
ya ra yang mga taung pagbuat yang magkatama.
Pirmi na kang agpamatiën yang pag̓arampuën nira tung anya.
Piru kung tinu pay pagbuat ta malalain,
ya ray kuntraën nab,”
mag̓aning.
Kaministiran Ang Mamagbuat Ta Matitinlu Maskin Mapasaran Ta Patigbak Ang Katulad Ka Tung Ni Jesu-Cristo (3:13-17)
13 Kung madërëpamung magbuat ta matitinlu,
indiamu unyën pa yang kadaklan ang mga tau.
14 Piru maskin tigbakënamu pa ka ëngëd natëtëngëd tung pagburuatën mi yang magkatama,
durug katinlu yang nag̓abtangan mic.
Indiamu ilëm mag̓ëlëd tung pagpapinitinsia tung numyu,
indiamu ra ka magpataranta.
15 Kung indi,
pirming dëmdëmën mi ang ti Jesu-Cristo yay Ginuu ming may kagaëman nang pinakaabwat tung tanan.
Pirmiamu ra kang riparasiun ang manuw̓al tung kumpurming magtalimaan tung numyu kung ayw̓at nag̓asiguru mi rang lag̓i ang nag̓aëlatanamu ra yang Dios ta sasang kaayënan ang inding pisan mapasiring-siringan.
16 Ug̓aring ilëm,
kung tumuw̓alamu ra nganing tung nira,
kaministiran ang ëklan mi tung pulus luay-luay ilëm ang pagturuw̓alën ang may pagkaamumu mi ang indiamu ra ka maplëkan ta ipanggalang mi ta mupia tung pagtalimaan.
Dapat kang anday malain ang ipag̓imasul tung numyu yang mga painu-inu mi ug̓ud kung ay pa tiing agsawayënamu ta duma,
duun da ka maëyak yang pagsaway kung maita na ra nganing yang mga pagburuatën ming matitinlu ang ya ray nag̓abuat mi natëtëngëd tung pagkarapulitan mi ni Jesu-Cristo.
17 Kipurki maayën pa ang yang pagburuatën mi yang matitinlu ya pay magakdan mi ta patigbak kung yay lug̓ud tung planu yang Dios tung numyu.
Indi ilëm ang tigbakënamu natëtëngëd tung binuatan ming malalain.
Kung Ayw̓at Magkabag̓ay Ang Mamagbuat Ta Matitinlu, Maskin Ya Pay Magakdan Nira Ta Patigbak (3:18-22)
18 Ag̓aningënamu ra yëën ta maning tia ay maskin nganing ti Jesu-Cristo pinasaran ta patigbak ang tung minsa ilëm nagpakugmatay natëtëngëd ilëm tung mga kasalanan ang nagkarabuat ta.
Bilang tanyang matinumanën tung kalëlyag̓an yang Dios,
ya pay pinasaran ta pinitinsiang durug lëbat para tung yatën ang malinampasën.
Ya ray pinasaran na ug̓ud asanita ra mapaulik na tung Dios ang pinagpaalawiran ta.
Tanya inimatay ra ka man ang ya ray pagtapus yang kabui na taa,
piru binwi si ka ëngëd ang uman yang Dios ang yang kabui na baklu rang klasi.
19 Pagkabui na si kang uman,
dayun dang minangay duun tung mga angil ang yag kukulung ang para ibalita na tung nira ang ëkël tung pagkabui na si kang uman,
tanira napabtang da tung tarampakan yang kakay na ang tung uri sintinsiaan na ra ka ëngëd tung kalainan ang anday katapusan nad.
20 Yang mga angil ang atii,
ya ra yang namagbatuk tung Dios atiing tukaw pang timpu pa ni Noëe atiing durung pagparurus yang Dios ang pag̓ëlat tung mga tau ang basi pa ra ilëm mamanligna ra tung mga ubra-ubra nirang atiing durung pisan agkalalainf.
Ya ray uras ang nag̓ipagbuat pa na Noe yang arka ang atiing tapus da,
ya ray sinaayan ta pira pa ilëm ang bilug ang para mangalibri tung palëmpan,
bilang walu ilëm nga tauan.
21 Taa numanyan yang pagtapnay yang Dios tung nira tung palëmpan ang atii,
yay gustuung ipananglitu tung palaksu yang pagtapnay na simanyan tung numyu ang ya ra ka man ay pinananglitan ming nagpabënyag.
Ay yang nadapatan na tia,
bëlag̓an ang mag̓aning ang may apiktar na tung mga sadili mi ang buat na pa asan da nakuat yang buling tung mga tinanguni mi ubin asanamu ra ka nga punasay yang Dios tung mga kasalanan mi.
Kung indi,
asanamu ra nagpailala ang anda rang pisan ay barasulun yang mga painu-inu mi gatëd atiing pag̓ingaluk mi ta kapatawaran tung Dios,
pinatawaramu ra kang lag̓ing anyang pinunasan ang yang kaalimbawaan na,
maning pa tung nagkasira-siraanamu ra ka ni Jesu-Cristong nagbungkaras atiing pagpabui si kang uman yang Dios tung anya.
22 Simanyan tanyang nabui si kang uman duun dag kakarung tung tëpad yang Dios ampir tung tuu na ang kasiraan da ka tanirang pamaggaraëmën.
Ay atiing pagpaabwat na duun tung langit,
ipinabtang da yang Dios tung pudir na yang tanan ang kinalasi-kalasi ta mga taung indi nag̓aita ang may nira-nirang mga kagaëman.