Dapat Ang Tabtaw̓ën Da Nira Yang Tanan Ang Pagtirimaën Kag Pagburuatën Ang Malain (2:1-3)
2
Purisu ang para anda ray pagsangkëlan yang paggërëgmaan ming magpurutula,
tabtaw̓ën mi ra yang tanan ang pagtirimaën ming malalain tung mga aruman mi.
Bilang iplëk mi ra yang tanan ang pagdarayaën.
Indiamu ra ka magparaita-itaan ilëm.
Indiamu ra ka mag̓iriw̓ëg̓-iw̓ëg̓an ubin magkirimun-kimunan.
Indiamu ra ka magraranggaan ta dëngëg may dëngëg.
2 Katulad ka tung mga mamulang baklung ipinangana ang indi ra ëngëd tëmëgka kung indi manusu ta muya-muya,
ta yamu,
ya ka.
Kaministiran kang indiamu ka tëmëgka kung indiamu manginëm ta muya-muya yang ultimung gatas ang limpiung pisan ang yay kaalimbawaan yang bitala yang Dios.
Ya ray paagyatan mi ug̓ud ya ray pagdakulan yang isip ming asta këmtël dang magtuman yang kalëlyag̓an yang Dios ang ya kang lag̓i ay katuyuan yang pagtapnay na tung numyu.
3 Ya ray prusigiran mi kipurki natimtiman mi ra kung unu pag katinlu yang kanëëman ni Ginuu tang nagtapnay tung numyu.
Tanira Lug̓ud Da Tung Maning Pa Tung Balay Ang Pag̓atiniran yang Espiritu Santo Ang Para Mamanirbian Tung Dios (2:4-6)
4 Tanyang pirming nag̓apalëngtan mi,
maning pa tung sasang batung pinasag̓i ang yay pinakaimpurtanting batu tung sasang balay ang darakulu ang nag̓ipakdëng.
Maskin pinangindian da ka man ta mga tau,
piru ya pa ka ëngëd ay minaal yang Dios ang pinilikb.
5 Pati yamu mismung pagpalëngët tung anya,
yang kaalimbawaan mi maning pa tung mga batu kang nag̓apagtambi-tambi yang Dios tung pag̓apakdëng nang maning pa tung sasang balay ang nag̓apatiniran na tung Espiritu Santo.
Yang sam bilug kang kaalimbawaan mi,
yamu maning pa tung mga pari ng mga Judiong pinilik yang Dios atiing tukaw ang para pirming magpalëngët tung anyang manirbianc ëkël tung pagdarasag̓ën nira ta mga ayëp ang ya ag̓iintrigaay nira tung anya.
Ug̓aring ta numyu,
bëlag̓an mga ayëp yang nag̓iintriga mi tung anya,
kung indi,
mismu yang mga sadili mid ang para mapagbuatamu ta kumpurming nag̓auyunan na ëkël tung ni Jesu-Cristong pagpaktël tung numyu.
6 Magkatamang pisan ang ti Jesu-Cristo ya ra ag̓aningayung maning pa tung sasang batung pinasag̓i ay kipurki may sasang inula yang Dios ang napabtang tung kasulatan ang tung anyang pisan nga tëmëng ang maning taa yang palaksu na:
“Tandaan mi ta maayën yang bitalaung naa.
May sasang taung piniliku ang durug kamaal tung yëën ang yay papanularënu tung primirung batung pinasag̓i ang ipasintaru tung pamusud yang balay ang ipakdëngu asan tung siudad ang Sione ang ya ray paniëlan yang intirung lëbat na.
Kung tinu pay magtalig yang sadili na tung anya,
talagang anda ra ka ëngëd ay mapaëyakan nang pagsungunan tung nag̓atalig̓an nang atia tung anya,”
mag̓aningf.
Nag̓apapagsunaid Na Yang May Pagtalig Tung Ni Jesu-Cristo May Yang Anda (2:7-10)
7 Purisu asan da ngaintindiay mi ang ta yamung pagtalig tung anya,
padëngëg̓anamu ra ka ëngëd yang Dios tung uri.
Piru kung natëtëngëd tung kumpurming indi ëngëd magtalig yang sadili nira tung anya,
talagang matuud yang sasang sinambit tung kasulatan ang sam bilug ang mag̓aning,
“Yang batung pinangindian yang mga manigpakdëng yang balay ang anda unu ay kuinta na,
ya pa ka ëngëd ay nagyaring pinakaimpurtanting batu tung tanang,”
ag̓aaning.
8 May sam bilug pang asan da ka tung nira nga tëmëng ang maning taa,
“Yang batung atia ya ray masapdukan nira,
Ya ra ka dayun ay mabëgsakan nirah,”
ag̓aaning.
Anday dumang ipagsapduk nirang mabëgsak,
kung indi,
ya ra yang pagpakuindi nira tung Matinlung Balita natëtëngëd tung ni Jesu-Cristo.
Yang natëngëran na pagkunsibir da yang sasang kalalangan yang Dios ang kumpurming tinu pay magpakuindi tung planu na,
ya ray mabëgsak tung kalainan.
9 Piru ta yamung tanan ang mga tumatalig,
tëëd mi tiag katinlu yang nag̓abtangan mi simanyan!
Yamu ra yang irinsiang pinilik yang Diosi ang katulad ka tung pagpilik na tung irinsiang pinamuaran ni Israel tiing tukaw.
Katulad ka tung nasyun nira ang yay binuat nang maning pa tung mga pari ang para mamanirbian tung anyang Adi niraj,
ta yamu,
ya ra kay turnu mi ang ipinagpiar na tung numyu simanyan.
Katulad ka tung nasyun nira atii kanay,
natig̓anaamu ra ka tung Dios ang para tanya ra ilëm ay may anya tung numyuk.
Yang katuyuan na tia ay ug̓ud magbaw̓alitaënamu ra tung mga kaarumanan mi kung unu pag katinlu yang pag̓irimakluën yang Dios tung numyu ang ya ra ka man ay nagbëtëng tung mga isip ming manalyud da tung makiklëp ang pag̓atiniran mi ra rin ang para malaktëramu ra dayun tung masadlaw ang ipinagsimpan nang durung pisan agkatinlul.
10 Atiing nataklib ang timpu,
yamu bëlag̓anamu mga tauan yang Dios,
piru numanyan mga tauanamu ra anyang sadili.
Atii kanay,
indiamu pa nag̓apaitaan na ta kaildaw na,
piru numanyan inildawanamu ra anyam.
Kaministiran Ang Yang Mga Buat-buat Nira Tung Kaliw̓utan Magkatunu Tung Pagkabëtang Nirang Maning Pa Tung Mga Dayuan Ka Ilëm Taa (2:11-12)
11 Mga putulung nag̓amaalu ta duru,
yang pagkabëtang mi tung kaliw̓utan ang naa midyu tung mga dayuanamu ka ilëm ay yang ultimung baw̓anwaan mi,
ya pa ag̓ëlatay mi.
Purisu pagpaamanaw tung numyu ang kung unu pay dating kalëlyag̓an mi atiing pagpanadiliamu pa,
indi mi ra ëngëd pagpanuntan ay kung tung gira pa ipananglitayu,
yay pirming pagsangsang tung numyu ang para marangga ra yang pagtaralig̓ën mi tung ni Ginuu ta pati tung pag̓urusuyun mi tung kalëlyag̓an na.
12 Kaministiran ang pirmi tung matinlu yang mga ug̓ali mi tung pagtërëlëngën yang mga kaarumanan ming indi pa nag̓atultul tung ni Ginuu ta.
Ya ray prusigiran mi ug̓ud maskin bangdananamu nirang malalain ang mga taun,
kung maita ra nganing nira yang mga pagburuatën ming mga matitinlu,
ya ray ipagdayaw nira tung Dios kung uras dang magbalik taa tung kaliw̓utan.
Kaministiran Mamagpagaëm Tung May Mga Katëngdanan (2:13-17)
13 Kaministiran ang magparanëkamung magpalalang tung kumpurming may mga katëngdanan arangan da ilëm tung ni Ginuu ta.
Bilang magpalalangamu tung ni Adi Cesar duun tung Roma ang yay pinakalandaw ta kagaëman.
14 Pati mga gubirnadur,
ya ka.
Ay ya ray pinamiaran na ang para magpadapat ta parusa tung kumpurming pagbuat ta malalain ubin magdayaw ka tung kumpurming pagbuat ta matinlu.
15 Kipurki yang kalëlyag̓an yang Dios ang ëkël tung pagburuatën ming pulus matinlu,
asan da nga kapasay ta ipagbangdan tung numyu yang mga taung anday naërëm ang pagbiw̓italaën ta indi ilëm nag̓aintindian nira.
16 Magpaitaamu ang yamu may kalibrian mi,
piru yang pagkalibri ming atia,
indi mi ilëm buatën ang sasang sapin ming magbuat ta malain.
Kung indi,
yay gamitën ming manirbian tung Dios tung tanan ang mga ubra-ubra mi.
17 Purisu,
kung papagbilug̓unu ra yang nag̓ianingung atia,
yang tanan ang mga masigkatau mi galangën mi tung matinlu.
Yang tanan ang mga kaputulan ming mga tumatalig,
maalën mi ka ta mupia.
Yang Ama tang Dios,
galangën mi ka ta ustung nunut da ka ta pag̓ëlëd mi ang muya mapagbuatamu ta indi na nag̓auyunan.
Pati ti Adi Cesar duun tung Roma,
galangën mi ka ta ustu.
Yang Mga Turuw̓ulun, Magpalalang Ka Tung Mga Ag̓alën Nira Maskin Maisëg (2:18-25)
18 Ta yamung mga turuw̓ulun,
magpalalangamu ka tung mga ag̓alën mi ang nunut da ka ta panggalang mi tung nirang ustu.
Bëlag̓an ilëm tung maayën kag maamumu,
kung indi,
pati tung madërëëg-dëëg,
parariu ilëm ang palalangën ming panangërën.
19 Dapat ang yay buatën mi,
kipurki kung tigbakënamu nira ang anday kamaling binuat mi ang pagkatapus ya ray nag̓agwantaën mi tung matinlung kinaisipan natëtëngëd nag̓askëan mi ang yay kalëlyag̓an yang Dios,
yay sasang mauyunan na ta mupia tung numyu.
20 Ipabëtang ta,
may kamali mi ang pagkatapus garutiënamu yang ag̓alën mi,
basu dayawënamu yang Dios natëtëngëd tung pag̓aragwantaën mi tung kastigung atia?
Indi ka!
Piru alimbawa,
kung magbuatamu ta matinlu ang pagkatapus garutiënamu pa ka ëngëd yang ag̓alën mi,
piru mag̓agwantaën mi ka ëngëd tung matinlung kinaisipan,
atia,
ya ray sasang mauyunan yang Dios ta maayën tung numyu.
21 Kipurki yay natëngëran na ang bintëngamu ra anyang magtalig tung ni Jesu-Cristo kipurki atiing pagpapinitinsia na arangan da ilëm tung numyu,
asanamu ra nga butwanay na ta mulidu ug̓ud mag̓usuyamu ra tung mga laad na.
22 Tanya indi ëngëd ang pisan nagbuat ta kasalanan.
Indi ka nganing ang pisan nagbukli.
Padëmdëman mi kung ya pa ag̓aring nagkamatuud da tung anya yang sasang inula ang mag̓aning,
“Indi ëngëd ang pisan nagbuat ta kasalanan,
Indi ka nganing ang pisan nagbukli,”
ag̓aaningo.
23 Atiing tanya ininsultu yang mga tau,
indi ra ëngëd nangimalësan tung nag̓insultu tung anya.
Atiing tanya pinapinitinsiaan ta malbat,
indi ra ëngëd nagpauras tung mga taung namagpapinitinsia tung anyap,
kung indi,
itinalig na ra ilëm yang tanan ang atiang malbat tung Dios ang yay pulus tama yang sintinsiang nag̓ipakdul na.
24 Atiing pagpalansang na tung krus,
tanya mismu ay nag̓agwantang nagpasapul ang pisan tung sintinsiang dapat da rin ang dumangat tung yatën natëtëngëd ka man tung mga kasalanan taq.
Yang katuyuan na tia ay ug̓ud asan da nga tabtab yang pagpakasalak ta ang para asan da ka magbilug yang mga isip tang magbuat yang magkatama tung pagtërëlëngën yang Dioss.
Natëtëngëd ilëm tung pagpalapdës na ta latigu ang asan da namagriribinta yang mga ulit na,
kung tung bulung pa ipananglitay,
ya ray pinagmaayënan ta tung maning pa tung linaru tang nagpakasalakr.
25 Kipurki atii kanay,
pariuita tung mga karnirung nangatalang dat.
Piru may uras ang nagbiraita rang nagtalig yang mga sadili ta tung ni Ginuung Jesus ang simanyan ya ray pagpadag̓ën-dag̓ën tung yatën ig pagmanada ang katulad ka tung sasang manig̓ëpët ta kaayëpanu.