Yang nag̓ipag̓ampuu para tung numyu ang mas pang maispirinsiaan mi yang kanëëman yang Dios ang pagpadag̓ën-dag̓ën tung numyu pati yang pagpalimëng na tung mga isip mi.

3 Magkabag̓ay rang pisan ang pirming dayawën ta yang Dios ang ya kay Dios ang pinanalig̓an ni Ginuung Jesu-Cristo atiing pag̓ingtau na taa tung kaliw̓utan ang naa ig ya kay pag̓aningën nang Ama Na.

Natëtëngëd tung kaildaw nang aw̓unda tung yatën,

pinaëyanganita ra anya ta ipagpangabui tang baklu ang duun ipatiëlay na tung pagpabui na si kang uman tung ni Jesu-Cristo.

Asanita ra ka ngaëyangay ta ipagpakbat ta tung sasang kaayënan ang siguradung malg̓uran ta tung uri.

4-5 Yang kaayënan ang atiang malg̓uran ta,

indi ëngëd ang pisan marangga ang asta tung sampa,

indi ka ëngëd ang pisan mamansaan,

ig indi ka ëngëd ang pisan mag̓uman.

Nag̓iëlat na ra nganing duun tung langit para tung yatën ang nag̓amanadaan na natëtëngëd tung kagaëman na ëkël tung pagtaralig̓ën ta ang asta ra ilëm malg̓uran ta yang katuglayunan yang kalibrian ta ang yay ipinagsimpan nang para ipalua na ra tung kauri-urian^c.

6 Natëtëngëd tung kalibrian ang atiang nasambitu,

agsadyaanamu ra ta mupiang pagpakbat.

Ug̓aring,

simanyan,

mintras pagpakbatamu,

puiding pagsintiamu ra kanay ta kapungawan mi natëtëngëd tung sari-saring mga kaliwag̓an ang asanamu ra nga sukdaay yang Dios kung yay lug̓ud tung planu na para tung numyu.

7 Yang katuyuan na tia ay ug̓ud asan da nga prubalay na kung unu pag kabakëd yang pagtaralig̓ën mi tung anya.

Ay nag̓askëan mi,

yang kantidad yang pagtaralig̓ën mi mas maal pa kay tung bulawan ang may kadiaduan na pa.

Kung yang bulawan ngani magtunawën pa tung apuy ang para asan da nga prubalay kung pag̓as da,

ya ka yang pagtaralig̓ën mi ang kaministiran kang maprubalan da ka.

Ay kung mapruibaan dang mabakëd ka man,

tay tia,

ya ray dayawën na tung numyung ipagpadëngëg tung uras ang ipagpabistu ni Jesu-Cristong maglëkat.

8 Tanya maskin indi kang lag̓ing sinakëp ta mga mata mi,

piru nag̓agëgmaan mi ra ka ëngëd.

Maskin indi mi pa nganing nag̓aita numanyan,

piru nag̓atalig̓an mi ra ka ëngëd ig magsadyaanamu ra ka ta duru ang yang kasadyaan ming atia nag̓aliwag̓anamu ra nganing ang mapabag̓ayan ta bitala ig magkaanggid-anggid da tung kasadyaan ang sintiën mi tung uri kung malg̓uramu ra nganing tung kasusulawën ni Ginuu ta.

9 Agsadyaanamu ra ta duru ay kipurki agtapnayënamu ra yang Dios ëkël tung pagtaralig̓ën mi tung ni Jesu-Cristo.

10 Natëtëngëd tung pagtapnay yang Dios ang naa tung numyu,

pinapag̓ula rang lag̓i yang Dios yang mga manig̓ula atiing tukaw pa.

Ya ray pinasadsaran nira ta durug dërëp kung ya pa ag̓aring magpaita yang Dios yang kanëëman nang atia tung numyu.

11 Pinadërëpan da nira ta mupia ang basi pa ra ilëm maintindian da nira kung sanu pang panimpuay magkainabu ig kung ya pa ag̓aring magkamaningan da yang ipinaula tung nira yang Espiritu Santo ang yay ipinatinir tung nira yang pag̓aningën ang Cristo.

Yang ipinaula na tung nira ang yang pag̓aningën ang Cristong yay Mananapnay,

kung kumaw̓ut da nganing,

dapat kang lag̓ing magpasar tung mga pinitinsia baklu ra nga padëngëg̓ay yang Dios.

12 Ipinasanag yang Dios tung nira ang yang mga bag̓ay ang atiang ipinag̓ula nira,

bëlag̓an para tung nira ang para ikaayën din nira tung panimpu nira,

kung indi,

para tung ikaayën mi simanyan.

Ang pagkatapus yang mga bag̓ay ang atia,

ya ka man mismu ay ipinagpaskë tung numyu yang namagparakaw̓utun yang Matinlung Balita natëtëngëd tung ni Jesu-Cristo ëkël tung pagpaktël tung nira yang Espiritu Santong tinuw̓ul yang Dios ang magtinir tung nira ang duun ka man manliit tung langit.

Tëëd mi tiag katinlu yang nag̓abtangan mi!

Kipurki yang mga bag̓ay ang atiang ipinagpakaw̓ut tung numyu,

maski nganing yang mga angil duun tung langit,

duru ka rin ang kalëlyag nirang mamagpasadsad tung nag̓adapatan na.

13 Kapurisu ya ra ka man taang ipagrëntën ta ta mupia tung mga isip tang magpakbat ëngëd tung kaayënan ang ëkël ni Jesu-Cristong maglëkat para tung yatën.

Bilang suspindiën ta yang sadiling mga kalëlyag̓an ta.

14 Katulad tung mga mamulang matinumanën tung mga ginikanan nira,

ta yatën ya ka.

Tumanën ta ra yang kumpurming nag̓ipatuman yang Dios tung yatën ang ya ray nagyaring Ama ta.

Purisu indi ta ra ëngëd pagpanuntan yang mga kalëlyag̓an tang atiang dating naanaran tang atiing anda pa rin ay naërëm ta kung unu pay nag̓auyunan yang Dios.

15 Kung indi,

dapat ang limpiuita ra ta ug̓ali ang katulad ka tung anyang nagbëtëng tung mga isip ta atiing primiru ang ya ra kang lag̓i ay limpiung pisan ta ug̓ali.

16 Dapat ang magkamaningan da ta maning tia yang mga ug̓ali ta natëtëngëd may sasang inaning yang Dios tung mga tauan nang mga Israel atiing tukaw ang mag̓aning,

17 Dispuis pa,

kumus pangambayita ra tung Ama tang Dios,

kaministiran ang pabastantiën ta yang panggalang ta tung anyang nunut da ka ta pangaman ta mintras taawita pang maning pa tung pagdayu ilëm taa tung kaliw̓utan ang naa.

Ay indi ta paglipatan ang tanya ka man yang manginsapu tung yatën kung unu pay nagkarabuat ta sasa may sasa ang anday pinilikan yang panginsapu na^e.

18-19 Ay kipurki nag̓askëan ta ra ka kung unu pag kamaal yang kantidad yang ipinanggawad na ang para mapaluasita ra anya tung dating mga pag̓urubraën tang anda ëngëd ay pakaw̓utun nang matinlu ang ya ka man ay pinanubli ta tung mga kinaampu ta.

Yang ipinanggawad na,

bëlag̓an yang may karanggaan na ang katulad ka tung kuartang bulawan ubin landuk ang salapi,

kung indi,

ya ra yang dug̓u ni Jesu-Cristo mismu ang ipinaturuk na ang yang kaalimbawaan na tanya maning pa tung sasang karnirung idinasag ang anda ëngëd ay mansa-mansa na^f.

20 Tanya pinilik da kang lag̓i yang Dios atiing indi na pa nag̓aimu yang kaliw̓utan ang pagkatapus tung panimpung naang pinakauri,

ipinagpailala na ra para tung yatën.

21 Purisu ëkël tung anya,

naëyanganita ra ta dakulung pagtalig ta tung Dios ang yay nagpabui si kang uman tung anya ang pagkatapus pinadëngëg̓an na ra ka duun tung katalungaan na.

Yang linuaan na,

yang Dios ya ray panalig̓an tang magpalua yang tanan ang kaayënan ang pinangakuan na tung yatën ang ya ra ka man ay nag̓ipagpakbat ta.

22 Natëtëngëd tung pagparanangërën mi tung kamatuuran,

asan dag limpiuay mi yang mga kinaisipan mi ang yang luluaan na paggërëgmaanamu rang magpurutul ang bëlag̓an tung patunu-tunu ilëm.

Purisu kaministiran ang ya ray ipadëgtë mi pa ka ëngëd ang tëdëk ang pisan tung mga pupusukun mi.

23 Magkabag̓ay ang pisan tia ay kipurki maning pa tung ipinanganaamu rang uman^g,

ig yang pinangapunglan yang pagkatau ming atiang baklu bëlag̓an yang ginikanan ming suitu ta kamatayën,

kung indi,

ya ra yang sasang ginikanan ang banal ang yang pag̓irimakluën na tung numyu,

asan da ipapanaway na tung bitala na ang durug kabuilu yang apiktar na tung isip mi ig andang pisan ay kauman-umanan nang asta tung sampa.

24 Yang palaksu yang bitala na katulad ka tung sasang sinambit tung kasulatan ang mag̓aning,