Atiing pagpasulat ni Pedro yang sulat ang naa, maëpët da kang lag̓i. Ti Silas yang pinapagsulat na (5:12). Puidi kang ya kay pinapag̓ëkël na yang sulat ang naa. Indi ta ilëm mabilug̓an ang pisan kung unu pang takunay yang pagpasulat ni Pedro, piru puiding tung sëlëd yang takun ang 60 asta 64.

Yang sulat ang naa ipinaëkël na tung mga tumatalig ang nagkarawasag-wasag da tung duma-rumang banwa. Yang mga tumatalig ang atii nag̓adëëg-dëëg̓an da ta bëlag̓an mga tumatalig ang yang gubirnu mismu ya ray pagpaugtun. Purisu pinanliwag̓an da ta maayën ang yang duma namanluw̓ay ra ig yang kalaum yang duma, muya unu pinaw̓ayaan da ilëm tanira yang Dios. Muya-muyang sinambit ni Pedro yang mga kaliwag̓an ubin mga pinitinsia ang nag̓apasaran nira (1:6; 2:18-21; 3:14, 17; 4:1; 4:12-16; 5:9-10). Kada masambit na tia, nag̓asugpatan na ka ta ipagpaktël na tung mga isip nira ang para padayunan da ka ëngëd nira yang pagpagaëm nira tung ni Ginuung Jesu-Cristo ang nunut da ka ta pagpakbat nira tung anyang maglëkat. Kapurisu kung yang sasang tumatalig agpasaran da ta mga kaliwag̓an ubin mga pinitinsia man, taa tung sulat ang naa ngayapay na yang matinlung kunsiu ang para indi ra manluw̓ay, kung indi, magpadayun da ka ëngëd tung pagtaralig̓ën na tung ni Ginuung Jesu-Cristo.

Kung unu pay katuyuan ni Pedrong nagpasulat tung nira, pinabilug̓an na tung 5:12.