Yang Nag̓ipagpadapat Na Tung Mga Manggaranën (5:1-6)
5
Naa w̓a yang ipagprangkaw ra tung mga manggaranën.
Maskin maayën yang bëtang mi numaan,
kanugunamu ka ëngëd agyapun.
Bag̓ay ang pisan tung numyu ang mag̓intraamu ra ilëm tarangitën ang nunut da ka ta pag̓irisyakën mi ang yang kaalimbawaan mi,
maning pa tung kinaw̓utanamu rang lag̓i ta mga pinitinsia.
Ay kipurki siguradung dangatënamu ra ka ëngëd yang sintinsia yang Dios.
2 Bag̓ay ang pisan tia tung numyu ay kipurki yang tanan ang mga kamanggaran mi magkaralubuk da ka ilëm.
Katulad da ilëm asan tung mga aw̓ël ming atiang matitinlung klasing minumpuk da ilëm,
panganën da ka ilëm ta mga dayapdap.
3 Asta yang mga kuarta ming atiang nag̓atuw̓ud ming nag̓atuw̓ud ya ka,
madiadu ra ka ilëm.
Ig yang pagkadiadu yang mga manggad ming atia ya ray magyaring sasang pruibang ipatëmëng yang Dios tung numyung duruamug kaikaw.
Yang kaalimbawaan yang nag̓italuk ming atia maning pa tung sasang apuy ang ya ray ikadiadu mi tung uri.
Purisu yang pagtaralukun mi ta manggad ang tag̓isip ming ya ag̓ikaayënay mi numanyan,
tung uri ya ra ikalainay mi.
4 Tëëd mi,
yang suul yang mga manig̓ayëg tung katriguan mi ang ya ray binwinan ming dinaya tung nira maning pa tung pagkkëndalën da ta maknul.
Tag̓isip ming anda ray panuw̓alan mi asan?
Uay,
yang mga riklamu yang mga manig̓ayëg pinamati ra yang Dios ang makagag̓aëm.
5 Talagang pusawamu ra tung tanan ang kaayënan taa tung kaliw̓utan ang naa ang ya ra ka ilëm ay nag̓apagustuan mi.
Piru asan da nga pakbungay mi yang sasang baka ang nag̓ipatambëk da ang andang pisan ay laum-laum na kung unu pay nag̓iëlat tung anya.
6 Basin yang mga taung anday kasalanan nira,
ya ra ag̓idimandaay mi tung usgadung nag̓apëtëlan ta kasalanan ang para ipaimatay mi.
Ang pagkatapus yang mga taung atia,
indi ka ilëm makayang magdipindir yang mga sadili nirang magbatuk da rin tung numyu.
Nag̓apaktël Na Yang Mga Tumatalig Ang Indi Ka Mamagmataka Ta Pagpakbat Nira Tung Ipaglëkat Ni Ginuung Jesus (5:7-8)
7 Kapurisu ta numyung mga putulu tung ni Ginuu ta,
maskin papinitinsiaanamu ta duma,
magpaurayamu ra ilëm ang mag̓agwanta ang asta kaw̓utun da nganing yang uras ang ipaglëkat ni Ginuu tang Jesus.
Tëlëngan mi ra ilëm yang sasang tagluak ang pagpakbat tung kutitsya yang mga luak na ang yay nag̓alangkag na ta duru.
Indi ëngëd pagmataka ta pag̓ëlat tung uras ang atia.
Tung primiru yang ëlatan na ya ra yang primirung bugsu yang kuran ang para mapag̓aradu ra.
Asta yang kuran tung kauri-urian nag̓aëlatan na kang maglaka-laka ang ya ray pagpailala ang nag̓aalëngët-lëngët da yang tilig̓ayëg.
8 Purisu pati yamu ya ka,
indiamu ka magmataka ta pagpakbat.
Patëntënën mi yang mga isip mi ay kipurki yang uras ang ipaglëkat ni Ginuu ta,
nag̓aalëngët dang nag̓aalëngët.
Nag̓apaamaman Nang Indi Ëngëd Magbarasul-w̓asulan (5:9)
9 Mga putulu,
kung mapanawanamu ra nganing ta mga kaliwag̓an ubin pinitinsia,
indiamu ra ëngëd magbarasul-w̓asulan ug̓ud indiamu ka sintinsiaan yang Dios ang ya si kay ipagpakusalak na tung numyu.
Yay dapat ëngëd ang likayan mi ay kipurki yang ultimung manigsintinsia alëngët dang maglëkat.
Natëtëngëd Tung Matinlung Mulidung Dapat Ang Pasuaran Nira Natëtëngëd Tung Pag̓aragwantaën Tung Mga Pinitinsia (5:10-11)
10 Mga putulu,
padëmdëman mi yang mga manigpalatay yang bitala yang Dios atiing tukaw pang mga panimpu.
Yang pag̓aragwantaën nira tung mga pinitinsiang pinasaran nira ya ray durug tinlung mulidung usuyun mi.
11 Talagang yay matinlung buatën mi ay kipurki nag̓askëan ta ra kang lag̓i ang yang kumpurming nag̓agwanta tung mga kaliwag̓an ang pinasaran na ya ra ag̓aningay tang sasang pinasadya ëngëd yang Dios ang pinakaayën.
Katulad da ilëm duun tung ni maëpët ang Job.
Nagngël mi ra ka nganing natëtëngëd tung pag̓aragwantaën na atiing tukaw pang panimpua ig nag̓askëan mi ra ka kung unu pay linuaan na tung kauri-urian da sigun tung planu yang Dios tung anyab.
Ay tanya durung pisan agkainildawën tung yatën ang mga tau.
Nag̓apaamanan Na Tanirang Indi Ëngëd Manumpa (5:12)
12 Simanyan,
mga putulu,
yang ianingung naa,
ya ëngëd ay tandaan mi.
Kung unu pay ianing ta tung aruman tang tau,
indi ta ëngëd pagpanuntan ta panumpa.
Indiita manumpa tung tanëk may langit ubin tung unu pa man ang bag̓ayay.
Ang indi,
kung ëë,
ay ëë ra ilëm.
U kung indi man,
ay indi ra ilëm ug̓ud indiita ra pakusalakën yang Dios.
Nag̓ipagpasanag Na Kung Ya Pa Ag̓aring Magtaraw̓ang-taw̓angan Tanira Ëkël Tung Pag̓arampuan Nira (5:13-18)
13 May asan tung numyu kaya ang nag̓apasaran ta kaliwag̓an?
Kaministiran mag̓ampu tung Dios.
May asan ka kaya ang masadya yang kinaisipan na?
Magkabag̓ay ang magdayaw tung Dios ang magkanta.
14 May asan ka kaya ang paglaru?
Kaministiran ang magpaguuy tung pamagmaëpët-ëpët tung numyung sam pundaan ang mga tumatalig ang para tanya ipag̓ampu nira tung Dios ang nunut da ka ta pagpiid nira ta lana ta olibo sigun ka man tung katëngdanan ang ipinakdul ni Ginuung Jesus tung nira ang mamangërëngan tung anya.
15 Numanyan tung pag̓arampuën nira,
kung may pagtalig nira ang yang nag̓aingaluk nira tung Dios ipakdul na tung nira,
asan da magmaayën yang paglaru ay paktëlën da yang Dios ang papagmaayënën.
Dispuis kung alimbawa may mga kasalanan ang nagkarabuat na ang muya ya ray natëngëran yang masiit na,
punasën da ka dayun yang Dios.
16 Purisu mag̓araminanita rang lag̓i sasa may sasa yang anya-anyang kasalanan ang pagkatapus mag̓arampuanita ra ka dayun ug̓ud asanita ra nga pamaayënay yang Dios tung pag̓alaru ta.
Kipurki yang pag̓arampuën yang sasang taung pagbuat yang magkatama tung pagtërëlëngën na,
dakulung bag̓ay yang pakaw̓utun na.
17 Katulad da ilëm asan tung ni Elias atiing tukaw.
Maskin sasang tau ang pariu ka ilëm tung yatën,
piru atiing pag̓ampu na tung Dios ang tëdëk tung isip na ang indi na ra pakuranën yang banwa,
indi ka man nagkuran-kuran tung sëlëd tulung takun may tënga.
18 Utru si,
nag̓ampu si ka ang pagkatapus kuminuran da ka man yang kaliw̓utan.
Baklu ra namagturubuan yang mga luak tung tanëk.
Natëtëngëd Tung Dapat Ang Buatën Nira Tung Sasang Putul Nirang Natalang (5:19-20)
19 Mga putulu,
kung may asan tung numyung natalang dang nalipat tung kamatuuran,
ang pagkatapus may sasang putul nang magpaiwan-iwan tung anya ang para mapabalik na tung kamatuuran,
durung pisan agkatinlu yang pag̓abuat na.
20 Ay yang dëmdëmën mi,
kung tinu pay magpabalik tung sasang putul nang nagpakasalak ang para indi ra magpadayun tung nag̓atalangan na,
katimbang nang asan da ngaipalibriay na yang aruman na tung kalainan,
bilang tung pagpablag na ra rin tung Dios.
Maskin durung kasalanan ang nagkarabuat na,
punasën da yang Dios ang luw̓us.
Ya ra ilëm tia ay masulatu tung numyu,
Santiago