4
Piru ay pa w̓a?
Yamug pagsuruay!
Ta,
tung numyung pag̓intindi,
unu pa w̓asu ay natëngëran yang pagsuruay-suayan ming atia?
Bëlag ba natëtëngëd ang dërëëg̓ënamu pa yang sadiling kalëlyag̓an mi ang yay gustu ming papsawan?
2 Alimbawa,
may sasang durung kalëlyag ming maëklan,
piru indi mi ilëm maëklan.
Ya ray nag̓atëngëran na ang masilag̓amu ra ig may gustu mi rang mangimatay tung sasang masigkatau mi ang para maëklan mi ra yang nag̓aisipan mi.
Yang pag̓iriw̓ëg̓ën ming atia tung mga bag̓ay ang indi mi maëklan,
asan da maniël yang pagsuruayan ming ërëkëtan.
Piru ya pa ag̓aring maëklan mi atiang indi mi ka ag̓ingalukun tung Dios?
3 Ang pagkatapus,
maskin ingalukun mi,
indiamu kag pakdulan na ay nag̓askëan na ra kang lag̓i ang kung pakdulanamu ra anya,
bëlag ya gamitay mi tung uyun tung kalëlyag̓an na,
kung indi,
basta mapapsawamu ilëm.
4 Abaa yamu,
yang gëgma mi tung Dios nagrusaw ra ang katulad ka tung sasang baw̓ay ang paglimbung da tung kasawa na.
Ayw̓a,
indi mi pa ka ëngëd nag̓aintindian ang kung magpagamënamu yang mga isip mi tung sistimang pangkaliw̓utan,
asanamu ra magluang kasuay yang Dios?
Purisu kung tinu pay malëlyag ang magpagamën yang isip na tung sistimang atia,
asan da tanya magluang kasuay yang Dios.
5 Muya kalaum ming anday kapulutan na yang sasang napabtang tung kasulatan ang yang Dios unung nag̓imu tung yatën,
kung may pagamënan tang asan da magrusaw yang gëgma tang bug̓us pa rin tung anya,
tanya maning pa tung mangimun da tung yatën.
6 Piru maskin pang maning tia,
maktël ka ëngëd yang taw̓ang na tung yatën ang para maulikan da atiing gëgma ta tung anyang magbug̓us si.
Katulad da asan tung sasang pangaku na ang yang tau unung taw̓angan na ya ra yang taung mapinagparanëk.
Piru yang tau unung mapinalandawën,
ya ray kuntraën na ta mupia.
7 Purisu magparanëkamu ra tung Dios ang magpalamtuk yang pundu yang kinaisipan mi.
Piru manguntiëlamu ra ka dayun ta mupia tung aklës ni Satanas.
Atia,
palaksu ra kang paalawid tung numyu.
8 Magpalëngëtamu ra tung Dios.
Atia,
magpalëngët da ka tung numyu.
Yamung makinasalananën tabtaw̓ën mi ra yang mga ubra-ubra ming malalain tung pagtërëlëngën na.
Yamung pagtënakan yang isip mi,
pabilug̓un mi rang tumanën yang kalëlyag̓an yang Dios.
9 Yang dapat ang mëyang tung mga isip mi ya ra yang kapupungawën ming pagsug̓at natëtëngëd tung mga kasalanan mi.
Bilang yang pagtaralangkakën ming pagpakasadya asan dapat ang mapaklian da ta pagtarangitën ming pagsëëy.
10 Purisu magparanëkamu ra ka ëngëd tung Dios ang magsuku.
Atia,
saptënamu ra ka anyang ipaabwat.
Nag̓apaamanan Na Tanira Ang Indi Ëngëd Magliliw̓akan (4:11-12)
11 Mga putulu tung ni Ginuu ta,
indiita ëngëd magliliw̓akan.
Ay kipurki kung tinu pay magliw̓ak tung sasang putul na ang asan dang lag̓i nga pakusalakay na,
katimbang nang asan da ka nga sawayay na yang mga katuw̓ulan yang Dios ay asan da ka nga lamkuay nang maluw̓ay ang dumangat yang silut ang sinambit na.
Purisu kung yang mga katuw̓ulan yang Dios ya pay palangaasan tang lamkuën ta maning tia,
yang ilyag nang ianing,
bëlag̓anita ra manigtuman yang mga katuw̓ulan na,
kung indi,
asan da ipabtangay ta yang sadili ta ang sasang sintinsiadur!
12 Sam bilug ilëm yang nagpakdul yang mga katuw̓ulan ang atia ig tanya ilëm yang sintinsiadur.
Ultimu ilëm yang Dios yang may kagaëman ang magkalalangan natëtëngëd tung sasang tau kung tanya sintinsiaan nang ipalibri u kung tanya sintinsiaan na tung kalainan.
Ayw̓a,
unu pa pay pagpabëtang ta tung mga sadili ta ang ita pay magtiwakaw tung anyang magsintinsia tung sasang masigkatau ta?
Nag̓apaamanan Na Yang Pamagnigusyu Ang Masyadung Pamaniguru (4:13-17)
13 Naa w̓a yang sasang dapat ang tandaan mi ang kumpurming maning taa yang nag̓ipag̓aning na tung mga aruman na:
“Numaan ang kaldaw ang naa ubin andamal,
magdistinuami ra duun tung siudad.
Duunami ra magtinir ang magnigusyu ta sëlëd san takun.
Talagang durung kuartang maita yamën duun.”
14 Abaa yang numyung atia,
indi mi ilëm ngani nag̓asiguru kung unu pay mabtangan mi andamal.
Kipurki yang kalayunan ta,
maning pa tung sasang ambun ang simanyan yag dawalay ta,
ang pagkatapus,
buay-w̓uay ilëm ta gësyë,
magpuruwas da ilëm.
15 Ang indi,
maning taa yang dapat ang ianing mi:
“Kung kalëlyag̓an yang Dios ang paabwatën na pa yang mga kabui yamën,
maning taa maning duun yang buatën yamën.”
16 Piru ay pa w̓a?
Maning da tiang paniguruamu rang lag̓ing pagpaambug tung mga sadili mi kung unu pay pakaw̓utun yang pagkabëtang mi!
Yang tanan ang pagparaambug̓un ta maning tia durung pisan agkalain tung pagtëlëng yang Dios.
17 Ig disir,
kung tinu pay nag̓askë ra yang magkatama ang yay dapat ang buatën na ang pagkatapus indi na buatën,
ya ray idata yang Dios tung anyang kasalanan na.