Natëtëngëd Tung Paggaramitën Ta Tung Dilak Ta (3:1-12)
3
Mga putulu,
maayën pang bëlag̓anamu dakëlëng mag̓ing mga manigtulduk yang bitala yang Dios.
Ay nag̓askëan mi ra ka ang yaming mga manigtulduk,
kung insapuanami ra nganing ni Ginuu ta,
mas maigpit yang panginsapu na tung yamën kay tung kadaklan ang pamamati ilëm tung yamën.
2 Yang panginsapu nang atia ya ray dapat ang pangamanan tang tanan ay maskin tinu pa tung yatën,
manigtulduk kag bëlag,
malpës kang lag̓i ilëm nganing ang mapagbuatita ta kamali.
Kung tinu pay indi pagkamali tung pamitala na,
asan da ta taung pagtëg̓asan da tung pagtaralig̓ën na.
Maskë rang magsuspindi tung intirung pagkatau na.
3 Katulad da ilëm asan tung sasang kabayu.
Kung taknan ta ra nganing ta busal yang nganga na ang para masaayan ta,
pati yang intirung tinanguni na maparumbu ta ra kung ay pay gustu tang paangayan na.
4 Isipën mi ra ilëm yang sasang gulita.
Maskin dakulu,
nag̓ipalaksu nganing ta palët ang durug këtël,
piru kayanan ta timun ang kagëtëy ka ilëm ang bira-biraën ang kumpurming ay pay gustu yang timunil ang rumbuën.
5 Yang pisan yang kaalimbawaan yang dilak ta.
Basin gësyë ilëm,
piru dakulung bag̓ay yang nag̓abuat na.
Tëlëngan mi ra ilëm yang apuy.
Maskin alikasu ilëm,
piru kayanan nang palalaw̓an yang intirung talun!
6 Yang pisan yang kaalimbawaan yang dilak ta,
distrusadu pa tung sasang apuy.
May sari-saring mga malalain ang puiding bitalaën ta.
Makamamansa tung intirung pagkatau ta ig makararangga ka tung pagnurunutan ta yang mga masigkatau ta.
Maning pa tung apuy ang nag̓akayaw̓an ta mupia ni Satanas.
7 Maayën pa yang dumang inimu yang Dios ang sari-saring klasi.
Maskin unu pang klasiay,
mag̓ing dayamdam man,
mag̓ing lamlam man,
mag̓ing iraw man,
mag̓ing ian man tung tëëb,
yang tanan ang atia nag̓akayanan ta taung nag̓apaalam disti pa tung primiru ang asta ra simanyan.
8 Piru yang dilak tang mga tau,
andang pisan ay taung makayang mapaalam kung tung sadili na ilëm.
Ay sasang malain ang indi ëngëd makuntrul.
Yang kaalimbawaan na punuk ang pisan ta dalit ang mapatayan ta tau.
9 Ya kay nag̓agamit tang pagdayaw tung Ampuan tang Dios ang ya ray nagyaring Ama ta,
ang pagkatapus ya pa kay gamitën tang magpamirisia tung sasang masigkatau ta ang ya pa ka man ay inimu yang Dios ang ipinatulut-tulut tung sadili na mismu.
10 Bilang sa nga ngangaan ilëm yang panliitan yang pagdarayawën ta tung Dios may yang pagpamirisia ta tung mga aruman ta.
Mga putulu,
indi ka ëngëd magkabag̓ay tia.
11 Ayw̓a w̓asu,
may sungkuk ta wai ang pariung masabur may mapakit yang nag̓ibëëk na?
12 Simpri,
mga putulu,
yang sasang ayung igus bëlag̓an natural nang mamurak ta olibo.
Pati yang sasang balag̓ën ang ubas bëlag̓an kang natural nang mamurak ta igus.
Asta yang waing makasa-kasa bëlag̓an natural nang may wai kang masabur yang ipalua na.
Intunsis dapat da rin ang bëlag̓an tëlyang-tëlyang yang magbitalaën ta,
kung indi,
purus limpiu.
Nag̓apagpasunaid Na Yang Duruang Klasing Pagkamataku (3:13–4:10)
13 Tinu pang tauay asan tung numyung nag̓aintindian ming mataku ig maskëng mag̓intindi?
Kaministiran ang ya ray papruibaan na tung mga pasais nang matitinlu ang maskin unu pay buatën na,
ëklan na tung ug̓ali nang mapinagparanëk ig tung isip nang mawayang.
14 Piru kung nag̓aëyanganamu ra ta ipag̓akig mi tung mga aruman ming mga manigtulduk ig pagkaralawanamu ra ta dëngëg,
maayën pang indiamu ra ilëm magpabug̓al ang yamu mataku.
Ay muya tung pagbukli ming atia asan da nga rëgmëkay mi yang kamatuuran ang nag̓itulduk mi ra rin tung duma.
15 Kipurki yang pagkamatakung maning tia,
bëlag̓an paëyang yang Dios,
kung indi,
pangkaliw̓utanën ka ilëm ang ya kang lag̓i ay nag̓ausuy yang mga tau ang yang mga kinaisipan nira indi pa nag̓aimaklu yang Espiritu Santo ig ya kay nag̓ipaisip yang mga dimunyu tung nira.
16 Talagang matuud tia ay kipurki kung ay pay sam pundaan ang may pag̓arakig̓akig̓an ig pagkaralawan ta dëngëg,
asan da ta pagkagulu yang pagpurutulan nira pati yang maskin unu pang ubra-ubraay ang malain ya ray maita tung nira.
17 Piru yang pagkamatakung nag̓ipaëyang yang Dios tung yatën maning taa yang pasais na.
Landaw tung tanan yang pagkabilug yang isip ta tung anya ang indi magtënakan.
Asan da maniël yang kadaklan ang mga pasais tang nag̓auyunan nang maning taa.
Asan da ta pagsikad ta ang ita pirming mag̓uruyunan yang mga kaarumanan ta,
asan da ka ta pagkaamumu tang bëlag̓anita ka maliwag ang pakigkësënan.
Dispuis duruita kag kainildawën tung mga aruman ta ig duru kang mga ubra-ubrang mapalua ta ang ikaayën nira.
Dispuis pa,
kung natëtëngëd tung pagsarapëtën ta tung mga aruman ta,
pantay-pantay ilëm ang anday pinilikan ig alawid tung yatën yang pagpakaayën-ayën ilëm.
18 Padëmdëman ta ra kanay yang sasang bitala ta mga mamaëpët ang kung gustu ta unung magpalua yang magkatama tung pagtërëlëngën yang Dios,
tay puis yang maning pa tung dapat unung iluak ta ang ita unu pirming magsikad ang mag̓uruyunanitang magpurutul tung matinlu.
Ig yang pasais ta unung magluak ta maning tia,
pirmi unu duun ipapanaway ta tung kinaisipan tang mauray.