Yang Isinulat Tung Mga HEBREO
Patkaw Ang Pasanag Tung Kumpurming Magbasa
Indi ta maskëan kung tinu pay nagsulat yang sulat ang naa. Piru nailala ra kang lag̓i yang mga tumatalig ang pinaëklan na (13:19). Yang sarang ang maskëan ta natëtëngëd tung anyang nagsulat, tanya sasang may katëngdanan nang ipiniar ni Ginuung Jesu-Cristo tung anya. Kag yadwa pa, tanya sag̓ad dang pisan tung kasulatan ang naggug̓uuyan ang Dating Ipinagpakigpaig̓u, ay yang kadaklan ang nagkaraulit na duun ngaëklay na.
Yang mga tumatalig ang pinaëklan na, sam pundaan ang pulus mga Judio yang nasyun nira. Yang dumang pangguuy tung nasyun nira atii kanay, mga Hebreo. Kumus namampablag da tanira ta pag̓irintindiën tung kadaklan ang mga masigkanasyun nira, nag̓adëëg-dëëg̓an da tanira ta mupiang pag̓apakdulan ta mga kaliwag̓an ang malëlbat (10:32-34). Ay nag̓atag̓amanan da yang mga masigkanasyun nirang nag̓arërëgës ang pabalikën tung dating pagturuuën nira ang usuy tung mga katuw̓ulan ang isinulat ni Moises atiing tukaw. Purisu yang dumang mga tumatalig, pamanluw̓ay ra ig may pira pang bilug tung nira ang nag̓aisip dang mamlëk da tung pagtaralig̓ën nira tung ni Ginuung Jesus ang para magbalik da tung dating nag̓apgësan yang nasyun nira, bilang yang Dating Ipinagpakigpaig̓u yang Dios tung nasyun nira. Purisu ya ray natëngëran na ang yang sasang pagpadag̓ën-dag̓ën ang naa tung nira, naisip dang magpaëkël ta sulat tung nira ug̓ud tag̓aman nang pasanag̓an ta mupia natëtëngëd tung Baklung Ipinagpakigpaig̓u yang Dios ang pinalg̓uran da nira ang durung nalandawan na tung Dating Ipinagpakigpaig̓u na. Pinanuntan na pa nganing ta mga paaman kung unu pay dangatën nirang malain kung buatën da ka ëngëd nira yang nag̓aisip nirang magbalik tung dati. Taa tung “Kamtangan Yang Sulat” nga sagyapay ta yang mga paaman ang atiang limang bilug.
Yang Kamtangan Yang Sulat Ang Binulus-bulus:
1:1-3 Ti Jesus Yay Pangultimung Nagpabunayag Natëtëngëd Tung Pagkadios Yang Dios May Tung Tanan Ang Planu Na
1:4-14 Ti Jesus Landaw Tung Mga Angil
2:1-4 Primirung Paaman: Kung baliwalaën da ilëm nira yang kalibrian ang pinagtukud ni Jesus, sintinsiaan da ka ëngëd yang Dios tung kalainan
2:5-18 Natëtëngëd Tung Pagkatau Ni Jesus Ang Yay Nangërëngan Tung Yatën Ang Para Bawiën Na Yang Dating Kagaëman Tang Naplëk Tung Yatën
3:1–4:13 Yadwang Paaman: Mamangaman ta mupia nusias may maëyangan da ka ta isip nirang diskumpiadu (3:12) ang asta indi ra ilëm mangalg̓ud tung sasang pag̓inëtëg̓an da rin ta mga isip nira ang katulad ka tung nalambëg̓an yang mga kinaampu nira atiing tukaw (4:1, 11)
4:14–7:28 Kung Unu Pay Nalandawan Yang Pagkapari Ni Jesus Kay Tung Pagkapari Yang Dating Mga Paring Mga Judio
6:4-6 Yaklung Paaman: Kung magdayun da ka ëngëd ang mamalpas tung ni Jesus, indi ra ka ëngëd maimung mangimaklu pa yang mga isip nirang para mapagsug̓at si ka rin ang uman
8:1–9:28 Kung Unu Pay Nalandawan Yang Baklung Ipinagpakigpaig̓u yang Dios Ang Pinagpundar Ni Jesus
10:1-25 Kung Unu Pay Nalandawan Yang Pagpaturuk Ni Jesus Yang Dug̓u Na Kay Tung Dug̓u Yang Mga Ayëp Ang Nag̓idasag
10:26-31 Yaëpat Dang Paaman: Kung talyuran da nira yang Baklung Ipinagpakigpaig̓u ang pinagtukud ni Jesus ang para magbalik da tung Dating Ipinagpakigpaig̓u, indi ra ëngëd patawarën yang Dios, kung indi, sintinsiaan na tung kalainan ang anday katapus-tapusan na
10:32-39 Sasang Pagpaktël Na Tung Isip Nirang Indi Ra Ëngëd Magpatalaw Ang Asta Mamlëk Da Ilëm Tung Pagtaralig̓ën Nira Tung Ni Jesus, Kung Indi, Ya Padayunay Nira Ang Para Asan Da NGa Siguruay Nira Yang Kalibrian Nira
11:1-40 Nag̓ipadëmdëm Na Kung Unu Pag Kabakëd Yang Pagtaralig̓ën Yang Mga Duma-rumang Kinaampu Nira Tung Dios Atiing Tukaw Ang Ya Ray Kaministiran Nirang Pausuyan Maskin Unu Pag Lëbat Yang Mapasaran Nira
12:1-13 Kaministiran Ang Indi Ra Mamagpaluw̓ay, Kung Indi, Mamagpadayun Da Ka Ëngëd Tung Pagtaralig̓ën Nira Tung Ni Jesus Ang Yay Maning Pa Tung Sasang Karira Ang Maglaksuën Nira
12:14-29 Yalimang Paaman: Dapat ang mamag̓amlig ang indi ra ëngëd mamagpabëngël tung nag̓ipagpasanag yang Dios tung nira natëtëngëd tung ni Jesu-Cristo may tung kalibrian ang pinagtukud na
13:1-19 Yang Mga Impurtanting Mga Bag̓ay Ang Dapat Ang Tumanën Nira
13:20-21 Yang Pangultimung Nag̓ipag̓ampu Na Para Tung Nira
13:22-25 Yang Pagtapusan Yang Sulat