Yang Isinulat Tung Mga HEBREO
Yang Intrada Yang Sulat: Nag̓apabilug̓an Yang Pag̓aningën Ang Ana Yang Dios (1:1-3)
1
Tung nagdarasun-dasun ang mga panimpu atiing tukaw pa ig tung sari-sari kang palaksu na nagbitala ra yang Dios tung mga kinaampu ta atiing tukaw ëkël tung mga manigpalatay ang pinamilik na.
2 Piru numanyan tung panimpu tang naang panguri,
nagbitala si ka tung yatën ëkël tung pag̓aningën nang Ana Na.
Ya ra kang lag̓i ay pinagpiaran na ang yang tanan ang bag̓ay tanya ray may anya tung uri ta kaldaw ig atiing primiru,
tung anya kang lag̓i ipinaimu nang luw̓us.
3 Tanya kay nagpailala kung unu pay kantidad yang pagkadios yang Dios ay tung anya ilëm nga bilug̓ay yang pagkadios yang Dios.
Ëkël tung kalalangan nang maktël,
tanya kay pag̓ërëkëlën tung tanan ang bag̓ay ang para mangasalapay ra ka ëngëd tung pinalanuan kang lag̓i yang Dios ang yay masalapayan nira.
Tanya kay nagtukud yang sasang patakaran ang puiding asan da nga punasay yang mga tau tung mga kasalanan nira.
Kumus natukud na ra tia,
nakarung da tung tëpad ang pisan yang Dios ang makagag̓aëm ang ampir ka pa man tung tuu na duun tung kaabwat-abwatan ang simanyan kasiraan da ka tanirang pamaggaraëmën.
Natëtëngëd Tung Kalandawan Yang Pag̓aningën Ang Ana Na Tung Mga Angil (1:4-14)
4 Purisu asan da ngaintindiay ta ang tanya mas landaw tung mga angil gatëd nagkatinir da ta kadëngëg̓an nang mas abwat kay tung niraa.
5 Kipurki tëlëngan mi.
Anda ëngëd ang pisan ay angil may sam bilug ang pinag̓aning yang Dios ta maning taa:
“Yaway pag̓aningënung anaw.
Numaan ang kaldaw ang naa,
yuu ray nagpasintar tung nuyung maggaraëmëna ra ug̓ud yang paggaraëmën mu tung nasyun ang naa ya kay paggaraëmënu.
Yang kaalimbawaan na maning pa tung inanaa ra yëën,”
ag̓aaningb.
Bëlag̓an ka natëtëngëd tung sasang angil yang inaning yang Dios ang sam bilug ang mag̓aning,
“Yuu ray mag̓ing maning pa tung Ama nang pagpakigsasa tung anya,
ig tanya ray mag̓ing maning pa tung anaw ang panangëd tung yëën,”
ag̓aaningc.
6 Kung indi,
atiing pagpabalik na tung anya duun tung kaliw̓utan ang panlangitd,
linalangan na yang tanan ang mga angil na ang,
“Magluuramu rang magtuu tung anya,”
mag̓aning.
7 Kung natëtëngëd ka man tung mga angil na,
maning taa yang napabtang tung kasulatan:
“Yang mga angil nang nag̓apanuw̓ul na pag̓uman-uman yang mga pagkabëtang nira.
Ang kaisan ya ray buw̓uatën nang pariu tung palët,
ang kaisan,
ipapariu na ra tung apuy ang pagsiklab,”
ag̓aaninge.
8 Piru maning taa yang inaning na tung pag̓aningën nang Ana Na:
“Ginuung Dios,
yang paggaraëmën mu dumayun ang asta tung sampang anda ëngëd ang pisan ay katapus-tapusan na.
Durung pisan agkatadlëng yang paggaraëmën mu tung mga kinasakpan mu.
9 Yang pag̓urubraën ang magkatama yay nag̓apakumaal mu,
yang malalain yay nag̓alawayan mu.
Kapurisu ya ray natëngëran na ang ta yëën ang yay Dios ang nag̓apanirbian mu,
pinatëmëngana ra yëën ang magkarung tung puistu.
Pinakdulana ra nganing yëën ta kadëngëg̓an mung landaw ang pisan kay tung duma ang ya ra kay ikasadya mu ta duru,”
ag̓aaningf.
10 Dispuis pa,
may sam bilug pang inaning na tung pag̓aningën nang “Ana Na” ang maning taa,
“Ginuu,
atii pa tung pinag̓impisaan,
yaway nag̓imu yang katanëkan.
Pati yang kalangitan,
yawa mismu yang may kabuat-buatan.
11 Ang pagkatapus may uras ang kaw̓utun ang tanira indi ra maitang uman.
Piru ta yawa,
yaway magnatis ang asta tung sampa.
Tanirang tanan lumag̓i-lag̓i ra ang maning pa tung aw̓ël.
12 Yang langit tanya manulad da ilëm tung kuklun ang kung lag̓i-lag̓i ra nganing,
ya ra ilëm agpurun-purunay ang iplëk.
Paklian da ta baklu ang katulad ka tung aw̓ël ang indi pa nag̓agamit.
Piru ta yawa,
maskin pira-pira pang takun ang mag̓ërëslëw̓-ëslëb,
unaynay ra ka ëngëd yang kabui mung anda ra ka ëngëd ang pisan ay pagtapusan na,”
ag̓aaningg.
13 Kidispuis pa,
andang pisan ay angil may sam bilug ang pinag̓aning yang Dios ta maning taa:
“Tania kumarung tung tëparung ampir tung tuuu ug̓ud magkasiraanita rang maggaraëmën ang asta luw̓us dang mapabtangu tung lilikdan yang kakay mu yang tanan ang pamagpasuag tung nuyu,”
ag̓aaningh.
14 Buinu,
kung papagbilug̓unu ra yang gustuung ianing natëtëngëd tung mga angil kung unu pay kapulutan nira,
tanirang tanan pamanirbian tung Dios.
Yay pirming nag̓apanuw̓ul nang magtaw̓ang tung kumpurming tinu pay tapnayën na.