Ti Filemon ang naang pinaëklan ni Pablo yang sulat ang naa sasa kang tumatalig ang manggaranën duun tung lansangan yang Colosas. Yang balay na, yay pagsaragpunan yang mga tumatalig ang sam pundaan duun. May sasang kirëpën nang nag̓aranan tung ni Onesimo ang ya ray nanakaw tung anya (18) ang pagkatapus nagpatakras da. Atii kanay tung batas yang gubirnu, kung may kirëpën ang manakaw tung ag̓alën na, dapat ang imatayën. Numanyan tung pagtakras ni Onesimo, nakaw̓ut da duun tung siudad yang Roma ang nagkatuun tung uras ang atiing ti Pablo nag̓aditini pa duun. Indi ta ilëm maskëan kung ya pa ag̓aring nagbag̓at tanira ni Pablo. Maskëan ta ilëm ang natëtëngëd tung pagpasanag ni Pablo tung anya, ti Onesimo nagsuku ra yang sadili nang nagtalig tung ni Ginuung Jesu-Cristong nagpatapnay (10). Pagkatapus naglua rang durug katinaw̓angën tung ni Pablo. Purisu gustu rin ni Pablong awiran na, piru kumus anday gustu nang manlëpës tung ni Filemon ang yay may kirëpën, naisip nang mas matinlu ang ipabalik na ra ilëm tung ag̓alën na (13-14). Purisu ya ra kay ipinagpasulat na yang sulat ang naa ug̓ud ingalukan na ti Filemon ang magpatawad da tung ni Onesimo. Iningaluk na ka tung anyang indi na ra ipabëtang ti Onesimo ang sasang kirëpën na ra ilëm, kung indi, kaw̓ig̓ën na ra kang sasang putul na natëtëngëd pariu ra tanirang pagtalig tung ni Ginuung Jesu-Cristo.

Ang para maëklan ni Pablo yang isip ni Filemon ang para risibiën na ra ti Onesimo, durug tinlu yang pamëtang-bëtang na ta bitala tung sulat ang naa. Baklu ra sambitay na yang aran yang kirëpën ni Filemon (10), nagpasalamat da kanay tung Dios natëtëngëd tung pagtalig ni Filemon may tung gëgma na tung mga kaputulan ig pinanuntan na ka ta ipag̓ampu na para tung anya (4-7). Indi ra nagkalalangan tung anya sigun tung pagkaapustul na, kung indi, nagpakigkësën da ilëm ta matinlu tung anya (8-10). Pagkatapus binadbaran na ra ta maayën yang isip ni Filemon ug̓ud kung may pagsangkëlan na pa sigun tung tinakaw ni Onesimo tung anya, makuat da tung isip na (11-19). Pagkatapus yang gustu nang ingalukun tung ni Filemon, asan da ipapanaway na tung may kaministiran nang palinaynayan da ni Filemon yang isip nang aburidu natëtëngëd tung ni Onesimo (20-21). Purisu unu duru unug dakul yang kumpiansa ni Pablo tung ni Filemon ang magpauyun da.

Yang sulat ang naa, nagkadëngan ang ipinaëkël na tung isinulat na tung sam pundaan duun tung Colosas. Ay ti Onesimo, ipinanunut na ra ilëm tung ni Tikikong yay pinapag̓ëkël na yang sulat ang atia (Colosas 4:9).