Ti Titong naa, sasang bëlag̓an Judiong nagtalig tung ni Jesu-Cristo ëkël tung pagpadag̓ën-dag̓ën ni Pablo. Tanya sasang tinalig̓an ni Pablo ig durug kadërëp tung kumpurming unu pay ipiniar na tung anya. Pinanunut nganing ni Pablo atiing pag̓angay nira ni Bernabe duun tung Jerusalem ang para mag̓urunta-untaan tanira yang pamagmangulu tung sam pundaan duun natëtëngëd tung sasang prublima (2:1-5; Mga Binuat-buatan 15:1-2; Galacia 2:1-4). Tanya kay tinuw̓ul ni Pablong magkunsiu tung sam pundaan yang mga tumatalig duun tung Corinto natëtëngëd tung pagkulikta nira yang kuartang itaw̓ang tung mga tumatalig duun tung Jerusalem (2 Corinto 8:6, 16-17, 23). Dispuis tanya kay nagkërëng tung ni Pablo ang tanya sasang matuud ang apustul. Yang pinakaw̓ut na, asan ngaulikay yang pagtërëlëngën nira tung ni Pablo (2 Cor. 7:5-7). Tung pira pang takun, nagtaw̓ang da ka tung ni Pablong nagparakaw̓utun duun tung Creta. Duun da ka nga butwanay na ang para panadlëngën na yang kumpurming kaministiran ang tadlëngën. Kag yadwa pa ang para magpamilik da ka ta mga mamag̓maëpët-ëpët ang kada sam pundaan duun tung pulung atii. Bilang ti Tito piniaran ni Pablong mangërëngan tung anya duun.

Atiing pagpasulat ni Pablo yang sulat ang naa, makapupungaw yang nag̓ainabung kada sam pundaan. Duru rang nagturuldukanën ta bëlag matuud ang duun da nga patalangay nira yang dumang mga tumatalig (1:10-11). Dispuis pa, kumus anda pay napilik ang mamagmaëpët-ëpët, anda pay mapagpasanag tung mga tumatalig natëtëngëd tung tamang nag̓itulduk (1:9). Purisu isinulat ni Pablo yang sulat ang naa ang para asan da ngaintindiay ni Tito kung ya pa ag̓aring maanluyan na yang mga prublimang mga maning tia.

May tulung bag̓ay ang pinabilug̓an ni Pablo tung sulat ang naa: (1) Ipinaintindi na tung ni Tito kung unu pay mga impurtanting pitik ang gamitën nang magpamilik ta mga mamagmaëpët-ëpët ang kada sam pundaan (1:5-9). Durug kaimpurtanti ang yang mga taung pamilikën na, magkatunu yang mga ug̓ali nira tung mga pitik ang atiang sinambit na ay kipurki duru ra ka man ang pamagtulduk ta bëlag̓an tama ig malaway yang mga ubra-ubra nira. (2) Ipinaintindi na ka tung anya yang tamang itulduk na tung mga kinalasi-klasi yang mga tumatalig duun, mag̓ing mga mamaëpët ang mga lalii, mag̓ing mga mamaëpët ang mga baw̓ay, mag̓ing mga sinultirus, mag̓ing mga kirëpën (2:1-10). Pagkatapus ipinadëmdëm na ka dayun tung ni Tito kung unu pay kantidad yang kanëëman ang ipinagpaita yang Dios tung mga tumatalig ang para asan da tanira ngaëyangay ta nag̓ipagpadërëp nirang magtuman yang mga kalëlyag̓an na (2:11-14). (3) Ipinasanag na ra ka tung anya kung unu pang klasiay ta pagpangabui ang dapat maita tung mga tumatalig (3:1-8). Sinambit na si yang natëtëngëd tung kanëëman yang Dios ang durung pisan agkabëw̓ërëng ang yay pinatiëlan yang Dios ang nagtapnay tung nira. Gustu ni Pablo ang yang kanëëman yang Dios ang atiang durug katinlu, ya ra ëngëd ay pabilug̓an ni Titong iwaswas ta maayën yang katuyuan na tung mga tumatalig duun ug̓ud asan da tanira ngaëyangay ta ipagpadërëp nirang pirming mag̓intindi tung pagburuatën nira yang kumpurming ikaayën yang mga masigkatau nira. Pinaaman na kang likayan ni Tito yang mga diskusiun ig kung unu pay matinlung buatën tung sasang taung may gustu nang bëlakën na yang sam pundaan (3:9-11).